Read Хуыцауы Дзырд иронау Езекиел 4 Bible Online

Езекиел 4 - Хуыцауы Дзырд иронау bible

Езекиел 4

¹Ды та, адӕймаджы фырт, райс агуыридур, дӕ разы йӕ ӕрӕвӕр ӕмӕ йыл скӕн Йерусалимы хахныв.

²Стӕй йыл ӕрхъула кӕн, йӕ ныхмӕ йын хӕцӕн мӕсыг сараз, сыджытбыру самай, хӕстон асадӕн скӕн йӕ ныхмӕ ӕмӕ йын йӕ алыварс сис фӕлдахӕн сармадзантӕ ӕрӕвӕр.

³Уый фӕстӕ райс алгъац ӕмӕ йӕ ӕфсӕн сисау дӕу ӕмӕ сахары астӕу ӕрӕвӕр, стӕй де ’ргом хӕстӕввонгӕй сахарырдӕм сараз ӕмӕ йыл ӕрхъула кӕн. Уый Израилы адӕмӕн уыдзӕни нысан.

⁴Ды та-иу дӕ галиуфарсыл-ӕрхуысс ӕмӕ-иу дӕхиуыл Израилы адӕмы тӕригъӕд сӕвӕр. Дӕ фарсыл цал боны фӕхуыссай, уал боны сӕ тӕригъӕдтӕ уыдзысты дӕ уӕлӕ.

⁵Тӕригъӕдтӕ цал азы фӕкодтой, уал боны дын снысан кодтон — ӕртӕ сӕдӕ нӕуӕдз боны хӕсдзынӕ дӕ уӕлӕ Израилы адӕмы тӕригъӕд.

⁶Уый куы сӕххӕст кӕнай, уӕд-иу дыккаг хатт ӕрхуысс — ныр та дӕ рахизфарсыл, ӕмӕ Иудейы адӕмы азым хӕсс дыууиссӕдз боны, азы ныхмӕ дын Ӕз снысан кодтон бон.

⁷Де ’ргом ӕмӕ дӕ дысфӕлдӕхт къух ӕрхъулагонд Йерусалимы ’рдӕм сараз ӕмӕ пехуымпариуӕг кӕн йӕ ныхмӕ.

⁸Мӕнӕ дыл Ӕз сӕвӕрдзынӕн рӕхыстӕ ӕмӕ дӕ иу фарсӕй иннӕмӕ разилын дӕ бон не суыдзӕн, цалынмӕ дӕ ӕрхъулайы бонтӕ фӕуой, уӕдмӕ.

⁹Дӕхицӕн райс мӕнӕу, хъӕбӕрхор, хъӕдур, тъӕпӕн хъӕдур, еуу ӕмӕ нӕлмӕнӕу. Иу мигӕнӕны сӕ ныккӕн ӕмӕ дзы дӕхицӕн цъаргӕндтӕ сфыц, дӕ фарсыл цы бонтӕ хуыссай, уыдоны нымӕцмӕ гӕсгӕ. Хӕрдзынӕ сӕ ӕртӕсӕдӕ нӕуӕдз боны.

¹⁰Дӕ хойрагӕй-иу алы бон дӕр — боны дӕргъы — хӕр ссӕдз шекелы бӕрц.

¹¹Дон дӕр-иу нуаз барстӕй, боны дӕргъы — гины иу ӕхсӕзӕймаг хай.

¹²Хӕр-иу хъӕбӕрхоры цъаргӕндтӕ ӕмӕ-иу сӕ ӕппӕт адӕмы цӕстыты раз фыц адӕймаджы ӕппарӕнтыл».

¹³Дунедарӕг ма Йӕ ныхасыл бафтыдта: «Афтӕ израилӕгтӕ, цы адӕмтӕм сӕ фӕсурон, уыдоны ’хсӕн хӕрдзысты сӕ чъизи хойраг».

¹⁴Уӕд ӕз загътон: «О Дунедарӕг Хуыцау! Ӕз мӕхи никуыма фӕчъизи кодтон. Нӕдӕр холы, нӕдӕр, сырдтӕ кӕй ныттыдтой, ахӕм дзидза никуы бахордтон ме ’взонгӕй нырмӕ. Ницы чъизи фыд схастон мӕ дзыхмӕ».

¹⁵Уый мын загъта: «Ӕз дын бар дӕттын адӕймаджы ӕппарӕнты бӕсты хъуджы фаджыс райсын, ӕмӕ-иу ууыл фыц дӕ дзул».

¹⁶Ноджы ма мын загъта: «Адӕймаджы фырт! Ӕз Йерусалимы хойраджы ӕвӕрӕнтӕ скуынӕг кӕндзынӕн. Сӕ къӕбӕр катайгӕнгӕ хӕрдзысты барстӕй, сӕ дон дӕр тӕрсгӕ-ризгӕйӕ барстӕй нуаздзысты.

¹⁷Уымӕн ӕмӕ хъуаг ӕййафдзысты къӕбӕр ӕмӕ донӕй. Сӕ алкӕй дӕр тас бацӕудзӕн, ӕмӕ баруайдзысты сӕ тӕригъӕдты аххосӕй.