Read Хуыцауы Дзырд иронау Левит 10 Bible Online

Левит 10 - Хуыцауы Дзырд иронау bible

Левит 10

¹Аароны фырттӕ Надав ӕмӕ Авигу сӕ будсудзӕнтӕ райстой, нывӕрдтой дзы судзгӕ ӕвзалытӕ ӕмӕ буд, ӕмӕ Дунедарӕджы размӕ нӕфӕтчиаг зынг бахастой, афтӕмӕй сын уый ахӕмӕй ницы бафӕдзӕхста.

²Уӕд Дунедарӕджы цурӕй рацыди арт ӕмӕ сӕ басыгъта — Дунедарӕджы раз бабын сты сӕ дыууӕ дӕр.

³Моисей Ааронӕн загъта: «Гъе уымӕн дзырдта Дунедарӕг: „Мӕ разы чи лӕууы, уыдоныл Ӕз равдисдзынӕн, уаз кӕй дӕн, уый, мӕ кад ӕппӕт адӕмы раз равдисдзынӕн“». Аарон хъусӕй лӕууыд.

⁴Моисей фӕдзырдта Аароны фыды ’фсымӕр Уззиелы фырттӕм, Мишаел ӕмӕ Елцафанмӕ. Загъта сын: «Рацӕут ӕмӕ уӕ хӕстӕджыты мӕрдтӕ Уаз Цӕрӕнӕй рӕсӕнуаты ӕддемӕ ахӕссут».

⁵Уыдон сын сӕ дарӕстыл ныххӕцыдысты ӕмӕ сӕ рӕсӕнуатӕй ӕддӕмӕ рахастой, Моисей сын куыд бафӕдзӕхста, афтӕ.

⁶Моисей загъта Аарон ӕмӕ йӕ фырттӕн, Елеазар ӕмӕ Итамарӕн: «Уӕ сӕрыхъуынтӕ ма райхалут ӕмӕ уӕ дарӕстӕ фӕйнӕрдӕм ма арӕдувут, цӕмӕй ма амӕлат ӕмӕ Дунедарӕг ӕппӕт адӕммӕ дӕр ма смӕсты уа. Фӕлӕ уе ’рвадӕлтӕ, ӕппӕт Израил, кӕуӕнт, Дунедарӕг кӕй басыгъта, уыдоныл.

⁷Сымах та Фембӕлды Цатыры къӕсӕрӕй ма ахизут, науӕд амӕлдзыстут, уымӕн ӕмӕ сӕрст ӕрцыдыстут, цӕмӕй суат Дунедарӕджы сауджынтӕ». Ӕмӕ бакодтой, Моисей куыд загъта, афтӕ.

⁸Дунедарӕг Ааронӕн бафӕдзӕхста:

⁹«Фембӕлды Цатырмӕ цӕугӕйӕ, дӕхӕдӕг дӕр ӕмӕ дӕ байзӕддаг дӕр сӕн ӕмӕ карз нозт ма нуазут, науӕд амӕлдзыстут. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ.

¹⁰Кӕрӕдзийӕ хицӕн кӕнут уаз ӕмӕ хуымӕтӕг, ӕнӕсыгъдӕг ӕмӕ сыгъдӕг,

¹¹ӕмӕ израилӕгтӕн амонут, Дунедарӕг сын Моисейы уылты цы уагӕвӕрдтӕ радта, уыдон».

¹²Моисей загъта Аарон ӕмӕ йӕ фырттӕн, Елеазар ӕмӕ Итамарӕн: «Райсут, Дунедарӕджы номыл хаст хуынтӕй цы ссад баззади, уый, скӕнут дзы донгонд дзултӕ ӕмӕ сӕ нывондхӕссӕны цур бахӕрут — уыдон сты иууылсыгъдӕг.

¹³Бахӕрут сӕ уаз бынаты, уымӕн ӕмӕ Дунедарӕджы номыл хаст хуынтӕй уыдон сты дӕу ӕмӕ дӕ фыртты хай. Афтӕ мын бафӕдзӕхстӕуыд.

¹⁴Хӕрдмӕисгӕ кӕразимаг ӕмӕ хуыны сгуы та бахӕрут сыгъдӕг ран, дӕхӕдӕг дӕр, стӕй дӕ фырттӕ ӕмӕ дӕ чызджытӕ дӕр, уымӕн ӕмӕ уыдон израилӕгты фидыды нывӕндтӕй дӕу ӕмӕ дӕ байзӕддӕгты хай сты.

¹⁵Нывӕндты фиутимӕ-иу лӕварӕн ӕрбахӕссӕнт сгуы ӕмӕ кӕразимаг, цӕмӕй сӕ ды Дунедарӕджы раз хӕрдмӕ сисай. Уыдон дӕуӕн ӕмӕ дӕ байзӕддӕгтӕн сты мыггагмӕйы хай, Дунедарӕг куыд бафӕдзӕхста, афтӕ».

¹⁶Моисей бафарста, тӕригъӕды нывондӕн кӕй ӕрхастой, уыцы цӕу кӕм ис, зӕгъгӕ, ӕмӕ базыдта, ныридӕгӕн сыгъд кӕй ӕрцыди, уый. Моисей смӕсты ис Елеазар ӕмӕ Итамармӕ, Аароны фырттӕй ма удӕгасӕй чи баззади, уыдонмӕ. Загъта сын:

¹⁷«Тӕригъӕды нывонды фыд уаз бынаты цӕуылнӕ бахордтат? Иууылсыгъдӕг у уый, ӕмӕ уын лӕвӕрд ӕрцыд, цӕмӕй Дунедарӕджы раз адӕмы тӕригъӕд ныббарыны ӕгъдау сӕххӕст кӕнат, ӕмӕ сын афтӕмӕй сӕ азым сисат.

¹⁸Кӕд ацы нывонды туг Уаз Цӕрӕнмӕ нӕ бахастат, уӕд ын йӕ дзидза хъуамӕ бахордтаиккат уаз бынаты, ӕз уын куыд бафӕдзӕхстон, афтӕ».

¹⁹Аарон Моисейӕн дзуапп радта: «Абон Дунедарӕджы раз ӕрхастам тӕригъӕды нывонд ӕмӕ иууылсудзинаг нывонд, фӕлӕ ныл цы ’рцыди, уый ӕрцыд. Ӕмӕ ацы бон тӕригъӕды нывондӕй куы бахордтаин, уӕд уый, ау, Дунедарӕгмӕ хорз фӕкастаид?»

²⁰Моисей уыцы ныхӕстӕ куы фехъуыста, уӕд сразы ис.