Read Хуыцауы Дзырд иронау Левит 27 Bible Online

Левит 27 - Хуыцауы Дзырд иронау bible

Левит 27

¹Дунедарӕг Моисейӕн загъта:

²«Фехъусын кӕн израилӕгтӕн: исчи Дунедарӕгӕн адӕймаджы снывонд кӕнынӕй куы расомы кӕна ӕмӕ йӕ, уыцы адӕймагӕн йӕ аргъ цас у, уый бӕрц бафидын куы хъӕуа,

³уӕд ссӕдз азӕй ӕртиссӕдз азы онг нӕлгоймагӕн йӕ аргъ уӕд дӕс ӕмӕ дыууиссӕдз ӕвзист шекелы, кувӕндоны шекелтӕй нымайгӕйӕ.

⁴Кӕд сылгоймаг у, уӕд та — дӕс ӕмӕ ссӕдз шекелы.

⁵Фондз азӕй ссӕдз азы онг нӕлгоймагӕн йӕ аргъ уӕд ссӕдз шекелы, сылгоймагӕн та — дӕс шекелы.

⁶Мӕйдзыдӕй фондз азы онг лӕппуйӕн йӕ аргъ уӕд фондз шекелы, чызгӕн та — ӕртӕ шекелы.

⁷Ӕртиссӕдз азӕй уӕлӕмӕ цы нӕлгоймагыл цӕуы, уымӕн йӕ аргъ — фынддӕс шекелы, сылгоймагӕн та — дӕс шекелы.

⁸Кӕд ӕмӕ, сомы чи ракодта, уый мӕгуыр у ӕмӕ нысангонд аргъ йӕ бон бафидын нӕу, уӕд ӕй сауджынмӕ ӕрбакӕнын хъӕуы, цӕмӕй сауджын, цы йӕм ис, уымӕ гӕсгӕ аскъуыддзаг кӕна, цас ын фидгӕ у, уый.

⁹Исчи Дунедарӕгӕн фос нывондӕн ӕрхӕссынӕй куы расомы кӕна, уӕд уыцы фос, Дунедарӕгӕн лӕвӕрд кӕй у, уымӕ гӕсгӕ суыдзӕни уаз.

¹⁰Ӕндӕрӕй йын баивӕн нӕй: хорзӕн — ӕвзӕрӕй, ӕвзӕрӕн та — хорзӕй. Исчи фос фосӕй куы баива, уӕд сӕ дыууӕ дӕр суыдзысты уаз.

¹¹Исчи, Дунедарӕгӕн нывондӕн хӕссын кӕй не ’мбӕлы, ахӕм ӕнӕсыгъдӕг фос нывондӕн ӕрхӕссынӕй куы расомы кӕна, уӕд-иу ӕй сауджынмӕ ӕрбакӕнӕд.

¹²Сауджын фосӕн, хорз ӕви ӕвзӕр у, уымӕ гӕсгӕ аргъ скӕнӕд. Куыд ын саргъ кӕна, афтӕ уыдзӕн.

¹³Уыцы фосы йӕ хицау фӕстӕмӕ балхӕнинаг куы уа, уӕд ма-иу ын йӕ аргъмӕ йӕ фӕндзӕм хай дӕр бафтауӕд.

¹⁴Исчи йӕ хӕдзар Дунедарӕгӕн куы снывонд кӕна, уӕд-иу ын сауджын, хорз ӕви ӕвзӕр у, уымӕ гӕсгӕ аргъ скӕнӕд. Куыд ын саргъ кӕна, афтӕ уӕд.

¹⁵Фӕлӕ йӕ хӕдзар чи снывонд кодта, уый йӕ фӕстӕмӕ балхӕнинаг куы уа, уӕд-иу ын йӕ аргъмӕ бафтауӕд йӕ фӕндзӕм хай, ӕмӕ хӕдзар фӕстӕмӕ йӕхи бауыдзӕн.

¹⁶Исчи йӕ зӕххы хай Дунедарӕгӕн куы снывонд кӕна, уӕд ын саргъ кӕнын хъӕуы йӕ тауинаджы бӕрцмӕ гӕсгӕ: хъӕбӕрхоры хомерӕн — дӕс ӕмӕ дыууиссӕдз шекелы ӕвзист.

¹⁷Ӕрдӕгсӕдӕйон азы йӕ куы нывонд кӕна, уӕд дӕр-иу йӕ аргъ уӕд уый бӕрц.

¹⁸Ӕрдӕгсӕдӕйон азы бӕрӕгбоны фӕстӕ йӕ куы нывонд кӕна, уӕд та-иу сауджын нысангонд аргъ фӕкъаддӕр кӕнӕд, иннӕ Ӕрдӕгсӕдӕйон азмӕ ма цал азы баззад, уый хынцгӕйӕ.

¹⁹Йӕ зӕххы хай чи снывонд кодта, уый йӕ фӕстӕмӕ балхӕнинаг куы уа, уӕд ма-иу нысангонд аргъмӕ бафтауӕд йӕ фӕндзӕм хай, ӕмӕ зӕхх фӕстӕмӕ йӕхи бауыдзӕн.

²⁰Фӕлӕ йӕ зӕхх фӕстӕмӕ куынӕ балхӕна ӕмӕ ӕндӕр искӕмӕн уӕйгонд куы ’рцӕуа, уӕд ын фӕстӕмӕ балхӕнӕн нал уыдзӕн.

²¹Ӕрдӕгсӕдӕйон азы уыцы зӕххы хай куы суӕгъд уа, уӕд суыдзӕни уаз, Дунедарӕгӕн кӕй снывонд кодтой, бавналын ӕм хӕрам у, зӕгъгӕ, кӕмӕй фӕзӕгъынц, ахӕм зӕхх, ӕмӕ сауджынты исбон бауыдзӕн.

²²Исчи Дунедарӕгӕн кӕмӕйдӕр ӕлхӕд зӕххы хай куы снывонд кӕна, йӕхи исбон чи нӕ уыдис, ахӕм,

²³уӕд-иу ын сауджын йӕ аргъ банымайӕд, Ӕрдӕгсӕдӕйон азмӕ ма цал азы баззад, уый хынцгӕйӕ, ӕмӕ йын тӕккӕ уыцы бон йӕ аргъ бафидӕд; уый у уаз мысайнаг Дунедарӕджы номыл.

²⁴Зӕхх та, Ӕрдӕгсӕдӕйон аз куы ралӕууа, уӕд фӕстӕмӕ, кӕмӕй ӕлхӕд ӕрцыд ӕмӕ кӕй зӕххы хай уыди, уый исбон бауыдзӕн.

²⁵Нысангонд ӕргътӕ иууылдӕр хъуамӕ нымад цӕуой кувӕндоны шекелтӕй, алы шекелы дӕр — ссӕдз герайы.

²⁶Фосы фыццаг цӕуӕт Дунедарӕгӕн снывонд кӕнын никӕй бон у, уымӕн ӕмӕ фыццаггуырдтӕ афтӕ дӕр Йӕ исбон сты. Гал уа ӕви фыс — Дунедарӕджы исбон у.

²⁷Фӕлӕ ӕнӕсыгъдӕг фосы фыццаг цӕуӕт фӕстӕмӕ балхӕнӕн уыдзӕн, нысангонд аргъмӕ ма йӕ фӕндзӕм хай бафтаугӕйӕ. Фӕстӕмӕ ӕлхӕд куынӕ ӕрцӕуа, уӕд та йӕ нысангонд аргъыл ауӕй кӕнын хъӕудзӕн.

²⁸Дӕ исбонӕй цӕмӕйдӕриддӕр басомы кӕнай, Дунедарӕгӕн ӕй снывонд кӕндзынӕн, зӕгъгӕ, — адӕймаг уа, фос ӕви зӕххы хай, — уымӕн нӕдӕр ауӕйгӕнӕн ис, нӕдӕр фӕстӕмӕ балхӕнӕн. Сомы ракӕнгӕйӕ, цыдӕриддӕр снывонд чындӕуыд, уый Дунедарӕджы у, иууылуаз.

²⁹Сомы ракӕнгӕйӕ, Дунедарӕгӕн кӕй снывонд кодтой, уыцы адӕймаджы фӕстӕмӕ балхӕнӕн нӕй: хъуамӕ мард ӕрцӕуа.

³⁰Зӕхх цы тыллӕг дӕтты — хор уа ӕви бӕлӕсты дыргътӕ уой — алцӕмӕн дӕр йӕ дӕсӕймаг хай у Дунедарӕджы исбон — иууылуаз.

³¹Йӕ фӕллойы дӕсӕймаг хай фӕстӕмӕ чи ӕлхӕна, уый-иу нысангонд аргъмӕ бафтауӕд йӕ фӕндзӕм хай.

³²Алы стурвос ӕмӕ лыстӕг фосы дӕсӕймаг хай дӕр — дӕсӕймаг хайы гакк кӕуыл ӕвӕрд ӕрцыд, уыдон сты Дунедарӕджы уаз хай.

³³Хорз фосы нӕй ӕвзӕр фосӕй хицӕнгӕнӕн, ивӕн дӕр сын нӕй. Исчи фос фосыл куы баива, уӕд сӕ дыууӕ дӕр суыдзысты уаз, ӕмӕ сын нӕй фӕстӕмӕ балхӕнӕн».

³⁴Адон сты, Дунедарӕг Синайы хохыл Моисейӕн, цӕмӕй сӕ израилӕгтӕ ӕххӕст кӕной, уый тыххӕй кӕй радта, уыцы фӕдзӕхстытӕ.