Read Хуыцауы Дзырд иронау Осиа 12 Bible Online

Осиа 12 - Хуыцауы Дзырд иронау bible

Осиа 12

¹Ефрем хизы дымгӕ, скӕсӕйнаг дымгӕйы фӕдыл зилы, бонӕй-бонмӕ фылдӕр кӕнынц мӕнгдзинад ӕмӕ тыхми. Ассиримӕ цӕдисонтӕ систы, оливӕйы сой ӕрвитынц Мысырмӕ.

²Фӕлӕ Дунедарӕг Иудӕимӕ дӕр тӕрхон кӕны. Уый Йаковы йӕ фӕндӕгтӕм гӕсгӕ бафхӕрдзӕн, йӕ хъуыддӕгтӕм гӕсгӕ йын бафиддзӕн.

³Йӕ мады гуыбыны дӕр йе ’фсымӕры зӕвӕтмӕ лӕбурдта, куы бахъомыл ис, уӕд та Хуыцауимӕ хъӕбысӕй хӕцыд.

⁴Уый зӕдимӕ хӕцыд ӕмӕ фӕуӕлахиз, лӕгъстӕ йын кодта, йӕ цӕссыг калгӕйӕ. Дунедарӕг ӕй ссардта Вефилы ӕмӕ уым ныхас кодта немӕ.

⁵Дунедарӕг та у Уӕларвӕфсады Бардарӕг, Дунедарӕг — Йӕ ном.

⁶Уӕдӕ раздӕх дӕ Хуыцаумӕ, Йӕ хорзӕх ӕмӕ Йын Йӕ раст тӕрхоныл ӕууӕнд, дӕ зӕрдӕ дар кӕддӕриддӕр Хуыцауыл.

⁷Хананейаг йӕ сайаг тӕрӕзтимӕ уарзы ӕфхӕрын,

⁸Ефрем та дзуры: «Схъӕздыг дӕн ӕз, бирӕ мулк ӕрӕмбырд кодтон, фӕлӕ мӕ къухы цыдӕриддӕр бафтыд — ницы фыдракӕнд, ницы тӕригъӕд мӕм ис!»

⁹Фӕлӕ Ӕз, Дунедарӕг, Мысыры зӕххыл ма куы уыдыстут, уӕдӕй абоны онг дӕн дӕ Хуыцау, ӕмӕ дӕ Ӕз, бӕрӕгбоны-иу куыд уыдис, афтӕ ногӕй халагъудты ӕрцӕрын кӕндзынӕн.

¹⁰Ӕз пехуымпартӕн хъусын кодтон Мӕ ныхас, бирӕ цӕстылуайӕнтӕ сын ӕвдыстон, пехуымпарты уылты ӕмбисӕндтӕ хастон.

¹¹Галаады фӕзынди фыддзинад, йӕ цӕрджытӕ дзӕгъӕл змӕлдыл систы. Гилгалы нывондӕн хастой галтӕ, фӕлӕ сӕ нывондхӕссӕнтӕ, быдыры ауӕдзыл цы дуррӕдзӕгъдтӕ самайынц, уыдонау суыдзысты.

¹²Йаков алыгъди Сиримӕ, ирӕды сӕрмӕ фыййауӕй фӕцыди Израил.

¹³Пехуымпары руаджы Дунедарӕг Израилы ракодта Мысырӕй, пехуымпары руаджы йыл дардта Йӕ арм.

¹⁴Ефрем тынг смӕсты кодта Дунедарӕджы йӕхимӕ, ӕмӕ йын Дунедарӕг, цы туг ныккалдта, уый тыххӕй аккаг фӕуыдзӕни, фидиссаг ӕй фӕкӕндзӕн.