Read Хуыцауы Дзырд иронау Лука 12 Bible Online

Лука 12 - Хуыцауы Дзырд иронау bible

Лука 12

¹Уӕдмӕ уый бӕрц адӕм ӕрӕмбырд ис, ӕмӕ дзы азмӕлӕн дӕр нал уыди. Йесойӕн йӕ фыццаг ныхас уыди Йӕ ахуыргӕнинӕгтӕм: «Уӕхи хизут фарисейты ӕнхъизӕнӕй — цӕстмӕхъусдзинадӕй.

²Афтӕ бамбӕхсӕн ницы ис, ӕмӕ ма раргом уа, ахӕм сусӕгдзинад нӕй, ӕмӕ ма рахъӕр уа.

³Уымӕ гӕсгӕ, талынджы цы загътат, уый айхъуысдзӕни бонрухсы; сусӕгӕй искӕй хъусы цы бадзырдтат, уый хъӕрӕй фехъусын кӕндзысты уӕлхӕдзӕрттӕй.

⁴Мӕ хӕлӕрттӕ, буар амарынӕй уӕлдай сӕ бон кӕмӕн ницы у, уыдонӕй ма тӕрсут.

⁵Тӕрсын уӕ кӕмӕй хъӕуы, уый уын Ӕз зӕгъдзынӕн: амарыны фӕстӕ зындоны ныппарын Кӕй бон у, Уымӕй тӕрсут. О, зӕгъын уын, Уымӕй тӕрсут.

⁶Фондз сырддонцъиуы дыууӕ ассарийыл нӕ уӕй кӕнынц, ӕви? Фӕлӕ дзы Хуыцауӕй иу дӕр рох нӕу.

⁷Сымахӕн та уӕ сӕрыхъуынтӕ дӕр ӕрдуйы онг нымад сты. Уӕдӕ ма тӕрсут: сымах сырддонцъиутӕй бирӕ зынаргъдӕр стут.

⁸Зӕгъын уын: Мӕныл кӕй ӕууӕнды, уый адӕмы раз ӕргомӕй чи дзура, уый Адӕймаджы Фырт дӕр йӕхионыл банымайдзӕни Хуыцауы зӕдты раз.

⁹Адӕмы раз Мыл йӕхи чи атигъ кӕна, ууыл та Уый дӕр Йӕхи атигъ кӕндзӕни Хуыцауы зӕдты раз.

¹⁰Адӕймаджы Фырты чи рафауа, уымӕн уыдзӕни хатыр, фӕлӕ Сыгъдӕг Уды чи рафауа, уымӕн хатыр нӕ уыдзӕн.

¹¹Синагогӕтӕм уӕ куы бакӕной ӕмӕ уӕ хицӕутты раз куы ӕрлӕууын кӕной, уӕд-иу ма мӕт кӕнут, цы зӕгъат, ууыл.

¹²Уымӕн ӕмӕ уын Сыгъдӕг Уд уайсахат бацамондзӕн, цы зӕгъын хъӕуы, уый».

¹³Уӕд Ӕм адӕмӕй иу чидӕр бахатыд: «Ахуыргӕнӕг, зӕгъ-ма ме ’фсымӕрӕн, ӕмӕ нын цы бынтӕ баззади, уыдонӕй мӕнӕн дӕр схай кӕна».

¹⁴Йесо йын дзуапп радта: «Чи Мӕ сӕвӕрдта сымахӕн тӕрхонгӕнӕгӕй кӕнӕ уӕ хъаст ӕвзарӕгӕй?»

¹⁵Загъта ма сын: «Уӕхи хъахъхъӕнут кӕрӕфдзинад уарзынӕй, уымӕн ӕмӕ адӕймаджы цард йӕ бирӕ мулкӕй аразгӕ нӕу».

¹⁶Ӕмӕ сын ӕмбисонд ӕрхаста: «Иу хъӕздыг лӕгӕн йӕ хуымы бирӕ хор ӕрзади.

¹⁷Лӕг йӕхимидӕг катай кодта: ныр цы кӕнон, мӕ хор кӕм бафснайон, ахӕм бынат мын куы нӕй, уӕд, зӕгъгӕ.

¹⁸Ӕмӕ сфӕнд кодта: „Бавдӕлон ӕмӕ мӕ хордӕттӕ фехалон, уыдонӕй стырдӕртӕ саразон ӕмӕ мӕ хор ӕмӕ мӕ мулк иууылдӕр уым бафснайон.

¹⁹Уӕд зӕгъдзынӕн мӕхицӕн: мӕнӕйуый, бирӕ азты фаг дӕм ис мулк. Цӕр ныр ӕнцад-ӕнцойӕ, хӕр, нуаз ӕмӕ рай дӕ цардӕй“.

²⁰Фӕлӕ йын Хуыцау загъта: „Ӕнӕзонд, ахсӕв дын дӕ уд айстӕуыдзӕн, ӕмӕ уӕд кӕмӕн баззайдзысты, дӕхицӕн кӕй ӕрцӕттӕ кодтай, уыдон?“

²¹Афтӕ рауайы, йӕхицӕн хӕзнатӕ чи ӕмбырд кӕны, Хуыцауы хъӕздыгдзинадӕй та ӕнӕхай чи у, уыдоны хъуыддаг».

²²Уый фӕстӕ Йесо загъта Йӕ ахуыргӕнинӕгтӕн: «Уымӕ гӕсгӕ уын зӕгъын: ма мӕт кӕнут нӕдӕр хойрагыл, нӕдӕр дарӕсыл.

²³Цард хойрагӕй ахсджиагдӕр у, буар та — дарӕсӕй.

²⁴Акӕсут-ма халӕттӕм: уыдон нӕдӕр тауынц, нӕдӕр кӕрдынц, нӕдӕр сын гонтӕ ӕмӕ хордӕттӕ ис, афтӕмӕй сӕ Хуыцау ӕфсады. Сымах та мӕргътӕй цас зынаргъдӕр стут!

²⁵Цыфӕндыйӕ дӕр уӕ йӕ цардмӕ бирӕ нӕ, фӕлӕ иу сахат бафтауын дӕр кӕй бон бауыдзӕн[1]?

²⁶Уӕдӕ кӕд гыццыл исты скӕнын дӕр уӕ бон нӕу, уӕд иннӕ хъуыддӕгтыл цӕуыл мӕт кӕнут?

²⁷Акӕсут-ма, дидинджытӕ куыд зайынц, уымӕ: нӕдӕр кусгӕ кӕнынц, нӕдӕр ӕлвисгӕ, фӕлӕ уын Ӕз зӕгъын: суанг Соломон дӕр йе стыр кадимӕ уыдонӕй иуы хуызӕн дӕр нӕ фӕлыста йӕхи.

²⁸Абон чи ис, райсом та пецы ӕппӕрст чи ӕрцӕудзӕни, уыцы быдираг кӕрдӕджы Хуыцау афтӕ кӕм фӕлынды, уым сымах та цас хуыздӕр сфӕлынддзӕн, лӕмӕгъуырнджытӕ!

²⁹Уӕдӕ цы хӕрат ӕмӕ цы нуазат, ууыл ма мӕт кӕнут ӕмӕ ма тыхсут.

³⁰Ӕппӕт уыдӕттӕ ацы дунейы агурынц муртаттӕгтӕ, сымахӕн та уӕ Фыд Йӕхӕдӕг зоны, цы уӕ хъӕуы, уый.

³¹Фыццаджыдӕр Ын агурут Йӕ Паддзахад, ӕмӕ уын уыдӕттӕ дӕр лӕвӕрд уыдзысты.

³²Ма тӕрс, чысыл дзуг! Уӕ Фыды бафӕндыд сымахӕн Паддзахад раттын.

³³Ауӕй кӕнут уӕ мулк ӕмӕ мӕгуыртӕн феххуыс кӕнут. Уӕхицӕн, хӕррӕгъ чи нӕ кӕны, ахӕм ӕвӕрӕндӕттӕ саразут; ӕрӕмбырд кӕнут ӕнӕихсигӕ хӕзнатӕ уӕлӕрвты — уырдӕм сӕм хуыснӕг нӕ баирвӕздзӕн ӕмӕ сӕ рӕмпӕг нӕ бахӕрдзӕн.

³⁴Уӕ хӕзна кӕм ис, уӕ зӕрдӕ дӕр уым уыдзӕн.

³⁵Кӕддӕриддӕр ут цӕттӕ — уӕ рӕттӕ ӕрбалвасут ӕмӕ уӕ рухсгӕнӕнтӕ ссудзут.

³⁶Йӕ хицау чындзӕхсӕвӕй кӕд ӕрбацӕудзӕн, уымӕ чи ӕнхъӕлмӕ кӕсы, уыцы адӕмы фӕзмут — хицау куыддӕр ӕрбахойа, афтӕ йын дуар фегом кӕндзысты.

³⁷Тӕхудиаг сты, хӕдзары хицау куы ӕрбацӕуа, уӕд фынӕйӕ кӕй не ’рбаййафа, уыцы цагъартӕ. Ӕцӕг уын зӕгъын, уый йӕ рон ӕрбалвасдзӕни, фынджы уӕлхъус сӕ ӕрбадын кӕндзӕн ӕмӕ сын йӕхӕдӕг кӕстӕриуӕг кӕнын райдайдзӕн.

³⁸Тӕхудиаг сты, кӕдфӕнды куы ӕрбацӕуа — ӕмбисӕхсӕв уа ӕви боныцъӕхтыл — сӕ хицау фынӕйӕ кӕй не ’рбаййафа, уыцы цагъартӕ.

³⁹Сымах ӕй уӕхӕдӕг зонут: хуыснӕг кӕцы сахат ӕрбацӕудзӕн, уый хӕдзары хицау куы зыдтаид, уӕд йӕ хӕдзар фӕкъахын нӕ бауагътаид.

⁴⁰Ӕмӕ сымах дӕр ут цӕттӕ, уымӕн ӕмӕ Адӕймаджы Фырт фӕзындзӕни ӕнӕнхъӕлӕджы».

⁴¹Уӕд Ӕй Петр бафарста: «Хицау, ӕрмӕст махӕн дзурыс ацы фӕсномыг ныхас ӕви алкӕмӕн дӕр?»

⁴²Бардарӕг дзуапп радта: «Чи у иузӕрдион ӕмӕ зондджын хӕдзаргӕс? Хӕринаг сын афоныл радӕттыны тыххӕй хӕдзары хицау йӕ цагъартӕн хистӕрӕй кӕй сӕвӕрдзӕни?

⁴³Тӕхудиаг уыдзӕни уыцы цагъар, йӕ хицау йӕ фӕдзӕхст ӕххӕстгӕнгӕ кӕй ӕрбаййафа.

⁴⁴Ӕцӕг уын зӕгъын, йе ’ппӕт исбон дӕр бакӕндзӕни йӕ бар.

⁴⁵Фӕлӕ уыцы цагъар йӕхинымӕр афтӕ куы зӕгъа, цӕй, мӕ хицау нырма рӕхджы нӕ фӕзындзӕни, ӕмӕ уыйадыл лӕггадгӕнӕг нӕлгоймӕгтӕ ӕмӕ сылгоймӕгты нӕмын куы райдайа, нуӕзтыл куы схӕца ӕмӕ расыгӕй куы цӕуа,

⁴⁶уӕд уыцы цагъарӕн йӕ хицау, ӕнхъӕл кӕд нӕ уа, уыцы бон ӕмӕ уыцы сахат фӕзындзӕн, тынг ӕй бафхӕрдзӕн ӕмӕ йӕ уӕдӕй фӕстӕмӕ йе ’ууӕнчы аккаг нал скӕндзӕн.

⁴⁷Йӕ хицауы фӕндон зындгонд кӕмӕн уыди, афтӕмӕй цӕттӕ чи нӕ разынд ӕмӕ йӕ чи нӕ сӕххӕст кодта, уыцы цагъар баййафдзӕни карз над.

⁴⁸Йӕ хицауы фӕндон чи нӕ зыдта, афтӕмӕй нады аккаг митӕ чи фӕкодта, уый та къаддӕр ӕфхӕрд баййафдзӕн. Хуыцау бирӕ кӕмӕн радта, уымӕй бирӕ ӕрдомдзӕн, йӕ бӕрны фылдӕр кӕмӕн бакодта, уымӕй фылдӕр ӕрцагурдзӕн.

⁴⁹Ӕз зӕхмӕ арт ӕрхӕссынмӕ ӕрцыдтӕн, ӕмӕ Мӕ куыд тынг фӕнды, цӕмӕй ныридӕгӕн ссудза!

⁵⁰Хъуамӕ Мыл хъизӕмӕртты аргъуыдӕй саргъуыдӕуа, ӕмӕ куыд тынг удхар кӕнын, цалынмӕ уый не ’рцӕуа, уӕдмӕ!

⁵¹Сымах афтӕ ӕнхъӕл стут, ӕмӕ Ӕз зӕхмӕ фидыд ӕрхӕссынмӕ ӕрцыдтӕн? Зӕгъын уын: фидыд ӕрхӕссынмӕ нӕ, фӕлӕ адӕмы фӕхицӕн кӕнынмӕ.

⁵²Уымӕн ӕмӕ нырӕй фӕстӕмӕ, иу хӕдзары фондз бинойнаджы ис, зӕгъгӕ, уӕд фӕхицӕнтӕ уыдзысты: ӕртӕйӕ — дыууӕйы ныхмӕ, дыууӕйӕ — ӕртӕйы ныхмӕ.

⁵³Фыд уыдзӕни йӕ фырты ныхмӕ, фырт — йӕ фыды, мад — йӕ чызджы, чызг — йӕ мады, ӕфсин — йӕ чындзы, чындз — йе ’фсины ныхмӕ».

⁵⁴Адӕмӕн та Йесо загъта: «Ныгуылӕнӕй мигъ ссӕугӕ куы фенут, уӕд фӕзӕгъут, къӕвда уыдзӕни, зӕгъгӕ, ӕмӕ ӕцӕгдӕр афтӕ вӕййы.

⁵⁵Хуссарӕй дымгӕ куы радымы, уӕд фӕзӕгъут, ӕнтӕф рӕстӕг уыдзӕни, зӕгъгӕ, ӕмӕ ӕцӕгдӕр афтӕ вӕййы.

⁵⁶Дыдзӕсгӕмттӕ! Зӕххыл ӕмӕ арвыл цы уынут, уый иртасын куы зонут, уӕд ныры рӕстӕг раиртасын уӕ бон цӕуылнӕ у?

⁵⁷Раст цы у, уый уӕхӕдӕг цӕуылнӕ зонут?

⁵⁸Хъаст дыл чи кӕны, уыимӕ тӕрхондонмӕ фӕндагыл бафидау; науӕд дӕ тӕрхонгӕнӕгмӕ бакӕндзӕн, тӕрхонгӕнӕг дӕ ратдзӕн хъахъхъӕнӕгмӕ, ӕмӕ дӕ уый ахӕстоны сбадын кӕндзӕн.

⁵⁹Зӕгъын дын: бафидын дӕ цы хъӕуы, уый цалынмӕ фӕстаг мисхалы онг раттай, уӕдмӕ уырдыгӕй нӕ рацӕудзынӕ».