Read Хуыцауы Дзырд иронау Йеремиа 28 Bible Online

Йеремиа 28 - Хуыцауы Дзырд иронау bible

Йеремиа 28

¹Паддзах Цедекиа цыппӕрӕм аз хицауиуӕг кодта Иудейы. Уыцы азы фӕндзӕм мӕй мын гивонаг пехуымпар, Аззуры фырт Хананиа, Дунедарӕджы хӕдзары, сауджынтӕ ӕмӕ ӕппӕт адӕмы раз загъта:

²«Уӕларвӕфсады Бардарӕг, Израилы Хуыцау, афтӕ зӕгъы: Ӕз вавилойнаг паддзахы ӕфсондз ныппырх кӕндзынӕн.

³Дыууӕ азы фӕстӕ Дунедарӕджы хӕдзары дзаума иууылдӕр — вавилойнаг паддзах Навуходоносор ардыгӕй кӕй ахаста ӕмӕ Вавилонмӕ кӕй аласта, уыдон — Ӕз фӕстӕмӕ ацы бынатмӕ раздахдзынӕн.

⁴Иудейы паддзах Йехониайы, Иоакимы фырты, стӕй Иудейӕ Вавилонмӕ уацары кӕй акодтой, уыцы адӕмы се ’ппӕты дӕр фӕстӕмӕ ардӕм раздахдзынӕн, — зӕгъы Дунедарӕг, — уымӕн ӕмӕ Ӕз Вавилоны паддзахӕн йе ’фсондз ныппырх кӕндзынӕн».

⁵Пехуымпар Йеремиа, Дунедарӕджы хӕдзары цы сауджынтӕ лӕууыд, уыдоны, стӕй ӕппӕт адӕмы раз пехуымпар Хананиайӕн дзуапп радта:

⁶«Дунедарӕг ахӕм хъуыддаг саразӕд! Уадз ӕмӕ дын Дунедарӕг сӕххӕст кӕна дӕ рагуац, ӕмӕ Дунедарӕджы хӕдзары дзаума иууылдӕр Вавилонӕй раздаха, стӕй хаст адӕмы се ’ппӕты дӕр.

⁷Фӕлӕ ма байхъус, ӕз дӕуӕн ӕмӕ ӕппӕт адӕмӕн хъӕлӕсыдзагӕй цы зӕгъдзынӕн, уымӕ.

⁸Рагон пехуымпартӕ, мах размӕ пехуымпариуӕг чи кодта, уыдон бирӕ бӕстӕтӕ ӕмӕ хъомысджын паддзахӕдтӕн дзырдтой, фидӕны сӕм ӕнхъӕлмӕ кӕй кӕсынц хӕстытӕ, бӕллӕхтӕ ӕмӕ рынтӕ.

⁹Пехуымпар-иу рагацау сабырдзинады кой куы скодта, уӕд-иу, Дунедарӕг ӕцӕг кӕй рарвыста, ахӕм пехуымпар кӕй у, уый-иу, ӕрмӕстдӕр йӕ ныхӕстӕ куы сӕххӕст сты, уӕд рабӕрӕг ис».

¹⁰Пехуымпар Хананиа Йеремиайӕн йӕ бӕрзӕйӕ ’фсондз систа ӕмӕ йӕ ныппырх кодта.

¹¹Уый фӕстӕ йын ӕппӕт адӕмы раз загъта: «Дунедарӕг афтӕ зӕгъы: Дыууӕ азы фӕстӕ, Вавилоны паддзах Навуходоносор ӕппӕт адӕмы бӕрзӕйыл цы ’фсондз сӕвӕрдта, уый Ӕз афтӕ ныппырх кӕндзынӕн». Йеремиа йӕ фӕндагыл ацыди.

¹²Пехуымпар Хананиа, Йеремиайы бӕрзӕйыл цы ӕфсондз уыди, уый куы ныссаста, уый фӕстӕ Дунедарӕг Йеремиайӕн загъта:

¹³«Цӕугӕ ӕмӕ Хананиайӕн Мӕ номӕй афтӕ зӕгъ: „Ды асастай хъӕдын ӕфсондз, фӕлӕ йӕ бӕсты Ӕз ӕфсӕйнаг ӕфсондз сараздзынӕн.

¹⁴Уымӕн ӕмӕ Уӕларвӕфсады Бардарӕг, Израилы Хуыцау, афтӕ зӕгъы: Ӕз уыцы адӕмтӕн се ’ппӕтӕн дӕр сӕ бӕрзӕйыл ӕфсӕйнаг ӕфсондз бакӕндзынӕн, цӕмӕй Вавилоны паддзах Навуходоносорӕн лӕггад кӕной, уый тыххӕй. Уыдон суыдзысты йӕ цагъартӕ, суанг ын хъӕддаг сырдты дӕр бакӕндзынӕн йӕ дӕлбар“».

¹⁵Ӕмӕ пехуымпар Йеремиа загъта пехуымпар Хананиайӕн: «Хананиа, байхъус-ма! Дунедарӕг дӕ нӕ рарвыста! Ды ацы адӕмӕн мӕнг ныхӕстӕй зӕрдӕтӕ ӕвӕрыс.

¹⁶Уымӕ гӕсгӕ Дунедарӕг афтӕ зӕгъы: Зӕххы цъарӕй дӕ фесафдзынӕн: ацы аз амӕлдзынӕ, уымӕн ӕмӕ Дунедарӕджы номӕй мӕнг ныхӕстӕ дзырдтай».

¹⁷Ӕмӕ уыцы азы ӕвдӕм мӕйы пехуымпар Хананиа амарди.