Read Хуыцауы Дзырд иронау Лука 11 Bible Online

Лука 11 - Хуыцауы Дзырд иронау bible

Лука 11

¹Иуахӕмы Йесо куывта ӕмӕ, куывд куы фӕци, уӕд Ӕм Йӕ ахуыргӕнинӕгтӕй иу бахатыд: «Хицау, сахуыр нӕ кӕн кувын, Иоанн йӕ ахуыргӕнинӕгты куыд сахуыр кодта, афтӕ».

²Йесо сын загъта: «Куы фӕкувут, уӕд-иу дзурут: „Нӕ Фыд! Кадджын уӕд Дӕ ном! Ӕрцӕуӕд Дӕ Паддзахад. Уӕлӕрвты куыд у, афтӕ зӕххыл дӕр сӕххӕст уӕд Дӕ фӕндон.

³Ратт нын абон цӕрынваг къӕбӕр.

⁴Ныббар нын нӕ хӕстӕ, мах нӕ хӕсджынтӕн куыд барӕм, афтӕ. Ма нӕ бафтау фыдӕвзарӕны, фӕлӕ нӕ бахиз сайтанӕй“».

⁵Йесо сын загъта: «Ныр, зӕгъӕм, сымахӕй искӕмӕн ис хӕлар, ӕмбисӕхсӕв ӕм бацыдыстут ӕмӕ йын загътат: „Мӕ хӕлар, ӕртӕ дзулы мын ӕфстау авӕр.

⁶Мӕ хӕлар мӕм фӕндагӕй фездӕхт, ӕмӕ йӕ цӕмӕй суазӕг кӕнон, уый мӕм нӕй“.

⁷Ӕмӕ уӕм уый мидӕгӕй куы радзурид: „Ма мӕ хъыгдар, мӕ дуар ныридӕгӕн ӕхгӕд у, мӕхӕдӕг дӕр хуысгӕ кӕнын ӕмӕ мӕ сывӕллӕттӕ дӕр хуыссӕны мемӕ сты. Фестон ӕмӕ дын дзул раттон, уый ныртӕккӕ мӕ бон нӕу“.

⁸Зӕгъын уын: уӕ хӕлардзинад нымайгӕйӕ, уый уайтагъд куынӕ феста ӕмӕ уын уӕ къух куынӕ сараза, фӕлӕ йӕ сымах уӕддӕр куынӕ уадзат, уӕд иуафон сыстдзӕнис ӕмӕ уын ратдзӕн, цы дзы курут, уый.

⁹Уӕдӕ уын Ӕз дӕр зӕгъын: курут ӕмӕ райсдзыстут, агурут ӕмӕ ссардзыстут, хойут ӕмӕ уын байгом уыдзӕн.

¹⁰Уымӕн ӕмӕ алы курӕг дӕр райсы, алы агурӕг дӕр ссары ӕмӕ алы хойӕгӕн дӕр дуар байгом вӕййы.

¹¹Йӕ фырт дзы дзул куы кура, уӕд ын дур чи ратта, уе ’хсӕн ахӕм фыд ис? Кӕнӕ кӕсаг куы кура, уӕд ын калм ратдзӕн?

¹²Айк дзы куы кура, уӕд ын йӕ къухы къӕдздым фӕсадздзӕн?

¹³Уӕдӕ сымах фыдзӕрдӕтӕ куы стут ӕмӕ уӕддӕр уӕ зӕнӕгӕн хорзы цӕуын куы зонут, уӕд Уӕларвон Фыд куыннӕ ратдзӕни Сыгъдӕг Уд, чи Дзы куры, уыдонӕн!»

¹⁴Иу хатт Йесо иу лӕгӕй сырдта ӕгомыггӕнӕг дӕлимоны. Куы дзы рацыди, уӕд гоби йӕ дзыхӕй сдзырдта, ӕмӕ адӕм дисы бафтыдысты.

¹⁵Иуӕй-иутӕ ма афтӕ дӕр загътой: «Уый дӕлимонты суры дӕлимонты ӕлдар Веелзевулы хъаруйӕ».

¹⁶Иннӕтӕ та Дзы Йӕ бафӕлварыны тыххӕй уӕларвӕй ӕвдисӕйнаг равдисын домдтой.

¹⁷Фӕлӕ сын Йесо зыдта сӕ хъуыдытӕ ӕмӕ сын загъта: «Цыфӕнды паддзахад дӕр, йӕ адӕм кӕрӕдзийы ныхмӕ куы ралӕууой, уӕд федзӕрӕг уыдзӕни, хӕдзары бинонтӕ кӕрӕдзийы ныхмӕ куы суой, уӕд хӕдзар ныккӕлдзӕн.

¹⁸Уӕдӕ кӕд сайтан йӕхи ныхмӕ тох кӕны, уӕд йӕ паддзахад куыд фӕлӕудзӕни? Сымах та афтӕ дзурут, цыма Ӕз Веелзевулы хъаруйӕ сурын дӕлимонты.

¹⁹Кӕд Ӕз дӕлимонты Веелзевулы хъаруйӕ сурын, уӕд сӕ уӕ фырттӕ та кӕй хъаруйӕ сурынц? Уыдон уын тӕрхонгӕнӕг уӕнт.

²⁰Фӕлӕ кӕд Хуыцауы хъаруйӕ сурын дӕлимонты, уӕд уӕм, бӕгуыдӕр, ӕрхӕццӕ ис Хуыцауы Паддзахад.

²¹Тыхджын йӕ хӕдзар ӕд хӕцӕнгарз куы хъахъхъӕна, уӕд йӕ исбонӕн тас нӕу.

²²Фӕлӕ йӕм йӕхицӕй тыхджындӕр куы бабырса, уӕд ыл фӕуӕлахиз уыдзӕн, йӕ зӕрдӕ цы хӕцӕнгӕрзтыл дардта, уыдон ын байсдзӕн ӕмӕ йын йӕ мулк байуардзӕн.

²³Мемӕ чи нӕй, уый Мӕ ныхмӕ у. Мемӕ чи не ’мбырд кӕны, уый хӕлӕттаг кӕны.

²⁴Ӕнӕзӕгъинаг адӕймагӕй куы рацӕуы, уӕд ӕнцой агурӕг фӕзилы ӕнӕдон рӕтты ӕмӕ, йӕхицӕн бынат куы не ссары, уӕд фӕзӕгъы: „Аздӕхон, цы хӕдзарӕй рацыдтӕн, уырдӕм“.

²⁵Ӕмӕ йӕм фӕстӕмӕ куы баздӕхы, уӕд ӕй марзт ӕмӕ ӕфснайдӕй баййафы.

²⁶Уӕд ацӕуы ӕмӕ йемӕ ӕркӕны ӕндӕр авд ӕнӕзӕгъинаджы, йӕхицӕй фыддӕрты, бацӕуынц уырдӕм ӕмӕ дзы ӕрцӕрынц; ӕмӕ уыцы адӕймаг бахауы, раздӕр цы уыди, уымӕй ноджы фыддӕр уавӕры».

²⁷Йесо Йӕ ныхас куы нӕма фӕци, уӕд Ын адӕмы ’хсӕнӕй иу сылгоймаг хъӕрӕй загъта: «Тӕхудиаг у, Дӕу чи ныййардта ӕмӕ Дӕу йӕ риуы ӕхсырӕй чи фӕхаста, уыцы ныййарӕг!»

²⁸Йесо та загъта: «Тӕхудиаг сты, Хуыцауы дзырдмӕ чи хъусы ӕмӕ йӕ чи ӕххӕст кӕны, уыдон».

²⁹Адӕм Йӕ алыварс куы ӕрӕмбырд сты, уӕд Йесо райдыдта дзурын: «Ацы фӕлтӕр тынг фехӕлди, ӕвдисӕйнаг домы. Фӕлӕ Ионӕйы диссагӕй дарддӕр ницы диссаг фендзӕни.

³⁰Уымӕн ӕмӕ Ионӕ ниневиӕгтӕн ӕвдисӕйнаг куыд уыди, Адӕймаджы Фырт дӕр ацы фӕлтӕрӕн афтӕ уыдзӕни.

³¹Хуссары ус-паддзах Тӕрхоны Бон мӕрдтӕй растдзӕни ацы фӕлтӕримӕ тӕрхон кӕнынмӕ ӕмӕ сӕ фӕзылынджын кӕндзӕни, уымӕн ӕмӕ уый зӕххы кӕронӕй ӕрцыд Соломоны куырыхон зондмӕ байхъусынмӕ; ныр та, Соломонӕй уӕлдӕр Чи у, Уый ам ис.

³²Ниневиӕгтӕ Тӕрхоны Бон мӕрдтӕй растдзысты ацы фӕлтӕры ныхмӕ ӕмӕ йӕ фӕзылынджын кӕндзысты, уымӕн ӕмӕ уыдон Ионӕйы пехуымпар ныхасӕй ӕрфӕсмон кодтой сӕ митыл. Ныр та, Ионӕйӕ уӕлдӕр Чи у, Уый ам ис.

³³Цырагъ чи ссудзы, уый йӕ сусӕг ран кӕнӕ дурыны нӕ бавӕры, фӕлӕ йӕ цырагъдарӕныл, бацӕуджытӕ рухс куыд уыной, афтӕ сӕвӕры.

³⁴Буарӕн йӕ рухсгӕнӕн цӕст у. Ӕмӕ дӕ цӕст сыгъдӕг куы уа, уӕд дӕ буар ӕгасӕй дӕр рухс уыдзӕн. Фӕлӕ дӕ цӕст чъизи куы уа, уӕд дӕ буар дӕр талынг уыдзӕн.

³⁵Уӕдӕ дӕхимӕ кӕс, цӕмӕй дӕм цы рухс ис, уый талынг ма разына.

³⁶Кӕд дӕ буар иууылдӕр рухс у ӕмӕ дӕм талынгӕй ӕппындӕр ницы ис, уӕд сӕрӕй къӕхтӕм уыдзынӕ рухс, цыма дӕ рухсгӕнӕн рухс кӕны, афтӕ».

³⁷Йесо Йӕ ныхас куы фӕци, уӕд Ӕй иу фарисей сӕхимӕ сихор хӕрынмӕ бахуыдта. Йесо бацыд ӕмӕ фынджы уӕлхъус ӕрбадти.

³⁸Хӕрды размӕ Йӕ къухтӕ кӕй нӕ цӕхсадта, уый фарисей куы федта, уӕд бадис кодта.

³⁹Фӕлӕ йын Хицау загъта: «Сымах, фарисейтӕ, уӕ къус ӕмӕ тӕбӕгъ ӕддейӕ сыгъдӕг кӕнут, мидӕгӕй та кӕрӕф ӕмӕ хӕрамӕй йедзаг стут.

⁴⁰Ӕнӕзӕндтӕ! Ӕддейӕ цы ис, уый дӕр ӕмӕ, мидӕгӕй цы ис, уый дӕр иу Скӕнӕг не сфӕлдыста, мыййаг?

⁴¹Уӕ тӕбӕгъы цы ис, уымӕй искӕмӕн куы фӕхай кӕнат, уӕд уын алцыдӕр уыдзӕни сыгъдӕг.

⁴²Фӕлӕ сар уӕ сӕр, фарисейтӕ! Моисейы Ӕгъдаумӕ гӕсгӕ суанг битъына, рутӕ ӕмӕ ӕппӕт иннӕ кӕрдӕджыты дӕсӕймаг хай дӕттут, фӕлӕ Хуыцауы рӕстдзинад ӕмӕ уарзт та ницӕмӕ дарут. Сымахӕн ӕмбӕлди адӕттӕ кӕнын ӕмӕ уыдӕттӕ дӕр рохуаты нӕ уадзын.

⁴³Сар уӕ сӕр, фарисейтӕ! Сымах уарзут синагогӕты раззаг бынӕтты бадын ӕмӕ сахарты фӕзты адӕмы арфӕтӕм хъусын.

⁴⁴Сар уӕ сӕр! Сымах стут, бӕрӕг чи нӕ дары ӕмӕ, уый нӕ зонгӕйӕ, адӕм кӕуыл рацу-бацу кӕнынц, уыцы рох ингӕнты хуызӕн».

⁴⁵Уӕд Йесойы ныхӕстӕм иу динамонӕг загъта: «Ахуыргӕнӕг, афтӕ кӕй зӕгъыс, уымӕй Ды мах дӕр ӕфхӕрыс».

⁴⁶Йесо йын дзуапп радта: «Сар уӕ сӕр сымахӕн дӕр, динамонджытӕ! Адӕмыл уӕззау уӕргътӕ ӕвӕрут, уӕхӕдӕг та уӕ къух дӕр ницӕмӕ бакӕнут, цӕмӕй сын феххуыс кӕнат.

⁴⁷Сар уӕ сӕр! Уӕ фыдӕлтӕ цы пехуымпарты фӕцагътой, уыдонӕн сымах та аразут зӕппӕдзтӕ

⁴⁸ӕмӕ уымӕй ӕвдисут, уӕ фыдӕлты митӕ растыл кӕй нымайут, уый: уыдон сӕ маргӕ акодтой, сымах та сын зӕппӕдзтӕ аразут.

⁴⁹Хуыцауы уӕлзонд уымӕн загъта: „Пехуымпартӕ ӕмӕ фидиуджытӕ сӕм арвитдзынӕн, ӕмӕ дзы кӕй ӕфхӕргӕ кӕндзысты, кӕй — маргӕ“.

⁵⁰Уӕдӕ ацы фӕлтӕрӕн фидинаг у, дуне сфӕлдисынӕй нырмӕ цы пехуымпарты туг фӕкалди, уый:

⁵¹Авелы тугӕй, нывондхӕссӕнӕй Кувӕндоны ӕхсӕн кӕй амардӕуыд, уыцы Захариайы туджы онг. О, зӕгъын уын, уый ацы фӕлтӕрӕн фидинаг у.

⁵²Сар уӕ сӕр, динамонджытӕ! Сымах байстат зонынады дӕгъӕл; уӕхӕдӕг дӕр нӕ бацыдыстут ӕмӕ, бацӕуын кӕй фӕндыди, уыдоны дӕр нӕ бауагътат».

⁵³Йесо уырдыгӕй куы ацыд, уӕд динамонджытӕ ӕмӕ фарисейтӕ райдыдтой Йӕ ныхмӕ дзурын ӕмӕ Йӕ фӕрстыты бын ныккодтой —

⁵⁴къахтой Йӕ, цӕмӕй йын Йӕ ныхӕстӕ Йӕхи ныхмӕ фӕкӕной.