Read Хуыцауы Дзырд иронау Езекиел 37 Bible Online

Езекиел 37 - Хуыцауы Дзырд иронау bible

Езекиел 37

¹Дунедарӕг мыл ӕруагъта Йӕ арм, Йӕ Уды хъомысӕй мӕ систа ӕмӕ мӕ дӕлвӕзы астӕу сӕвӕрдта. Дӕлвӕз йедзаг уыди стджытӕй.

²Сӕ алывӕрсты мӕ ӕрзилын кодта: дӕлвӕзы уыди ӕнӕнымӕц стджытӕ ӕмӕ тынг ныххус сты.

³Загъта мын: «Адӕймаджы фырт! Ацы стджытӕ райгас уыдзысты, цымӕ?» Ӕз ын дзуапп радтон: «Дунедарӕг Хуыцау! Уый Ды зоныс ӕрмӕстдӕр».

⁴Уӕд мын Уый загъта: «Ацы стджыты тыххӕй пехуымпар ныхас фехъусын кӕн, зӕгъ сын: „Уӕ, хус стджытӕ, ӕрбайхъусут Дунедарӕджы ныхасмӕ.

⁵Афтӕ зӕгъы Дунедарӕг Хуыцау: Ӕз уын уӕ мидӕг царды комулӕфт бауадздзынӕн, ӕмӕ райгас уыдзыстут.

⁶Нуӕрттӕй уӕ бамбӕрздзынӕн, буар уыл ӕрзайын кӕндзынӕн, уый уӕлӕ та — царм; царды комулӕфт уын ратдзынӕн, ӕмӕ райгас уыдзыстут. Уӕд базондзыстут, Ӕз Дунедарӕг кӕй дӕн, уый“».

⁷Ӕз бардзырдмӕ гӕсгӕ фехъусын кодтон рагуац, ӕмӕ, пехуымпариуӕг куы кодтон, уӕд райхъуысти уынӕр, стджытӕ базмӕлыдысты ӕмӕ байдыдтой кӕрӕдзиимӕ иу кӕнын, стӕг — стӕгимӕ.

⁸Ӕмӕ ӕз федтон: фӕзынди сыл нуӕрттӕ, ӕрзади сыл буар, уый уӕлӕ та — царм, фӕлӕ царды комулӕфт нӕма уыди сӕ мидӕг.

⁹Дунедарӕг мын загъта: «Адӕймаджы фырт! Царды комулӕфты тыххӕй рагуац фехъусын кӕн, пехуымпариуӕг кӕн: „Афтӕ зӕгъы Дунедарӕг Хуыцау: царды комулӕфт, цыппар дымгӕйӕ фӕзын ӕмӕ ацы мӕрдтыл раулӕф, цӕмӕй райгас уой“».

¹⁰Ӕз Дунедарӕджы бардзырдмӕ гӕсгӕ фехъусын кодтон рагуац, ӕмӕ сӕ мидӕг царды комулӕфт бацыд, райгас сты ӕмӕ слӕууыдысты сӕ къӕхтыл — тынг бирӕ, ӕнӕнымӕц бирӕ ӕфсад.

¹¹Дунедарӕг мын загъта: «Адӕймаджы фырт! Ацы стджытӕ сты Израилы ӕппӕт адӕм. Уыдон дзурынц, зӕгъгӕ, бахус сты не стджытӕ, асасти нӕ ныфс, не сӕфт ӕрцыд».

¹²Уымӕ гӕсгӕ сын рагуац фехъусын кӕн. Зӕгъ сын: «Дунедарӕг Хуыцау афтӕ зӕгъы: Мӕ адӕм, Ӕз уын уӕ ингӕнтӕ байгом кӕндзынӕн, сисдзынӕн уӕ уырдыгӕй ӕмӕ уӕ Израилы зӕхмӕ ӕрбакӕндзынӕн.

¹³Ӕмӕ сымах базондзыстут, Ӕз Дунедарӕг кӕй дӕн, уый, уӕ ингӕнтӕ уын куы байгом кӕнон ӕмӕ уӕ уырдыгӕй куы сисон, уӕд.

¹⁴Мӕ комулӕфт уын бауадздзынӕн уӕ мидӕг, ӕмӕ райгас уыдзыстут. Ӕз уӕ ӕрцӕрын кӕндзынӕн уӕ зӕххыл, ӕмӕ уӕд базондзыстут, афтӕ Ӕз, Дунедарӕг, кӕй загътон ӕмӕ Мӕ ныхас кӕй сӕххӕст кодтон, уый», — зӕгъы Дунедарӕг.

¹⁵Дунедарӕг мын загъта:

¹⁶«Уӕ, адӕймаджы фырт, райс лӕдзӕг ӕмӕ йыл ныффысс: „Иудӕйӕн ӕмӕ йе ’мцӕдисон израилӕгтӕн“. Ноджы ма иу лӕдзӕг райс ӕмӕ ууыл та ныффысс: „Йосеф, Ефрем ӕмӕ Израилы иннӕ адӕмӕн, се ’мцӕдисонтӕн“.

¹⁷Баиу кӕн дыууӕ лӕдзӕджы, дӕ къухы иу куыд уой, афтӕ.

¹⁸Де ’мбӕстӕгтӕ дӕ куы фӕрсой, дӕ къухы уый цы амоны, зӕгъгӕ,

¹⁹уӕд-иу сын зӕгъ: Дунедарӕг Хуыцау афтӕ зӕгъы: Ӕз райсдзынӕн Йосефы лӕдзӕг, Ефрем ӕмӕ йе ’мцӕдисон израилаг хӕдзарвӕндӕгты къухы чи ис, уый, Иудӕйы лӕдзӕгимӕ йӕ баиу кӕндзынӕн ӕмӕ сӕ сараздзынӕн иу лӕдзӕг, баиу уыдзысты Мӕ къухы.

²⁰Цы дыууӕ лӕдзӕгыл ныффыссай, уыдон сӕ разы дӕ къухмӕ куы райсай,

²¹уӕд-иу сын зӕгъ: „Дунедарӕг Хуыцау афтӕ зӕгъы: израилӕгты ракӕндзынӕн, ӕцӕгӕлон адӕмты ’хсӕн кӕм цӕрынц, уырдыгӕй, ӕрӕмбырд сӕ кӕндзынӕн алырдыгӕй ӕмӕ сӕ ӕрбакӕндзынӕн сӕ зӕхмӕ.

²²Уыцы зӕххыл сӕ, Израилы хӕхтыл, иу адӕм скӕндзынӕн, се ’ппӕтӕн дӕр уыдзӕнис иу паддзах, ӕмӕ дыууӕ адӕмы нал уыдзысты, уӕдӕй фӕстӕмӕ дыууӕ паддзахадыл нал дих кӕндзысты.

²³Сӕхи нал фӕчъизи кӕндзысты сӕ хуыцаугӕндтӕм ӕмӕ сӕ гуымирытӕм кувынӕй, сӕ алы фыдракӕндӕй. Суӕгъд сӕ кӕндзынӕн, тӕригъӕды кӕм цыдысты, сӕ уыцы цӕрӕнбынӕттӕй, ссыгъдӕг сӕ кӕндзынӕн, ӕмӕ уыдон суыдзысты Мӕ адӕм, Ӕз та — сӕ Хуыцау.

²⁴Мӕ цагъар Давид суыдзӕни сӕ паддзах, се ’ппӕты фыййау, ӕмӕ Мын ӕххӕст кӕндзысты Мӕ уагӕвӕрдтӕ, нымайдзысты ӕмӕ ӕххӕст кӕндзысты Мӕ амындтытӕ.

²⁵Цӕрдзысты, Мӕ цагъар Йаковӕн цы зӕхх радтон, сӕ фыдӕлтӕ кӕм цардысты, ууыл. Уым мыггагмӕ цӕрдзысты сӕхӕдӕг дӕр, сӕ байзӕддаг дӕр ӕмӕ сӕ байзӕддаджы байзӕддаг дӕр. Мӕ цагъар Давид та мыггагмӕ уыдзӕни сӕ фӕтӕг.

²⁶Ӕз семӕ сараздзынӕн мыггагмӕйы фидыд, ӕмӕ сын уый фарн ӕрхӕсдзӕни. Сбирӕ сӕ кӕндзынӕн ӕмӕ сын сӕ астӕу мыггагмӕ сӕвӕрдзынӕн Мӕ Кувӕндон.

²⁷Уыдонмӕ уыдзӕни Мӕ цӕрӕн, ӕмӕ Ӕз уыдзынӕн сӕ Хуыцау, уыдон та — Мӕ адӕм.

²⁸Ӕцӕгӕлон адӕмтӕ куы феной, Мӕ Кувӕндон Израилы астӕу сӕвӕрдтон, уый, уӕд базондзысты, Ӕз Дунедарӕг кӕй дӕн, Израилы адӕмы Йӕхицӕн уаз Чи кӕны, Уый“».