Read Хуыцауы Дзырд иронау Левит 6 Bible Online

Левит 6 - Хуыцауы Дзырд иронау bible

Левит 6

¹Дунедарӕг Моисейӕн загъта:

²«Дунедарӕджы раз, исты фыдракӕнд саразгӕйӕ, тӕригъӕды чи бацӕуа: йӕ бӕрны йын кӕй бакодтой кӕнӕ йӕм бавӕрынмӕ кӕй радтой, науӕд давгӕ кӕй акодта, ахӕм истӕмӕй, нӕ федтон, зӕгъгӕ, чи ныллӕууа; искӕмӕй исты чи байса,

³искӕй сӕфт дзаума чи ссара ӕмӕ йыл чи нӕ басӕтта — адӕм тӕригъӕды цӕй тыххӕй бацӕуынц, уыцы хъуыддӕгтӕй исты чи сараза ӕмӕ ма ноджы, нӕ уыдтӕн, зӕгъгӕ, мӕнг сомы чи ракӕна, —

⁴уыцы адӕймаг, тӕригъӕды кӕй бацыд ӕмӕ азымджын кӕй сси, уымӕ гӕсгӕ уал раздӕр фӕстӕмӕ раттӕд, цы адавта кӕнӕ цы байста, бавӕрынмӕ цы райста кӕнӕ цы сӕфт дзаума ссардта, уый,

⁵— мӕнг сомы цӕйдӕриддӕр тыххӕй ракодта, уыдон иууылдӕр. Фиддоны нывонд ӕрхӕссыны бон фӕстӕмӕ алцыдӕр хицауӕн раттӕд ӕмӕ ма сӕм сӕ аргъы фӕндзӕм хай бафтауӕд.

⁶Йӕ азымы тыххӕй сауджынмӕ ӕрбакӕнӕд ӕнӕсахъат фыс — Дунедарӕгӕн фиддоны нывондӕн; аргъонд ын хъуамӕ ӕрцӕуа кувӕндоны ӕвзист шекелтӕй.

⁷Сауджын Дунедарӕджы раз сӕххӕст кӕндзӕн тӕригъӕд ныббарыны ӕгъдау, ӕмӕ, цӕмӕйдӕриддӕр фӕазымджын ис, уыдон ын уыдзысты барст».

⁸Дунедарӕг Моисейӕн бафӕдзӕхста, цӕмӕй Аарон ӕмӕ йӕ фырттӕн зӕгъа:

⁹«Мӕнӕ иууылсудзинаг нывонд хӕссыны ӕгъдау: иууылсудзинаг нывонд-иу ӕхсӕв-бонмӕ баззайӕд нывондхӕссӕныл, кӕм ӕй басыгътой, уым. Нывондхӕссӕныл иудадзыг судзӕд арт.

¹⁰Райсомӕй сауджын йӕ уӕлӕ скӕнӕд гӕн хъуымацӕй дарӕс — пӕлӕз ӕмӕ мидӕггаг хӕлаф. Нывондхӕссӕнӕй, судзгӕ-судзын иууылсудзинаг нывонды сой кӕдӕм фӕтагъди, уыцы фӕнык сисӕд ӕмӕ йӕ нывондхӕссӕны цур ӕркалӕд.

¹¹Уый фӕстӕ йӕ дарӕс раивӕд ӕмӕ фӕнык рӕсӕнуатӕй сыгъдӕг ранмӕ ахӕссӕд.

¹²Нывондхӕссӕны арт хъуамӕ ӕдзухдӕр судзгӕ кӕна, макуы ахуысса. Сауджын-иу ыл ӕрвылрайсом суг бафтауӕд, равӕрӕд-иу иууылсудзинаг нывонды уӕнгтӕ ӕмӕ-иу уыдонимӕ фидыды нывӕндтӕн дӕр сӕ нӕрдтӕ басудзӕд.

¹³Нывондхӕссӕны арт ӕдзухдӕр судзӕд, макуы ахуыссӕд.

¹⁴Мӕнӕ хойраджы хуынтӕ хӕссыны ӕгъдау: Аароны фырттӕ-иу сӕ хъуамӕ ӕрбахӕссой Дунедарӕджы размӕ, нывондхӕссӕны цурмӕ.

¹⁵Сауджын-иу хойраджы хуыны сойамӕст мӕнӕуы ссадӕй йӕ армыдзаг сисӕд, стӕй, йӕ сӕрыл цы буд ӕвӕрд ис, уый иууылдӕр, ӕмӕ сӕ нывондхӕссӕныл басудзӕд — Дунедарӕгӕн ӕхцон хӕрздӕфӕн, хуын иууылдӕр Дунедарӕджы кӕй у, уый нысанӕн.

¹⁶Хуынӕй ма цы ссад баззайа, уый та бахӕрӕнт Аарон ӕмӕ йӕ фырттӕ. Хӕрын ӕй ӕмбӕлы донгонд дзулты хуызы, уаз бынаты — Фембӕлды Цатыры кӕрты.

¹⁷Ӕнхъизӕн кӕнӕн ыл нӕй. Уый сын Ӕз хай кӕнын Мӕ номыл хаст нывӕндтӕй. Хойраджы хуын дӕр тӕригъӕды ӕмӕ фиддоны нывӕндтау иууылсыгъдӕг у.

¹⁸Аароны байзӕддӕгтӕй алы нӕлгоймагӕн дӕр уыцы хайӕ хӕрын ӕмбӕлы. Уый уын уыдзӕни мыггагмӕйы хай Дунедарӕджы номыл хаст хуынтӕй, фӕлтӕрӕй-фӕлтӕрмӕ. Цыдӕриддӕр сыл бандзӕва, уый суыдзӕни уаз».

¹⁹Дунедарӕг Моисейӕн загъта:

²⁰«Мӕнӕ, Аарон ӕмӕ йӕ фырттӕн сӕ байсӕрдыны бонӕй фӕстӕмӕ Дунедарӕгӕн ӕрвылбон цы хуын хӕссын ӕмбӕлы, уый: ӕвзаргӕ мӕнӕуы ссад — ефӕйы дӕсӕймаг хай, йӕ иу ӕмбис — райсомӕй, иннӕ та — изӕрӕй.

²¹Уыцы ссадӕй, оливӕйы соимӕ хӕрзызмӕст куыд уа, афтӕмӕй алгъацы лауаситӕ афыцӕнт, асӕстытӕ сӕ кӕнӕнт ӕмӕ сӕ басудзӕнт — Дунедарӕгӕн ӕхцон хӕрздӕфӕн.

²²Аароны байзӕддӕгтӕй, Аароны бынатмӕ кӕй байсӕрдой, уыцы сауджынтӕй алчидӕр афтӕ кӕнӕд. Уый у мыггагӕмӕйы уагӕвӕрд — хойраг хъуамӕ иууылдӕр сыгъд ӕрцӕуа Дунедарӕджы номыл.

²³Сауджын цы хойраджы хуын ӕрбахӕссы, уый иууылдӕр басудзын хъӕуы, хӕрын дзы не ’мбӕлы».

²⁴Дунедарӕг Моисейӕн бафӕдзӕхста, цӕмӕй Аарон ӕмӕ йӕ фырттӕн зӕгъа:

²⁵«Мӕнӕ тӕригъӕды нывонд хӕссыны ӕгъдау: тӕригъӕды нывонд аргӕвдын хъӕуы Дунедарӕджы раз, иууылсудзинӕгтӕ кӕм фергӕвдынц, уым. Ацы нывонд у иууылсыгъдӕг.

²⁶Тӕригъӕды нывонд чи ӕрхаста, уыцы сауджын дзы хъуамӕ бахӕра, хӕрын та дзы хъӕуы уаз бынаты — Фембӕлды Цатыры кӕрты.

²⁷Нывондаджы фыдыл цыдӕриддӕр андзӕва, уый суыдзӕни уаз, йӕ тугӕй дарӕсыл куы бакӕла, уӕд ӕй ныхсын хъӕудзӕни уаз бынаты.

²⁸Дзидза цы дурын мигӕнӕны сфыца, уый хъӕудзӕн асӕттын. Кӕд ӕрхуы мигӕнӕны сфыца, уӕд та йӕ хъӕудзӕн ныххафын ӕмӕ донӕй ныхсын.

²⁹Уыцы дзидза сауджынты мыггаджы нӕлгоймӕгтӕй алкӕмӕн дӕр хӕрын ӕмбӕлы. Уый у иууылсыгъдӕг нывонд.

³⁰Фӕлӕ тӕригъӕды нывонды фыд, йӕ туг Фембӕлды Цатырмӕ кӕмӕн ӕрбахӕссынц — тӕригъӕдтӕ ныббарыны ӕгъдау Уаз Цӕрӕны сӕххӕст кӕнынӕн, — уый та хӕрӕн нӕй, басудзын ӕй хъӕуы.