Read Хуыцауы Дзырд иронау Езекиел 41 Bible Online

Езекиел 41 - Хуыцауы Дзырд иронау bible

Езекиел 41

¹1-2 Уый фӕстӕ мӕ уыцы лӕг бакодта Кувӕндонмӕ ӕмӕ йӕ сбарста. Йӕ бацӕуӕны уӕрх уыди дӕс ӕлмӕрины, бацӕуӕнӕн йӕ фӕйнӕфарс къулты дӕргъ — фӕйнӕ фондз ӕлмӕрины, йӕ цӕджындзты бӕзн та — фӕйнӕ ӕхсӕз ӕлмӕрины. Кувӕндонӕн мидӕгӕй йӕ дӕргъ уыди цыппор ӕлмӕрины, йӕ уӕрх та — ссӕдз ӕлмӕрины.

³Уыцы лӕг бацыди Кувӕндоны рӕбинаг агъуысты размӕ ӕмӕ йын сбарста йӕ бацӕуӕны цӕджындзтӕ. Сӕ уӕрх уыдис ӕхсӕз ӕлмӕрины, бацӕуӕнӕн йӕ фӕйнӕфарс къулты дӕргъ — фӕйнӕ авд ӕлмӕрины, сӕ бӕзн та, къултӕн дӕр ӕмӕ бацӕуӕны цӕджындзтӕн дӕр, — дыууӕ ӕлмӕрины.

⁴Рӕбинаг агъуыстӕн сбарста йӕ дӕргъ ӕмӕ йӕ уӕрх, ӕмӕ дыууӕрдӕм дӕр уыди фӕйнӕ ссӕдз ӕлмӕрины, Кувӕндонӕн йӕ уӕрхы хуызӕн. Загъта мын: «Уый у Рухсмонуат».

⁵Уый фӕстӕ уыцы лӕг сбарста Кувӕндоны къулты бӕзн, ӕмӕ уыди ӕхсӕз ӕлмӕрины. Кувӕндоны алыварс, ӕртӕрдыгӕй уыди фӕрссаг хатӕнтӕ, сӕ уӕрх — фӕйнӕ цыппар ӕлмӕрины.

⁶Фӕрссаг хатӕнтӕ нымадӕй уыдысты ӕртын ӕртӕ, хатӕн хатӕны ӕмкъул, се ’ппӕт дӕр цыдысты Кувӕндонӕн йе ’ртӕ къулы рӕбынты, семӕ уыдысты баст, фӕлӕ сыл не ’ндзӕвыдысты.

⁷Кувӕндоны агъуыст алырдыгӕй, хӕрдмӕ куыд цыди, афтӕ кодта уӕрӕхӕй-уӕрӕхдӕр, фӕрссаг хатӕнты фӕрцы, ӕмӕ уымӕ гӕсгӕ уӕле уӕрӕхдӕр уыди. Бинаг уӕладзыгӕй уӕллаг уӕладзыгмӕ ссӕуын хъуыдис астӕуккаг уӕладзыгыл.

⁸Кувӕндоны бындуры ӕз федтон бӕрзонд ӕвӕрд астӕрд, фӕрссаг хатӕнтӕн дӕр сӕ бындуры уый уыди, йӕ бӕрзӕнд — ӕхсӕз ӕлмӕрины.

⁹9-10 Фӕрссаг хатӕнты ӕддаг къулӕн йӕ бӕзн уыди фондз ӕлмӕрины. Кувӕндоны фӕрссаг хатӕнты ӕмӕ сауджынты хатӕнты ’хсӕн цы тыгъдад уыди, уымӕн йӕ уӕрх — ссӕдз ӕлмӕрины.

¹¹Астӕрды гом тыгъдадӕй фӕрссаг хатӕнтӕм уыди дыууӕ дуары, иу цӕгатӕрдыгӕй, иннӕ та хуссарӕрдыгӕй. Хатӕнты алыварс астӕрдӕн йӕ уӕрх уыди фондз ӕлмӕрины.

¹²Кувӕндонӕн йӕ ныгуылӕнварс цы фӕз уыд, уый ӕмарӕн цыди бӕстыхай, йӕ уӕрх — ӕвдай ӕлмӕрины, йӕ дӕргъ та — нӕуӕдз ӕлмӕрины. Уыцы бӕстыхайӕн йӕ къулты бӕзн уыди фондз ӕлмӕрины.

¹³13-15 Уӕд, чи мӕ ӕрбакодта, уыцы лӕг сбарста Кувӕндоны бӕстыхӕйтты ӕппӕт фӕзахст. Кувӕндон ӕмӕ йе ’фтуанагъуысты дӕргъ уыди сӕдӕ ӕлмӕрины, йӕ уӕрх дӕр, йӕ алыварс фӕзимӕ — сӕдӕ ӕлмӕрины. Афтӕмӕй барст ӕрцыди алцыдӕр: Кувӕндоны хуылф, тыргъ,

¹⁶астӕрдӕй хӕрдмӕ, рудзгуыты онг чи ссыд, уыцы хъӕдын уӕлхуыд фӕлыст, ӕртывазыг фӕлгӕтджын рудзгуытӕ,

¹⁷Кувӕндонмӕ бацӕуӕн кулдуары сӕрмӕ къул, уыимӕ ӕппӕт Кувӕндон — мидӕгӕй дӕр ӕмӕ ӕдде дӕр;

¹⁸конд ӕрцыдысты херувимтӕ, стӕй пальмӕты нывӕфтыдтӕ: дыууӕ херувимы ӕхсӕн — пальмӕ, алы херувимӕн дӕр — дыууӕ цӕсгомы.

¹⁹Иуырдыгӕй пальмӕмӕ кӕсы адӕймаджы цӕсгом, иннӕрдыгӕй та — домбайы цӕсгом; ахӕм нывӕфтыдтӕ Кувӕндоны конд ӕрцыдысты алырдыгӕй.

²⁰Херувимтӕ ӕмӕ пальмӕты нывӕфтыдтӕ конд уыди мидкувӕндоны ӕппӕт къултыл дӕр, астӕрдӕй Кувӕндонмӕ бацӕуӕны уӕлкъӕсӕры онг.

²¹Кувӕндонмӕ бацӕуӕны дуарӕн уыди цыппаркъӕпхӕнон тарвӕзтӕ, иу тарваз — иннӕйы мидӕг, Рухсмонуаты бацӕуӕны дӕр афтӕ.

²²Уыди дзы хъӕдын нывондхӕссӕн, йӕ бӕрзӕнд — ӕртӕ ӕлмӕрины, йӕ дӕргъ ӕмӕ йӕ уӕрх та — фӕйнӕ дыууӕ ӕлмӕрины. Йӕ тигътӕ дӕр, йӕ бын дӕр ӕмӕ йӕ къултӕ дӕр уыдысты хъӕдӕй конд. Чи мӕ ӕрбакодта, уыцы лӕг мын загъта: «Уый, Дунедарӕджы раз чи лӕууы, уыцы фынг у».

²³23-24 Кувӕндонмӕ ӕмӕ Рухсмонуатмӕ бацӕуӕнтӕн уыди дывӕлдах дуӕрттӕ, ӕвдузӕнтыл зилгӕ дыгай базыртимӕ.

²⁵Кувӕндонӕн йӕ дуӕрттыл дӕр уыди херувимтӕ ӕмӕ пальмӕты нывӕфтыдтӕ конд, къултыл куыд уыдис, афтӕ. Тыргъмӕ бацӕуӕны сӕрмӕ та ӕдде уыди аууондар тапка.

²⁶Тыргъы фӕйнӕфарс къултӕй кастысты рудзгуытӕ, уыдон уыдысты пальмӕты нывӕфтыдтӕй фӕлыст.