Read Хуыцауы Дзырд иронау Йеремиа 17 Bible Online

Йеремиа 17 - Хуыцауы Дзырд иронау bible

Йеремиа 17

¹Иудейы тӕригъӕд ӕхсон ӕмӕ ӕфсӕн сисӕй ныффыстӕуыд адӕмы дур зӕрдӕтыл ӕмӕ нывондхӕссӕнты сыкъатыл.

²Раст цыма сӕ цот сты, уыйау сӕ нӕ рох кӕнынц сӕ нывондхӕссӕнтӕ, къабузджын бӕлӕсты раз ӕмӕ бӕрзонд къуыбыртыл — Ашерӕйы цӕджындзтӕ.

³Дӕ хӕхтӕ, дӕ исбон, дӕ хӕзнатӕ ӕмӕ дӕ уаз къуыппытӕ дын Ӕз иууылдӕр хӕлӕттаг фӕкӕндзынӕн, уымӕн ӕмӕ дӕ алы зӕххы хайыл дӕр тӕригъӕдтӕ фӕкодтай.

⁴Дӕхи аххосӕй, цы зӕххы хай дын радтон, уымӕй ӕнӕхай фӕуыдзынӕ, кӕй нӕ зоныс, уыцы бӕстӕйы дӕ Ӕз де знӕгтӕн цагъайраг скӕндзынӕн, уымӕн ӕмӕ Мӕ маст ссыгъди ӕмӕ ӕнусмӕ дӕр нӕ ахуысдзӕн».

⁵Дунедарӕг афтӕ зӕгъы: «Адӕймагыл йӕ зӕрдӕ чи дары, ныфсджын дзы чи у ӕмӕ йӕ зӕрдӕ Дунедарӕгӕй дард кӕмӕн у, уый ӕлгъыст у.

⁶Ӕдзӕрӕг быдыры цы какон сындз зайы, уыйау хорзӕх нӕ фендзӕни. Ӕнтӕф ӕдзӕрӕг быдыр, иунӕг цӕрӕг дӕр кӕм нӕй, уыцы цӕхджын зӕхх йӕ цӕрӕнкъуым суыдзӕн.

⁷Йӕ ныфс Дунедарӕг кӕмӕн у ӕмӕ Дунедарӕгыл йӕ зӕрдӕ чи дары, уый арфӕгонд у!

⁸Ахӕм адӕймаг, донбыл сагъд бӕласау ауадзы йӕ уидӕгтӕ, ӕнтӕф заман кӕй ралӕудзӕн, уымӕй нӕ тӕрсы, йӕ сыфтӕр кӕддӕриддӕр — цъӕх. Хусрӕстӕгӕй йын тас нӕу, никуы баззайы ӕнӕ дыргъӕй.

⁹Адӕймаджы зӕрдӕйӕ мӕнгарддӕр нӕй, нӕй йын срастгӕнӕн! Чи йӕ базондзӕн?

¹⁰Ӕз, Дунедарӕг, адӕймаджы зӕрдӕ уынын, йӕ уд ын фӕлварын, цӕмӕй алкӕмӕн дӕр йӕ митӕм ӕмӕ йӕ хъуыддӕгтӕм гӕсгӕ бафидон».

¹¹Хуыргарк, йӕхӕдӕг кӕй не ’рӕфтыдта, уыцы ӕйчытыл къуыртты фӕбады. Уый ӕнгӕс у, мӕнгард миты фӕрцы чи схъӕздыг ис, уыцы адӕймаг. Йӕ кары тӕмӕны алцӕмӕй дӕр ӕнӕхай фӕуыдзӕн ӕмӕ ӕдылыйы бынаты баззайдзӕн.

¹²Рагзаманӕй стауинаг цы кадджын паддзахы бадӕн сси, уый у нӕ Уаз Хуыцауы бынат!

¹³О Дунедарӕг, Израилӕн йӕ зӕрдӕдарӕн Ды дӕ! Чи Дӕ ныууадза, уыдон иууылдӕр фӕхудинаг уыдзысты. «Йе ’ргом Мӕ чи аздӕхта, уыдон зӕххы хай бауыдзысты, уымӕн ӕмӕ ныууагътой Дунедарӕджы, цардӕгас Донгуырӕн сӕ ферох ис».

¹⁴О Дунедарӕг, сдзӕбӕх мӕ кӕн, ӕмӕ ӕнӕниз суыдзынӕн; фервӕзын мӕ кӕн, ӕмӕ фервӕздзынӕн, уымӕн ӕмӕ ӕз Дӕу стауын!

¹⁵Алчи мын дзуры: «Цӕй, кӕм ис Дунедарӕджы ныхас? Сӕххӕст уӕд!»

¹⁶Зоныс ӕй, ӕз Дӕумӕ фыййауӕй кусынмӕ нӕ бӕллыдтӕн, бӕллӕхы бонмӕ ӕнхъӕлмӕ нӕ кастӕн. Мӕ дзыхӕй цы ссыди, уыдӕттӕ Дын ӕргом сты.

¹⁷Ӕвирхъау тас мын ма фест: бӕллӕхы заман ме ’мбӕхсӕн Ды дӕ!

¹⁸Мӕ сурджытӕ фӕхудинаг уӕнт, мӕн та бахиз стыр тасӕй. Фыдбылыз сын бавзарын кӕн, уӕззау цӕфӕй сӕ басӕтт!

¹⁹Дунедарӕг мын загъта: «Ацу ӕмӕ Бениамины мыггаджы кулдуары цур ӕрлӕуу: Иудейы паддзӕхтӕ фӕцӕуынц уыцы кулдуары уылты. Цӕугӕ Йерусалимы ӕппӕт кулдуӕрттӕм

²⁰ӕмӕ фехъусын кӕн: байхъусут Дунедарӕджы ныхасмӕ, иудейаг паддзӕхтӕ, ӕгас Иудей ӕмӕ Йерусалимы цӕрджытӕ, ацы кулдуӕртты уылты чидӕриддӕр бацӕуы, уыдон!

²¹Дунедарӕг афтӕ зӕгъы: Кӕд уӕ удӕгасӕй баззайын фӕнды, уӕд сабаты Йерусалимы кулдуӕртты уылты мацы хӕссут.

²²Уӕ хӕдзӕрттӕй дӕр мацы хӕссут сабаты ӕмӕ ӕппындӕр мацы кусут. Уӕ фыдӕлтӕн куыд бафӕдзӕхстон, афтӕ уын сабатбон уӕд уаз.

²³Уыдон Мӕм нӕ хъуыстой, хивӕндӕй цардысты, Мӕ зондамынд Мын ницӕмӕ дардтой.

²⁴24-25 Куы Мӕм байхъусат, — зӕгъы Дунедарӕг, — ӕмӕ сабаты ацы сахары кулдуӕртты уылты куы ницы хӕссат, сабат уын уаз куы уа ӕмӕ уыцы бон ӕппындӕр куы ницы кусат, уӕд, Давиды бадӕны цы паддзӕхтӕ сбадынц, уыдон, уӕздӕттӕ, стӕй Иудей ӕмӕ Йерусалимы иннӕ цӕрджытӕ бӕхтӕ ӕмӕ бӕхуӕрдӕттыл кӕддӕриддӕр ацы сахары кулдуӕртты уылты цӕудзысты, сахар та лӕудзӕни мыггагмӕ.

²⁶Иудейы сахартӕй, стӕй Йерусалимы алфамбылайӕ, Бениамины зӕххӕй, Шефелайӕ, хӕхтӕй ӕмӕ Негевӕй адӕм цӕудзысты ардӕм, цӕмӕй Дунедарӕджы хӕдзары иууылсудзинӕгтӕ ӕмӕ ӕндӕр нывӕндтӕ ӕрхӕссой, хойраджы хуынтӕ, хӕрздӕфгӕнӕнтӕ ӕмӕ арфӕйы нывӕндтӕ Йын ӕрбахӕссой.

²⁷Куынӕ Мӕм байхъусат, сабатбон уын уаз куынӕ уа ӕмӕ уыцы бон Йерусалимы кулдуарыл уӕ уӕргътимӕ куы цӕуат, уӕд Ӕз ацы кулдуар басудздзынӕн, ӕмӕ уыцы ӕнӕахуысгӕ арт Йерусалимы галуантӕ иууылдӕр бабын кӕндзӕн».