Read Хуыцауы Дзырд иронау Нымӕцтӕ 12 Bible Online

Нымӕцтӕ 12 - Хуыцауы Дзырд иронау bible

Нымӕцтӕ 12

¹Моисейӕн йӕ ус уыди эфиопаг, ӕмӕ йын Мариам ӕмӕ Аарон уый йӕ цӕстмӕ дардтой.

²Уыдон дзырдтой: «Исты ӕрмӕст Моисеимӕ уыди Йӕ ныхас Дунедарӕгӕн? Ау, махимӕ дӕр нӕ ныхас кодта?» Ӕмӕ фехъуыста уый Дунедарӕг.

³Моисейы хуызӕн сабыр адӕймаг та зӕххыл нӕ уыд.

⁴Ӕмӕ загъта Дунедарӕг ӕваст Моисей, Аарон ӕмӕ Мариамӕн: «Цӕугӕут-ма ӕртӕйӕ дӕр Фембӕлды Цатырмӕ». Ацыдысты се ’ртӕ дӕр,

⁵ӕмӕ сӕм раргом ис Дунедарӕг мигъы цӕджындзы, Цатыры бахизӕны ныллӕууыд ӕмӕ басидт Йӕхимӕ Аарон ӕмӕ Мариаммӕ. Куы Йӕм бахӕстӕг сты, уӕд

⁶Дунедарӕг загъта: «Байхъусут мӕ ныхӕстӕм: Кӕд уе ’хсӕн Дунедарӕджы пехуымпар вӕййы, уӕд ӕм Ӕз йӕ цӕстылуайӕнты раргом кӕнын Мӕхи, фыны фӕдзурын йемӕ.

⁷Мӕ цагъар Моисейы хъуыддаг та ӕндӕр у: уый алцӕмӕй дӕр иузӕрдион у Мӕныл Мӕ Хӕдзары.

⁸Уыци-уыцитӕй нӕ, фӕлӕ ӕргом, лӕгӕй-лӕгмӕ дзурын Ӕз йемӕ; уый Дунедарӕджы сурӕт йӕ цӕстӕй куы уыны, уӕд куыд бауӕндыдыстут сымах Мӕ цагъары, Моисейы, ныхмӕ дзурын?»

⁹Дунедарӕджы маст сӕм рафыхт, ӕмӕ Йӕхи уырдыгӕй айста.

¹⁰Ӕврагъ Цатырӕй адард ис, Мариамы буар та хъотырӕй митау урс адардта. Аарон бакасти Мариаммӕ ӕмӕ федта, къахӕй сӕрмӕ йыл хъотыр кӕй ис, уый.

¹¹Ӕмӕ Аарон загъта Моисейӕн: «Мӕ хицау! Ма нӕ бафхӕр — не ’нӕзондӕй бацыдыстӕм тӕригъӕды.

¹²Ма ’руадз уый, цӕмӕй Мариам, йӕ мады гуыбынӕй ӕрдӕгӕмбыдӕй чи рацӕуы, уыцы мардӕйгуырд сабийы хуызӕн суа».

¹³Ӕмӕ сдзынӕзта Моисей Дунедарӕгмӕ: «О Хуыцау, курын Дӕ, сдзӕбӕх ӕй кӕн!»

¹⁴Ӕмӕ загъта Дунедарӕг Моисейӕн: «Йӕ фыд ын йӕ цӕсгомыл куы бату кӕнид, уӕд авд боны дӕргъы фыр ӕфсӕрмӕй йӕхи не ’мбӕхсид? Авд боны дӕргъы рӕсӕнуаты ӕдде фӕуӕд ӕмӕ-иу уый фӕстӕ ӕрбацӕуӕд».

¹⁵Ӕмӕ рӕсӕнуаты ӕдде фӕкодтой Мариамы авд боны ӕмгъуыдмӕ. Йе ’рбаздӕхынмӕ израилӕгтӕ сӕ фӕндагыл нӕ ацыдысты.