Read Хуыцауы Дзырд иронау Нымӕцтӕ 3 Bible Online

Нымӕцтӕ 3 - Хуыцауы Дзырд иронау bible

Нымӕцтӕ 3

¹Мӕнӕ, Дунедарӕг Синайы хохыл Моисеимӕ куы дзырдта, уӕд Аарон ӕмӕ Моисейӕн цы байзӕддӕгтӕ уыдис, уыдон.

²Аароны фырттӕ: йӕ хистӕр зӕнӕг — Надав, уый фӕстӕ Авигу, Елеазар ӕмӕ Итамар —

³Аароны фырттӕ, сауджынлӕггадӕн сӕрст чи ӕрцыди, уыдон.

⁴Надав ӕмӕ Авигу ӕрбамардысты, Дунедарӕджы размӕ Синайы ӕдзӕрӕг быдыры нӕфӕтчиаг арт куы бахастой, уӕд; цот сын нӕ баззад. Елеазар ӕмӕ Итамар та сӕ фыд Аароны къухдариуӕгӕй сауджынлӕггад кодтой.

⁵Дунедарӕг Моисейӕн загъта:

⁶«Фӕсид Левийы мыггагмӕ ӕмӕ сӕ сауджын Аароны дӕлбар бакӕн, уадз ӕмӕ йын лӕггад кӕной.

⁷Аароны бӕсты дӕр ӕмӕ ӕппӕт дзыллӕйы бӕсты дӕр уыдон хъуамӕ лӕггад кӕной Фембӕлды Цатыры: Уаз Цӕрӕны алы куыст дӕр уыдонмӕ хауы.

⁸Уыдон ӕппӕт израилӕгты бӕсты лӕггад кӕнынц Уаз Цӕрӕны ӕмӕ сӕ бӕрны уӕнт Фембӕлды Цатыры мигӕнӕнтӕ.

⁹Бакӕн левитты Аарон ӕмӕ йӕ фыртты дӕлбар; израилӕгты ’хсӕн уыдон Ааронӕн лӕвӕрд сты.

¹⁰Аарон ӕмӕ йӕ фырттӕн бахӕс кӕн сауджынлӕггад кӕнын; ӕндӕр исчи хӕстӕг ӕрбацыди, зӕгъгӕ, уӕд уый та амарын хъӕуы».

¹¹Дунедарӕг Моисейӕн загъта:

¹²«Израилӕгты ӕхсӕн Ӕз равзӕрстон левитты. Мӕхицӕн сӕ исын израилӕгты хистӕр зӕнӕджы ныхмӕ — мады гуыбыны фыццаг гуырдзы ныхмӕ. Левиттӕ уыдзысты Мӕн.

¹³Уымӕн ӕмӕ Мӕн у алы фыццаг зӕнӕг дӕр. Мысыры алы фыццаг цӕуӕты куы ныццагътон, уӕд Мӕхицӕн рахицӕн кодтон Израилы алы фыццаг цӕуӕты дӕр — адӕймагӕй фосы онг. Мӕн сты уыдон. Ӕз — Дунедарӕг».

¹⁴Дунедарӕг Моисейӕн Синайы ӕдзӕрӕг быдыры загъта:

¹⁵«Банымай Левийы байзӕддӕгты хӕдзаргай, мыгаггай; нӕлгоймагӕй дзы чидӕриддӕр ис, иумӕйдзыд ӕмӕ уымӕй хистӕртӕ, уыдоны се ’ппӕты дӕр банымай».

¹⁶Ӕмӕ сӕ банымадта Моисей, Дунедарӕг куыд загъта, афтӕ.

¹⁷Мӕнӕ Левийы фырттӕ номхуындӕй: Гершон, Кехат ӕмӕ Мерари.

¹⁸Мӕнӕ номхуындӕй Гершоны фырттӕ: Ливни ӕмӕ Шими, сӕ мыггӕгтимӕ;

¹⁹Кехаты фырттӕ: Амрам, Ицхар, Хеврон ӕмӕ Уззиел, сӕ мыггӕгтимӕ;

²⁰Мерарийы фырттӕ: Махли ӕмӕ Муши, сӕ мыггӕгтимӕ. Уый — Левийы байзӕддӕгты мыггӕгтӕ сӕ фыдӕлтимӕ.

²¹Гершонӕй — Ливнийы мыггаг ӕмӕ Шимийы мыггаг. Уый — Гершоны байзӕддӕгтӕ.

²²Хыгъд сӕ чи ӕрцыд, уыцы иумӕйдзыд ӕмӕ уымӕй хистӕр нӕлгоймӕгтӕ — авд мин фондзсӕдӕ.

²³Гершоны мыггӕгтӕн Цатыры чъылдыммӕ лӕугӕ у, Цатырӕй ныгуылӕнӕрдӕм.

²⁴Гершоны байзӕддӕгты фӕтӕг — Елйасаф, Лаелы фырт.

²⁵Уаз Цӕрӕны Гершоны байзӕддӕгтӕн сӕ бӕрны сты: Цатыр, Цатыры царӕмбӕрзӕн ӕмӕ Цатыры дуарӕмбӕрзӕн,

²⁶Цатыр ӕмӕ кӕрты ӕмбонд нывондхӕссӕны алыварс, кӕрты дуарӕмбӕрзӕн ӕмӕ бӕндӕнтӕ. Семӕ баст алы куыст дӕр уыдонмӕ хауы.

²⁷Кехатӕй — Амрамы мыггаг, Ицхары мыггаг, Хевроны мыггаг, Уззиелы мыггаг. Уый — Кехаты байзӕддӕгтӕ.

²⁸Хыгъд сӕ чи ӕрцыди, уыцы иумӕйдзыд ӕмӕ уымӕй хистӕр нӕлгоймӕгтӕ — аст мин ӕхсӕзсӕдӕ, уыдон та Уаз Цӕрӕнмӕ сӕ цӕст дардзысты.

²⁹Кехаты байзӕддӕгтӕн Цатырӕй хуссарӕрдӕм лӕугӕ у.

³⁰Кехаты байзӕддӕгты фӕтӕг — Елцафан, Уззиелы фырт.

³¹Уыдоны бӕрны сты: Чырын, фынг, цырагъдарӕн, нывондхӕссӕнтӕ, хуыцаулӕггады уаз мигӕнӕнтӕ ӕмӕ ӕмбӕрзӕн. Семӕ баст алы куыст дӕр уыдонмӕ хауы.

³²Левитты фӕтӕгты сӕргъы — Елеазар, сауджын Аароны фырт; уый йӕ цӕст дары, уаз дзауматӕ кӕй бӕрны сты, уыдонмӕ.

³³Мерарийӕ — Махлийы мыггаг, Мушийы мыггаг. Уый — Мерарийы байзӕддӕгтӕ.

³⁴Хыгъд сӕ чи ӕрцыд, уыцы иумӕйдзыд ӕмӕ уымӕй хистӕр нӕлгоймӕгтӕ — ӕхсӕз мин дыууӕсӕдӕ.

³⁵Мерарийы байзӕддӕгты фӕтӕг — Цуриел, Авихаилы фырт; Цатырӕй цӕгатӕрдӕм лӕугӕ у уыдонӕн.

³⁶Мерарийы байзӕддӕгты бӕрны сты: Цатыры хъайвантӕ, ӕвдузӕнтӕ, цӕджындзтӕ, бындуртӕ ӕмӕ ӕппӕт гӕрзтӕ. Семӕ баст алы куыст дӕр уыдонмӕ хауы.

³⁷Кӕрты алыварс цы цӕджындзтӕ ис, уыдонӕн сӕ бындуртӕ, цурчытӕ, бӕндӕнтӕ дӕр уыдоны бӕрны сты.

³⁸Цатыры раззаг фарс та, Цатырӕй скӕсӕнӕрдӕм, Моисей ӕмӕ Ааронӕн йӕ фырттимӕ лӕугӕ у. Израилӕгтӕн се ’ппӕты бӕсты Уаз Цӕрӕны уыдон лӕггад кӕнынц. Уаз Цӕрӕнмӕ ӕндӕр исчи куы ӕрбаввахс уа, уӕд уый та амарын хъӕуы.

³⁹Дунедарӕджы бардзырдмӕ гӕсгӕ Моисей ӕмӕ Аарон мыггаггай кӕй банымадтой, уыцы левиттӕ, иумӕйдзыд ӕмӕ уымӕй хистӕр нӕлгоймӕгтӕ, ӕдӕппӕтӕй дыууын дыууӕ мины.

⁴⁰Дунедарӕг Моисейӕн загъта: «Банымай, иу мӕйӕ уӕлӕмӕ кӕуыл цӕуы, Израилы уыцы нӕлгоймӕгтӕй фыццаг зӕнӕг чи у, уыдоны се ’ппӕты дӕр номхуындӕй ӕмӕ сын сӕ нымӕц сбӕрӕг кӕн.

⁴¹Ӕз — Дунедарӕг! Рахицӕн кӕн левитты Мӕнӕн израилӕгты фыццаг зӕнӕджы ныхмӕ, левитты фос та — израилӕгты фосы фыццаг цӕуӕты ныхмӕ».

⁴²Банымадта Моисей, Дунедарӕг ын куыд загъта, афтӕ, Израилы нӕлгоймӕгтӕй фыццаг зӕнӕг чидӕриддӕр уыди, уыдоны се ’ппӕты дӕр.

⁴³Иу мӕйӕ уӕлӕмӕ сӕ кӕуыл цӕуы, уыцы фыццаггуырд нӕлгоймӕгтӕ уыдысты дыууын дыууӕ мин дыууӕсӕдӕ ӕвдай ӕртӕ.

⁴⁴Дунедарӕг Моисейӕн загъта:

⁴⁵«Райс левитты Израилы фыццаг зӕнӕджы ныхмӕ, левитты фос та — уыдоны фосы ныхмӕ. Левиттӕ уыдзысты Мӕн: Ӕз — Дунедарӕг.

⁴⁶Израилы фыццаг зӕнӕг левиттӕй цы дыууӕ сӕдӕ ӕвдай ӕртӕ адӕймаджы фылдӕр у,

⁴⁷уыдонӕй алкӕй ныхмӕ та райс фӕйнӕ фондз шекелы, кувӕндоны шекелтӕй, алы шекелы дӕр — ссӕдз герайы.

⁴⁸Ратт уыцы ӕвзист Аарон ӕмӕ йӕ фырттӕн, левиттӕй ивд чи не ’рцыд, уыдоны балхӕныны охыл».

⁴⁹Моисей, левиттӕй ивд чи не ’рцыд, уыдоны ныхмӕ райста ӕвзист:

⁵⁰иу мин ӕмӕ ӕртӕсӕдӕ ӕхсай фондз шекелы, кувӕндоны шекелтӕй.

⁵¹Моисей радта уыцы ӕвзист Аарон ӕмӕ йӕ фырттӕн, Дунедарӕг ын куыд загъта, афтӕ.