Read Хуыцауы Дзырд иронау Езекиел 46 Bible Online

Езекиел 46 - Хуыцауы Дзырд иронау bible

Езекиел 46

¹Афтӕ зӕгъы Дунедарӕг Хуыцау: «Мидӕггаг кӕрты скӕсӕнварс кулдуар кусгӕ бонты, ӕхсӕз боны дӕргъы, ӕхгӕд уыдзӕн, фӕлӕ сабаты, стӕй мӕйноджы бӕрӕгбоны уыдзӕни гом.

²Фӕтӕг-иу бацӕуӕд кулдуары раз ӕддаг тыргъыл ӕмӕ-иу ӕрлӕууӕд кулдуары цӕджындзты раз. Сауджынтӕ-иу ын ӕрхӕссӕнт йӕ иууылсудзинаг ӕмӕ йӕ фидыды нывонд, уый та-иу кулдуары раз бакувӕд Дунедарӕгмӕ ӕмӕ рацӕуӕд. Кулдуар-иу изӕрмӕ ӕхгӕд ма ӕрцӕуӕд.

³Бӕстӕйы адӕм-иу, кулдуарыл бахизыны размӕ, Дунедарӕгмӕ бакувӕнт, сабаты дӕр ӕмӕ мӕйноджы бӕрӕгбоны дӕр.

⁴Адӕмы фӕтӕг-иу Дунедарӕгӕн сабаты ӕрхӕссӕд иууылсудзинӕгтӕ: ӕхсӕз ӕнӕсахъат фысы ӕмӕ иу ӕнӕсахъат фыр.

⁵Хойраджы хуынӕн-иу фыр-нывондимӕ ӕрхӕссӕд ссады иу ефӕ, алы уӕрыккимӕ та — йӕ къух цас амона, уый бӕрц, стӕй ссады ефӕимӕ — оливӕйы сойы иу гин.

⁶Мӕйноджы бӕрӕгбоны-иу галты дзугӕй нывондӕн ӕрхӕссӕд ӕнӕсахъат гал, стӕй уӕрыччы ӕмӕ иу фыр, уыдон дӕр ӕнӕсахъат куыд уой, афтӕ.

⁷Хойраджы хуынӕн-иу гал-нывондимӕ ӕрхӕссӕд ссады иу ефӕ, фыр-нывондимӕ дӕр — афтӕ, алы уӕрыккимӕ та — йӕ къух цас амона, уый бӕрц, стӕй ссады ефӕимӕ — оливӕйы сойы иу гин.

⁸Адӕмы фӕтӕг-иу куы ’рбацӕуа, уӕд-иу мидӕмӕ бацӕуӕд кулдуары раз тыргъыл, ӕддемӕ дӕр-иу рацӕуӕд афтӕ.

⁹Бӕстӕйы адӕм бӕрӕгбӕтты заман Дунедарӕджы размӕ куы цӕуой, уӕд, бакувынмӕ цӕгатварс кулдуарыл чи бацӕуа, уый-иу фӕстӕмӕ та рацӕуӕд хуссарварс кулдуарыл, хуссарварс кулдуарыл чи бацӕуа, уый та-иу фӕстӕмӕ рацӕуӕд цӕгатварс кулдуарыл. Мидӕмӕ цы кулдуарыл бацыд, ууыл-иу ма рацӕуӕд фӕстӕмӕ, фӕлӕ рацӕуӕд уымӕн йӕ бакомкоммӕ кулдуарыл.

¹⁰Адӕмы фӕтӕг семӕ хъуамӕ уа. Адӕм куы бацӕуой, уӕд-иу бацӕуӕд уый дӕр, куы рацӕуой, уӕд та-иу уый дӕр рацӕуӕд.

¹¹Бӕрӕгбӕтты заман-иу адӕмы фӕтӕг гал-нывондимӕ ӕмӕ фыр-нывондимӕ хойраджы хуынтӕн ӕрхӕссӕд ссады фӕйнӕ ефӕйы, уӕрыччытимӕ та — йӕ къух цас амона, уый бӕрц, стӕй ссады ефӕимӕ — оливӕйы сойы иу гин.

¹²Адӕмы фӕтӕг Дунедарӕгӕн иууылсудзинаг кӕнӕ фидыды нывонд бархийӕ ӕрхӕссинаг куы уа, уӕд-иу ын байгом кӕнӕнт скӕсӕйнаг кулдуар, ӕмӕ-иу, сабаты куыд бакодта, афтӕ ӕрхӕссӕд йӕ иууылсудзинаг ӕмӕ йӕ фидыды нывонд, уый фӕстӕ-иу рацӕуӕд. Куы рацӕуа, уӕд-иу кулдуар ӕхгӕд ӕрцӕуӕд йӕ фӕдыл.

¹³Алы бон дӕр-иу, ӕрвылрайсом, Дунедарӕгӕн иууылсудзинагӕн ӕрхӕсс афӕдздзыд уӕрыкк.

¹⁴Алы райсом дӕр ыл хойраджы хуынӕн ӕфтау ссады ефӕйы ӕхсӕзӕм хай ӕмӕ оливӕйы сойы гины ӕртыццаг хай, ссад сызмӕнтынӕн. Уый у ӕрвылбоны уагӕвӕрд мыггагмӕ, Дунедарӕгӕн хойраджы хуын хӕссыны тыххӕй.

¹⁵Ӕрвылрайсом дӕр иууылсудзинагӕн хӕссын хъӕуы фыс, стӕй хойраджы хуын ӕмӕ оливӕйы сой».

¹⁶Афтӕ зӕгъы Дунедарӕг Хуыцау: «Адӕмы фӕтӕг йӕ исбонӕй йӕ фырттӕй искӕмӕн лӕвар куы ракӕна, уӕд уыцы лӕвар дарддӕр ӕрхаудзӕни уый фырттӕм дӕр. Афтӕмӕй уыцы исбон суыдзӕни фыдӕй-фыртмӕйы исбон.

¹⁷Йӕ исбонӕй йӕ цагъартӕй искӕмӕн куы ралӕвар кӕна, уӕд цагъары хай уыдзӕни ссӕрибары афӕдзы онг, стӕй фӕстӕмӕ суыдзӕн адӕмы фӕтӕджы исбон. Афтӕмӕй йӕ исбон ӕрмӕст йӕ фыртты хай суыдзӕн.

¹⁸Ӕцӕг, фӕтӕгӕн йӕ бон нӕу адӕмы исбонӕй райсын, сӕ зӕххытӕй сӕ сурын. Йӕ фырттӕн йӕ бон дӕттын у ӕрмӕст йӕхи исбонӕй, Мӕ адӕмӕй та йӕ зӕххы хайӕ никӕй ӕмбӕлы сурын».

¹⁹Кулдуары фарсмӕ бацӕуӕныл мӕ уыцы лӕг бакодта сауджынтӕн лӕвӕрд уаз агъуыстытӕм, се ’ргом цӕгатӕрдӕм арӕзт кӕмӕн уыд, уыдонмӕ. Се ’ппӕты кӕрон, ныгуылӕнварсӕрдыгӕй, уыдис иу бынат.

²⁰Уыцы лӕг мын загъта: «Сауджынтӕ ацы бынаты фыцдзысты фиддоны ӕмӕ тӕригъӕды нывӕндтӕ, стӕй хойраджы хуынтӕ. Ӕддаг кӕртмӕ дзы ницы рахӕсдзысты, цӕмӕй адӕмӕй, уаз цы у, ууыл мачи бандзӕва».

²¹Уыцы лӕг мӕ ракодта ӕддаг кӕртмӕ, бакодта мӕ кӕртӕн йӕ цыппар къуыммӕ дӕр, ӕмӕ йын йӕ алы къуымы дӕр ма федтон фӕйнӕ кӕрты.

²²Кӕрты къуымты уыди фӕйнӕ сӕрӕмбӕрзт кӕрты. Уыдонӕй алкӕцыдӕр дӕргъмӕ уыди дыууиссӕдз ӕлмӕрины, уӕрхмӕ та — дӕс ӕмӕ ссӕдз. Афтӕмӕй, цыппар къуымы кӕртытӕ уыдысты ӕмиӕстӕ.

²³Алы кӕртӕн дӕр йӕ алыварс уыди быру, быруйы ӕмкъул та алырдыгӕй — къонатӕ.

²⁴Уыцы лӕг мын загъта: «Адон сты, Кувӕндоны лӕггадгӕнджытӕ адӕмы нывӕндтӕ кӕм фыцынц, уыцы цӕлгӕнӕнтӕ».