Read Хуыцауы Дзырд иронау Нымӕцтӕ 33 Bible Online

Нымӕцтӕ 33 - Хуыцауы Дзырд иронау bible

Нымӕцтӕ 33

¹Мӕнӕ Моисей ӕмӕ Аароны разамындӕй Мысырӕй чи рацыд, уыцы израилӕгты балцвӕндӕгтӕ сӕ хӕстон къордтӕм гӕсгӕ.

²Моисей ӕрфыста, Дунедарӕджы ныхасӕй-иу рӕсӕнуатӕй кӕм фенкъуыстысты ӕмӕ-иу сӕ фӕндагыл дарддӕр цы рӕттӕй ацыдысты, уыдон.

³Рамсесӕй рараст сты фыццаг мӕйы фынддӕсӕм бон; Куадзӕны нывонд куы ӕрхастой, уымӕн йӕ дыккаг бон рацыдысты израилӕгтӕ бӕрзонд къухдариуӕджы бын ӕппӕт мысырӕгты цӕсты раз,

⁴мысырӕгтӕ, Дунедарӕг кӕй ӕрцавта, сӕ уыцы хистӕр фыртты мӕрдтӕ куы ныгӕдтой, Дунедарӕг сын сӕ хуыцаугӕндты куы ныффалгӕрон кодта, уӕд.

⁵Рараст сты израилӕгтӕ Рамсесӕй ӕмӕ рӕсӕнуат скодтой Суккоты.

⁶Рараст сты Суккотӕй ӕмӕ рӕсӕнуат скодтой Етамы, ӕдзӕрӕг быдыры кӕрон.

⁷Етамӕй рараст сты ӕмӕ, Баал-Цефоны раз чи ис, уыцы Пи-Хахиротмӕ баздӕхтысты ӕмӕ Мигдолы раз скодтой рӕсӕнуат.

⁸Пи-Хахиротӕй рацыдысты ӕмӕ денджызы астӕуты ӕдзӕрӕг быдырмӕ ахызтысты; ӕртӕ бонцауы фӕцыдысты Етамы ӕдзӕрӕг быдыры ӕмӕ рӕсӕнуат скодтой Марайы.

⁹Марайӕ рараст сты ӕмӕ Елиммӕ ӕрбацыдысты, Елимы та уыди дыууадӕс суадоны ӕмӕ дӕс ӕмӕ ӕртиссӕдз финик бӕласы, ӕмӕ уым рӕсӕнуат скодтой.

¹⁰Елимӕй рараст сты ӕмӕ Сырх денджызы был рӕсӕнуат скодтой.

¹¹Сырх денджызӕй рараст сты ӕмӕ Сины ӕдзӕрӕг быдыры рӕсӕнуат скодтой.

¹²Сины ӕдзӕрӕг быдырӕй рараст сты ӕмӕ рӕсӕнуат скодтой Дофкайы.

¹³Дофкайӕ рараст сты ӕмӕ рӕсӕнуат скодтой Алушы.

¹⁴Алушӕй рараст сты ӕмӕ рӕсӕнуат скодтой Рефидимы, ӕмӕ уым адӕмӕн дон нӕ уыди бануазынмӕ.

¹⁵Рараст сты Рефидимӕй ӕмӕ Синайы ӕдзӕрӕг быдыры рӕсӕнуат скодтой.

¹⁶Синайы ӕдзӕрӕг быдырӕй рараст сты ӕмӕ рӕсӕнуат скодтой Киврот-Хаттавайы.

¹⁷Рараст сты Киврот-Хаттавайӕ ӕмӕ рӕсӕнуат скодтой Хацероты.

¹⁸Хацеротӕй рараст сты ӕмӕ рӕсӕнуат скодтой Ритмайы.

¹⁹Рараст сты Ритмайӕ ӕмӕ рӕсӕнуат скодтой Риммон-Перецы.

²⁰Риммон-Перецӕй рараст сты ӕмӕ рӕсӕнуат скодтой Ливнӕйы.

²¹Рараст сты Ливнӕйӕ ӕмӕ рӕсӕнуат скодтой Рисайы.

²²Рисайӕ рараст сты ӕмӕ рӕсӕнуат скодтой Кегелатайы.

²³Рараст сты Кегелатайӕ ӕмӕ рӕсӕнуат скодтой Шеферы хохы рӕбын.

²⁴Шеферы хохӕй рараст сты ӕмӕ рӕсӕнуат скодтой Харадайы.

²⁵Рараст сты Харадайӕ ӕмӕ рӕсӕнуат ӕркодтой Макхелоты.

²⁶Макхелотӕй рараст сты ӕмӕ рӕсӕнуат скодтой Тахаты.

²⁷Рараст сты Тахатӕй ӕмӕ рӕсӕнуат скодтой Тарахы.

²⁸Тарахӕй рараст сты ӕмӕ рӕсӕнуат скодтой Миткайы.

²⁹Рараст сты Миткайӕ ӕмӕ рӕсӕнуат скодтой Хашмоны.

³⁰Хашмонӕй рараст сты ӕмӕ рӕсӕнуат скодтой Мосероты.

³¹Рараст сты Мосеротӕй ӕмӕ рӕсӕнуат скодтой Бен-Йаканы.

³²Бен-Йаканӕй рараст сты ӕмӕ рӕсӕнуат скодтой Хор-Агидгады.

³³Рараст сты Хор-Агидгадӕй ӕмӕ рӕсӕнуат скодтой Иотватайы.

³⁴Иотватайӕ рараст сты ӕмӕ рӕсӕнуат скодтой Авронайы.

³⁵Рараст сты Авронайӕ ӕмӕ рӕсӕнуат скодтой Ецион-Геверы.

³⁶Ецион-Геверӕй рараст сты ӕмӕ рӕсӕнуат скодтой Цины ӕдзӕрӕг быдыры, йӕ иннӕ ном — Кадеш.

³⁷Рараст сты Кадешӕй ӕмӕ рӕсӕнуат скодтой Оры хохы, Едомы бӕстӕйы арӕнмӕ ӕввахс.

³⁸Ӕмӕ сауджын Аарон Дунедарӕджы ныхасӕй ссыди Оры хохмӕ ӕмӕ уым амарди — израилӕгтӕ Мысыры бӕстӕй куы рацыдысты, уымӕн йӕ цыппорӕм азы фӕндзӕм мӕйы фыццаг бон.

³⁹Аарон Оры хохы сӕр куы амарди, уӕд ыл цыди сӕдӕ дыууын ӕртӕ азы.

⁴⁰Ӕмӕ фехъуыста Ханааны паддзах Арад, Ханааны бӕстӕн йӕ хуссары цӕрӕг, израилӕгтӕ ӕрбацӕуынц, уый.

⁴¹Рараст сты уыдон Оры хохӕй ӕмӕ рӕсӕнуат скодтой Цалмонайы.

⁴²Цалмонайӕ рараст сты ӕмӕ рӕсӕнуат скодтой Фуноны.

⁴³Рараст сты Фунонӕй ӕмӕ рӕсӕнуат скодтой Овоты.

⁴⁴Овотӕй рараст сты ӕмӕ рӕсӕнуат скодтой Ийе-Хаваримы, Моавы арӕныл.

⁴⁵Рараст сты Ийимӕй ӕмӕ рӕсӕнуат скодтой Дивон-Гады.

⁴⁶Дивон-Гадӕй рараст сты ӕмӕ рӕсӕнуат скодтой Алмон-Дивлатаимы.

⁴⁷Рараст сты Алмон-Дивлатаимӕй ӕмӕ рӕсӕнуат скодтой Аваримы хӕхты, Невойы раз.

⁴⁸Аваримы хӕхтӕй рараст сты ӕмӕ рӕсӕнуат скодтой Моавы быдырты, Иорданы цур, Йерихоны бакомкоммӕ.

⁴⁹Рӕсӕнуат скодтой Иорданы цур, Бет-Йешимотӕй Авел-Шиттимы онг, Моавы быдырты.

⁵⁰Ӕмӕ загъта Дунедарӕг Моисейӕн Моавы быдырты, Иорданы цур, Йерихоны бакомкоммӕ:

⁵¹«Фӕдзур израилӕгтӕм ӕмӕ сын зӕгъ: Иорданы сӕрты Ханааны бӕстӕм куы ахизат,

⁵²уӕд ын йӕ цӕрджыты се ’ппӕты дӕр фӕсурут уырдыгӕй, ныффалгӕрон сын кӕнут сӕ хуыцаугӕндты нывтӕ ӕмӕ джиппыуагъд сурӕттӕ, сӕ кувӕн къуыбыртӕ сын иууылдӕр сӕмлӕгъз кӕнут.

⁵³Байсут уыцы зӕхх ӕмӕ дзы ӕрбынат кӕнут, уымӕн ӕмӕ Ӕз уыцы бӕстӕ сымахӕн дӕттын.

⁵⁴Хӕлттӕм гӕсгӕ байуарут бӕстӕ уӕ хӕдзарвӕндӕгтыл. Стырдӕр мыггӕгтӕн скӕнут стырдӕр хӕйттӕ, сӕ нымӕц бирӕ кӕмӕн нӕу, уыдонӕн та — къаддӕр хӕйттӕ. Халмӕ гӕсгӕ кӕмӕ цы хай ӕрхауа, уым уыдзӕн йӕ бынат. Уӕ фыдӕлты хӕдзарвӕндӕгты ’хсӕн адих кӕнут зӕхх.

⁵⁵Ацы бӕстӕйы цӕрджыты куынӕ фӕсурат уӕ цурӕй, уӕд та, кӕй дзы ныууадзат, уыдон уӕ цӕстытӕн какон сындзытау уыдзысты, уӕ фӕрстӕ уын судзинтау рӕхойдзысты, цы бӕстӕйы ӕрцардыстут, уым уӕ тыхсын кӕндзысты.

⁵⁶Ӕмӕ уӕд, уыдонӕн цы хъавыдтӕн, уый Ӕз сымахӕн бакӕндзынӕн».