Read Хуыцауы Дзырд иронау Нымӕцтӕ 5 Bible Online

Нымӕцтӕ 5 - Хуыцауы Дзырд иронау bible

Нымӕцтӕ 5

¹Дунедарӕг загъта Моисейӕн:

²«Израилӕгтӕн зӕгъ, ӕмӕ рӕсӕнуатӕй арвитой, хъотыр кӕуыл ис, йӕ цъӕй кӕмӕн мизы, марды буарыл бандзӕвгӕйӕ чи фӕчъизи ис, уыдоны се ’ппӕты дӕр.

³Нӕлгоймагӕй, сылгоймагӕй сӕ арвитут, цӕмӕй ма чъизи кӕной рӕсӕнуат, уымӕн ӕмӕ Ӕз семӕ дӕн рӕсӕнуаты».

⁴Ӕмӕ израилӕгтӕ афтӕ бакодтой: ахӕм адӕймӕгты рӕсӕнуатӕй арвыстой. Дунедарӕг Моисейӕн куыд загъта, афтӕ бакодтой израилӕгтӕ.

⁵Дунедарӕг Моисейӕн загъта:

⁶«Зӕгъ израилӕгтӕн: нӕлгоймаг кӕнӕ сылгоймаг искӕй тӕригъӕды куы бацӕуа ӕмӕ афтӕмӕй Дунедарӕджы ныхмӕ фыддзинад куы ракӕна ӕмӕ куы фӕазымджын уа,

⁷уӕд йӕ тӕригъӕдыл басӕттӕд ӕмӕ, кӕй бахъыгдардта, уымӕн ӕххӕстӕй бафидӕд, цы йын фӕзиан кодта, уый, уыцы фиддонӕн ма йӕм ноджы йӕ фӕндзӕм хай бафтауӕд, афтӕмӕй.

⁸Кӕд ӕмӕ, фиддон чи айса, хъыгдард баййафӕгӕн ахӕм ӕввахс хион нӕй, уӕд азым ныббарӕггаг Дунедарӕджы у ӕмӕ сауджынӕн лӕвӕрд цӕуы — тӕригъӕд ссыгъдӕг кӕныны тыххӕй нывондӕн кӕй ӕрхӕссынц, уыцы фыримӕ.

⁹Израилӕгты мысайнӕгтӕ, сӕ уаз лӕвӕрттӕ, иууылдӕр сауджынты сты.

¹⁰Алы сауджын дӕр, цы уаз лӕвӕрттӕ йӕм ӕрбахӕссынц, уыдон йӕхицӕн ныууадзы: сауджынӕн цы рардӕуы, уый йӕ хай у».

¹¹Дунедарӕг Моисейӕн загъта:

¹²«Фехъусын кӕн израилӕгтӕн: мӕнӕ сын цы гӕнгӕ у, искӕуыл дзы йӕ ус гадзрахатӕй куы рацӕуа — куы йӕ фӕсайа —

¹³ӕмӕ искӕй лӕг йемӕ ӕмуат куы ’рцӕуа ӕмӕ йыл йӕ мыг куы фӕкала, фӕлӕ йӕ мой уый йӕхӕдӕг куынӕ фена, сылгоймаг сусӕгӕй йӕхи куы фӕчъизи кӕна ӕмӕ йӕ базылын кӕнынӕн йӕ ныхмӕ ӕвдисӕн куынӕ уа,

¹⁴фӕлӕ йӕм уӕддӕр лӕджы зӕрдӕ куы ’хсайа ӕмӕ йыл ӕнӕууӕнк куы кӕна, уӕд. Кӕнӕ, сылгоймаг йӕхи нӕ фӕчъизи кодта, афтӕмӕй йыл йӕ мой ӕнӕхъуаджы ӕнӕууӕнк кӕны, зӕгъгӕ,

¹⁵уӕд ӕрбакӕнӕд уыцы лӕг йӕ усы сауджыны размӕ. Йӕ усы тыххӕй сауджынӕн бахӕссӕд хъӕбӕрхоры ссады ефӕйы дӕсӕймаг хай, ӕрмӕст ыл оливӕйы сой ма ӕркалӕд ӕмӕ йыл буд ма сӕвӕрӕд — уыцы хойраджы хуын ӕнӕууӕнчы, багӕды кӕныны фӕдыл кӕй у, уымӕ гӕсгӕ.

¹⁶Дунедарӕджы раз ӕрлӕууын кӕнӕд сауджын сылгоймаджы.

¹⁷Ӕркӕнӕд аргъуыд дон дурын мигӕнӕны, Уаз Цӕрӕны астӕрдӕй сыджыт фелвасӕд ӕмӕ йӕ уыцы доны ныппарӕд.

¹⁸Ӕрлӕууын кӕнӕд сылгоймаджы Дунедарӕджы раз, йӕ сӕрыхъуынтӕ йын йе уӕхсчытыл ӕркалӕд ӕмӕ йын йӕ къухтӕм раттӕд уыцы хойраджы хуын — багӕды кӕныны хуын, ӕнӕууӕнчы хуын. Сауджыны къухты — маст дон, ӕлгъыст дон,

¹⁹афтӕмӕй хъуамӕ ныффӕдзӕхса сылгоймагӕн ӕмӕ йын зӕгъа: „Кӕд ӕмӕ ӕндӕр нӕлгоймаг демӕ ӕмуат не ’рцыди, кӕд ӕмӕ дӕ лӕгыл гадзрахатӕй нӕ рацыдтӕ ӕмӕ нӕ фӕчъизи дӕ, уӕд дӕ ацы маст дон, адӕймагыл ӕлгъыст чи ӕфтауы, уый, мацы бахъыгдарӕд!

²⁰Фӕлӕ кӕд дӕ лӕгыл гадзрахатӕй рацыдтӕ ӕмӕ ӕндӕр нӕлгоймаг демӕ ӕмуат ӕрцыди…“

²¹Ӕмӕ ацы ран карз ӕлгъыстӕй хъуамӕ фелгъита сауджын сылгоймаджы: „Ӕлгъыстаг дӕ фӕкӕнӕд Дунедарӕг, адӕмы ’хсӕн ӕмбисондӕн куыд баззайай, ӕддӕсывӕр, гуыбындымст куыд фӕуай!

²²Ацӕуӕд дӕ хуылфы ацы ӕлгъыст дон ӕмӕ дын дӕ гуыбын ныддымсын кӕнӕд, дӕ сывӕр дын федде кӕнӕд“. Ӕмӕ хъуамӕ зӕгъа сылгоймаг: „Аммен! Аммен!“

²³Уыцы ӕлгъыстытӕ хъуамӕ сауджын ныффысса тухгӕ чиныджы, фыстытӕ маст донмӕ ӕрӕхса

²⁴ӕмӕ бадара сылгоймагӕн уыцы ӕлгъыст маст дон, цӕмӕй уыцы ӕлгъыст дон йӕ хуылфы ацӕуа ӕмӕ йыл низ бафтауа.

²⁵Райсӕд сауджын сылгоймаджы къухӕй хойраджы хуын, ӕнӕууӕнчы хуын, Дунедарӕджы раз ӕй хӕрдмӕ сисӕд ӕмӕ йӕ нывондхӕссӕны размӕ бахӕссӕд.

²⁶Сисӕд уыцы хуынӕй йӕ армыдзаг, хуын иууылдӕр Дунедарӕджы кӕй у, уый нысанӕн, ӕмӕ йӕ нывондхӕссӕныл басудзӕд. Уый фӕстӕ сылгоймагӕн дон бадарӕд.

²⁷Уыцы дон ын куы бадара, уӕд, кӕд ӕмӕ сылгоймаг йӕхи ӕцӕгӕй фӕчъизи кодта ӕмӕ йӕ лӕгыл гадзрахатӕй рацыд, уӕд уыцы ӕлгъыст дон йӕ хуылфы низӕй ацӕудзӕн — йӕ гуыбын ныддымсдзӕн, йӕ сывӕр федде уыдзӕн, ӕмӕ ӕлгъыстаг фӕуыдзӕн сылгоймаг адӕмы ’хсӕн.

²⁸Кӕд ӕмӕ сылгоймаг йӕхи нӕ фӕчъизи кодта ӕмӕ сыгъдӕг у, уӕд ӕй дон ницы бахъыгдардзӕн, ӕмӕ ӕнӕзӕнӕг нӕ фӕуыдзӕн.

²⁹Уый — ӕнӕууӕнчы ӕгъдау, сылгоймаг йӕ лӕгыл гадзрахатӕй куы рацӕуа ӕмӕ йӕхи куы фӕчъизи кӕна,

³⁰кӕнӕ та лӕг дызӕрдыджы куы ныххауа ӕмӕ йӕ усыл ӕнӕууӕнк куы кӕна, уӕд. Дунедарӕджы раз ӕрлӕууын кӕнӕнт сылгоймаджы, ӕмӕ йӕ сауджын ацы ӕгъдаумӕ гӕсгӕ бавзарӕд.

³¹Ӕмӕ сыгъдӕг уыдзӕни лӕг тӕригъӕдӕй, ус та йӕ тӕригъӕды тыххӕй дзуапп ратдзӕн».