Read Хуыцауы Дзырд иронау Марк 16 Bible Online

Марк 16 - Хуыцауы Дзырд иронау bible

Марк 16

¹Сабат куы аивгъуыдта, уӕд магдалӕйаг Мариа, Йаковы мад Мариа ӕмӕ Саломи балхӕдтой хӕрздӕфгӕнӕнтӕ, цӕмӕй ацӕуой ӕмӕ Йесойы байсӕрдой.

²Ӕмӕ къуырийы фыццаг бон, райсомӕй раджы, хур куыддӕр скастис, афтӕ ӕрбацыдысты зӕппадзмӕ.

³Ӕмӕ кӕрӕдзийӕн дзырдтой: «Зӕппадзмӕ бахизӕнӕй нын дур чи афӕлдахдзӕн?»

⁴Фӕлӕ куы бакастысты, уӕд ӕй фӕлдӕхтӕй федтой, афтӕмӕй та дур уыди тынг стыр.

⁵Зӕппадзмӕ куы бацыдысты, уӕд дзы рахизӕрдыгӕй федтой ӕрыгон лӕппуйы, урс дарӕсы бадгӕйӕ, ӕмӕ сыл стыр тас бахӕцыд.

⁶Фӕлӕ сын уый загъта: «Ма тӕрсут. Сымах дзуарылтыгъд Назаретаг Йесойы агурут — ам нӕй, райгас ис. Мӕнӕ, кӕм Ӕй бавӕрдтой, уыцы бынат.

⁷Уӕдӕ ацӕут ӕмӕ зӕгъут Йӕ ахуыргӕнинӕгтӕн, стӕй Петрӕн дӕр, Галилеймӕ уӕ разӕй фӕцӕуы, зӕгъгӕ. Уым Ӕй фендзыстут, Йӕхӕдӕг уын куыд загъта, афтӕ».

⁸Сылгоймӕгтӕ зӕппадзӕй куы рацыдысты, уӕд згъорынмӕ фесты. Фыр адӕргӕй сӕхи дӕр нал ӕмбӕрстой ӕмӕ никӕмӕн ницы загътой, уымӕн ӕмӕ тарстысты.

⁹Йесо, къуырийы фыццаг бон куы райгас ис сӕумӕйӕ, уӕд уал фыццаг Йӕхи раргом кодта магдалӕйаг Мариамӕ — авд дӕлимоны кӕмӕй расырдта, уымӕ.

¹⁰Уый ацыд ӕмӕ хабар радзырдта Йесойы ахуыргӕнинӕгтӕн, ныр кӕугӕ ӕмӕ дзыназгӕ чи кодта, уыдонӕн.

¹¹Фӕлӕ уыдон, Йесо райгас ис ӕмӕ Йӕ Мариа федта, зӕгъгӕ, уый куы фехъуыстой, уӕд сӕ нӕ бауырныдта.

¹²Уый фӕстӕ ахуыргӕнинӕгтӕй дыууӕ хъӕумӕ куы фӕцӕйцыдысты, уӕд сӕм Йесо, ӕндӕр хуыз райсгӕйӕ, фӕндагыл Йӕхи раргом кодта.

¹³Уыдон раздӕхтысты ӕмӕ хабар иннӕтӕн дӕр радзырдтой. Фӕлӕ уыдоныл дӕр нӕ баууӕндыдысты.

¹⁴Ӕппынфӕстаг Йесо Йӕ иуӕндӕс ахуыргӕнинагмӕ раргом ис, фынджы уӕлхъус куы бадтысты, уӕд. Ӕмӕ сын бауайдзӕф кодта, уырнындзинад сӕм кӕй нӕ уыд, сӕ зӕрдӕтӕ ӕхгӕд кӕй разындысты ӕмӕ, Йӕ райгасы фӕстӕ Йӕ чи федта, уыдоныл кӕй нӕ баууӕндыдысты, уый тыххӕй.

¹⁵Ӕмӕ сын загъта: «Ӕрзилут ӕгас дунейыл ӕмӕ Фарны Уац хъусын кӕнут алкӕмӕн дӕр.

¹⁶Чи баууӕнда ӕмӕ аргъуыд чи райса, уый фервӕздзӕн; чи нӕ баууӕнда, уый та тӕрхонгонд ӕрцӕудзӕн.

¹⁷Уырнджытӕ та ахӕм диссӕгтӕ ӕвдисдзысты: Мӕ номӕй сурдзысты дӕлимонты, ног ӕвзӕгтыл сдзурдзысты;

¹⁸кӕлмыты исдзысты сӕ къухтӕм ӕмӕ, марг куы бануазой, уӕд дӕр сын ницы уыдзӕн; рынчынтыл сӕ къухтӕ ӕвӕрдзысты, ӕмӕ-иу уыдон адзӕбӕх уыдзысты».

¹⁹Уыдӕттӕ зӕгъыны фӕстӕ Бардарӕг Йесо уӕларвмӕ Йӕхи систа ӕмӕ уым Хуыцауы рахизфарс ӕрбадти.

²⁰Ахуыргӕнинӕгтӕ дӕр ацыдысты ӕмӕ алы ран хъусын кодтой Фарны Уац. Бардарӕг сын ӕххуыс кодта ӕмӕ, сӕ ныхас раст кӕй у, уый ӕвдыста алы диссӕгты фӕрцы.