Read Хуыцауы Дзырд иронау Езекиел 35 Bible Online

Езекиел 35 - Хуыцауы Дзырд иронау bible

Езекиел 35

¹Дунедарӕг мын загъта:

²«Адӕймаджы фырт! Де ’ргом сараз Сеиры хӕхбӕстӕм ӕмӕ пехуымпариуӕг кӕн йӕ ныхмӕ.

³Фехъусын ын кӕн: „Афтӕ зӕгъы Дунедарӕг Хуыцау: Ӕз дӕ ныхмӕ сыстдзынӕн, Сеир! Мӕ къух дӕм сисдзынӕн ӕмӕ дӕ ӕдзӕрӕг быдыр фестын кӕндзынӕн.

⁴Дӕ сахартӕ дын хӕлддзӕгты кӕритӕ фестын кӕндзынӕн; сафтид уыдзынӕ ӕмӕ уӕд базондзынӕ, Ӕз Дунедарӕг кӕй дӕн, уый.

⁵Израилы адӕммӕ де ’нӕуынондзинад ӕнусон кӕй у, уый тыххӕй сӕ ды сӕ бӕллӕхы, сӕ азары бон, карды амӕттаг бакодтай.

⁶Ӕмӕ сомы кӕнын Мӕхицӕй, — зӕгъы Дунедарӕг Хуыцау, — дӕ туджы дӕ фӕмӕцын кӕндзынӕн, тугисджытӕ зилдзысты дӕ фӕдыл. Туг ныккалынмӕ ӕмхиц кӕй уыдтӕ, уый тыххӕй дын дӕхи туг дӕр ӕрцагуырдӕуыдзӕн.

⁷Ӕз Сеиры хӕхбӕстӕ сафтид кӕндзынӕн, афтид ӕмӕ ӕдзӕрӕг тыгъд быдыр фестдзӕни, налдӕр ӕм бацӕуӕг уыдзӕн, налдӕр уырдыгӕй рацӕуӕг.

⁸Йӕ къӕдзӕхтӕ йын байдзаг кӕндзынӕн мӕрдтӕй. Карды амӕттаг-иу чи фӕуа, уыдон хаудзысты дӕ къуыбыртыл, дӕ дӕлвӕзты ӕмӕ де ’ппӕт мӕсчъыты.

⁹Мыггагмӕ дӕ ӕдзӕрӕг быдыр фестын кӕндзынӕн, дӕ сахарты никуыуал ничи ӕрцӕрдзӕн, ӕмӕ уӕд базондзыстут, Ӕз Дунедарӕг кӕй дӕн, уый.

¹⁰Афтӕ кӕй дзырдтай, ацы дыууӕ адӕмы ӕмӕ ацы дыууӕ бӕстӕйы мӕн уыдзысты ӕмӕ сӕ нӕхи бакӕндзыстӕм, зӕгъгӕ, — афтӕмӕй та уым Дунедарӕг царди, —

¹¹уый тыххӕй Ӕз сомы кӕнын Мӕхицӕй, — зӕгъы Дунедарӕг Хуыцау, — цы ӕнӕуынондзинад ӕмӕ сӕм цы хӕлӕгдзинад равдыстай, уымӕ гӕсгӕ дын стӕрхон кӕндзынӕн. Уыдонӕн та Мӕхи раргом кӕндзынӕн, дӕуӕн куы тӕрхон кӕнон, уӕд.

¹²Ӕмӕ базондзынӕ, Ӕз, Дунедарӕг, кӕй фехъуыстон, ды Израилы хӕхтӕн куыд фидис кодтай, ныггӕныстон сты ӕмӕ нӕ амӕттаг баисты, зӕгъгӕ, уый.

¹³Уӕхицӕй ӕппӕлыдыстут Мӕ разы, уе ’взӕгтӕ суагътат Мӕ ныхмӕ. Ӕз алцыдӕр фехъуыстон.

¹⁴Дунедарӕг Хуыцау афтӕ зӕгъы: Израилы зӕхх цинӕй куы райа, уӕд дӕу та ӕдзӕрӕг быдыр фестын кӕндзынӕн.

¹⁵Израилы исбон куы ныггӕныстон, уӕд ды ууыл кӕй цин кодтай, уый тыххӕй дын Ӕз афтӕ бакӕндзынӕн, ӕмӕ ды дӕр, Сеиры хох, заууатмӕ ӕрцӕудзынӕ, стӕй ӕппӕт Едом. Ӕмӕ уӕд базондзысты, Ӕз Дунедарӕг кӕй дӕн, уый“».