Read Хуыцауы Дзырд иронау Нымӕцтӕ 15 Bible Online

Нымӕцтӕ 15 - Хуыцауы Дзырд иронау bible

Нымӕцтӕ 15

²«Израилӕгтӕн фехъусын кӕн: кӕм цӕрдзыстут, уыцы бӕстӕм куы бацӕуат, Ӕз уын кӕй дӕттын, уыцы бӕстӕм

³ӕмӕ Дунедарӕгӕн уе стуртӕ кӕнӕ уӕ фысвосӕй нывӕндтӕ куы хӕссат — иууылсудзинаг нывонд уа ӕви сомыйы нывонд, бархийы нывонд, бӕрӕгбоны фӕдыл ӕви ӕндӕр исты нывонд — Дунедарӕгӕн ӕхцон хӕрздӕфӕн куы судзат,

⁴уӕд Дунедарӕджы нывондимӕ ӕнӕмӕнг хъуамӕ хойраджы хуын дӕр уа: мӕнӕуы ссады ефӕйы дӕсӕймаг хай оливӕйы сойы гины цыппӕрӕм хаимӕ змӕстӕй.

⁵Иууылсудзинаг нывонд ӕмӕ кусӕрттаг уӕрыккимӕ ӕмбӕлы ӕрбахӕссын сӕн дӕр — гины цыппӕрӕм хай.

⁶Нывондаг фыримӕ хойраджы хуынӕн ӕрбахӕссын ӕмбӕлы мӕнӕуы ссады ефӕйы дыууӕ дӕсӕймаг хайы оливӕйы сойы гины ӕртыццаг хаимӕ змӕстӕй,

⁷гины ӕртыццаг хай та сӕн. Уый уыдзӕни Дунедарӕгӕн ӕхцон хӕрздӕф.

⁸Нывондаг галимӕ — Дунедарӕджы иууылсудзинаг уа, сомыйы нывонд уа ӕви фидыды нывонд —

⁹хойраджы хуынӕн ӕрбахӕссын ӕмбӕлы мӕнӕуы ссады ефӕйы ӕртӕ дӕсӕймаг хайы гины ӕмбис оливӕйы соимӕ змӕстӕй,

¹⁰гины ӕрдӕг та сӕн. Уый уыдзӕни арты нывонд Дунедарӕгӕн, ӕхцон хӕрздӕф.

¹¹Афтӕ кӕнын уын ӕмбӕлы кӕддӕриддӕр, нывондӕн куы хӕссат гал кӕнӕ фыр, уӕрыкк кӕнӕ сӕныкк.

¹²Цал нывонды ӕрхӕссат, уал хъуамӕ уа семӕ хойраджы хуынтӕ ӕмӕ сӕн дӕр.

¹³Алы бынӕттон цӕрӕг дӕр хъуамӕ афтӕ кӕна, Дунедарӕгӕн ӕхцон хӕрздӕфӕн арты нывонд куы хӕсса, уӕд.

¹⁴Ӕрцӕуӕггаг исчи уе ’хсӕн кӕнӕ уӕ байзӕддӕгты ’хсӕн куы цӕра ӕмӕ йӕ Дунедарӕгӕн ӕхцон хӕрздӕфӕн арты нывонд ӕрхӕссын куы бафӕнда, уӕд уый дӕр хъуамӕ алцыдӕр, сымах куыд кӕнут, афтӕ бакӕна.

¹⁵Ӕхсӕнады фӕтк иу у сымахӕн дӕр ӕмӕ ӕрцӕуӕггӕгтӕн дӕр. Уый уын — мыггагмӕйы уагӕвӕрд, ӕмӕ йӕ ӕххӕст кӕнут фыдӕй-фыртмӕ. Дунедарӕджы раз ӕрцӕуӕггаг дӕр хъуамӕ кӕна, сымах куыд кӕнут, афтӕ.

¹⁶Иу ӕгъдау ӕмӕ иу уагӕвӕрд ис сымахӕн дӕр ӕмӕ уе ’хсӕн цӕрӕг ногӕрлидзджытӕн дӕр».

¹⁷Дунедарӕг Моисейӕн загъта:

¹⁸«Фӕдзур израилӕгтӕм ӕмӕ сын зӕгъ: Ӕз уӕ цы бӕстӕм кӕнын, уырдӕм куы бацӕуат

¹⁹ӕмӕ уыцы зӕххы хойраг куы хӕрат, уӕд-иу Дунедарӕджы ном арут.

²⁰Ног хоры ссады сӕртӕй-иу Мын гуыл скӕнут, цыма мусы лӕвар у, афтӕ.

²¹Уӕ хыссӕйы сӕртӕй конд гуылӕй кувут Дунедарӕгӕн фыдӕй-фыртмӕ.

²²Дунедарӕг Моисейӕн кӕй фехъусын кодта, уыцы фӕдзӕхстытӕй искӕцы ӕнӕрхъуыдыйӕ куынӕ сӕххӕст кӕнат,

²³Моисейӕн уын цы бафӕдзӕхста, уыдӕттӕй исты, уӕд уын мӕнӕ афтӕ кӕнын ӕмбӕлы (Дунедарӕг ацы бардзырд куы радта, уыцы бонӕй фӕстӕмӕ кӕддӕриддӕр, фыдӕй-фыртмӕ).

²⁴Кӕд ӕмӕ дзыллӕйы аххосӕй ӕрцыди рӕдыд, уӕд дзыллӕ иумӕйагӕй ӕрхӕссӕд иууылсудзинаг нывонд — гал, Дунедарӕгӕн ӕхцон хӕрздӕфӕн, хойраджы хуын ӕмӕ сӕнимӕ, стӕй тӕригъӕды нывондӕн — сӕгъ.

²⁵Ссыгъдӕг кӕнӕд сауджын ӕппӕт израилӕгты дзыллӕ, ӕмӕ сын хатыр уыдзӕн: рӕдыд ӕрцыд, ӕмӕ уыцы рӕдыды тыххӕй уыдон арты нывонд ӕрхастой Дунедарӕгӕн, стӕй ма тӕригъӕды нывонд дӕр ӕрхастой Дунедарӕджы раз.

²⁶Хатыр уыдзӕн ӕппӕт израилӕгты дзыллӕйӕн ӕмӕ се ’хсӕн цӕрӕг ӕрцӕуӕггӕгтӕн, уымӕн ӕмӕ ӕнӕбары ӕруагътой рӕдыд ӕппӕт адӕм.

²⁷Иу исчи ӕнӕбары куы ӕруадза рӕдыд, уӕд та цӕугуист ӕрхӕссӕд тӕригъӕды нывондӕн.

²⁸Ӕгъдаумӕ гӕсгӕ ссыгъдӕг кӕнӕд сауджын Дунедарӕджы раз, ӕнӕбары чи фӕрӕдыд, уыцы адӕймаджы. Ссыгъдӕг ӕй кӕндзӕн ӕгъдаумӕ гӕсгӕ, ӕмӕ уыцы адӕймагӕн хатыргонд уыдзӕн йӕ тӕригъӕд.

²⁹Иу уагӕвӕрд уӕм хъуамӕ уа, чи фӕрӕдийа, уыдонӕн: израилаг бынӕттон цӕрджытӕн дӕр ӕмӕ се ’хсӕн цӕрӕг ӕцӕгӕлӕттӕн дӕр.

³⁰Фӕлӕ зонгӕ-зонын куы бакӕна тӕригъӕд ми адӕймаг, уӕд, бынӕттон цӕрӕг уа ӕви ӕрцӕуӕггаг, уый уымӕй Дунедарӕджы ӕфхӕры, ӕмӕ йӕ адӕмӕй фӕхъӕудзӕн.

³¹Уый Дунедарӕджы ныхас ницӕмӕ ӕрдардта, Йӕ фӕдзӕхсты сӕрты Йын ахызт, ӕмӕ йӕ адӕмы ’хсӕнӕй фӕхъӕудзӕн, йӕ тӕригъӕд бафиддзӕн».

³²Израилӕгтӕ ӕдзӕрӕг быдыры куы уыдысты, уӕд амбӕлдысты, сабатбон сугтӕ чи ӕмбырд кодта, ахӕм лӕгыл.

³³Сугтӕ ӕмбырдгӕнгӕ йӕ чи баййӕфта, уыдон ӕй Моисей, Аарон ӕмӕ ӕппӕт дзыллӕйы размӕ ӕрбакодтой.

³⁴Ахӕстоны йӕ баппӕрстой, цы гӕнгӕ йын у, уымӕн уагӕвӕрд кӕй нӕ уыди, уымӕ гӕсгӕ.

³⁵Дунедарӕг загъта Моисейӕн: «Ацы адӕймаг маринаг у. Дзыллӕ йӕ дурты бын фӕкӕнӕнт рӕсӕнуаты ӕдде».

³⁶Ракодтой йӕ дзыллӕ иумӕ рӕсӕнуатӕй ӕмӕ йӕ, Дунедарӕг Моисейӕн куыд загъта, афтӕ дурты бын фӕкодтой.

³⁷Дунедарӕг загъта Моисейӕн:

³⁸«Фехъусын кӕн израилӕгтӕн: сӕ дарӕсты кӕрӕтты хъуамӕ цупӕлттӕ кӕной фыдӕй-фыртмӕ, уыцы цупӕлтты ӕрвхуыз ӕндахӕй хау куыд уа, афтӕмӕй.

³⁹Цӕмӕй-иу уыцы цупӕлттӕм гӕсгӕ уӕ зӕрдыл ӕрлӕууой Дунедарӕджы ӕппӕт фӕдзӕхстытӕ, ӕххӕст сӕ кӕнат ӕмӕ уӕ ма сайой хъахбайдзинадмӕ уӕ зӕрдӕ ӕмӕ уӕ цӕстытӕ.

⁴⁰Уӕ зӕрдыл дардзыстут ӕмӕ ӕххӕст кӕндзыстут Мӕ фӕдзӕхстытӕ ӕмӕ уӕ Хуыцауы раз сыгъдӕг уыдзыстут.

⁴¹Ӕз — Дунедарӕг, уӕ Хуыцау, цӕмӕй уӕ Хуыцау уа, уый тыххӕй уӕ Мысырӕй Чи ракодта, Уый. Ӕз — Дунедарӕг, уӕ Хуыцау».