Read Хуыцауы Дзырд иронау Левит 8 Bible Online

Левит 8 - Хуыцауы Дзырд иронау bible

Левит 8

¹Дунедарӕг Моисейӕн загъта:

²«Фӕдзур Аарон ӕмӕ йӕ фырттӕм, райс дарӕстӕ, сӕрдӕн сой, тӕригъӕды нывондӕн — гал, стӕй дыууӕ фыры ӕмӕ донгонд дзулты чыргъӕд.

³Фембӕлды Цатыры къӕсӕрмӕ ӕппӕт адӕмы ӕрӕмбырд кӕн».

⁴Моисей, Дунедарӕг ын куыд бафӕдзӕхста, афтӕ бакодта, ӕмӕ Израилы адӕм Фембӕлды Цатыры къӕсӕры раз ӕрӕмбырд сты.

⁵Моисей сын загъта: «Дунедарӕг мын бафӕдзӕхста мӕнӕ афтӕ бакӕнын».

⁶Моисей Аароны ӕмӕ йӕ фыртты размӕ ракодта ӕмӕ сӕ доны цынадта.

⁷Аароныл скодта хӕдон ӕмӕ йын ӕй ронӕй ӕрбабаста. Уый фӕстӕ йыл скодта пӕлӕз, уый ӕдде та — раздарӕн, астӕубосӕй йӕ ӕрбалвӕста.

⁸Ноджы ма йыл бакодта риуылдарӕн, уый уӕлӕ — урим ӕмӕ туммим.

⁹Йӕ сӕрыл ын ӕркодта сарыхъ ӕмӕ йыл разӕй сӕвӕрдта сыгъзӕрин цъарӕг — уаз кады худ, Дунедарӕг ын куыд бафӕдзӕхста, афтӕ.

¹⁰Моисей райста сӕрдӕн сой ӕмӕ дзы байсӕрста цатыр, стӕй, цыдӕриддӕр дзы уыдис, уыдон. Афтӕмӕй сӕ срухс скодта.

¹¹Уый фӕстӕ сойӕ нывондхӕссӕн авд хатты бапырх кодта, байсӕрста йӕ йе ’ппӕт дзаумаимӕ, хихсӕн аг йӕ суанцъыимӕ, цӕмӕй сӕ срухс кӕна.

¹²Аароны сӕрыл сой ӕруагъта ӕмӕ йӕ байсӕрста — Дунедарӕджы раз ӕй ссыгъдӕг кодта.

¹³Уый фӕстӕ Аарон ӕмӕ йӕ фыртты размӕ ракодта, хӕдӕттӕ сыл скодта, рӕттӕ сыл ӕрбабаста ӕмӕ сыл ӕркодта сарыхътӕ, Дунедарӕг ын куыд бафӕдзӕхста, афтӕ.

¹⁴Моисей тӕригъӕды нывондӕн ӕрбакодта гал. Аарон ӕмӕ йӕ фырттӕ сӕ къухтӕ галы сӕрыл ӕрӕвӕрдтой.

¹⁵Моисей йӕ аргӕвста, йӕ тугӕй йын йе ’нгуылдзыл систа ӕмӕ дзы нывондхӕссӕны сыкъатӕ сахуырста, цӕмӕй нывондхӕссӕн срухс кӕна. Иннӕ туг иууылдӕр нывондхӕссӕны рӕбын акалдта. Афтӕмӕй, тӕригъӕдтӕ ныббарыны ӕгъдау сӕххӕст кӕнгӕйӕ, нывондхӕссӕн ссыгъдӕг кодта.

¹⁶Уый фӕстӕ Моисей хуылфыдзаумӕтты фиу иууылдӕр, стӕй игӕры ӕфтуанхай ӕмӕ уыргтӕ ӕд фиу нывондхӕссӕныл басыгъта.

¹⁷Галӕй ма цы баззади, уыдон та — цармӕй, фыдӕй, хуылфыдзаумайӕ — рӕсӕнуаты ӕдде басыгъта, Дунедарӕг ын куыд бафӕдзӕхста, афтӕ.

¹⁸Моисей иууылсудзинаг нывондӕн ӕрбакодта фыр, ӕмӕ йын Аарон ӕмӕ йӕ фырттӕ сӕ къухтӕ йӕ сӕрыл ӕрӕвӕрдтой.

¹⁹Моисей йӕ аргӕвста ӕмӕ йын йӕ туг нывондхӕссӕныл алырдыгӕй бапырх кодта.

²⁰Кусарт суӕнгтӕ кодта ӕмӕ йын йӕ уӕнгтӕ сӕр ӕмӕ фиуимӕ басыгъта.

²¹Уый фӕстӕ йын Моисей йӕ хуылфыдзаумӕттӕ ӕмӕ йӕ къӕхтӕ доны ныхсадта ӕмӕ уыдон дӕр нывондхӕссӕныл басыгъта. Уый уыди иууылсудзинаг нывонд, Дунедарӕгӕн ӕхцон хӕрздӕфӕн, арты нывонд, Дунедарӕг Моисейӕн куыд бафӕдзӕхста, афтӕ.

²²Сауджын суӕвыны нывондӕн Моисей ӕрбакодта ӕндӕр фыр, ӕмӕ йын Аарон ӕмӕ йӕ фырттӕ сӕ къухтӕ йӕ сӕрыл ӕрӕвӕрдтой.

²³Моисей йӕ аргӕвста, йӕ тугӕй йын райста ӕмӕ дзы Ааронӕн йӕ рахиз хъусы кӕрон, йӕ рахиз къухы хистӕр ӕнгуылдз ӕмӕ йӕ рахиз къахы хистӕр ӕнгуылдз ацахуырста.

²⁴Уый фӕстӕ ӕрбахуыдта Аароны фыртты ӕмӕ уыдонӕн дӕр сӕ рахиз хъусты кӕрӕттӕ, сӕ рахиз къухты хистӕр ӕнгуылдзтӕ ӕмӕ сӕ рахиз къӕхты хистӕр ӕнгуылдзтӕ ацахуырста, стӕй нывондхӕссӕн алырдыгӕй тугӕй бапырх кодта.

²⁵Моисей райста кусартӕн йӕ дымӕг, хуылфыдзаумӕтты фиу иууылдӕр, игӕры ӕфтуанхай, уыргтӕ ӕд фиу ӕмӕ рахиз сгуы.

²⁶Дунедарӕджы раз цы донгонд дзулты чыргъӕд уыди, уымӕй иу донгонд дзул, иу сойыфых ӕмӕ иу лауаси райста, фиутӕ ӕмӕ рахиз сгуыйы сӕрыл сӕ сӕвӕрдта.

²⁷Иууылдӕр сӕ Аарон ӕмӕ йӕ фырттӕм радта ӕмӕ сын сӕ Дунедарӕджы раз хӕрдмӕ сисын кодта.

²⁸Уый фӕстӕ сӕ райста ӕмӕ сӕ иууылсудзинагимӕ нывондхӕссӕныл басыгъта. Уый у сауджын суӕвыны нывонд, ӕхцон хӕрздӕф, арты нывонд Дунедарӕгӕн.

²⁹Моисей райста фыры кӕразимаг ӕмӕ йӕ Дунедарӕджы раз хӕрдмӕ систа. Уый уыди Моисейы хай, сауджынлӕггадӕн ӕй снывонд кӕнынӕн цы нывонд ӕрхастӕуыди, уымӕй, Дунедарӕг ын куыд бафӕдзӕхста, афтӕ.

³⁰Уый фӕстӕ Моисей райста сӕрдӕн сой. Нывондхӕссӕныл цы туг уыди, уымӕй систа ӕмӕ дзы бапырх кодта Аароныл, стӕй йӕ дарӕсыл, Аароны фырттыл ӕмӕ сӕ дарӕсыл. Афтӕмӕй уазлӕггадӕн снывонд кодта Аароны, срухс ын кодта йӕ дарӕс, стӕй йӕ фыртты ӕмӕ уыдоны дарӕс дӕр.

³¹Моисей Аарон ӕмӕ йӕ фырттӕн загъта: «Фембӕлды Цатыры къӕсӕры раз дзидза сфыцут ӕмӕ дзы уым, сауджын суӕвыны нывонды хуынӕй чыргъӕды цы дзул ис, уыимӕ бахӕрут, куыд уын бафӕдзӕхстон, афтӕ. Аарон ӕмӕ йӕ фырттӕ сӕ бахӕрӕнт.

³²Дзидза ӕмӕ дзулӕй цы баззайа, уый-иу арты басудзут.

³³Авд боны дӕргъы Фембӕлды Цатыры къӕсӕрӕй иуварс ма ацӕут, цалынмӕ сауджынлӕггадӕн уӕ снывонд кӕныны бонтӕ нӕ сӕххӕст уой, уӕдмӕ, уымӕн ӕмӕ уыцы ӕгъдау хъуамӕ ахӕсса авд боны.

³⁴Абон цы сарӕзтӕуыд, уый уыди Дунедарӕджы фӕдзӕхст, цӕмӕй уӕ тӕригъӕдтӕ барст ӕрцӕуой.

³⁵Авд боны дӕргъы ӕхсӕвӕй-бонӕй Фембӕлды Цатыры къӕсӕры раз лӕуут ӕмӕ уын Дунедарӕг уӕ бӕрны цы бакодта, уый ӕххӕст кӕнут, науӕд амӕлдзыстут. Афтӕ мын бафӕдзӕхстӕуыд».

³⁶Аарон ӕмӕ йӕ фырттӕ сӕххӕст кодтой, Дунедарӕг сын Моисейы уылты цыдӕриддӕр бафӕдзӕхста, уыдӕттӕ.