Read Хуыцауы Дзырд иронау Матфей 28 Bible Online

Матфей 28 - Хуыцауы Дзырд иронау bible

Матфей 28

¹Сабат куы аивгъуыдта, уӕд, къуырийӕн йӕ фыццаг бон, магдалӕйаг Мариа ӕмӕ иннӕ Мариа сӕударӕй ӕрцыдысты зӕппадз бабӕрӕг кӕнынмӕ.

²Ӕвиппайды зӕхх тынг нынкъуысти: Хуыцауы зӕд ӕрцыди уӕларвӕй, дур афӕлдӕхта ӕмӕ йыл ӕрбадти.

³Уый уыди арвӕрттывды ӕнгӕс, йӕ дарӕс — урс-урсид митау.

⁴Хъахъхъӕнджытӕ фыр тӕссӕй ныррызтысты ӕмӕ мардау фесты.

⁵Зӕд сылгоймӕгтӕн загъта: «Ма тӕрсут! Ӕз зонын, дзуарылтыгъд Йесойы кӕй агурут, уый.

⁶Ам нӕй — райгас ис, куыд загъта, афтӕ. Ӕрбацӕут ӕмӕ фенут, кӕм ӕвӕрд уыди, уыцы бынат.

⁷Цӕугӕут рӕвдздӕр ӕмӕ Йын Йӕ ахуыргӕнинӕгтӕн зӕгъут, мӕрдтӕй райгас ис, зӕгъгӕ. Уый уӕ разӕй цӕуы Галилеймӕ, ӕмӕ Йӕ уым фендзыстут. Уый уын мӕ зӕгъинаг».

⁸Сылгоймӕгтӕ ратындзыдтой зӕппадзы цурӕй ӕмӕ цинӕмхӕццӕ тасимӕ азгъордтой хабар ахуыргӕнинӕгтӕн фехъусын кӕнынмӕ.

⁹Фӕндагыл ӕвиппайды сӕ размӕ рацыди Йесо ӕмӕ сын загъта: «Цин кӕнут!» Уыдон Ӕм базгъордтой, сӕ зонгуытыл ӕрхаудтой Йӕ разы ӕмӕ Йын ныттыхстысты Йӕ къӕхтыл.

¹⁰Уӕд сын Йесо загъта: «Ма тӕрсут. Ацӕут, фехъусын кӕнут Ме ’фсымӕртӕн, цӕмӕй Галилеймӕ ацӕуой; уым Мӕ фендзысты».

¹¹Сылгоймӕгтӕ ма фӕндагыл уыдысты, афтӕ хъахъхъӕнджытӕй чидӕртӕ бахӕццӕ сты сахармӕ ӕмӕ, цы ӕрцыди, уыдӕттӕ алчертӕн радзырдтой.

¹²Уыдон ӕрӕмбырд сты адӕмы хистӕртимӕ ӕмӕ бауынаффӕ кодтой. Ӕфсӕддонтӕн бирӕ ӕхца радтой

¹³ӕмӕ сын бафӕдзӕхстой: «Зӕгъут афтӕ: „Йӕ ахуыргӕнинӕгтӕ ӕрцыдысты ӕмӕ Йӕ ӕхсӕвы, мах фынӕй куы уыдыстӕм, уӕд адавтой“.

¹⁴Кӕд уыцы хабар бӕстыхицаумӕ бахӕццӕ уа, уӕд ӕй мах ууыл баууӕндын кӕндзыстӕм ӕмӕ уӕ мастӕй бахиздзыстӕм».

¹⁵Уыдон райстой ӕхца ӕмӕ, куыд сын бацамыдтой, афтӕ бакодтой. Уыцы хабар иудейӕгты ӕхсӕн суанг абон дӕр хъуыстгонд у.

¹⁶Иуӕндӕс ахуыргӕнинаджы Галилеймӕ, Йесо цы хохмӕ загъта, уырдӕм ацыдысты

¹⁷ӕмӕ Йӕ куы федтой, уӕд Йӕ разы сӕ зонгуытыл ӕрхаудтой. Фӕлӕ дзы иуӕй-иутӕ уӕддӕр гуырысхо кодтой.

¹⁸Йесо сӕм ӕрбахӕстӕг ис ӕмӕ сын загъта: «Арв ӕмӕ зӕххыл ӕппӕт бартӕ дӕр Мӕнӕн лӕвӕрд сты.

¹⁹Уӕдӕ ацӕут ӕмӕ ӕппӕт адӕмты Мӕ ахуыргӕнинӕгтӕ скӕнут. Аргъаут сыл Фыды, Фырты ӕмӕ Сыгъдӕг Уды номӕй.

²⁰Сахуыр сӕ кӕнут, Ӕз уын цы бафӕдзӕхстон, ӕппӕт уыдӕттӕ ӕххӕст кӕнын. Ӕз та дунейы фӕудмӕ кӕддӕриддӕр уыдзынӕн уемӕ».