Read Хуыцауы Дзырд иронау Йеремиа 37 Bible Online

Йеремиа 37 - Хуыцауы Дзырд иронау bible

Йеремиа 37

¹Иоакимы фырт Йехониайы фӕстӕ паддзах сси Иосиайы фырт Цедекиа. Вавилоны паддзах Навуходоносор ӕй Иудейы паддзахӕй сӕвӕрдта.

²Цедекиа, йӕ лӕггадгӕнджытӕ ӕмӕ бӕстӕйы цӕрджытӕ, Дунедарӕг пехуымпар Йеремиайы дзыхӕй цы ныхӕстӕ дзырдта, уыдонмӕ нӕ хъуыстой.

³Паддзах Цедекиа Йеремиамӕ Шелемийы фырт Йегухал ӕмӕ сауджын Софониайы, Маасеайы фырты, арвыста, мах тыххӕй ма Дунедарӕгмӕ, нӕ Хуыцаумӕ, скув, зӕгъгӕ.

⁴Уыцы заман Йеремиа сӕрибарӕй царди йӕ адӕмы ’хсӕн, уымӕн ӕмӕ ахст нӕ уыди.

⁵Фараоны ӕфсад рацыди Мысырӕй, ӕмӕ, Йерусалимыл цы халдейӕгтӕ ӕрхъула кодтой, уыдон уый куы фехъуыстой, уӕд сахарӕй аздӕхтысты.

⁶6-7 Дунедарӕг Йеремиайӕн загъта: «Афтӕ зӕгъы Дунедарӕг, Израилы Хуыцау: Мӕнмӕ уӕ бафӕрсынмӕ чи ӕрбарвыста, уыцы иудейаг паддзахӕн зӕгъут: „Фараоны ӕфсад уӕм ӕххуысмӕ рацыди, фӕлӕ фӕстӕмӕ аздӕхдзӕн йӕ зӕхмӕ, Мысырмӕ,

⁸халдейӕгтӕ та фӕстӕмӕ раздӕхдзысты ӕмӕ ацы сахары ныхмӕ схӕцдзысты, бацахсдзысты йӕ ӕмӕ йӕ басудздзысты“».

⁹Дунедарӕг афтӕ зӕгъы: «Уӕхи ма сайут ӕмӕ афтӕ ӕнхъӕл ма ут, цыма халдейӕгтӕ ардыгӕй ацӕудзысты. Нӕ уыдзӕн уый!

¹⁰Уӕ ныхмӕ цы халдейӕгты ӕфсад хӕцы, ууыл куы фӕуӕлахиз уыдаиккат ӕмӕ ма сӕм ӕрмӕст, чи фӕцӕф ис, ахӕм хӕстонтӕ куы баззадаид, уӕд уыдон дӕр рацыдаиккой сӕ цатыртӕй ӕмӕ ацы сахар басыгътаиккой».

¹¹Фараоны ӕфсад кӕй ӕрбаввахс ис, уый тыххӕй халдейӕгты хӕстонтӕ Йерусалимӕй куы адард сты,

¹²уӕд Йеремиа рацыди Йерусалимӕй, цӕмӕй Бениамины зӕхмӕ ацӕуа, адӕмы ’хсӕн фӕуа ӕмӕ афтӕмӕй сахарӕй ралидза.

¹³Бениамины кулдуары уылты куы фӕцӕйцыд, уӕд ӕм хъахъхъӕнджыты хицау, Хананиайы фырты фырт, Шелемийы фырт Ирийа фӕлӕбурдта ӕмӕ йын загъта: «Дӕу фӕнды халдейӕгтӕм балидзын!»

¹⁴Йеремиа йын дзуапп радта: «Уыцы ныхас мӕнг у! Ӕз халдейӕгтӕм лидзинаг нӕ дӕн». Ирийа йын йӕ ныхӕстӕ ницӕмӕ ӕрдардта, ӕрцахста йӕ ӕмӕ йӕ уӕздӕтты размӕ ӕрбакодта.

¹⁵Уӕздӕттӕ Йеремиамӕ смӕсты сты, фӕнадтой йӕ ӕмӕ йӕ нымӕрдар Йонатаны хӕдзары бамидӕг кодтой, уымӕн ӕмӕ уыцы хӕдзарӕй ахӕстон скодтой.

¹⁶Йеремиайы ныккӕнды ныппӕрстой, ӕмӕ уым дзӕвгар рӕстӕг фӕбадти.

¹⁷Уый фӕстӕ йӕм паддзах Цедекиа арвыста, ӕмӕ йӕ галуанмӕ ӕрбакодтой. Паддзах ӕй сусӕгӕй бафарста: «Дунедарӕг дын ницы загъта, мыййаг?» Йеремиа йын дзуапп радта: «Загъта: вавилойнаг паддзахы къухмӕ бахаудзынӕ».

¹⁸Йеремиа паддзах Цедекиайӕн ноджы загъта: «Цӕмӕй фӕаххосджын дӕн дӕ разы, стӕй дӕ лӕггадгӕнджытӕ ӕмӕ дӕ адӕмы раз? Ныккӕнды мӕ цӕй тыххӕй ныппӕрстат?

¹⁹Вавилойнаг паддзах сымахмӕ, ацы зӕхмӕ, не ’рбабырсдзӕн, зӕгъгӕ, цы пехуымпартӕ дзырдтой, уыдон цы фесты?

²⁰О мӕ хицау ӕмӕ мӕ паддзах, байхъус мӕм, мӕ курдиатыл мын дӕхи ма атигъ кӕн! Мауал мӕ арвит нымӕрдар Йонатаны хӕдзармӕ, науӕд уым амӕлдзынӕн».

²¹Паддзах Цедекиайы бардзырдмӕ гӕсгӕ Йеремиайы хъахъхъӕнджыты кӕртмӕ акодтой ӕмӕ йын алы бон дӕр кӕрдзынгӕнджыты сыхӕй иу кӕрдзын хастой, цалынмӕ сахары дзул нӕ фӕци, уӕдмӕ. Афтӕмӕй Йеремиа хъахъхъӕнджыты кӕрты баззади.