Read Хуыцауы Дзырд иронау Нымӕцтӕ 21 Bible Online

Нымӕцтӕ 21 - Хуыцауы Дзырд иронау bible

Нымӕцтӕ 21

¹Негеваг Арады паддзах, ханаанаг, фехъуыста, Атариммӕ фӕндагыл кӕй фӕцӕуынц израилӕгтӕ. Семӕ схӕцыди ӕмӕ дзы кӕйдӕрты уацары райста.

²Уӕд израилӕгтӕ Дунедарӕгӕн басомы кодтой: «Ацы адӕмы нын кӕд нӕ къухмӕ раттай, уӕд сын сӕ сахартӕ ӕлгъыстаг фӕкӕндзынӕн».

³Дунедарӕгмӕ фехъуысти Израилы сомы, ӕмӕ йын ханаанӕгты йӕ къухмӕ радта. Израилӕгтӕ сын ӕлгъыстаг фӕкодтой сӕхи дӕр ӕмӕ сӕ сахартӕ дӕр. Уӕдӕй фӕстӕмӕ уыцы бынат хонынц Хорма[1].

⁴Ӕмӕ рараст сты Оры хохӕй Сырх денджызмӕ фӕндагыл, цӕмӕй Едомы бӕстӕйы иувӕрсты ацӕуой. Фӕндагыл адӕм бастадысты.

⁵Бустӕ кодтой Хуыцау ӕмӕ Моисейыл: «Цӕмӕн нӕ ракодтат Мысырӕй? Ӕдзӕрӕг быдыры амӕлынмӕ? Ам къӕбӕр дӕр ӕмӕ дон дӕр нӕй, ӕмӕ нӕ уд хауы ацы нӕбӕззон хӕринагӕй».

⁶Ӕмӕ Дунедарӕг маргджын кӕлмыты ахӕсты фӕкодта адӕмы, ӕмӕ израилӕгтӕй дзӕвгар фӕмарди уыдоны хӕстӕй.

⁷Бацыдысты адӕм Моисеймӕ ӕмӕ загътой: «Тӕригъӕд ракодтам мах, уымӕн ӕмӕ Дунедарӕджы ныхмӕ ӕмӕ дӕ ныхмӕ дзырдтам. Скув Дунедарӕгмӕ, цӕмӕй нӕ кӕлмытӕй фервӕзын кӕна». Скуывта Моисей адӕмы тыххӕй,

⁸ӕмӕ Дунедарӕг загъта Моисейӕн: «Сараз дӕхицӕн калмы ныв, хъилыл ӕй бакӕн ӕмӕ-иу ӕм, калм кӕуыл фӕхӕцыд, ахӕм исчи куы бакӕса, уӕд удӕгасӕй баззайдзӕн».

⁹Ӕмӕ сарӕзта Моисей ӕрхуы калм ӕмӕ йӕ хъилыл бакодта, ӕмӕ-иу калмдзӕф адӕймаг ӕрхуы калммӕ куы бакасти, уӕд-иу удӕгасӕй баззад.

¹⁰Араст сты израилӕгтӕ ӕмӕ Овоты ӕрӕнцадысты.

¹¹Ӕмӕ рараст сты Овотӕй ӕмӕ, Моавы бакомкоммӕ хурыскӕсӕны ’рдыгӕй цы ӕдзӕрӕг быдыр ис, Ийе-Хаварим, уым ӕрлӕууыдысты.

¹²Уырдыгӕй рараст сты ӕмӕ Зереды дӕлвӕзы ӕрӕнцадысты.

¹³Рараст сты уырдыгӕй ӕмӕ, ӕдзӕрӕг быдыры чи ис, аморӕгты арӕны ӕдде, Арноны уыцы хайыл ӕрӕнцадысты. Уымӕн ӕмӕ Арнон у Моавы арӕн, Моав ӕмӕ аморӕгты ӕхсӕн ис.

¹⁴Уымӕн загъдӕуы Дунедарӕджы хӕстыты чиныджы дӕр: «Суфы чи ис, уыцы Вахев, Арнон

¹⁵ӕмӕ кӕмтты фӕхстӕ сӕхи айтыгътой Ары онг ӕмӕ Моавы арӕныл банцой кодтой».

¹⁶Уырдыгӕй араст сты Беермӕ, Дунедарӕг Моисейӕн афтӕ кӕмӕй загъта, ӕрбамбырд кӕн адӕмы ӕмӕ сын Ӕз сын дон ратдзынӕн, уыцы Цъаймӕ.

¹⁷Уӕд ныззарыд Израил ацы зарӕг: «Йедзаг кӕн, цъай, зарут ын:

¹⁸„Сӕ лӕдзджытӕй, сӕ старцытӕй фӕтӕгтӕ кӕй къахтой, адӕмы раздзӕуджытӕ кӕй къахтой, гъе уыцы цъай“». Ӕдзӕрӕг быдырӕй араст сты Маттанамӕ.

¹⁹Маттанайӕ — Нахалиелмӕ, Нахалиелӕй та — Бамотмӕ.

²⁰Бамотӕй — Моавы быдырты, ӕдзӕрӕг быдыры чи зыны, уыцы Фасгайы хохы сӕрмӕ.

²¹Ӕмӕ арвыста Израил лӕгтӕ Сигонмӕ, аморӕгты паддзахмӕ, цӕмӕй йӕм бахатой:

²²«Ауадз мӕ дӕ зӕххыл ацӕуын. Нӕ бацӕудзыстӕм дӕ быдыртӕ ӕмӕ дӕ сӕндӕттӕм, дӕ цъайтӕй дон нӕ бануаздзыстӕм. Паддзахвӕндагыл цӕудзыстӕм, цалынмӕ дӕ арӕнӕй ахизӕм, уӕдмӕ».

²³Фӕлӕ Сигон Израилӕн йӕ зӕххыл ацӕуыны бар нӕ радта; ӕрбамбырд кодта йе ’ппӕт адӕмы ӕмӕ Израилы ныхмӕ ӕдзӕрӕг быдырмӕ рацыд. Йахацмӕ бахӕццӕ ӕмӕ Израилимӕ схӕцыд.

²⁴Ныддӕрӕн ӕй кодта Израил ӕмӕ йын йӕ зӕхх байста Арнонӕй Йавокмӕ, аммонӕгты онг, уымӕн ӕмӕ аммонӕгты арӕн фидар уыд.

²⁵Басаста Израил уыцы сахартӕ иууылдӕр ӕмӕ ӕрбынат кодта аморӕгты ӕппӕт сахарты, Хешбон ӕмӕ йӕ алфамбылӕйтты.

²⁶Уымӕн ӕмӕ Хешбон уыди Сигоны, аморӕгты паддзахы, сахар. Уый та хӕцыди Моавы раздӕры паддзахимӕ ӕмӕ йын йӕ зӕхх ӕнӕхъӕнӕй, суанг Арноны онг, йӕхи бакодта.

²⁷Уымӕн дзурынц кадӕггӕнджытӕ: «Ӕрцӕут Хешбонмӕ! Сигоны сахар арӕзт ӕмӕ фидаргонд ӕрцӕуӕд!

²⁸Уымӕн ӕмӕ рацыди Хешбонӕй цӕхӕр, Сигоны сахарӕй — арт ӕмӕ аныхъуырдта Ар-Моавы, Арноны бӕрзӕндты хицӕутты.

²⁹Дудгӕ фӕбадай, Моав! Бабын стут, Кемошы адӕм, уӕ фырттӕ лидзӕг фесты, уӕ чызджытӕ Сигоны, аморӕгты паддзахы, уацайрӕгтӕ баисты!

³⁰Фатты бын сӕ фӕкодтам; бацарӕфтыд кодтам Хешбон Дивоны онг, гӕныстон фӕци, Медевайы раз чи ис, уыцы Нофахы онг».

³¹Израилӕгтӕ ӕрбынӕттон сты аморӕгты зӕххыл.

³²Моисей бӕрӕггӕнӕг арвыста Йазермӕ, ӕмӕ йын израилӕгтӕ бацахстой йӕ алыварс хъӕутӕ, аморӕгты бынаты ӕрцардысты.

³³Уырдыгӕй куы фӕзылдысты, уӕд израилӕгтӕ Башанмӕ фӕндагыл араст сты. Ог, Башаны паддзах, йӕ адӕмимӕ гӕрзифтонгӕй сӕ размӕ рацыд ӕмӕ Едреийы цур семӕ схӕцыд.

³⁴Дунедарӕг Моисейӕн загъта: «Ма дзы тӕрс: дӕ къухмӕ дын дӕттын Ӕз йӕхи дӕр, йӕ адӕмы дӕр ӕмӕ йӕ бӕстӕ дӕр. Сигонӕн, аморӕгты паддзахӕн, Хешбоны цӕрӕгӕн куыд бакодтай, уымӕн дӕр афтӕ бакӕн».

³⁵Ӕмӕ йын амардтой йӕхи, йӕ фыртты ӕмӕ йӕ адӕмы се ’ппӕты дӕр, иуы дӕр дзы удӕгасӕй нал ныууагътой, ӕмӕ йын йӕ зӕхх сӕхи бакодтой.