Read Хуыцауы Дзырд иронау Нымӕцтӕ 31 Bible Online

Нымӕцтӕ 31 - Хуыцауы Дзырд иронау bible

Нымӕцтӕ 31

²«Израилӕгты маст райс мидианӕгтӕй ӕмӕ уый фӕстӕ ацы дунейӕ ахицӕн уыдзынӕ».

³Ӕмӕ загъта Моисей адӕмӕн: «Уӕ адӕмӕй гӕрзифтонг ӕфсад скӕнут, цӕмӕй мидианӕгты ныхмӕ ралӕууой ӕмӕ сӕ Дунедарӕджы маст райсой.

⁴Алы хӕдзарвӕндагӕй дӕр — мин, израилаг хӕдзарвӕндӕгтӕ се ’ппӕт дӕр хъуамӕ уой ӕфсады».

⁵Ӕмӕ дыууадӕс мин гӕрзифтонг израиладжы, алы хӕдзарвӕндагӕй дӕр мин, ӕфсадмӕ бацыдысты.

⁶Моисей сӕ хӕстмӕ арвыста, алы хӕдзарвӕндагӕй дӕр мин, сӕ разамонӕг — Пинхас, сауджын Елеазары фырт, йӕ къухы — уаз мигӕнӕнтӕ ӕмӕ фӕдисы сыкъауадындзтӕ, афтӕмӕй.

⁷Схӕцыдысты мидианӕгтимӕ, Дунедарӕг Моисейӕн куыд загъта, афтӕ ӕмӕ дзы нӕлгоймагӕй чидӕриддӕр уыди, уыдоны се ’ппӕты дӕр ныццагътой.

⁸Мӕрдты ӕхсӕн — мидианӕгты фондз паддзахы: Еви, Рекем, Цур, Хур ӕмӕ Рева; Беоры фырт Балаам дӕр кардылӕфтыд фӕци.

⁹Мидианӕгты сылгоймӕгтӕ ӕмӕ сабиты та израилӕгтӕ уацары акодтой, сӕ фос, сӕ рӕгъӕуттӕ, сӕ мулк сын иууылдӕр ратӕлӕт кодтой.

¹⁰Кӕм цардысты, уыцы сахартӕ ӕмӕ сын сӕ фидӕрттӕ арты хай бакодтой.

¹¹Се ’фтиаг ӕмӕ сӕ амӕттӕгтыл — адӕймагӕй, фосӕй — рахӕцыдысты

¹²ӕмӕ сӕ — уацайрӕгты дӕр ӕмӕ, цы фӕфос кодтой, уыцы фӕллой ӕнӕхъӕнӕй, — Моисей, сауджын Елеазар ӕмӕ израилӕгты ӕппӕт дзыллӕйы раз балӕууын кодтой рӕсӕнуаты, моаваг быдырты, Иорданы был, Йерихоны бакомкоммӕ.

¹³Ӕмӕ Моисей, сауджын Елеазар ӕмӕ дзыллӕйы хицӕуттӕ рӕсӕнуатӕй сӕ размӕ рацыдысты.

¹⁴Ӕмӕ смӕсты ис Моисей, хӕстӕй чи ӕрбацыди, уыцы ӕфсӕддон хицӕуттӕм, мины хицӕуттӕ ӕмӕ сӕдӕйы хицӕуттӕм.

¹⁵Ӕмӕ сын загъта Моисей: «Сылгоймӕгты се ’ппӕты дӕр удӕгасӕй ныууагътат?

¹⁶Афтӕмӕй та, Балаамы уынаффӕмӕ гӕсгӕ, уыдон израилӕгты бацардыдтой Дунедарӕджы ныхмӕ, цӕмӕй Йыл сӕхи атигъ кӕной ӕмӕ Пеоры ’рдӕм фӕуой; ӕмӕ Дунедарӕджы дзыллӕйыл рын сыстад.

¹⁷Уӕдӕмӕ амарут, нӕлгоймаджы мыггагӕй дзы цыдӕриддӕр сабитӕ ис, уыдоны ӕмӕ, нӕлгоймагимӕ ӕмуат чи ӕрцыд, уыцы сылгоймӕгтӕй алкӕй дӕр амарут.

¹⁸Нӕлгоймагимӕ ӕмуат чи нӕма ӕрцыд, уыцы ӕнахъом сылыстӕджы та удӕгасӕй ныууадзут уӕхицӕн.

¹⁹Ӕмӕ рӕсӕнуаты ӕдде авд боны фӕут; адӕймаг чи амардта ӕмӕ мардыл чи андзӕвыди, уыдонӕй алчидӕр йӕхи ссыгъдӕг кӕнӕд ӕртыккаг ӕмӕ ӕвдӕм бон, уӕхӕдӕг дӕр ӕмӕ уӕ уацайрӕгтӕ дӕр.

²⁰Цӕрмын ӕмӕ сӕгъы хъуынӕй уӕлӕдарӕс иууылдӕр, стӕй ӕппӕт хъӕдын мигӕнӕнтӕ ӕмбӕлы ссыгъдӕг кӕнын».

²¹Ӕмӕ загъта сауджын Елеазар, хӕсты чи уыди, уыцы ӕфсӕддонтӕн: «Мӕнӕ уын, Дунедарӕг Моисейӕн цы ӕгъдау бафӕдзӕхста, уый:

²²сыгъзӕрин, ӕвзист, ӕрхуы, ӕфсӕйнаг, къала ӕмӕ зды —

²³арты цы нӕ судзы, уыдон иууылдӕр арты ссыгъдӕг кӕнут ӕмӕ сӕ сыгъдӕггӕнӕн донӕй ӕрӕхсут; арты цы судзы, ӕппӕт уыдон та донӕй ссыгъдӕг кӕнын хъӕуы.

²⁴Уӕ уӕлӕдарӕс дӕр цӕхсут ӕвдӕм бон, ӕмӕ ссыгъдӕг уыдзыстут; уый фӕстӕ уын рӕсӕнуатмӕ бацӕуыны бар ис».

²⁵Дунедарӕг загъта Моисейӕн:

²⁶«Сӕрӕй-сӕрмӕ банымай ӕфтиаг — адӕмӕй, фосӕй цы ратӕлӕт кодтам, уый — сауджын Елеазар ӕмӕ дзыллӕйы хӕдзарвӕндӕгты хистӕртимӕ.

²⁷Хӕсты чи уыди, уыцы ӕфсӕддонтӕ ӕмӕ йӕ ӕппӕт дзыллӕйы ’хсӕн дыууӕ дихы акӕн.

²⁸Хӕсты чи уыди, уыцы ӕфсӕддонтӕй Дунедарӕгӕн хъалон райс, алы фондзсӕдӕйӕ дӕр — фӕйнӕ иуы: адӕмӕй дӕр, стурвосӕй дӕр, хӕрджытӕй дӕр, лыстӕг фосӕй дӕр.

²⁹Уыдон, цы хай сӕм хауы, уымӕй рахицӕн кӕн ӕмӕ сӕ, Дунедарӕгӕн скувынӕн, сауджын Елеазарӕн ратт.

³⁰Израилӕгтӕм цы хауы, уымӕн та йӕ алы дӕс ӕмӕ дыууиссӕдзӕм хайӕ дӕр — адӕмӕй, стуртӕй, хӕрджытӕй, лыстӕг фосӕй, ӕппӕт хӕдзарон фосӕй — иу сӕр рахицӕн кӕн ӕмӕ йӕ Дунедарӕджы цатыры лӕггадгӕнӕг левиттӕн ратт».

³¹Ӕмӕ бакодтой Моисей ӕмӕ сауджын Елеазар, Дунедарӕг Моисейӕн куыд бафӕдзӕхста, афтӕ.

³²Ӕмӕ ӕфтиаг исбон, хӕсты чи уыди, уыцы ӕфсӕддонтӕ кӕй айстой, уый нӕ нымайгӕйӕ, уыдис: ӕхсӕзсӕдӕ ӕвдай фондз мин сӕры — лыстӕг фос,

³³стурвос — ӕвдай дыууӕ мины,

³⁴хӕрджытӕ — ӕхсай иу мин,

³⁵адӕймӕгтӕ, нӕлгоймагимӕ ӕмуат чи нӕма ӕрцыд, ахӕм сылыстӕг, ӕдӕппӕтӕй — ӕртын дыууӕ мины.

³⁶Хӕсты чи уыди, уыдоны хайы, куы сӕ банымадтой, уӕд разынди: ӕртӕсӕдӕ ӕртын авд мин фондзсӕдӕ — лыстӕг фос,

³⁷уыдонӕй Дунедарӕджы хъалон — ӕхсӕзсӕдӕ ӕвдай фондз;

³⁸стурвос — ӕртын ӕхсӕз мины, уыдонӕй ӕвдай дыууӕ — Дунедарӕджы хъалон;

³⁹хӕрджытӕ — ӕртын мин фондзсӕдӕ, уыдонӕй ӕхсай иу — Дунедарӕджы хъалон;

⁴⁰уацайрӕгтӕ — ӕхсӕрдӕс мины, уыдонӕй ӕртын дыууӕ — Дунедарӕджы хъалон.

⁴¹Ӕмӕ радта Моисей сауджын Елеазарӕн Дунедарӕджы хъалон, Йӕ мысайнаг, Дунедарӕг ын куыд бафӕдзӕхста, афтӕ.

⁴²Израилӕгтӕн цы хай райста Моисей, хӕцгӕ чи кодта, уыдоны тӕлӕтӕй,

⁴³уый та дзыллӕйы уыди: ӕртӕсӕдӕ ӕртын авд мин фондзсӕдӕ — лыстӕг фос;

⁴⁴стурвос — ӕртын ӕхсӕз мины;

⁴⁵хӕрджытӕ — ӕртын мин фондзсӕдӕ;

⁴⁶уацайрӕгтӕ — ӕхсӕрдӕс мины.

⁴⁷Израилӕгтӕм цы хауд, уымӕн Моисей йӕ алы дӕс ӕмӕ дыууисӕдзӕй дӕр иу рахицӕн кодта — уацайрӕгтӕй дӕр ӕмӕ фосӕй дӕр — ӕмӕ йӕ Дунедарӕджы цатыры лӕггадгӕнӕг левиттӕн, Дунедарӕг ын куыд бафӕдзӕхста, афтӕ радта.

⁴⁸Ӕрбалӕууыдысты Моисеймӕ ӕфсады хицӕуттӕ, минтӕ ӕмӕ сӕдӕты сӕргълӕуджытӕ.

⁴⁹Загътой Моисейӕн: «Мах, дӕ цагъартӕ, нӕ бӕрны чи уыди, уыцы ӕфсӕддонты банымадтам, ӕмӕ дзы иу дӕр нӕ фӕхъуыд.

⁵⁰Ӕмӕ мах, цӕмӕй Дунедарӕджы раз сыгъдӕг уӕм, уый тыххӕй Дунедарӕгӕн мысайнагӕн ӕрбахастам, йӕ къухы нӕ кӕмӕн цы бафтыд, уый: сыгъзӕрин мигӕнӕнтӕ, цонгдарӕнтӕ, ӕргъӕвджытӕ, къухдарӕнтӕ, хъусцӕджытӕ ӕмӕ хъуырылдаргӕ фӕлындӕнтӕ».

⁵¹Ӕмӕ сын райстой Моисей ӕмӕ сауджын Елеазар сӕ сыгъзӕринтӕ, алыхуызон фӕлындӕнтӕ.

⁵²Ӕмӕ Дунедарӕгӕн мысайнагӕн цы сыгъзӕрин ӕрбацыд мины хицӕуттӕ ӕмӕ сӕдӕйы хицӕуттӕй, уый ӕдӕппӕтӕй уыди ӕхсӕрдӕс мин авдсӕдӕ фӕндзай шекелы.

⁵³Ӕфсӕддонтӕй алчи тыхтона кодта йӕхи пайдайӕн.

⁵⁴Ӕмӕ сыгъзӕрин райстой Моисей ӕмӕ сауджын Елеазар мины хицӕуттӕ ӕмӕ сӕдӕйы хицӕуттӕй ӕмӕ йӕ, израилӕгтӕ Дунедарӕджы сӕ зӕрдыл кӕй дарынц, уый нысанӕн Фембӕлды Цатырмӕ бахастой.