Read Хуыцауы Дзырд иронау Езекиел 3 Bible Online

Езекиел 3 - Хуыцауы Дзырд иронау bible

Езекиел 3

¹Ӕмӕ мын загъта: «Адӕймаджы фырт! Бахӕр дӕ разы уыцы тухгӕ чиныг, уый фӕстӕ цу ӕмӕ дзургӕ кӕн Израилы адӕмӕн».

²Ӕз мӕ дзых байгом кодтон, ӕмӕ мын Уый бахӕрын кодта уыцы тухгӕ чиныг.

³Загъта мын: «Адӕймаджы фырт! Дӕ гуыбын байдзаг кӕн ӕмӕ дӕхи бафсад, мӕнӕ дын цы тухгӕ чиныг дӕттын, уымӕй». Ӕз бахордтон, ӕмӕ цыма мыд бахордтон, уыйау мӕ дзых садджын.

⁴Уый мын загъта: «Адӕймаджы фырт! Цу Израилы адӕммӕ ӕмӕ сын мӕ ныхӕстӕ фехъусын кӕн.

⁵Зынхатӕн ныхас ӕмӕ къуымых ӕвзаг кӕмӕн ис, ахӕм адӕммӕ дӕ не ’рвыстӕуы, фӕлӕ — Израилы адӕммӕ.

⁶Ӕниу дӕ, зынхатӕн ныхас ӕмӕ къуымых ӕвзаг кӕмӕн ис, ахӕм адӕмтӕм куы арвыстаин, уӕд дӕм уыдон байхъуыстаиккой.

⁷Израилы адӕмы та нӕ бафӕнддзӕни дӕумӕ байхъусын, уымӕн ӕмӕ Мӕ коммӕ нӕ кӕсынц — Израилы адӕм се ’ппӕт дӕр хивӕнд ӕмӕ къӕйных сты.

⁸Фӕлӕ дӕ Ӕз уыдонау хивӕнд ӕмӕ къӕйных скӕндзынӕн.

⁹Алмаси ӕмӕ ӕхсондур куыд фидар сты, афтӕ дӕ сфидар кӕндзынӕн Ӕз. Ма тӕрс, тас дӕ ма бацӕуӕд сӕ разы, уымӕн ӕмӕ уыдон сты змӕнтӕг адӕм».

¹⁰Загъта ма мын: «Адӕймаджы фырт! Цы ныхӕстӕ дын зӕгъын, уыдонмӕ се ’ппӕтмӕ дӕр лӕмбынӕг байхъус ӕмӕ сӕ дӕ зӕрдыл бадар.

¹¹Ацу хаст адӕммӕ, дӕ адӕммӕ, ӕмӕ сын фехъусын кӕн: „Афтӕ зӕгъы Дунедарӕг Хуыцау.“ Хъусдзысты дӕм ӕви нӕ, уымӕ-иу ма кӕс».

¹²Уд мӕ систа, ӕмӕ ӕз мӕ фӕсчъылдымӕй фехъуыстон нӕргӕ хъӕлӕс: «Дунедарӕджы кад арфӕгонд у Йӕ ӕрвон цӕрӕны!»

¹³Ноджы ма фехъуыстон цӕрӕгойты базырты, кӕрӕдзиуыл чи ӕндзӕвы, уыдоны уынӕр, стӕй цӕлхыты гыбар-гыбур цӕрӕгойты раз, уый уыди ӕрвнӕрды уынӕрау.

¹⁴Уд мӕ систа ӕмӕ мӕ ахаста уырдыгӕй. Ӕз цыдтӕн, хъынцъымгӕнгӕйӕ, мӕстӕлгъӕдӕй, уымӕн ӕмӕ мыл Дунедарӕг Йӕ къухы уӕз ӕруагъта.

¹⁵Уӕд бацыдтӕн Кевары доны цур Тел-Авивы цӕрӕг хаст адӕммӕ. Уым баззадтӕн ӕмӕ сӕм авд боны зӕрдӕнкъуыстӕй фӕдӕн.

¹⁶Авд боны фӕстӕ мын Дунедарӕг загъта:

¹⁷«Адӕймаджы фырт! Ӕз дӕ Израилы адӕмӕн сӕвӕрдтон хъахъхъӕнӕгӕй. Мӕ ныхӕстӕм-иу Мын хъус ӕмӕ сын зонд амон Мӕ номӕй.

¹⁸Ӕнаккагӕн, ӕнӕмӕнг амӕлдзынӕ, зӕгъгӕ, куы зӕгъон, ӕмӕ йын ды зонд куынӕ амонай, уыцы ӕнаккаг фӕндагӕй раздӕх ӕмӕ удӕгасӕй баззайдзынӕ, зӕгъгӕ йын куынӕ дзурай, уӕд ӕнаккаг амӕлдзӕни йӕ тӕригъӕды аххосӕй, фӕлӕ йын Ӕз йӕ туг исдзынӕн дӕуӕй.

¹⁹Фӕлӕ кӕд ӕнаккагӕн зонд амыдтай, ӕмӕ уый йӕ фыдракӕндтӕ ӕмӕ йӕ ӕнаккаг фӕндаг нӕ ныууагъта, уӕд амӕлдзӕн йӕ фыдракӕндты аххосӕй, ды та дӕ уд фервӕзын кӕндзынӕ.

²⁰Рӕстгӕнӕг йӕ рӕстадӕй йе ’ргом куы аздаха ӕмӕ фыдракӕнд куы сараза, уӕд ын Ӕз йӕ размӕ цӕлхдур сӕвӕрдзынӕн, ӕмӕ амӕлдзӕн. Зонд ын куынӕ амонай, уӕд амӕлдзӕн йӕ тӕригъӕды аххосӕй, ӕмӕ йӕ рӕстаг хъуыддӕгтӕ нымады дӕр нал уыдзысты, фӕлӕ йын Ӕз йӕ туг дӕуӕй исдзынӕн.

²¹Ӕцӕг, тӕригъӕды ма бацӕуа, зӕгъгӕ, раст адӕймагӕн зонд куы бацамонай, ӕмӕ уый тӕригъӕд ми куынӕ сараза, уӕд удӕгасӕй баззайдзӕни уый дӕр, раст зонд ын кӕй бацамындӕуыд, уый фӕрцы, ӕмӕ ды дӕр дӕ уд фервӕзын кӕндзынӕ».

²²Уыцы ран мыл Дунедарӕг Йӕ арм ӕруагъта ӕмӕ мын загъта: «Марадз, ацу быдырмӕ, Ӕз уым ныхас кӕндзынӕн демӕ».

²³Ӕз сыстадтӕн ӕмӕ быдырмӕ ацыдтӕн, ӕмӕ федтон Дунедарӕджы кад, Кевары доны был ӕй куыд федтон, афтӕ. Ӕмӕ ныддӕлгом дӕн зӕххыл.

²⁴Уд бацыди мӕ мидӕг, слӕууын мӕ кодта мӕ къӕхтыл. Дунедарӕг мын загъта: «Ацу дӕ хӕдзармӕ ӕмӕ дӕхиуыл дуар сӕхгӕн.

²⁵Адӕймаджы фырт! Бӕндӕнтӕй дӕ сбӕтдзысты, ӕмӕ дӕ бон адӕммӕ рацӕуын нал суыдзӕн.

²⁶Ӕз афтӕ бакӕндзынӕн, ӕмӕ Де ’взаг дӕ комарынгыл баныхӕсдзӕн, багомыг уыдзынӕ ӕмӕ сын дӕ бон уайдзӕфтӕ кӕнын нал суыдзӕн, уымӕн ӕмӕ уыдон ӕгоммӕгӕс адӕм сты.

²⁷Фӕлӕ Ӕз демӕ куы сдзурон, уӕд дын дӕ дзых байгом кӕндзынӕн, ӕмӕ сын ды зӕгъдзынӕ: „Афтӕ зӕгъы Дунедарӕг Хуыцау“. Ӕмӕ, байхъусын кӕй фӕнда, уый-иу байхъусӕд, кӕй нӕ фӕнда, уый та-иу ма байхъусӕд, уымӕн ӕмӕ уыдон ӕгоммӕгӕс адӕм сты.