Read Хуыцауы Дзырд иронау Езекиел 8 Bible Online

Езекиел 8 - Хуыцауы Дзырд иронау bible

Езекиел 8

¹Ӕхсӕзӕм аз, ӕхсӕзӕм мӕйӕн йӕ фӕндзӕм бон, ӕз бадтӕн мӕ хӕдзары, Иудейы хистӕртӕ дӕр — мӕ разы, ӕмӕ мыл уым Дунедарӕг Хуыцауы къух бандзӕвыд.

²Ӕз федтон: мӕнӕ чидӕр — адӕймаджы хуызӕн, астӕуӕй дӕлӕмӕ — артӕнгӕс, астӕуӕй уӕлӕмӕ та — цӕхӕркалгӕ згъӕрау.

³Ӕрбадардта мӕм къухы хуызӕн цыдӕр, мӕ сӕрыхъуынтӕй мӕ фелвӕста. Уд мӕ арв ӕмӕ зӕххы астӕумӕ систа ӕмӕ мӕ Хуыцауӕй лӕвӕрд цӕстылуайӕны ӕрхаста Йерусалиммӕ, йе ’ргом цӕгатӕрдӕм арӕзт кӕмӕн уыд, уыцы мидӕггаг кулдуары цурмӕ. Уым лӕууыди, Дунедарӕгӕн Йӕ маст кӕмӕ сыгъди, уыцы гуымиры.

⁴Уым мын раргом ис Израилы Хуыцауы кад, быдыры кӕй федтон, уый ӕнгӕс.

⁵Дунедарӕг мын загъта: «Адӕймаджы фырт! Акӕс-ма цӕгатӕрдӕм». Ӕз акастӕн цӕгатӕрдӕм ӕмӕ нывондхӕссӕны кулдуары цур цӕгатӕрдыгӕй федтон, бацӕуӕны тӕккӕ раз чи лӕууыд, уыцы зӕрдӕхсайды гуымирыйы.

⁶Дунедарӕг мын загъта: «Адӕймаджы фырт! Федтай, цытӕ аразынц, уый? Уыныс, Израилы адӕм ацы ран цытӕ аразынц, уый? Ӕвирхъау ӕлгъаг митӕ кӕнынц, цӕмӕй Ӕз Мӕ Кувӕндон ныууадзон. Фӕлӕ кӕс дарддӕр, ӕмӕ ноджы фыддӕр ӕлгъаг митӕ фендзынӕ».

⁷Дунедарӕг мӕ бакодта кӕрты дуармӕ, ӕмӕ уым къулы федтон хуынкъ.

⁸Дунедарӕг мын загъта: «Адӕймаджы фырт! Бакъах-ма къул». Ӕз бакъахтон къул ӕмӕ федтон цавӕрдӕр дуар.

⁹Дунедарӕг мын афтӕ зӕгъы: «Бацу ӕмӕ фен, ацы бынаты цы ’лгъаг митӕ кӕнынц, уый».

¹⁰Ӕз бацыдтӕн ӕмӕ къултыл федтон алы хилӕгойты ӕмӕ ӕлгъаг цӕрӕгойты нывтӕ, стӕй, Израилы адӕм кӕмӕ куывтой, уыцы алыхуызон гуымирыты нывтӕ.

¹¹Израилы хистӕртӕй ӕвдайы бӕрц лӕууыдысты сӕ разы, Шафаны фырт Иазани дӕр се ’хсӕн, афтӕмӕй. Алкӕй къухы дӕр сӕ уыди будсудзӕн, ӕмӕ буды хӕрздӕфы къуыбылӕйттӕ хӕрдмӕ цыдысты.

¹²Дунедарӕг мын загъта: «Уыныс, адӕймаг, Израилы хистӕртӕй алчидӕр талынджы, йӕ гуымирыты нывтӕй фӕлыст уаты, цытӕ кӕны, уый? Уыдон дзурынц, Дунедарӕг мах нӕ уыны, зӕгъгӕ, Йӕхи, дам, атигъ кодта ацы зӕххыл».

¹³Ноджы мын загъта: «Кӕс дарддӕр ӕмӕ ноджы фыддӕр ӕлгъаг митӕ фендзынӕ».

¹⁴Стӕй мӕ бакодта Дунедарӕджы Кувӕндоны кулдуары цурмӕ, йе ’ргом цӕгатӕрдӕм арӕзт кӕмӕн уыди, уымӕ. Уыцы ран бадтысты сылгоймӕгтӕ ӕмӕ куыдтой Таммуз-хуыцауы[1] мӕлӕтыл.

¹⁵Дунедарӕг мын загъта: «Уыныс, адӕймаг? Кӕс дарддӕр ӕмӕ ноджы фыддӕр ӕлгъаг митӕ фендзынӕ».

¹⁶Дунедарӕг мӕ бакодта Кувӕндоны мидӕггаг кӕртмӕ, ӕмӕ дын мӕнӕ Дунедарӕджы Кувӕндоны къӕсӕрмӕ, тыргътӕй нывондхӕссӕны ’хсӕн, фондз ӕмӕ ссӕдз лӕджы лӕууы. Сӕ чъылдымтӕ сарӕзтой Дунедарӕджы Кувӕндонмӕ, се ’ргом та хурыскӕсӕнмӕ ӕмӕ хурыскӕсӕнӕрдӕм хурӕн куывтой.

¹⁷Дунедарӕг мын загъта: «Уыныс, адӕймаг? Иудейы адӕм ацы ран цы ’лгъаг митӕ кӕнынц, уыдон сын фаг не сты! Нӕ фӕлӕ ма ӕгас бӕстӕ байдзаг кодтой фыдмитӕй ӕмӕ Мын ноджы тынгдӕр ссыгътой Мӕ маст. Кӕс-ма, къалиутӕ сӕ фындзтӕм куыд схӕссынц, уымӕ.

¹⁸Уыдӕтты тыххӕй сыл Ӕз Мӕ маст ныххуырсдзынӕн. Мӕ цӕст сын нӕ фӕтӕригъӕд кӕндзӕн ӕмӕ сын нӕ ныббардзынӕн. Хъӕрӕй Мӕм куы дзыназой, уӕд дӕр сӕ нӕ фехъусдзынӕн».