Read Хуыцауы Дзырд иронау Захариа 4 Bible Online

Захариа 4 - Хуыцауы Дзырд иронау bible

Захариа 4

¹Мемӕ цы зӕд дзырдта, уый ногӕй мӕ разы февзӕрдис ӕмӕ мӕ райхъал кодта, адӕймаджы йӕ фынӕйӕ куыд фехъал кӕнынц, афтӕ.

²Бафарста мӕ: «Цы уыныс?» Ӕз дзуапп радтон: «Уынын сыгъзӕрин цырагъдарӕн, йӕ цъуппыл — сойы кӕхц, уый сӕрмӕ — авд цырагъы, алы цырагъыл дӕр — авд хӕтӕлы.

³Сойы кӕхцы фӕйнӕфарс — оливӕ бӕлӕстӕ: иу — йӕ рахизфарс, иннӕ — йӕ галиуфарс».

⁴Ӕз, мемӕ чи дзырдта, уыцы Зӕды бафарстон: «Уый цы у, ме ’лдар?»

⁵Мемӕ цы зӕд дзырдта, уый мын загъта: «Нӕ йӕ зоныс, цы у?» Ӕз ын дзуапп радтон: «Нӕ зонын, ме ’лдар».

⁶Уӕд мын афтӕ зӕгъы: «Уый Дунедарӕг ахӕм хуызы Зоровавелӕн фехъусын кодта Йӕ ныхас: хъару ӕмӕ хъомысы фӕрцы нӕ, фӕлӕ Мӕ Уды руаджы, — зӕгъы Уӕларвӕфсады Бардарӕг.

⁷О, бӕрзонд хох! Ды чи дӕ Зоровавелы раз? Быдырӕй уӕлдай ницы дӕ йӕ цуры. Уый рахӕсдзӕни Кувӕндоны фӕстаг дур, адӕм та хъӕр кӕндзысты: „Фарны дур нын фестӕд!“»

⁸Дунедарӕг Мын загъта:

⁹«Ацы хӕдзарӕн бындур Зоровавелы къухтӕ ӕрӕвӕрдтой, ӕмӕ йӕ кӕронмӕ дӕр сараздзысты йӕ къухтӕ. Уӕд базондзынӕ, сымахмӕ Мӕ Уӕларвӕфсады Бардарӕг кӕй рарвыста, уый.

¹⁰Ацы хъуыддагмӕ йӕ райдианы сӕрбӕрзондӕй чи касти, уыдон дӕр ныццин кӕндзысты, Зоровавелы къухы аразӕн дур куы феной, уӕд. Ацы авд цырагъы сты Дунедарӕджы авд цӕсты, уыдон фӕлгӕсынц ӕгас зӕххыл».

¹¹Уӕд ӕй ӕз бафарстон: «Цырагъдарӕнӕн йӕ галиу ӕмӕ йӕ рахизфарс цы оливӕ бӕлӕстӕ ис, уыдон та цы нысан кӕнынц?»

¹²Стӕй ма ноджы сфӕрӕзтон: «Цы амонынц, дыууӕ сыгъзӕрин хӕтӕлӕй сой цы бӕлӕстӕ уадзынц, уыдон та?»

¹³Уый мӕ бафарста: «Нӕ йӕ зоныс, цы сты, уый?» Ӕз дзуапп радтон: «Нӕ зонын, ме ’лдар».

¹⁴Уӕд мын уый загъта: «Уыдон сты дыууӕ байсӕрсты, ӕгас зӕххы Дунедарӕгӕн лӕггад кӕнынц».