Read Хуыцауы Дзырд иронау Нымӕцтӕ 20 Bible Online

Нымӕцтӕ 20 - Хуыцауы Дзырд иронау bible

Нымӕцтӕ 20

¹Фыццаг мӕйы мӕйноджы израилӕгтӕ Цины ӕдзӕрӕг быдырмӕ бахӕццӕ сты. Дзыллӕ Кадешы ӕрлӕууыдысты. Уыцы ран Мариам амард, ӕмӕ йӕ уым баныгӕдтой.

²Дзыллӕ донхъуаг ӕййӕфтой, ӕмӕ Моисей ӕмӕ Аароныл ӕртыгуыр сты.

³Моисеимӕ загъд кодтой: «Фӕлтау мах дӕр Дунедарӕджы раз куы ӕрбамардаиккам не ’фсымӕртау!

⁴Цӕмӕн ӕрбакодтат ды ӕмӕ Аарон Дунедарӕджы дзыллӕйы ацы ӕдзӕрӕг быдырмӕ? Цӕмӕй нӕхӕдӕг дӕр ӕмӕ нӕ фос дӕр ам амӕлӕм?

⁵Цӕмӕн нӕ ракодтат Мысырӕй ацы ӕлгъыст ранмӕ, исты байтауӕн кӕм нӕй, легъуи, сӕнӕфсир, гранат кӕм нӕ зайы, уырдӕм? Дон дӕр дзы куы нӕй нуазынӕн!»

⁶Моисей ӕмӕ Аарон адӕмы ӕмбырдӕй ныууагътой, Фембӕлды Цатыры размӕ ацыдысты ӕмӕ сӕ зонгуытыл ӕрхаудтой. Дунедарӕджы кад сӕм Йӕхи равдыста,

⁷ӕмӕ Дунедарӕг Моисейӕн загъта:

⁸«Райс мӕнӕ ацы лӕдзӕг, ӕмӕ де ’фсымӕр Ааронимӕ дзыллӕйы ӕрбамбырд кӕнут. Стӕй, иууылдӕр уӕ куыд уыной, афтӕмӕй къӕдзӕхӕн зӕгъут, дон ратт, зӕгъгӕ. Къӕдзӕхы хуылфӕй сын ды дон самал кӕндзынӕ сӕхицӕн дӕр ӕмӕ сӕ фосӕн дӕр».

⁹Моисей Дунедарӕджы разӕй, куыд ын загъта, афтӕ лӕдзӕг райста.

¹⁰Ӕрбамбырд кодтой Моисей ӕмӕ Аарон адӕмы къӕдзӕхы размӕ, ӕмӕ сын Моисей загъта: «Ӕрбайхъусут-ма, ӕнӕсӕттонтӕ! Ау, ныр уын хъуамӕ мӕнӕ ацы къӕдзӕхӕй рауадзӕм дон?»

¹¹Уыцы ныхӕстимӕ Моисей йӕ лӕдзӕгӕй дыууӕ хатты ныццавта къӕдзӕх. Къӕдзӕхӕй уый бӕрц дон фемӕхст, ӕмӕ адӕмӕн дӕр ӕмӕ сӕ фосӕн дӕр фаг уыд.

¹²Дунедарӕг Моисей ӕмӕ Ааронӕн загъта: «Фаг Мыл кӕй нӕ баууӕндыдыстут ӕмӕ, Уаз кӕй Дӕн, уый израилӕгты раз кӕй нӕ равдыстат, уымӕ гӕсгӕ ацы адӕмы, цы бӕстӕ сын дӕттын, уырдӕм сымах нӕ бакӕндзыстут».

¹³Ацы дон — Мерива. Уым израилӕгтӕ Дунедарӕгимӕ схъаугъа сты, ӕмӕ сын, уаз кӕй у, уый равдыста.

¹⁴Кадешӕй Моисей лӕгтӕ арвыста Едомы паддзахмӕ, цӕмӕй йын фехъусын кӕной: «Афтӕ зӕгъы де ’фсымӕр Израил: нӕ фыдӕбӕттӕ нын зоныс.

¹⁵Нӕ фыдӕлтӕ Мысырмӕ фӕцыдысты, ӕмӕ Мысыры бирӕ фӕцардыстӕм. Мысырӕгтӕ мах дӕр нӕ фыдӕлтау уӕлӕмӕ скӕсын нӕ уагътой.

¹⁶Дунедарӕгмӕ куы сдзынӕзтам, уӕд нӕ Уый фехъуыста. Рарвыста нӕм зӕды, ӕмӕ нӕ уый Мысырӕй ракодта. Ныр мӕнӕ Кадешы сахары стӕм, дӕ арӕнгӕрон.

¹⁷Бар нын ратт, цӕмӕй дӕ зӕххыл нӕ фӕндаг акӕнӕм. Дӕ хуымтӕ ӕмӕ дын дӕ сӕндӕттыл нӕ ацӕудзыстӕм, дӕ цъайты донӕй дын нӕ бануаздзыстӕм. Паддзахвӕндагыл ацӕудзыстӕм, рахизӕрдӕм дӕр ӕмӕ галиуӕрдӕм дӕр нӕ фӕзилдзыстӕм, цалынмӕ дӕ арӕнӕй ахизӕм, уӕдмӕ».

¹⁸Едомӕгтӕ загътой: «Нӕ зӕххыл ацӕуын уӕ нӕ бауадздзыстӕм! Куы бафӕлварат, уӕд кӕрдтимӕ уӕ размӕ ралӕудзыстӕм!»

¹⁹Израилӕгтӕ загътой: «Над фӕндагыл ацӕудзыстӕм. Уӕ донӕй уын куы бануазӕм, нӕ фосӕн дзы куы бадарӕм, уӕд уын бафиддзыстӕм. Ницы нӕ хъӕуы, ӕрмӕстдӕр нӕ ацӕуын бауадзут!»

²⁰Фӕлӕ уыдон загътой: «Нӕ ацӕудзыстут нӕ зӕххыл!» Ӕмӕ гӕрзифтонг стыр ӕфсадӕй сӕ ныхмӕ ралӕууыдысты.

²¹Едомӕгтӕй сӕ бон куы базыдтой, уӕд израилӕгтӕ ӕндӕр рӕтты ацыдысты.

²²Кадешӕй араст сты израилӕгтӕ ӕмӕ Оры хохмӕ бахӕццӕ сты.

²³Оры хохрӕбын, Едомы арӕнмӕ хӕстӕг, Дунедарӕг загъта Моисей ӕмӕ Ааронӕн:

²⁴«Аарон хъуамӕ йӕ сыджытыл бафта. Меривайы раз Мӕ коммӕ кӕй нӕ бакастыстут, уый тыххӕй Аарон, Ӕз израилӕгтӕн кӕй дӕттын, уыцы зӕхмӕ нӕ бацӕудзӕн.

²⁵Аарон ӕмӕ йӕ фырт Елеазары Оры хохмӕ скӕн.

²⁶Ааронӕн йӕ дарӕс ралас ӕмӕ йын сӕ йӕ фырт Елеазарыл скӕн. Аарон уыцы ран амӕлдзӕн ӕмӕ йӕ сыджытыл бафтдзӕн».

²⁷Моисей, Дунедарӕг ын куыд загъта, афтӕ бакодта. Дзыллӕйы раз ссыдысты Оры хохмӕ,

²⁸ӕмӕ уыцы ран Моисей раласта йӕ дарӕс Ааронӕн ӕмӕ йын сӕ йӕ фырт Елеазарыл скодта. Аарон уым, хохы сӕр, амарди, Моисей ӕмӕ Елеазар та дӕлӕмӕ ӕрцыдысты.

²⁹Дзыллӕ Аароны марды хабар фехъуыстой, ӕппӕт израилӕгтӕ йыл дӕс ӕмӕ ссӕдз боны дӕргъы фӕкуыдтой.