Read Хуыцауы Дзырд иронау Езекиел 31 Bible Online

Езекиел 31 - Хуыцауы Дзырд иронау bible

Езекиел 31

¹Иуӕндӕсӕм азы ӕртыккаг мӕйӕн йӕ фыццаг бон мын Дунедарӕг загъта:

²«Адӕймаджы фырт! Зӕгъ фараонӕн, Мысыры паддзахӕн, стӕй йӕ адӕмӕн: „Кӕимӕ абардзынӕ дӕ хъомыс?

³Бакӕс-ма Ассиримӕ — ливайнаг кедрмӕ[1]; уыд аууондар, йӕ къабузтӕ — рӕсугъд, бӕрзонд — йӕ зӕнг, йӕ цъуппӕй ӕврӕгътыл ныдзӕвыд.

⁴Уый донӕфсӕстӕй рӕзыд, дӕлдзӕхы донӕй ахӕцыд хӕрдмӕ, йӕ дӕттӕ йын ӕртыхстысты йӕ зӕнгыл, ӕппӕт бӕлӕстӕн донхорыг лӕвӕрдта.

⁵О, ацы бӕлас басгуыхти бӕрзонддӕр, стӕй къабузджындӕр хъӕды ӕппӕт бӕлӕстӕй, йӕ къалиутӕ дӕр донӕфсӕстӕй райрӕзтысты.

⁶Алы мӕргътӕ-иу йӕ къалиутыл ахстӕттӕ сбыдтой, йӕ къабузты бын-иу сӕ зӕйц рауагътой алы сырдтӕ, йӕ аууоны-иу ӕрбынат кодтой алы стыр знӕмтӕ.

⁷Куыд диссаджы рӕсугъд уыди, куыд бӕрзонд, куыд даргъ уыдысты йӕ къабузтӕ, уымӕн ӕмӕ стыр дӕтты былгӕрон ауагъта йӕ уидӕгтӕ.

⁸Хуыцауы дыргъдоны кедрты цур дӕр йӕ хуыз нӕ тар кодта. Нӕ уыдысты йӕ къалиуты фидауцӕн кипаристӕ, йӕ къабузты ставдӕн — тӕрс бӕлӕстӕ. Хуыцауы дыргъдоны бӕлӕсты астӕу йӕ рӕсугъдӕн ӕмбал нӕ уыди.

⁹Йӕ бирӕ къабузтӕй йӕ сфӕлыстон Мӕхӕдӕг, хӕлӕг ӕм кодтой Едемы бӕлӕстӕ, Хуыцауы дыргъдоны сагъд чи уыди, уыдон“».

¹⁰Уымӕ гӕсгӕ Дунедарӕг Хуыцау афтӕ зӕгъы: «Бӕрзонд кӕй сырӕзыд, йӕ цъуппӕй ӕврӕгътыл кӕй ӕндзӕвыд ӕмӕ йе стырадӕй кӕй схъал,

¹¹уый тыххӕй Ӕз радтон адӕмты паддзахы къухтӕм, ӕмӕ йын уый бакодта, куыд ын хъуыди, афтӕ. Ӕз ыл Мӕхи атигъ кодтон йе ’наккаг миты аххосӕй.

¹²Акъуырдтой йӕ ӕндӕрбӕстӕгтӕ, адӕмты фыддӕртӕ, ӕмӕ йӕ афӕлдӕхтой хӕхтыл. Ӕппӕт дӕлвӕзтыл адаргъ сты йӕ къабузтӕ, йӕ къалиутӕ ныппырх сты ӕппӕт мӕсчъытыл. Йӕ аууоны цы знӕмтӕ царди, уыдон ӕй ныууагътой ӕмӕ ацыдысты.

¹³Йӕ калд зӕнгыл ын алы мӕргътӕ ӕрбадтысты, йӕ къалиутыл та алы сырдтӕ ӕрцардысты.

¹⁴Уӕдӕ донбыл сагъд бӕлӕстӕй йӕ зӕнджы бӕрзондӕй макӕцы раппӕлӕд ӕмӕ сӕ ӕврӕгъты онг йӕ цъупп макӕцы сисӕд. Дон нуазӕг бӕлӕстӕй йӕхи макӕцы уӕлдӕр кӕнӕд иннӕтӕй, уымӕн ӕмӕ се ’ппӕт дӕр лӕвӕрд ӕрцӕудзысты мӕлӕтмӕ — ингӕнмӕ, мӕрдтыбӕстӕм цы адӕм ныххызтысты, уыдонимӕ».

¹⁵Дунедарӕг Хуыцау афтӕ зӕгъы: «Бӕлас мӕрдтыбӕстӕм куы ныххызт, уӕд ыл Ӕз бахъынцъым кӕнын кодтон ӕгӕрон фурд. Сӕхгӕдтон ӕй, бацауӕзтон ын йӕ цӕугӕдӕттӕ, ӕрлӕууын кодтон стыр дӕттӕ ӕмӕ Ливанӕн ацы бӕласыл сау дарын бафӕдзӕхстон. Хъыг ыл кодтой хъӕды иннӕ бӕлӕстӕ иууылдӕр.

¹⁶Мӕрдтыбӕстӕм ӕй куы ныппӕрстон, ингӕнтӕм чи ныххызти, уыдонмӕ, уӕд йӕ афӕлдӕхты уынӕрӕй нынкъуысыдысты адӕмтӕ, дӕлдзӕхы та ныццин кодтой Едемы ӕппӕт бӕлӕстӕ, стӕй Ливаны кӕддӕры донӕфсӕст ӕвзаргӕ бӕлӕстӕ иууылдӕр.

¹⁷Уымӕн ӕмӕ йӕ цӕдисонтӕ, йӕ аууоны чи цард адӕмты ’хсӕн, уыдон дӕр йемӕ ныххызтысты мӕрдтыбӕстӕм, карды амӕттаг чи баци, уыдонмӕ.

¹⁸Уӕдӕ ды Едемы бӕлӕстӕй кӕй баййӕфтай дӕ кад ӕмӕ дӕ хъомысӕй? Ныр ды дӕр Едемы бӕлӕстау ӕппӕрст ӕрцӕудзынӕ мӕрдтыбӕстӕм ӕмӕ ӕнӕсунӕтты, карды амӕттаг чи баци, уыдоны ’хсӕн лӕзӕрдзынӕ. Уыдон сты фараон ӕмӕ йӕ бирӕ дӕм», — зӕгъы Дунедарӕг Хуыцау.