Read Хуыцауы Дзырд иронау Нымӕцтӕ 10 Bible Online

Нымӕцтӕ 10 - Хуыцауы Дзырд иронау bible

Нымӕцтӕ 10

¹Дунедарӕг Моисейӕн загъта:

²«Рацӕгъд дӕхицӕн дыууӕ ӕвзист сыкъауадындзы, ӕмӕ дын ахъаз уыдзысты дзыллӕмӕ фӕсидынӕн ӕмӕ рӕсӕнуӕттӕ сӕ бынатӕй фенкъуысын кӕнынӕн.

³Дыууӕ уадындзы уастмӕ дӕм ӕгас дзыллӕ дӕр хъуамӕ Фембӕлды Цатыры къӕсӕрмӕ ӕрбалӕууа,

⁴сӕ иуы уастмӕ та хъуамӕ ӕрбамбырд уой ӕрмӕстдӕр фӕтӕгтӕ, Израилы мингӕйтты раздзӕуджытӕ.

⁵Сыкъауадындзтӕ фӕдисы уаст куы ныккӕной, уӕд сӕ фӕндаг дарӕнт, скӕсӕны чи лӕууыд, уыцы ӕфсӕдтӕ;

⁶сыкъауадындзтӕ дыккаг хатт куы ныккӕной фӕдисы уаст, уӕд та, хуссары чи лӕууыд, уыдон фӕдисы уастмӕ сӕ бынатӕй фенкъуысынц.

⁷Ӕмбырдмӕ сидгӕйӕ дӕр сыкъауадындзтӕй уасгӕ у, ӕрмӕст хуымӕтӕджы уаст.

⁸Аароны фырттӕ, сауджынтӕ, уасӕнт сыкъауадындзтӕй; уый уын — мыггагмӕйы уагӕвӕрд, фӕлтӕрӕй-фӕлтӕрмӕ.

⁹Знаг уӕм куы ӕрбабырса ӕмӕ йӕ ныхмӕ куы хӕцат уӕ зӕххыл, уӕд-иу фӕдисы уаст ныккӕнут сыкъауадындзтӕй, ӕмӕ Йӕ зӕрдыл ӕрбалӕудзыстут Дунедарӕгӕн, уӕ Хуыцауӕн, ӕмӕ фервӕздзыстут уе знӕгтӕй.

¹⁰Уӕ цины бонты, уӕ бӕрӕгбӕтты ӕмӕ уӕ алы мӕйноджы, сыкъауадындзтӕй уасут, иууылсудзинаг нывӕндтӕ ӕмӕ фидыды нывӕндтӕ хӕсгӕйӕ, ӕмӕ-иу уый фӕрцы Йӕ зӕрдыл ӕрлӕудзыстут Дунедарӕгӕн, уӕ Хуыцауӕн; Ӕз — Дунедарӕг, уӕ Хуыцау».

¹¹Дыккаг азӕн йӕ дыккаг мӕйы ссӕдзӕм бон мигъ йӕхи систа Фембӕлды Цатырӕй,

¹²ӕмӕ араст сты израилӕгтӕ Синайы ӕдзӕрӕг быдырӕй. Параны ӕдзӕрӕг быдыры мигъ йӕхи ӕруагъта.

¹³Уӕд фыццаг хатт сыстадысты сӕ бынатӕй, Дунедарӕг Моисейӕн куыд бафӕдзӕхста, афтӕ.

¹⁴Фыццаг уал, къорд къорды фӕдыл, араст ис Иудӕйы байзӕддӕгты ӕфсад, сӕ разӕй — Нахшон, Аминадавы фырт.

¹⁵Иссахары байзӕддӕгты ӕфсадӕн сӕ разӕй — Нетанел, Цуары фырт.

¹⁶Зевулоны байзӕддӕгты ӕфсадӕн — Елиав, Хелоны фырт.

¹⁷Уый фӕстӕ ист ӕрцыди Уаз Цӕрӕн. Гершоны фырттӕ ӕмӕ Мерарийы фырттӕ систой Уаз Цӕрӕн ӕмӕ сӕ фӕндаг адардтой.

¹⁸Уый фӕстӕ, къорд къорды фӕдыл, йӕ бынатӕй фенкъуысти Рувимы ӕфсад, сӕ разӕй — Елицур, Шедеуры фырт.

¹⁹Симеоны байзӕддӕгты ӕфсады разӕй — Шелумиел, Цуришаддайы фырт;

²⁰Гады байзӕддӕгты ӕфсады разӕй — Елйасаф, Деуелы фырт.

²¹Уый фӕстӕ Кехаты байзӕддӕгтӕ уаз дзауматӕ систой ӕмӕ сӕ фӕндаг адардтой. (Сӕ бацыдмӕ Уаз Цӕрӕн хъуамӕ ног бынаты ӕвӕрд ӕрцыдаид.)

²²Уый фӕстӕ, къорд къорды фӕдыл, араст ис Ефремы байзӕддӕгты ӕфсад, сӕ разӕй — Елишама, Аммиуды фырт.

²³Менассиайы байзӕддӕгты ӕфсады разӕй — Гамлиел, Педацуры фырт.

²⁴Бениамины байзӕддӕгты ӕфсады разӕй — Авидан, Гидеонийы фырт.

²⁵Ӕппӕты фӕстӕ йӕ бынатӕй, къорд къорды фӕдыл, фенкъуысти Даны байзӕддӕгты ӕфсад, йӕ разӕй — Ахиезер, Амишаддайы фырт.

²⁶Асиры байзӕддӕгты ӕфсады разӕй — Пагиел, Охраны фырт.

²⁷Неффалимы байзӕддӕгты ӕфсады разӕй — Ахира, Енаны фырт.

²⁸Уый — израилӕгты цыды фӕтк фӕндагыл, къорд къорды фӕдыл.

²⁹Моисей загъта Ховавӕн, Реуелы фыртӕн, йӕ мидианаг каисӕн: «Мах цӕуӕм, Дунедарӕг нын раттынӕй зӕрдӕ цы бӕстӕй бавӕрдта, уырдӕм. Цом махимӕ, ӕмӕ дын хорзы бацӕудзыстӕм, уымӕн ӕмӕ Дунедарӕг Израилӕн бирӕ хӕрзтӕй зӕрдӕ бавӕрдта».

³⁰Фӕлӕ уый загъта: «Нӕ цӕуын, фӕлтау мӕхи бӕстӕм, мӕ фыды зӕхмӕ аздӕхдзынӕн».

³¹Моисей йын загъта: «Ма нӕ ныууадз! Ды ӕдзӕрӕг быдыры, рӕсӕнуатӕн чи бӕззы, ахӕм бынӕттӕ хорз зоныс ӕмӕ нын фӕндаг бацамон.

³²Немӕ куы ацӕуай, уӕд дӕу дӕр, Дунедарӕгӕй нӕ цы хорзӕх уа, уымӕй схайджын кӕндзыстӕм».

³³Араст сты Дунедарӕджы хохӕй ӕмӕ ӕртӕ боны фӕцыдысты. Дунедарӕджы Фидыды Чырын ӕртӕ бонцауы раздӕр цыди сӕ разӕй, цӕмӕй сын, ӕхсӕв кӕм ӕрлӕууой, уыцы бынӕттӕ амона.

³⁴Боныгон-иу рӕсӕнуатӕй куы рацыдысты, уӕд та Дунедарӕджы мигъ уыди сӕ сӕрмӕ.

³⁵Фидыды Чырын-иу куы фезмӕлыди, уӕд-иу Моисей загъта: «Раст, Дунедарӕг! Ныххӕлиу уӕнт де знӕгтӕ, Дӕ разӕй лидзӕнт Дӕ фыдгултӕ!»

³⁶Фидыды Чырын-иу куы ’рлӕууыд, уӕд та дзырдта: «Раздӕх, ӕнӕнымӕц израилӕгты Дунедарӕг!»