Read Хуыцауы Дзырд иронау Нымӕцтӕ 9 Bible Online

Нымӕцтӕ 9 - Хуыцауы Дзырд иронау bible

Нымӕцтӕ 9

¹Ӕмӕ загъта Дунедарӕг Моисейӕн Синайы ӕдзӕрӕг быдыры, Мысырӕй куы рацыдысты, уымӕн йӕ дыккаг азы фыццаг мӕйноджы:

²«Йӕ афоныл кӕнӕнт израилӕгтӕ Куадзӕн.

³Йӕ афоныл ӕй кӕнут, ацы мӕйӕн ӕй йӕ цыппӕрдӕсӕм бон, изӕрмилты, фӕтк ӕмӕ ӕгъдау куыддӕриддӕр домынц, афтӕ скӕнут».

⁴Моисей загъта израилӕгтӕн, цӕмӕй Куадзӕн скӕной,

⁵ӕмӕ Синайы ӕдзӕрӕг быдыры фыццаг мӕйы цыппӕрдӕсӕм бон изӕрмилты скодтой Куадзӕн. Алцыдӕр, Дунедарӕг Моисейӕн куыд бафӕдзӕхста, растдӕриддӕр афтӕ бакодтой израилӕгтӕ.

⁶Ахӕмтӕ уыди, марды буарыл чи андзӕвыд ӕмӕ чи фӕчъизи ис. Уыдонӕн уыцы бон Куадзӕны бӕрӕгбон скӕнӕн нӕ уыди, ӕмӕ тӕккӕ уыцы бон бацыдысты Моисей ӕмӕ Ааронмӕ

⁷ӕмӕ загътой: «Мах марды буарыл андзӕвыдыстӕм ӕмӕ сыгъдӕг не стӕм. Ау, иннӕ израилӕгтимӕ нын йӕ афоныл Дунедарӕгӕн нывонд ӕрхӕссыны бар нӕй?»

⁸Моисей загъта: «Фӕлӕуут мӕм ам, ӕмӕ ӕз байхъусон, Дунедарӕг уын цы зӕгъдзӕн, уымӕ».

⁹Дунедарӕг Моисейӕн загъта:

¹⁰«Фехъусын кӕн израилӕгтӕн: уӕхицӕй кӕнӕ уӕ байзӕддагӕй исчи, марды буармӕ февналгӕйӕ, куы фӕчъизи уа кӕнӕ дард фӕндагыл куы уа, уӕддӕр хъуамӕ Дунедарӕджы Куадзӕн скӕна.

¹¹Дыккаг мӕйы цыппӕрдӕсӕм бон ӕй изӕрмилты скӕнӕд, донгонд гуылтӕ ӕмӕ маст зайӕгхӕлттимӕ бахӕрӕд йӕ Куадзӕны уӕрыкк.

¹²Райсоммӕ дзы мацыуал ныууадзӕд ӕмӕ йын йе стджытӕй мацы асӕттӕд: Куадзӕны фӕтк хъуамӕ мацӕмӕй фехала.

¹³Сыгъдӕг чи у, фӕндагыл чи нӕ уыд ӕмӕ афтӕмӕй Куадзӕны нывонд чи не ’рхаста, уый йӕ адӕмӕй фӕхъӕудзӕн, уымӕн ӕмӕ Дунедарӕгӕн йӕ афоныл нывонд не ’рхаста; тӕригъӕды азар баййафдзӕн уыцы адӕймаджы.

¹⁴Уе ’хсӕн цӕрӕг ӕрцӕуӕггаджы куы фӕнда Дунедарӕджы Куадзӕн скӕнын, уӕд ӕй хъуамӕ Куадзӕны фӕтк ӕмӕ ӕгъдаумӕ гӕсгӕ скӕна — уыцы иу уагӕвӕрдтӕ уӕм хъуамӕ уа ӕцӕгӕлонӕн дӕр ӕмӕ бынӕттон цӕрӕгӕн дӕр».

¹⁵Цы бон ӕвӕрд ӕрцыди, уыцы бон Уаз Цӕрӕн иууылдӕр мигъы аныгъуылд, изӕрӕй райсоммӕ та, цыма йӕ сӕрмӕ арт судзы, афтӕ зынди.

¹⁶Уӕдӕй фӕстӕмӕ афтӕ уыди кӕддӕриддӕр: Уаз Цӕрӕн-иу мигъ ӕрбамбӕрзта, ӕхсӕвыгон та, цыма йӕ сӕрмӕ арт судзы, афтӕ зынди.

¹⁷Мигъ-иу йӕхи куы систа Уаз Цӕрӕнӕй, уӕд-иу израилӕгтӕ сӕ фӕндаг адардтой, мигъ-иу кӕм ӕрбадт, уым та-иу рӕсӕнуат скодтой.

¹⁸Дунедарӕджы амындӕй-иу ацыдысты сӕ фӕндагыл израилӕгтӕ ӕмӕ-иу Дунедарӕджы амындӕй ӕрлӕууыдысты: цалынмӕ-иу Уаз Цӕрӕны сӕрмӕ мигъ бадти, уӕдмӕ сӕ бынатӕй не змӕлыдысты.

¹⁹Мигъ-иу дӕргъвӕтин рӕстӕг йӕхи куы нӕ иста Уаз Цӕрӕнӕй, уӕд-иу израилӕгтӕ ӕнцад лӕууыдысты — ӕххӕст кодтой Дунедарӕджы фӕндон.

²⁰Мигъ-иу цалдӕр боны куы бадти Уаз Цӕрӕны сӕрмӕ, уӕд-иу израилӕгтӕ, Дунедарӕджы амындӕй, сӕ бынаты лӕууыдысты ӕмӕ-иу стӕй, Дунедарӕджы амындӕй, сӕ фӕндаг дарддӕр кодтой.

²¹Мигъ-иу йӕ бынаты ӕрмӕстдӕр изӕрӕй райсоммӕ куы лӕууыди, уӕд-иу уыдон дӕр, райсомӕй-иу куыддӕр йӕхи систа, афтӕ цӕуынмӕ фесты. Мигъ-иу йӕ бынаты иунӕг бон ӕмӕ иунӕг ӕхсӕв куы лӕууыд ӕмӕ-иу стӕй йӕхи куы систа, уӕд-иу уыдон дӕр уайсахат цӕуынмӕ фесты.

²²Дыууӕ боны, мӕй ӕви фылдӕр, цасфӕнды лӕууӕд мигъ Уаз Цӕрӕны сӕрмӕ — сӕ бынаты лӕууыдысты израилӕгтӕ ӕмӕ фӕндаджы кой нӕ кодтой, фӕлӕ-иу мигъ йӕхи куы систа, уӕд-иу уайтагъд цӕуынмӕ фесты.

²³Дунедарӕджы амындӕй-иу ӕрлӕууыдысты ӕмӕ-иу Дунедарӕджы амындӕй дарддӕр сӕ фӕндаг кодтой. Дунедарӕг Моисейӕн куыд бафӕдзӕхста, афтӕ кодтой.