Read Хуыцауы Дзырд иронау Ионӕ 3 Bible Online

Ионӕ 3 - Хуыцауы Дзырд иронау bible

Ионӕ 3

¹Дунедарӕг Ионӕйӕн дыккаг хатт загъта:

²«Марадз, хъуыстгонд стыр сахар Ниневимӕ ацу ӕмӕ адӕмӕн, Ӕз дын цы зӕгъын, уый фехъусын кӕн».

³Ионӕ байхъуыста Дунедарӕджы ныхасмӕ, срӕвдз кодта йӕхи ӕмӕ араст ис Ниневимӕ. Ниневи уыди стыр сахар, йӕ иу кӕронӕй иннӕмӕ — ӕртӕ боны цыд.

⁴Ионӕ сахары цӕуын байдыдта, боны дӕргъы йын-иу цас бантысти, уыйас, ӕмӕ адӕмӕн Хуыцауы ныхас хъусын кодта: «Дыууиссӕдз боны ма — ӕмӕ Ниневи ныппырх уыдзӕн!»

⁵Ӕмӕ ниневиӕгтӕ баууӕндыдысты Хуыцауыл: стырӕй, чысылӕй ком дардтой, сӕ уӕлӕ скодтой сӕхъис.

⁶Хабар Ниневийы паддзахмӕ байхъуысти, уый сыстад йӕ къӕлӕтджынӕй, йӕ дарӕс раласта, сӕхъис скодта йӕ уӕлӕ ӕмӕ фӕнычы сбадти.

⁷Стӕй уӕд бардзырд радта йӕхи ӕмӕ йӕ номдзыд адӕймӕгты номӕй: «Ниневийы адӕм, стурвос, лыстӕг фос дӕр мацы хӕргӕ хъуамӕ кӕной, мацы — нуазгӕ,

⁸Цӕмӕй адӕймагӕй, фосӕй ӕмбӕрзт уой уыцы пӕлӕзтӕй, цӕмӕй адӕм Хуыцаумӕ тынг кувын байдайой, цӕмӕй алчи йӕ рӕдыд фӕндагӕй рахиза, фыдбылыз макӕмӕнуал кӕна.

⁹Чи зоны, кӕд нын Хуыцау фӕтӕригъӕд кӕнид, Йӕ судзгӕ мастӕй нӕ бахизид ӕмӕ кӕд нӕ фесӕфиккам».

¹⁰Ӕмӕ федта Хуыцау, адӕм сӕ рӕдыд фӕндагӕй кӕй рахызтысты, уый, бӕллӕх ӕруадзинаг сыл кӕй уыдис, уымӕй сын фӕтӕригъӕд кодта ӕмӕ йӕ нал ӕруагъта.