Read Хуыцауы Дзырд иронау Марк 11 Bible Online

Марк 11 - Хуыцауы Дзырд иронау bible

Марк 11

¹Йерусалиммӕ сӕ бирӕ нал хъуыд. Елеоны хохы фахсыл Виффаги ӕмӕ Вифанимӕ куы фӕцӕйхӕццӕ кодтой, уӕд Йесо фӕдзырдта Йӕ ахуыргӕнинӕгтӕй дыууӕмӕ

²ӕмӕ сын загъта: «Ацӕут, уартӕ нӕ ныхмӕ цы хъӕу ис, уырдӕм. Куыддӕр хъӕумӕ бацӕуат, афтӕ дзы ссардзыстут, адӕймаг кӕуыл нӕма бадти, ахӕм къӕлӕу бастӕй. Суадзут ӕй ӕмӕ йӕ ардӕм ракӕнут.

³Исчи уӕ куы фӕрса: „Уый цы ми кӕнут?“, уӕд-иу ын дзуапп раттут: „Бардарӕджы хъӕуы, рӕхджы йӕ рарвитдзӕн фӕстӕмӕ“».

⁴Ахуыргӕнинӕгтӕ ацыдысты, ӕмӕ иу уынджы, кулдуарыл бастӕй, ссардтой къӕлӕуы, ӕмӕ йӕ суагътой.

⁵Уым чи лӕууыди, уыдонӕй сын чидӕртӕ загътой: «Цы ми кӕнут? Къӕлӕуы цӕмӕн уӕгъд кӕнут?»

⁶Ахуыргӕнинӕгтӕ сын, Йесо сын куыд бафӕдзӕхста, афтӕ дзуапп радтой, ӕмӕ сын уӕд уыдон дӕр ницыуал загътой.

⁷Ӕркодтой къӕлӕуы Йесомӕ, сӕвӕрдтой йыл сӕ дарӕс, ӕмӕ йыл Йесо сбадти.

⁸Адӕмӕй бирӕтӕ фӕндагыл айтыдтой сӕ дарӕс, иннӕтӕ та — быдыртӕй кӕй ӕрбахастой, уыцы къалиутӕ.

⁹Йесойӕн Йӕ разӕй ӕмӕ Йӕ фӕстӕ чи цыди, уыдон хъӕр кодтой: «Осаннӕ! Арфӕгонд уӕд Хуыцауы номӕй Ӕрцӕуӕг!

¹⁰Арфӕгонд уӕд нӕ фыдӕл Давиды ӕрцӕуинаг Паддзахад! Осаннӕ уӕлӕрвты!»

¹¹Йесо Йерусалиммӕ куы бахӕццӕ ис, уӕд бацыди Кувӕндонмӕ, алцӕмӕ дӕр лӕмбынӕг ӕркасти ӕмӕ, ӕнафон кӕй уыд, уымӕ гӕсгӕ Йӕ дыууадӕс ахуыргӕнинагимӕ Вифанимӕ ацыди.

¹²Дыккаг бон Вифанийӕ куы рацыдысты, уӕд Йесо сыстонг ис.

¹³Дардӕй ауыдта, сыфтӕр чи рафтыдта, ахӕм легъуи бӕлас ӕмӕ йӕм бацыди, кӕд ыл исты уаид, зӕгъгӕ. Фӕлӕ йӕм куы бахӕстӕг ис, уӕд ыл сыфтӕртӕ йеддӕмӕ ницы ссардта, уымӕн ӕмӕ йын дыргъафон нӕма уыд.

¹⁴Уӕд ын Йесо загъта: «Нырӕй фӕстӕмӕ дын дӕ дыргъӕй мыггагмӕ дӕр мачиуал бахӕрӕд». Ӕмӕ уый фехъуыстой Йӕ ахуыргӕнинӕгтӕ.

¹⁵Бахӕццӕ сты Йерусалиммӕ. Йесо Кувӕндоны кӕртмӕ бацыд ӕмӕ — уӕйгӕнӕгӕй, ӕлхӕнӕгӕй — се ’ппӕты дӕр тӕрын райдыдта, ӕхцаивджытӕн афӕлдӕхта сӕ фынгтӕ, бӕлонуӕйгӕнджытӕн — сӕ бандӕттӕ.

¹⁶Стӕй Кувӕндоны кӕрты уылты никӕй уагъта исты дзаума хӕссын.

¹⁷Амыдта сын: «Афтӕ фыст нӕу, ӕви: „Мӕ Хӕдзар Мын ӕппӕт адӕмтӕн кувӕн хӕдзар схондзысты“? Сымах та дзы абырджыты лӕгӕт сарӕзтат».

¹⁸Алчертӕ ӕмӕ динамонджытӕ уый фехъуыстой ӕмӕ агуырдтой Йӕ амарыны фадат. Уымӕн ӕмӕ Йӕ ахуырад ӕппӕт адӕмы дисы ӕфтыдта, ӕмӕ Дзы тарстысты.

¹⁹Куы баизӕр ис, уӕд Йесо Йӕ ахуыргӕнинӕгтимӕ сахарӕй рацыди.

²⁰Дыккаг бон та райсомӕй легъуи бӕласы цурты фӕцӕйцыдысты ӕмӕ федтой, бӕлас суанг йӕ уидӕгтӕм кӕй бахус ис, уый.

²¹Петрӕн йӕ зӕрдыл ӕрлӕууыди зноны хабар ӕмӕ Йесомӕ дзуры: «Равви, акӕс-ма, Ды кӕй ралгъыстай, уыцы легъуи бӕлас бахус ис!»

²²Йесо сын загъта:

²³«Ӕууӕндут Хуыцауыл. Ӕцӕг цы у, уый уын зӕгъын: исчи мӕнӕ ацы хохӕн афтӕ куы зӕгъа, зӕххӕй фӕхицӕн у ӕмӕ денджызы дӕхи баппар, зӕгъгӕ, ӕмӕ, афтӕ кӕй уыдзӕн, ууыл дызӕрдыг куынӕ кӕна, фӕлӕ, йӕ ныхӕстӕ ӕрцӕудзысты, уый йӕ фидарӕй куы уырна, уӕд, куыд зӕгъа, афтӕ уыдзӕни.

²⁴Уымӕ гӕсгӕ уын зӕгъын: уӕ куывды цы курат, уый ныридӕгӕн кӕй райстат, ууыл ӕууӕндут ӕмӕ йӕ уӕд ӕнӕмӕнгӕй райсдзыстут.

²⁵Стӕй, кувгӕйӕ, Хуыцауы раз куы лӕууат, уӕ зӕрдӕйы та искӕмӕ маст куы хӕссат, уӕд-иу ын ныббарут, ӕмӕ уын уӕ Уӕларвон Фыд дӕр ныббардзӕни уӕ тӕригъӕдтӕ.

²⁶[Кӕд нӕ барут, уӕд уын уӕ Уӕларвон Фыд дӕр нӕ ныббардзӕни уӕ тӕригъӕдтӕ.]»

²⁷Йесо та Йӕ ахуыргӕнинӕгтимӕ ӕрбаздӕхти Йерусалиммӕ. Кувӕндоныл куы зылди, уӕд Ӕм алчертӕ, динамонджытӕ ӕмӕ адӕмы хистӕртӕ бацыдысты

²⁸ӕмӕ Йӕ бафарстой: «Ды ацы хъуыддӕгтӕ цавӕр хъаруйӕ кӕныс? Афтӕ кӕныны бар Дын чи радта?»

²⁹Йесо сын загъта: «Ӕз дӕр уӕ иу цӕмӕйдӕр бафӕрсдзынӕн. Дзуапп Мын раттут, ӕмӕ уын уӕд Ӕз дӕр зӕгъдзынӕн, цавӕр хъаруйӕ сӕ кӕнын, уый.

³⁰Зӕгъут-ма мын, Иоанн цы аргъуыдӕй аргъуыдта, уый йын кӕмӕй лӕвӕрд уыд: уӕларвӕй ӕви адӕмӕй?».

³¹Уыдон кӕрӕдзийӕн дзырдтой: «Афтӕ куы зӕгъӕм: „Уӕларвӕй“, уӕд нӕ бафӕрсдзӕн: „Уӕдӕ цӕуылнӕ баууӕндыдыстут Иоанныл?“»

³²«Адӕмӕй» зӕгъын та тарстысты адӕмӕй, уымӕн ӕмӕ се ’ппӕты дӕр уырныдта, Иоанн ӕцӕгӕйдӕр пехуымпар кӕй уыд, уый.

³³Ӕмӕ дзуапп радтой Йесойӕн: «Нӕ йӕ зонӕм». Уӕд сын Йесо дӕр загъта: «Уӕдӕ уын Ӕз дӕр нӕ зӕгъдзынӕн, ацы хъуыддӕгтӕ цавӕр хъаруйӕ кӕнын, уый».