Read Хуыцауы Дзырд иронау Марк 10 Bible Online

Марк 10 - Хуыцауы Дзырд иронау bible

Марк 10

¹Уырдыгӕй Йесо ацыд Иудейы зӕхмӕ ӕмӕ Иорданы фаллаг фарсмӕ ахызти. Адӕм та Йыл ногӕй ӕрӕмбырд сты, ӕмӕ та сын иннӕ хӕттытау амыдта.

²Бацыдысты Йӕм фарисейтӕ ӕмӕ Йӕ бафӕлварыны охыл бафарстой: «Лӕгӕн йӕ усы ауадзын ӕмбӕлы?»

³Йесо сын дзуапп радта: «Моисей уын цы бафӕдзӕхста?»

⁴Уыдон загътой: «Моисей бар радта лӕгӕн йӕ усы ауадзын, ӕрмӕст ын ахицӕны гӕххӕтт ныффыссӕд».

⁵Йесо сын загъта: «Моисей уын ахӕм фӕдзӕхст, хивӕнд кӕй стут, уый тыххӕй радта.

⁶Фӕлӕ райдианы Хуыцау „сфӕлдыста нӕлгоймаг ӕмӕ сылгоймаджы“.

⁷„Уымӕ гӕсгӕ адӕймаг ныууадздзӕни йӕ фыд ӕмӕ йӕ мады,

⁸баиу уыдзӕн йӕ усимӕ, ӕмӕ суыдзысты иу буар“. Афтӕмӕй уыдон уыдзысты дыууӕ нӕ, фӕлӕ иу буар.

⁹Уӕдӕ Хуыцау цы баиу кодта, уый адӕймаг ма фӕхицӕн кӕнӕд».

¹⁰Хӕдзары та Йӕ ахуыргӕнинӕгтӕ ногӕй бафарстой уый тыххӕй.

¹¹Йесо сын загъта: «Йӕ усӕй чи ахицӕн уа ӕмӕ ӕндӕр ус чи ракура, уый хӕтгӕ кӕны ӕмӕ уымӕй йӕ фыццаг усы тӕригъӕды цӕуы.

¹²Сылгоймаг куы ахицӕн уа ӕмӕ ӕндӕрмӕ куы смой кӕна, уӕд уый дӕр хӕтгӕ кӕны».

¹³Йесомӕ адӕм сӕ сывӕллӕтты хастой, цӕмӕй сыл андзӕва, фӕлӕ сӕ Йӕ ахуыргӕнинӕгтӕ нӕ уагътой.

¹⁴Йесо уый куы федта, уӕд смӕсты ис ӕмӕ сын загъта: «Уадз ӕмӕ Мӕм сабитӕ цӕуой, ма сӕ хъыгдарут, уымӕн ӕмӕ уыцы сывӕллӕтты хуызӕн чи у, Хуыцауы Паддзахад уыдоны у.

¹⁵Ӕцӕг цы у, уый уын зӕгъын: Хуыцауы Паддзахадыл сывӕллонау чи нӕ баууӕнда, уый йӕм нӕ бацӕудзӕн».

¹⁶Ӕмӕ сабиты Йӕ хъӕбысы ӕрбатыхта, Йӕ къухтӕ сыл авӕрдта ӕмӕ сын раарфӕ кодта.

¹⁷Йесо Йӕ фӕндагыл дарддӕр куы араст, уӕд ма Йӕм иу чидӕр ӕрбазгъордта. Йӕ разы йӕ зонгуытыл ӕрхауд ӕмӕ Йӕ бафарста: «Хорз Ахуыргӕнӕг, мыггагмӕйы цард райсынӕн цы саразон?»

¹⁸Йесо йын дзуапп радта: «Цӕмӕн Мӕ хоныс хорз? Иунӕг Хуыцауы йеддӕмӕ хорз ничи у.

¹⁹Йӕ фӕдзӕхстытӕ Йын зоныс: „Ма амар“, „Ма хӕт“, „Ма дав“, „Мӕнгӕвдисӕн ма ныллӕуу“, „Ма сай“, „Нымай дӕ фыд ӕмӕ дӕ мады“».

²⁰Уый Йесойӕн загъта: «Ахуыргӕнӕг, ӕппӕт уыдӕттӕ ме ’взонджы бонтӕй ӕххӕст кӕнын».

²¹Йесо йӕм бакасти, Йӕ зӕрдӕйӕн фӕадджын ис, ӕмӕ йын загъта: «Иу хъуыддаг ма дын нӕ фаг кӕны: ацу ӕмӕ дӕм цыдӕриддӕр ис, уый ауӕй кӕн, де ’хца мӕгуыртыл байуар, ӕмӕ дын уӕлӕрвты уыдзӕни хӕзна. Стӕй-иу раздӕх ӕмӕ цу Мӕ фӕдыл».

²²Уыцы ныхӕстӕ фехъусгӕйӕ, уый хорзау нал фӕци ӕмӕ ӕнкъардӕй ацыд, уымӕн ӕмӕ йӕм бирӕ мулк уыди.

²³Йесо йӕ алыварс акаст ӕмӕ Йӕ ахуыргӕнинӕгтӕн загъта: «Ӕвӕдза, куыд зын у бонджынтӕн Хуыцауы Паддзахадмӕ бацӕуын!»

²⁴Йӕ ныхӕстӕ ахуыргӕнинӕгты дисы бафтыдтой. Фӕлӕ сын Йесо ногӕй загъта: «Мӕ хъӕбултӕ, ӕвӕдза, [мулкӕй ныфс кӕй ис, уымӕн] куыд зын у Хуыцауы Паддзахадмӕ бацӕуын!

²⁵Хъӕздыгӕн Хуыцауы Паддзахадмӕ бацӕуынӕй теуайӕн судзины быныл ахизын ӕнцондӕр у».

²⁶Ахуыргӕнинӕгтӕм уый тынг диссаг фӕкаст, ӕмӕ сӕ кӕрӕдзийӕн дзырдтой: «Уӕдӕ чи фервӕздзӕн?»

²⁷Йесо сӕм бакаст ӕмӕ загъта: «Уый адӕймаджы бон нӕу, фӕлӕ Хуыцауӕн бантысдзӕн, уымӕн ӕмӕ Хуыцауӕн алцыдӕр у Йӕ бон».

²⁸Уӕд Ын Петр райдыдта дзурын: «Мӕнӕ мах ныууагътам ӕппӕт дӕр ӕмӕ рацыдыстӕм Дӕ фӕдыл».

²⁹Йесо сын дзуапп радта: «Ӕцӕг цы у, уый уын зӕгъын: Мӕ сӕраппонд ӕмӕ Фарны Уацы сӕраппонд йӕ хӕдзар, йе ’фсымӕрты, йӕ хоты, йӕ мад, йӕ фыды, [йӕ усы] йӕ сывӕллӕтты кӕнӕ йӕ зӕххытӕ чи ныууадза, уыдонӕй иу дӕр ахӕм нӕй,

³⁰ӕмӕ, кӕд ӕфхӕрд ӕййафдзӕн, уӕддӕр ныридӕгӕн, ацы заманы, фондзыссӕдз хатты фылдӕр чи нӕ райса хӕдзӕрттӕ, ӕфсымӕртӕ, хотӕ, мадӕлтӕ, сывӕллӕттӕ ӕмӕ зӕххытӕ, фидӕны та — мыггагмӕйы цард.

³¹Фӕлӕ фыццӕгтӕй бирӕтӕ уыдзысты фӕстӕгтӕ, фӕстӕгтӕй та — фыццӕгтӕ».

³²Йесо ӕмӕ Йӕ ахуыргӕнинӕгтӕ сӕ фӕндаг дардтой Йерусалиммӕ. Йесо цыди разӕй, ӕмӕ Йыл Йӕ ахуыргӕнинӕгтӕ дис кодтой, Йӕ фӕдыл цӕуӕг адӕмы та тас бацыди. Йесо фӕхибар кодта дыууадӕсы ӕмӕ сын ногӕй райдыдта дзурын, цы Йыл ӕрцӕудзӕн, уый тыххӕй:

³³«Ныр мах цӕуӕм Йерусалиммӕ, ӕмӕ Адӕймаджы Фырт лӕвӕрд ӕрцӕудзӕн алчертӕ ӕмӕ динамонджытӕм, ӕмӕ Йын уыдон марыны тӕрхон рахӕсдзысты, стӕй Йӕ муртаттӕгты къухтӕм ратдзысты.

³⁴Уыдон Ын алы ӕфхӕрӕн митӕ кӕндзысты, ехсӕй Йӕ нӕмдзысты, тутӕ Йыл кӕндзысты ӕмӕ Йӕ амардзысты. Фӕлӕ ӕртӕ боны фӕстӕ райгас уыдзӕн».

³⁵Йесомӕ бацыдысты Зеведейы фырттӕ Йаков ӕмӕ Иоанн ӕмӕ Йын загътой: «Ахуыргӕнӕг, фӕнды нӕ, цӕмӕй нын нӕ курдиат сӕххӕст кӕнай».

³⁶Йесо сӕ бафарста: «Зӕгъут-ма, цы уӕ хъӕуы, цы уын саразон?»

³⁷Уыдон Ын дзуапп радтой: «Дӕ кады афон куы ралӕууа, уӕд нӕ иуы сбадын кӕн Дӕ рахизфарс, иннӕйы та — Дӕ галиуфарс».

³⁸Йесо сын загъта: «Цы курут, уый уӕхӕдӕг дӕр не ’мбарут. Ӕз цы хъизӕмӕртты кӕхцӕй нуазын, уый бануазын кӕнӕ, Ӕз Мӕхимӕ кӕй исын, ахӕм аргъуыд райсын уӕ бон бауыдзӕн?»

³⁹Уыдон Ын дзуапп радтой: «Бауыдзӕн». Ӕмӕ сын уӕд Йесо загъта: «Ӕз цы хъизӕмӕртты кӕхцӕй нуазын, уымӕй нуаздзыстут ӕмӕ уыл саргъуыдӕуыдзӕн, Ӕз кӕй райсдзынӕн, ахӕм аргъуыдӕй.

⁴⁰Мӕ рахизфарс ӕмӕ Мӕ галиуфарс чи ӕрбаддзӕн, уый та Мӕнӕй аразгӕ нӕу — уыцы бынӕттӕ кӕмӕн ӕрцӕттӕ чындӕуыд, уыдон дзы сбаддзысты».

⁴¹Иннӕ дӕс ахуыргӕнинаджы уый куы фехъуыстой, уӕд Йаков ӕмӕ Иоаннмӕ смӕсты сты.

⁴²Йесо фӕдзырдта се ’ппӕтмӕ дӕр ӕмӕ сын загъта: «Сымах зонут, ӕлдӕрттӕ кӕй хонынц, уыдон адӕмтыл хицауиуӕг кӕй кӕнынц ӕмӕ хицӕуттӕн адӕмтыл сӕ бар кӕй цӕуы, уый.

⁴³Сымахмӕ та афтӕ ма уӕд. Уӕлдӕр уӕвын уӕ кӕй фӕнды, уый иннӕтӕн уӕд лӕггадгӕнӕг;

⁴⁴фыццаг уӕвын уӕ кӕй фӕнды, уый уе ’ппӕтӕн дӕр уӕд цагъар.

⁴⁵Адӕймаджы Фырт дӕр уый тыххӕй не ’рцыд, ӕмӕ Йын лӕггад кӕной. Уый ӕрцыди, цӕмӕй Йӕхӕдӕг балӕггад кӕна ӕмӕ бирӕты сӕрибары сӕраппонд ратта Йӕ цард».

⁴⁶Ӕрхӕццӕ сты Йерихонмӕ. Йӕ ахуыргӕнинӕгтӕ ӕмӕ бирӕ адӕмимӕ уырдыгӕй куы рацӕйцыди, уӕд иу куырм лӕг, мӕгуыргур Вартимей, Тимейы фырт, бадти фӕндаггӕрон.

⁴⁷Йӕ рӕзты Назаретаг Йесо фӕцӕуы, уый куы фехъуыста, уӕд хъӕр систа: «Йесо, Давиды Фырт, батӕригъӕд мын кӕн!»

⁴⁸Бирӕтӕ архайдтой, цӕмӕй ныхъхъус уа, ууыл, фӕлӕ уый ноджы тынгдӕр хъӕр кодта: «Давиды Фырт, батӕригъӕд мын кӕн!»

⁴⁹Йесо ӕрлӕууыд ӕмӕ загъта: «Фӕдзурут ӕм». Куырм лӕгмӕ фӕдзырдтой ӕмӕ йын загътой: «Ма тӕрс, сыст, дзуры дӕм!»

⁵⁰Уый йӕ пӕлӕз феппӕрста, фӕгӕпп кодта ӕмӕ Йесомӕ базгъордта.

⁵¹Йесо йӕ бафарста: «Цы дӕ фӕнды? Цӕмӕй дын баххуыс кӕнон?» Куырм Ын дзуапп радта: «Раввуни, мӕн фӕнды, цӕмӕй мӕ цӕстытӕй ракӕсон».

⁵²Йесо йын загъта: «Ацу, дӕ уырнындзинад дӕ фервӕзын кодта». Куырм уыцы сахат цӕстӕй ракаст ӕмӕ Йесойы фӕдыл ацыди.