Read Хуыцауы Дзырд иронау Нымӕцтӕ 32 Bible Online

Нымӕцтӕ 32 - Хуыцауы Дзырд иронау bible

Нымӕцтӕ 32

¹Рувим ӕмӕ Гады байзӕддӕгтӕм рӕгъӕуттӕ тынг бирӕ уыди. Йазер ӕмӕ Галаады бӕстӕтӕ куы федтой, уӕд сӕм стурвос хизынӕн хорз фӕкастысты.

²Бацыдысты Гад ӕмӕ Рувимы байзӕддӕгтӕ Моисеймӕ, сауджын Елеазар ӕмӕ дзыллӕйы фӕтӕгтӕм ӕмӕ загътой:

³«Атарот, Дивон, Йазер, Нимра, Хешбон, Елале, Свам, Нево ӕмӕ Беон —

⁴Дунедарӕг израилӕгты цӕстыты раз кӕй ӕрцавта, уыцы зӕхх стурвосы зӕхх у, ӕмӕ дӕ цагъартӕм та ис рӕгъӕуттӕ».

⁵Загътой: «Кӕд нӕ дӕ хорзӕхы аккаг кӕныс, уӕд уыцы зӕхх ратт махӕн, Иорданы сӕрты нӕ ма ахизын кӕн».

⁶Ӕмӕ загъта Моисей Гад ӕмӕ Рувимы байзӕддӕгтӕн: «Уе ’фсымӕртӕ хӕстмӕ ацӕудзысты, сымах та ам баддзыстут?

⁷Цӕмӕн ардаут израилӕгты, цӕмӕй ма ацӕуой, Дунедарӕг сын цы бӕстӕ радта, уырдӕм?

⁸Уӕ фыдӕлтӕ дӕр афтӕ бакодтой, Кадеш-Барнеайӕ сӕ, уыцы бӕстӕм ӕркӕсут, зӕгъгӕ, куы арвыстон, уӕд.

⁹Ешколы дӕлвӕзмӕ бахӕццӕ сты, бӕстӕ федтой ӕмӕ израилӕгты сардыдтой, цӕмӕй, Дунедарӕг сын цы бӕстӕ радта, уырдӕм ма ацӕуой.

¹⁰Ӕмӕ рафыхт уыцы бон Дунедарӕджы маст, ӕмӕ басомы кодта:

¹¹„Нӕ фендзысты, Мысырӕй чи рацыд, уыцы адӕм, ссӕдз азы ӕмӕ уымӕй уӕлӕмӕ кӕуыл цӕуы, уыдон, Ӕз Авраам, Исаак ӕмӕ Йаковӕн зӕрдӕ цы бӕстӕй бавӕрдтон, уый, уымӕн ӕмӕ Мӕ коммӕ нӕ бакастысты.

¹²Ӕрмӕстдӕр кенизаг Иефоннейы фырт Калев ӕмӕ Нуны фырт Йешуа сӕххӕст кодтой Дунедарӕджы фӕндон“.

¹³Ӕмӕ рафыхти Дунедарӕджы маст израилӕгтӕм, ӕмӕ сӕ дыууиссӕдз азы ӕдзӕрӕг быдыры фӕракӕн-бакӕн кодта, цалынмӕ, Дунедарӕджы цӕсты фыдгӕнӕг чи уыди, уыдоны мыггаг сыскъуыди, уӕдмӕ.

¹⁴Ӕмӕ мӕнӕ ныр уӕ фыдӕлты бынаты ралӕууыдыстут сымах, тӕригъӕдджынты бардз, цӕмӕй та Дунедарӕджы маст израилӕгтӕм рафыца.

¹⁵Уӕ чъылдым Ӕм куы раздахат, уӕд ма израилӕгты ноджыдӕр фӕдардзӕн ӕдзӕрӕг быдыры, ӕмӕ сӕ бынтондӕр бацарӕфтыд кӕндзыстут».

¹⁶Уӕд ӕм бацыдысты ӕмӕ йын загътой: «Нӕ фосы дзугтӕн ам уӕтӕртӕ сараздзыстӕм, нӕ сабитӕн — сахартӕ.

¹⁷Нӕхӕдӕг та гӕрзифтонгӕй ацӕудзыстӕм израилӕгты разӕй, цалынмӕ сӕ нӕ бахӕццӕ кӕнӕм сӕ бынатмӕ, уӕдмӕ; не ’нахъом сабитӕ та, ацы бӕстӕйы цӕрджытӕй сын тас кӕм нӕ уа, ахӕм фидаргонд сахарты баззайӕнт.

¹⁸Не ’рбаздӕхдзыстӕм нӕ хӕдзӕрттӕм, цалынмӕ израилӕгтӕй алчидӕр йӕ хай нӕ райса, уӕдмӕ.

¹⁹Мах уыдонимӕ хай нӕ райсдзыстӕм Иорданы фаллаг фарс, уымӕн ӕмӕ Иорданӕн йӕ ацы, скӕсӕнварс, исӕм хай».

²⁰Моисей сын загъта: «Кӕд афтӕ бакӕнат ӕмӕ Дунедарӕджы раз гӕрзифтонгӕй хӕстмӕ ацӕуат,

²¹Дунедарӕджы раз Иорданы сӕрты ахизат ӕмӕ, цалынмӕ Уый Йе знӕгты зӕхх нӕ байса

²²ӕмӕ бӕстӕ нӕ басӕтта, уӕдмӕ тох кӕнат, уӕд, фӕстӕмӕ ӕрбаздӕхгӕйӕ, ӕназым уыдзыстут Дунедарӕг ӕмӕ Израилы раз, ӕмӕ ацы бӕстӕ сымахӕн баззайдзӕн.

²³Афтӕ куынӕ бакӕнат, уӕд та тӕригъӕдджын уыдзыстут Дунедарӕджы раз, ӕмӕ уӕ уыцы тӕригъӕды азар кӕй баййафдзӕн, уый зонут.

²⁴Аразут сахартӕ уе ’нахъом сабитӕн ӕмӕ уӕтӕртӕ уӕ лыстӕг фосӕн, уӕ дзырдӕн хицау ут».

²⁵Ӕмӕ загътой Моисейӕн Гад ӕмӕ Рувимы байзӕддӕгтӕ: «Дӕ цагъартӕ, нӕ хицау цы зӕгъа, уый бакӕндзысты.

²⁶Не ’нахъом сабитӕ, нӕ бинойнӕгтӕ, нӕ рӕгъӕуттӕ, не ’ппӕт фос баззайдзысты уым, Галаады сахарты.

²⁷Дӕ цагъартӕ та, нӕ бардар куыд зӕгъы, афтӕ гӕрзифтонгӕй Дунедарӕджы раз хӕстмӕ ацӕудзысты».

²⁸Ӕмӕ сӕ бафӕдзӕхста Моисей сауджын Елеазар, Нуны фырт Йешуа ӕмӕ израилаг хӕдзарвӕндӕгты фӕтӕгтӕн.

²⁹Загъта Моисей: «Гад ӕмӕ Рувимы байзӕддӕгтӕ кӕд иууылдӕр Дунедарӕджы раз гӕрзифтонгӕй Иорданы сӕрты уемӕ ахизой ӕмӕ бӕстӕ саст ӕрцӕуа, уӕд-иу Галаады зӕхх уыдонӕн раттут.

³⁰Кӕд ӕмӕ гӕрзифтонгӕй уемӕ нӕ ацӕуой, уӕд та уе ’хсӕн райсдзысты хай Ханааны».

³¹Гад ӕмӕ Рувимы байзӕддӕгтӕ загътой: «Дунедарӕг дӕ цагъартӕн куыддӕриддӕр загъта, афтӕ бакӕндзыстӕм.

³²Мах гӕрзифтонгӕй Дунедарӕджы раз ацӕудзыстӕм Ханааны бӕстӕм, ӕмӕ нын Иорданӕн йӕ ацы фарс хай уӕд».

³³Ӕмӕ радта Моисей Гад ӕмӕ Рувимы байзӕддӕгтӕн, стӕй Йосефы фырт Менассиайы байзӕддӕгты ӕрдӕгӕн аморӕгты паддзах Сигоны ӕмӕ Башаны паддзах Огы бӕстӕтӕ сӕ сахартӕ ӕмӕ алфамбылай зӕххытимӕ.

³⁴Ӕмӕ сарӕзтой Гады байзӕддӕгтӕ Дивон, Атарот ӕмӕ Ароер,

³⁵Атарот-Шофан, Йазер ӕмӕ Йагбеха,

³⁶Бет-Нимра ӕмӕ Бет-Харан — бырутӕй ӕхгӕд сахартӕ, фосдарӕнтӕ.

³⁷Рувимы байзӕддӕгтӕ ногӕй сарӕзтой Хешбон, Елале ӕмӕ Кирйатаим,

³⁸Нево ӕмӕ Баал-Меон (ацы сахартӕн сӕ нӕмттӕ аивтой), стӕй Сивма. Ногӕй цы сахартӕ сарӕзтой, уыдонӕн ног нӕмттӕ радтой.

³⁹Аморӕгтӕ Галаады цардысты. Бацыдысты уырдӕм Менассиайы фырт Махиры фырттӕ ӕмӕ йӕ сӕхи бакодтой, аморӕгты фӕтардтой.

⁴⁰Моисей радта Галаад Махиры, Менассиайы фырты, байзӕддӕгтӕн, ӕмӕ уым ӕрбынат кодтой.

⁴¹Менассиайы фырт Иаир цалдӕр хъӕуы бацахста ӕмӕ сӕ Иаиры хъӕутӕ схуыдта.

⁴²Новах дӕр Кенаты сахар ӕмӕ йӕ алфамбылӕйттӕ йӕхи бакодта ӕмӕ йӕ Новах, зӕгъгӕ, йӕхи номӕй рахуыдта.