Read Хуыцауы Дзырд иронау Марк 9 Bible Online

Марк 9 - Хуыцауы Дзырд иронау bible

Марк 9

¹Загъта ма сын: «Ӕцӕг цы у, уый уын зӕгъын: ам чи лӕууы, уыдонӕй иуӕй-иутӕ нӕ амӕлдзысты, цалынмӕ Хуыцауы Паддзахад хъомысджынӕй ӕрцӕугӕ феной, уӕдмӕ».

²Ӕхсӕз боны фӕстӕ Йесо Йемӕ рахуыдта Петр, Йаков ӕмӕ Иоанны, скодта сӕ бӕрзонд хохмӕ, ӕмӕ уым уыдысты хибарӕй. Сӕ разы Йӕ хуыз аивта.

³Йӕ дарӕс сӕрттывта ӕмӕ Йын митау урс-урсид фестади — зӕххыл иу адӕймагӕн дӕр хъуымац афтӕ сурс кӕнын йӕ бон нӕ бауыдзӕн.

⁴Фӕзындысты Илийа ӕмӕ Моисей ӕмӕ ныхас кодтой Йесоимӕ.

⁵Уӕд Петр загъта Йесойӕн: «Равви, мӕнӕ нын цы хорз у ам! Цӕй ӕмӕ ацы ран ӕртӕ халагъуды скӕнӕм: иу — Дӕуӕн, иу — Моисейӕн, иу — Илийайӕн».

⁶Уымӕн ӕмӕ, цы загътаид, уый нӕ зыдта — афтӕ тынг фӕтарстысты.

⁷Уалынмӕ фӕзындис ӕврагъ, ӕрӕмбӕрзта сӕ, ӕмӕ ӕврагъӕй райхъуысти: «Ай Мӕ уарзон Фырт у. Хъусут Ӕм».

⁸Ӕмӕ ӕваст сӕ алыварс куы акастысты, уӕд дзы Йесойы йеддӕмӕ никӕйуал федтой.

⁹Хохӕй куы ’рцӕйцыдысты, уӕд сын Йесо бафӕдзӕхста, цӕмӕй, цы федтой, уый, цалынмӕ Адӕймаджы Фырт мӕрдтӕй райгас уа, уӕдмӕ макӕмӕн радзурой.

¹⁰Йесойы фӕдзӕхст сӕ зӕрдыл бадардтой, фӕлӕ кӕрӕдзийы фарстой, «мӕрдтӕй райгас уӕвын» цы амоны, зӕгъгӕ.

¹¹Ӕмӕ Йӕ бафарстой: «Уӕдӕ динамонджытӕ афтӕ цӕмӕн дзурынц, Чырыстийы размӕ уал, дам, Илийа хъуамӕ ӕрцӕуа?»

¹²Йесо сын дзуапп радта: «Раст у, раздӕр хъуамӕ Илийа ӕрцӕуа ӕмӕ ӕппӕт дӕр банывыл кӕна. Сыгъдӕг Фысты уӕдӕ афтӕ загъд цӕмӕн ис, Адӕймаджы Фырт хъуамӕ бирӕ удхӕрттӕ бавзара ӕмӕ хынджылӕггаг суа, зӕгъгӕ?

¹³Фӕлӕ уын зӕгъын: Илийа дӕр ныридӕгӕн ӕрцыдис, ӕмӕ сӕ цы фӕндыди, уый йын бакодтой, фыст куыд ис, афтӕ».

¹⁴Иннӕ ахуыргӕнинӕгтӕм куы ӕрыздӕхтысты, уӕд сын сӕ алыварс ӕрӕййӕфтой бирӕ адӕм, стӕй динамонджыты — семӕ цӕуылдӕр быцӕу кодтой.

¹⁵Адӕм Йесойы куы ауыдтой, уӕд иууылдӕр стыр дисы бафтыдысты, Йӕ размӕ згъордтой ӕмӕ Йын салам лӕвӕрдтой.

¹⁶Йесо сӕ бафарста: «Цӕуыл у уӕ быцӕу?»

¹⁷Адӕмӕй Йын иу дзуапп радта: «Ахуыргӕнӕг, ӕз Дӕм ӕрбакодтон мӕ фырты, ӕнӕзӕгъинаг ӕй багомыг кодта.

¹⁸Кӕм ӕй ӕрцахсы, уым ӕй зӕххыл ныццӕвы, ӕмӕ лӕппуйӕн йӕ комы фынк акӕлы, йӕ дӕндӕгты хъыс-хъыс ссӕуы ӕмӕ фӕсур вӕййы. Дӕ ахуыргӕнинӕгтӕн загътон, цӕмӕй дӕлимоны расурой, фӕлӕ сӕ бон нӕ баци».

¹⁹Йесо дзуапп радта: «Ӕнӕуырнӕг фӕлтӕр! Цас ма уыдзынӕн уемӕ? Кӕдмӕ ма уын быхсдзынӕн? Ӕрбакӕнут Мӕм ӕй».

²⁰Ӕмӕ Йӕм ӕй ӕрбакодтой. Дӕлимон куыддӕр Йесойы ауыдта, афтӕ лӕппуйы йӕ гӕндзӕхтӕ цӕгъдыныл бафтыдта; лӕппу зӕххыл адӕргъ ис ӕмӕ, йӕ комы фынк калгӕйӕ, ратул-батул кодта.

²¹Уӕд ын Йесо йӕ фыды бафарста: «Рагӕй афтӕ у?» Уый Йын дзуапп радта: «Йӕ чысылӕй нырмӕ.

²²Дӕлимон ӕй бирӕ хӕттыты хъавыди фесафынмӕ: куы арты, куы та йӕ доны ӕппӕрста. Фӕлӕ кӕд Дӕ бон исты саразын у, уӕд нын фӕтӕригъӕд кӕн ӕмӕ нын баххуыс кӕн».

²³Йесо йын загъта: «Кӕд Дӕ бон у, зӕгъыс? Чи ӕууӕнды, уымӕн йӕ бон алцыдӕр у».

²⁴Уӕд лӕппуйы фыд [цӕссыгкалгӕ] уыциу хъӕр фӕкодта: «Уырны мӕ! Кӕд мӕ уырнындзинад фидар нӕу, уӕд мын ыл бафтау».

²⁵Йесо адӕмы ӕрбацӕйзгъоргӕ куы федта, уӕд ӕнӕзӕгъинагӕн карзӕй загъта: «Ӕгомыг ӕмӕ къуырма уд! Ӕз дын бардзырд дӕттын: рахиз дзы ӕмӕ йӕ мидӕг макуыуал бацу».

²⁶Уӕд дӕлимон ныцъцъӕхахст кодта, тынг ныууыгъта лӕппуйы ӕмӕ дзы рацыди. Лӕппу мардау фӕцис, ӕмӕ бирӕтӕ фенхъӕлдтой, удӕгас нал у, зӕгъгӕ.

²⁷Фӕлӕ йын Йесо йӕ къухыл ныххӕцыд, рабадын ӕй кодта, ӕмӕ лӕппу сыстади.

²⁸Йесо хӕдзармӕ куы бацыди, уӕд Ӕй Йӕ ахуыргӕнинӕгтӕ хибарӕй бафарстой: «Дӕлимоны расурын мах бон цӕуылнӕ баци?»

²⁹Йесо сын загъта: «Адоны мыггагӕн ӕрмӕстдӕр кувын ӕмӕ ком дарыны фӕрцы ис фӕсурӕн».

³⁰Рацыдысты уырдыгӕй ӕмӕ сӕ фӕндаг акодтой Галилейыл. Йесойы нӕ фӕндыди, цӕмӕй, уым кӕй ис, уый исчи базона.

³¹Уымӕн ӕмӕ Йӕ ахуыргӕнинӕгтӕн ӕмбарын кодта ӕмӕ сын дзырдта: «Адӕймаджы Фырты ратдзысты адӕмы къухтӕм, амардзысты Йӕ, ӕмӕ ӕртыккаг бон райгас уыдзӕн».

³²Фӕлӕ Йын уыдон нӕ бамбӕрстой Йӕ ныхӕстӕ, бафӕрсын та Йӕ нӕ уӕндыдысты.

³³Ӕрцыдысты Капернауммӕ. Хӕдзары куы уыдысты, уӕд сӕ Йесо бафарста: «Фӕндагыл та цӕуыл дзырдтат?»

³⁴Уыдон ныхъхъус сты, уымӕн ӕмӕ фӕндагыл фӕбыцӕу сты, уӕлдӕр сӕ чи у, уый фӕдыл.

³⁵Уӕд Йесо ӕрбадти, дыууадӕсмӕ дӕр фӕдзырдта ӕмӕ сын загъта: «Фыццаг уӕвын кӕй фӕнды, уый уӕд ӕппӕты фӕстаг ӕмӕ лӕггад кӕнӕд алкӕмӕн дӕр».

³⁶Стӕй сын сӕ размӕ ӕрбахуыдта сывӕллоны, ӕрбахъӕбыс ӕй кодта ӕмӕ сын загъта:

³⁷«Ахӕм сабитӕй иуы дӕр Мӕн тыххӕй чи суазӕг кӕна, уый Мӕн суазӕг кӕндзӕн; Мӕн чи суазӕг кӕна, уый та — Мӕ Рарвитӕджы».

³⁸Уӕд Ын Иоанн афтӕ зӕгъы: «Ахуыргӕнӕг, мах федтам, Дӕ номӕй дӕлимонты чи суры, иу ахӕм адӕймаджы ӕмӕ йын карзӕй загътам, цӕмӕй афтӕ мауал кӕна, уымӕн ӕмӕ уый махӕй нӕу».

³⁹Йесо йын дзуапп радта: «Ма йӕ хъыгдарут. Мӕ номӕй диссаг чи равдиса, уый ӕваст Мӕ фыдгой кӕнынмӕ нӕ фӕуыдзӕн.

⁴⁰Нӕ ныхмӕ чи нӕу, уый нӕ фарс у.

⁴¹Чырыстийы кӕй стут, уый тыххӕй уын доны къус чи бадӕтта, уый, ӕцӕг цы у, уый уын зӕгъын, ӕнӕ хӕрзиуӕгӕй нӕ баззайдзӕн.

⁴²Фӕлӕ ацы кӕстӕртӕй — Мӕныл ӕууӕндджытӕй — иуы дӕр тӕригъӕды чи баппара, уымӕн йӕ бӕрзӕйыл куыройы фыд куы ӕрцауындзиккой ӕмӕ йӕ денджызмӕ куы баппариккой, уӕд ын хуыздӕр уаид.

⁴³Дӕ къух дӕ рӕдийын кӕны, — ралыг ӕй кӕн: хуыздӕр дын у уӕнгхъуагӕй цӕрын, цӕйнӕфӕлтау дыууӕ къухимӕ зындоны ӕнӕхуысгӕ арты бахауай.

⁴⁴[Уым сӕ къуыдыргалм нӕ мӕлы, ӕмӕ дзы арт нӕ хуыссы.]

⁴⁵Дӕ къах дӕ рӕдийын кӕны, — ралыг ӕй кӕн: хуыздӕр дын у уӕнгхъуагӕй цӕрын, цӕйнӕфӕлтау дыууӕ къахимӕ зындонмӕ бахауай.

⁴⁶[Уым сӕ къуыдыргалм нӕ мӕлы, ӕмӕ дзы арт нӕ хуыссы.]

⁴⁷Дӕ цӕст дӕ куы рӕдийын кӕна, уӕд ӕй фелвас: хуыздӕр дын у иу цӕстимӕ Хуыцауы Паддзахадмӕ бацӕуын, цӕйнӕфӕлтау дыууӕ цӕстимӕ зындоны арты бахауай.

⁴⁸[Уым сӕ къуыдыргалм нӕ мӕлы, ӕмӕ дзы арт нӕ хуыссы.]

⁴⁹Уымӕн ӕмӕ, Хуыцауӕн хаст нывонд цӕххӕй куыд ссыгъдӕг кӕнынц, афтӕ алчидӕр арты фӕрцы сыгъдӕггонд ӕрцӕудзӕни.

⁵⁰Цӕхх хорз у, фӕлӕ йӕ тых куы фесӕфа, уӕд ма йӕ цӕмӕй сцӕхджын кӕндзынӕ? Ӕдзӕхх ма ут ӕмӕ кӕрӕдзиимӕ хӕларӕй цӕрут».