Read Хуыцауы Дзырд иронау Езекиел 20 Bible Online

Езекиел 20 - Хуыцауы Дзырд иронау bible

Езекиел 20

¹Ӕвдӕм аз фӕндзӕм мӕйӕн йӕ дӕсӕм бон мӕм Израилы хистӕртӕ ӕрбацыдысты, Дунедарӕджы бафӕрсыны охыл, ӕмӕ ӕрбадтысты мӕ разы.

²Дунедарӕг мын загъта:

³«Адӕймаджы фырт! Израилы хистӕртӕн фехъусын кӕн: „Афтӕ зӕгъы Дунедарӕг Хуыцау: Мӕ бафӕрсынмӕ ӕрбацыдыстут? Сомы кӕнын Мӕхицӕй, ницы дзуапп уын ратдзынӕн“, — зӕгъы Дунедарӕг Хуыцау.

⁴Адӕймаджы фырт! Тӕрхонгӕнинаг сын дӕ ӕви нӕ? Сӕ фыдӕлты ӕлгъаг митӕ сын равдис.

⁵Фехъусын сын кӕн: „Афтӕ зӕгъы Дунедарӕг Хуыцау: Израилы адӕмы куы равзӕрстон, уыцы бон Мӕ къух уӕлӕмӕ систон ӕмӕ расомы кодтон Йаковы хӕдзарвӕндагӕн, Мӕхи сын раргом кодтон Мысыры зӕххыл. Мӕ къух хӕрдмӕ систон ӕмӕ сын загътон: ‚Ӕз Дунедарӕг дӕн, уӕ Хуыцау!‘

⁶Уыцы бон сын Ӕз, Мӕ къух уӕлӕмӕ сисгӕйӕ, расомы кодтон, Мысыры зӕххӕй сӕ кӕй ракӕндзынӕн, цы зӕхх сын равзӕрстон — ӕхсыр ӕмӕ мыд кӕцӕй хъары, уырдӕм, ӕппӕт зӕххыты диссагдӕрмӕ.

⁷Уыимӕ сын загътон: ‚Алчидӕр уӕ аппарӕд, кӕсынӕй кӕмӕ не ’фсӕдут, йӕ уыцы гуымирытӕ ӕмӕ уӕхи ма чъизи кӕнут Мысыры хуыцаугӕндтӕй. Ӕз дӕн Дунедарӕг, уӕ Хуыцау‘

⁸Фӕлӕ уыдон Мӕ ныхмӕ фесты ӕмӕ Мӕм нӕ байхъуыстой. Ничи сӕ аппӕрста, сӕ мондӕгтӕ кӕмӕй истой, уыцы гуымирытӕ ӕмӕ сӕ Мысыры хуыцаугӕндтыл ничи атигъ кодта йӕхи. Ӕмӕ уӕд загътон, Мӕ маст сыл ныккалдзынӕн ӕмӕ сыл Мӕ азар ныххуырсдзынӕн Мысыры зӕххыл, зӕгъгӕ.

⁹Фӕлӕ Мӕ номы сӕраппонд бакодтон ахӕм хъуыддаг, цӕмӕй Мын ма фауой Мӕ ном, кӕй ӕхсӕн цардысты, уыцы адӕмтӕ, уымӕн ӕмӕ сын уыдоны раз раргом кодтон Мӕхи, Мысыры зӕххӕй сӕ ракӕныны охыл.

¹⁰Ӕз сӕ рахуыдтон Мысыры зӕххӕй ӕмӕ сӕ акодтон ӕдзӕрӕг быдырмӕ.

¹¹Уым сын радтон Мӕ уагӕвӕрдтӕ ӕмӕ сын фехъусын кодтон Мӕ амындтытӕ, цӕмӕй сӕ алы адӕймаг дӕр ӕххӕст кӕна ӕмӕ уый фӕрцы цӕра.

¹²Бафӕдзӕхстон сын Мӕ сабаты уагӕвӕрдтӕ ӕххӕст кӕнын, Мӕн ӕмӕ уыдоны ӕхсӕн фидыды нысанӕн. Уадз ӕмӕ зоной, Ӕз Дунедарӕг кӕй дӕн, уыдоны Чи срухс кӕны, Уый.

¹³Фӕлӕ Израилы адӕм ӕдзӕрӕг ран Мӕ ныхмӕ фесты. Мӕ уагӕвӕрдтӕ Мын не ’ххӕст кодтой, Мӕ амындтытыл Мын суӕлӕхох сты, афтӕмӕй та уыдон, чи сӕ ӕххӕст кӕны, уымӕн цард дӕттынц. Фӕчъизи Мын кодтой Мӕ сабӕттӕ, ӕмӕ Ӕз загътон, ӕдзӕрӕг ран сыл Мӕ азар ныххуырсдзынӕн ӕмӕ сӕ бабын кӕндзынӕн, зӕгъгӕ.

¹⁴Фӕлӕ Мӕ номы сӕраппонд бакодтон ахӕм хъуыддаг, цӕмӕй Мын ма фауой Мӕ ном, кӕй цӕстыты раз сӕ ракодтон, уыцы адӕмтӕ.

¹⁵Уымӕ гӕсгӕ ӕдзӕрӕг быдыры Мӕ къух уӕлӕмӕ систон ӕмӕ сын расомы кодтон, кӕй сӕ нӕ акӕндзынӕн, цы зӕхх сын равзӕрстон — ӕхсыр ӕмӕ мыд кӕцӕй хъары, уырдӕм, ӕппӕт зӕххыты диссагдӕрмӕ.

¹⁶Уымӕн ӕмӕ Мын суӕлӕхох сты Мӕ амындтытыл, Мӕ уагӕвӕрдтӕ Мын не ’ххӕст кодтой, фӕчъизи Мын кодтой Мӕ сабӕттӕ, ӕппӕт зӕрдӕйӕ се ’ргом гуымирыты ’рдӕм сарӕзтой.

¹⁷Фӕлӕ сын Ӕз фӕтӕригъӕд кодтон ӕмӕ сӕ нӕ бабын кодтон, нӕ сӕ ныццагътон ӕдзӕрӕг быдыры.

¹⁸Сӕ фырттӕн сын ӕдзӕрӕг быдыры дзырдтон: Уӕ фыдӕлты ӕгъдӕуттӕм гӕсгӕ ма цӕрут, сӕ уагӕвӕрдтӕ сын ма ӕххӕст кӕнут, уӕхи ма фӕчъизи кӕнут уыдоны хуыцаугӕндтӕй.

¹⁹Ӕз Дунедарӕг дӕн, уӕ Хуыцау, Мӕ фӕдзӕхстытӕм гӕсгӕ цӕрут ӕмӕ Мын ӕнувыдӕй ӕххӕст кӕнут Мӕ уагӕвӕрдтӕ.

²⁰Кад кӕнут Мӕ сабаты уагӕвӕрдтӕн, уымӕн ӕмӕ уыдон сты фидыды нысан Мӕн ӕмӕ сымах ӕхсӕн, цӕмӕй зонат: Ӕз Дунедарӕг дӕн, уӕ Хуыцау“.

²¹Фӕлӕ сӕ фырттӕ дӕр Мӕ ныхмӕ фесты. Мӕ фӕдзӕхстытӕм гӕсгӕ нӕ цардысты, Мӕ уагӕвӕрдтӕ Мын не ’ххӕст кодтой, афтӕмӕй та уыдон, чи сӕ ӕххӕст кӕны, уымӕн цард дӕттынц. Фӕчъизи Мын кодтой Мӕ сабӕттӕ, ӕмӕ загътон, Мӕ азар сыл ныххуырсдзынӕн ӕмӕ сӕ ӕдзӕрӕг быдыры Мӕ маст ныккалдзынӕн, зӕгъгӕ.

²²Фӕлӕ Ӕз Мӕ къух ӕруагътон ӕмӕ Мӕ номы сӕраппонд бакодтон ахӕм хъуыддаг, цӕмӕй Мын ма фауой Мӕ ном, кӕй цӕстыты раз сӕ ракодтон, уыцы адӕмтӕ.

²³Ӕцӕг, ӕдзӕрӕг быдыры Мӕ къух уӕлӕмӕ систон ӕмӕ расомы кодтон, кӕй сӕ ныххӕлиу кӕндзынӕн алы бӕстӕтыл, алы адӕмтыл.

²⁴Уымӕн ӕмӕ Мын не ’ххӕст кодтой Мӕ амындтытӕ, суӕлӕхох сты Мӕ уагӕвӕрдтыл ӕмӕ фӕчъизи кодтой Мӕ сабӕттӕ. Се ’ргом аздӕхтой, сӕ фыдӕлтӕ кӕмӕ куывтой, уыцы гуымирытӕм.

²⁵Уӕд сӕ Ӕз дӕр бауагътон ӕвзӕр — мӕлӕт сын чи хаста, уыцы уагӕвӕрдтӕ ӕххӕст кӕнын,

²⁶сӕ нывӕндтӕй сӕхи фӕчъизи кӕнын — сӕ алы фыццаггуырды арты нывондӕн хӕссын, цӕмӕй сыл бафтауон фыд тас, ӕмӕ базоной, Ӕз Дунедарӕг кӕй дӕн, уый.

²⁷Уымӕ гӕсгӕ Израилы адӕмӕн фехъусын кӕн, адӕймаджы фырт: „Дунедарӕг Хуыцау афтӕ зӕгъы: мӕнӕ ма Мӕ ноджыдӕр куыд ӕфхӕрдтой уӕ фыдӕлтӕ, гадзрахатӕй-иу Мыл рацыдысты.

²⁸Ӕз сӕ ӕрбакодтон, сомы сын ракӕнгӕйӕ, Мӕ къух уӕлӕмӕ сисгӕйӕ, зӕрдӕ кӕмӕй бавӕрдтон, уыцы зӕхмӕ, фӕлӕ адон сӕхицӕн бацагуырдтой алы къуыбыр ӕмӕ алы къабузджын бӕлас, ӕмӕ-иу ахӕм къуыбырыл, кӕнӕ ахӕм бӕласы бын аргӕвстой сӕ нывондӕгтӕ. Уыцы рӕтты-иу ӕрӕвӕрдтой сӕ хуынтӕ, хӕрздӕф буд-иу ссыгътой ӕмӕ калдтой сӕн“.

²⁹Ӕз сӕ фарстон, кӕдӕм ссӕут, уыцы уаз къуыпп уын цы у, зӕгъгӕ. Уӕдӕй абоны онг уыцы къуыпп Бамы ном хӕссы.

³⁰Уымӕ гӕсгӕ Израилы адӕмӕн фехъусын кӕн: „Дунедарӕг Хуыцау афтӕ зӕгъы: уӕ фыдӕлты кӕй фӕзмут, уымӕй уӕхи нӕ чъизи кӕнут, мыййаг? Уыдоны гуымирытӕм кувгӕйӕ, хъахбай митӕ нӕ кӕнут, ӕви?

³¹Лӕвӕрттӕ сын хӕсгӕйӕ ӕмӕ сын уӕ цоты арты нывондӕн судзгӕйӕ, уӕхи фӕчъизи кӕнут уӕ гуымирытӕй. Ӕмӕ ма уый фӕстӕ дзуапп агурут Мӕнӕй, Израилы адӕм? Сомы кӕнын Мӕхицӕй, — зӕгъы Дунедарӕг Хуыцау, — ницы дзуапп уын ратдзынӕн!

³²Сымах дзурут, цӕй ӕмӕ муртаттӕгтау, ӕндӕрбӕстаг адӕмтау, хъӕдтӕм ӕмӕ дуртӕм кувӕм, зӕгъгӕ. Фӕлӕ уӕ хъуыдыйы цы ис, уый уӕ къухы ницы хуызы бафтдзӕн!

³³Сомы кӕнын Мӕхицӕй, — зӕгъы Дунедарӕг Хуыцау, — Мӕ хъомысджын къухӕй, Мӕ рахиз къухӕй уын Ӕз хицауиуӕг кӕндзынӕн, Мӕ азар уыл ӕххуырсгӕйӕ.

³⁴Ракӕндзынӕн уӕ, цы адӕмтӕ ӕмӕ цы бӕстӕтыл ныххӕлиу стут, уырдыгӕй ӕмӕ уӕ ӕрӕмбырд кӕндзынӕн, Мӕ хъомыс ӕвзаргӕйӕ, Мӕ къухӕй ӕвзидгӕйӕ ӕмӕ Мӕ азар ӕххуырсгӕйӕ.

³⁵Акӕндзынӕн уӕ, адӕмты ’хсӕн цы ӕдзӕрӕг быдыр ис, уырдӕм ӕмӕ уын лӕгӕй-лӕгмӕ тӕрхон кӕндзынӕн.

³⁶Уӕ фыдӕлтӕн Мысыры ӕдзӕрӕг быдыры куыд тӕрхон кодтон, афтӕ тӕрхон кӕндзынӕн сымахӕн дӕр, — зӕгъы Дунедарӕг Хуыцау. —

³⁷Рауадздзынӕн уӕ, фыййауы лӕдзӕджы бынты рауадзӕгау, ӕмӕ та уемӕ ногӕй сфидар кӕндзынӕн Мӕ фидыд.

³⁸Сымахӕй фӕхицӕн кӕндзынӕн, Мӕ ныхмӕ чи сыстад, уыцы фыдгӕнджыты. Ракӕндзынӕн сӕ, ӕрцӕуӕггӕгты цардӕй кӕм цӕрынц, уыцы зӕххӕй, фӕлӕ Израилы зӕхмӕ нӕ бацӕудзысты. Ӕмӕ уӕд базондзыстут, Ӕз Дунедарӕг кӕй дӕн, уый.

³⁹Сымах та, Израилы адӕм, — зӕгъы Дунедарӕг Хуыцау, — уӕ гуымирытӕм ацӕут ӕмӕ сын лӕггад кӕнут, кӕд Мӕнмӕ нӕ хъусут, уӕд, фӕлӕ Мын Мӕ уаз ном уӕ лӕвӕрттӕ ӕмӕ уӕ гуымирытӕй мауал фӕчъизи кӕнут.

⁴⁰Уымӕн ӕмӕ Мын Мӕ уаз хохыл, Израилы бӕрзонд хохыл, — зӕгъы Дунедарӕг Хуыцау, — лӕггад кӕндзысты ӕппӕт Израилы адӕм, дунейыл сӕ чидӕриддӕр ис, уыдон. Уым сыл Ӕз ӕхсызгонӕй сӕмбӕлдзынӕн. Уым уын бацагурдзынӕн уӕ хуынтӕ, уӕ хоры сӕртӕ ӕмӕ уе ’ппӕт уаз нывӕндтӕ.

⁴¹Хӕрдӕф будау Мын суыдзыстут ӕхцон, цы адӕмтӕ ӕмӕ цы бӕстӕтыл ныххӕлиу стут, уырдыгӕй уӕ куы ӕрӕмбырд кӕнон, уӕд; афтӕ Ӕз ӕппӕт адӕмтӕн равдисдзынӕн, уаз кӕй дӕн, уый.

⁴²Израилы зӕхмӕ уӕ куы бакӕнон, уӕ фыдӕлтӕн, Мӕ къух уӕлӕмӕ сисгӕйӕ, сомы кӕмӕй ракодтон, уыцы зӕхмӕ, уӕд базондзыстут, Ӕз Дунедарӕг кӕй дӕн, уый.

⁴³Уым ӕрымысдзыстут уе ’ппӕт фӕндӕгтӕ ӕмӕ уе ’ппӕт митӕ, уӕхи-иу кӕмӕй фӕчъизи кодтат, уыдон ӕмӕ уе ’наккаг митыл ӕрхуддзыстут.

⁴⁴Ӕмӕ бамбардзыстут, Ӕз Дунедарӕг кӕй дӕн, уый, уӕ фыдракӕндтӕ ӕмӕ уӕ хъахбай миты тыххӕй цӕй аккаг стут, афтӕ уын куынӕ бакӕнон, фӕлӕ уын Мӕ номы сӕраппонд хорздзинад куы саразон, уӕд, о, Израилы хӕдзар, — зӕгъы Дунедарӕг Хуыцау“».

⁴⁵Дунедарӕг мын загъта:

⁴⁶«Адӕймаджы фырт! Де ’ргом сараз хуссарӕрдӕм, бартхъирӕн кӕн уыцырдӕм ӕмӕ хуссары хъӕдӕн пехуымпар ныхас зӕгъ.

⁴⁷Фехъусын кӕн хуссары хъӕдӕн: байхъус Дунедарӕджы ныхасмӕ, Дунедарӕг Хуыцау афтӕ зӕгъы: „Арт дыл бандзардзынӕн, ӕмӕ дын уый дӕ бӕлӕстӕ, цъӕхӕй, хуыскъӕй, иууылдӕр аныхъуырдзӕн. Пиллонкалгӕ арт нӕ ахуысдзӕн, ӕмӕ алцыдӕр басудздзӕни хуссарӕй цӕгатмӕ.

⁴⁸Уӕд алы адӕймаг дӕр фендзӕн, уыцы ӕнӕахуысгӕ арт Ӕз, Дунедарӕг, кӕй ссыгътон, уый“».

⁴⁹Уӕд ӕз загътон: «О Дунедарӕг Хуыцау! Уайдзӕф мын кӕнынц, ай нын ӕмбисӕндтӕй цы дзуры, зӕгъгӕ».