Read Хуыцауы Дзырд иронау Лука 2 Bible Online

Лука 2 - Хуыцауы Дзырд иронау bible

Лука 2

¹Уыцы рӕстӕг кесӕр Август уынаффӕ рахаста ӕппӕт бӕстӕйы цӕрджыты сфыссыны тыххӕй.

²Ацы сфыст уыди фыццаг; арӕзт ӕрцыди, Сирийӕн Квирини хицауиуӕг куы кодта, уыцы заманы.

³Алчи йӕхи ныффыссын кӕнынмӕ цыди йӕхи сахармӕ.

⁴Йосиф дӕр галилейаг сахар Назаретӕй араст ис Иудеймӕ, Вифлеем кӕй хонынц, Давиды уыцы сахармӕ, уымӕн ӕмӕ Давиды байзӕддаг уыди.

⁵Йемӕ ракодта йӕ усаг Мариайы дӕр, цӕмӕй сӕхи ныффыстаиккой. Мариа та йӕхи бар нӕ уыди,

⁶ӕмӕ Вифлеемы йӕ арыны афон ӕрцыд.

⁷Уыйадыл Фырт ныййардта. Хӕцъилты Йӕ батыхта ӕмӕ Йӕ кӕвдӕсы нывӕрдта, уымӕн ӕмӕ сӕм фысымуаты бынат не ’рхаудис.

⁸Уырдӕм ӕввахс, быдыры, уыдысты фыййӕуттӕ ӕмӕ ӕхсӕвы сӕ фосы дзуг хъахъхъӕдтой.

⁹Ӕвиппайды Хуыцауы зӕд сӕ разы февзӕрди, ӕмӕ Хуыцауы кадӕй бӕстӕ ныррухс ис. Фыййӕуттӕ фыр тӕссӕй сӕхи дӕр нал ӕмбӕрстой.

¹⁰Зӕд сын загъта: «Ма тӕрсут, ӕз уӕм ӕрцыдтӕн, ӕппӕт адӕмӕн дӕр стыр циндзинад чи ӕрхӕсдзӕн, уыцы Фарны Уац фехъусын кӕнынмӕ:

¹¹абон Давиды сахары райгуырди уӕ Ирвӕзынгӕнӕг — Бардарӕг Чырысти.

¹²Сывӕллоны баййафдзыстут хӕцъилты тыхтӕй, кӕвдӕсы хуысгӕйӕ, ӕмӕ Йӕ базондзыстут уыцы нысанӕй».

¹³Зӕды фарсмӕ ӕваст фегуырди ӕнӕнымӕц уӕларвон ӕфсад. Уыдон кадджын кодтой Хуыцауы:

¹⁴«Кад Хуыцауӕн бӕрзӕндты, зӕххыл та фарнимӕ уӕнт, Хуыцау кӕуыл ауды, уыдон!»

¹⁵Зӕдтӕ сӕ цурӕй уӕларвмӕ куы ссыдысты, уӕд фыййӕуттӕ сӕ кӕрӕдзийӕн загътой: «Уӕдӕ фӕцӕуӕм Вифлееммӕ ӕмӕ нӕхи цӕстӕй фенӕм, цы дзы ӕрцыди ӕмӕ нын Хуыцау цӕй тыххӕй фехъусын кодта, уый».

¹⁶Атындзыдтой ӕмӕ дзы Мариа ӕмӕ Йосифы баййӕфтой. Сывӕллон хуыссыди кӕвдӕсы.

¹⁷Куы сӕм бакастысты, уӕд радзырдтой, Сывӕллоны тыххӕй сын цы загъдӕуыди, уый.

¹⁸Фыййӕутты ныхӕстӕ, чи сӕ фехъуыста, уыдоны се ’ппӕты дӕр стыр дисы бафтыдтой.

¹⁹Мариа та сӕ йӕ зӕрдыл бадардта ӕмӕ сыл арф ныхъхъуыды кодта.

²⁰Фыййӕуттӕ фӕстӕмӕ аздӕхтысты, цы фехъуыстой ӕмӕ цы федтой, уыдӕтты тыххӕй кадджын кодтой Хуыцауы. Алцы дӕр рауад, зӕд сын куыддӕриддӕр загъта, афтӕ.

²¹Аст боны фӕстӕ, Сывӕллонӕн Йӕ сунӕты афон куы ралӕууыд, уӕд Ӕй схуыдтой Йесо. Зӕд Ын уыцы ном рагацау радта, Йӕ мады гуыбыны дӕр куы нӕма сӕвзӕрди, уӕд.

²²Моисейы Ӕгъдаумӕ гӕсгӕ, ссыгъдӕг кӕныны фӕтк ахицӕн кӕныны афон куы ӕрцыди, уӕд Йесойы ахастой Йерусалиммӕ, Хуыцауы размӕ,

²³уымӕн ӕмӕ Хуыцауы Ӕгъдауы фыст ис: «Алы хистӕр зӕнӕг дӕр, лӕппу куы уа, уӕд лӕвӕрд ӕрцӕуӕд Хуыцауӕн».

²⁴Уыимӕ, Хуыцауы Ӕгъдаумӕ гӕсгӕ, нывондӕн хъуамӕ ӕрхастаиккой «дыууӕ ӕхсинӕджы кӕнӕ дыууӕ лӕппын бӕлоны».

²⁵Йерусалимы цардис иу рӕстгӕнӕг, йӕ ном — Симеон. Уый уыди Хуыцауыл ӕнувыд адӕймаг ӕмӕ ӕнхъӕлмӕ касти, Хуыцау Израилы кӕд фервӕзын кӕндзӕн, уымӕ. Симеон хайджын уыди Сыгъдӕг Удӕй.

²⁶Сыгъдӕг Уд ын раргом кодта, Хуыцау Кӕй рарвита, цалынмӕ уыцы Чырыстийы фенай, уӕдмӕ нӕ амӕлдзынӕ, зӕгъгӕ.

²⁷Сыгъдӕг Уд ӕй сразӕнгард кодта Кувӕндонмӕ ацӕуынмӕ, ӕмӕ, Моисейы Ӕгъдау сӕххӕст кӕныны тыххӕй Йесойы ныййарджытӕ Сабийы Кувӕндонмӕ куы бахастой,

²⁸уӕд Ӕй Симеон йӕ хъӕбысмӕ райста, арфӕ ракодта Хуыцауӕн ӕмӕ загъта:

²⁹«Бардарӕг Хуыцау, Дӕ цагъарӕн зӕрдӕ куыд бавӕрдтай, афтӕ мӕ ӕрвитыс ныр фарнимӕ:

³⁰мӕхи цӕстӕй федтон Дӕ Ирвӕзынгӕнӕджы,

³¹ӕппӕт адӕмты сӕрвӕлтау Кӕй ӕрцӕттӕ кодтай, уый.

³²Муртаттӕгтӕн Уый уыдзӕни Дӕу ӕргомгӕнӕг рухс, Дӕ адӕмӕн, Израилӕн та — йӕ кад».

³³Йесойы тыххӕй цы загъта, уый диссаг фӕкасти Сабийы фыд ӕмӕ мадмӕ.

³⁴Симеон сӕ Хуыцауыл бафӕдзӕхста ӕмӕ Йесойы мад Мариайӕн загъта: «Ацы Сывӕллоны тыххӕй израилӕгтӕй бирӕтӕ дӕлӕмӕ ӕрхаудзысты ӕмӕ бирӕтӕ сбӕрзонд уыдзысты. Уый расайдзӕни быцӕутӕ,

³⁵ӕмӕ афтӕмӕй бирӕтӕн сӕ сусӕг хъуыдытӕ раргом уыдзысты. Дӕуӕн дӕхицӕн дӕр цыргъаг дӕ риуы иннӕрдӕм ахиздзӕн».

³⁶Уыди ма уым пехуымпар Аннӕ дӕр, Фануилы чызг, Асиры хӕдзарвӕндагӕй, хӕрз зӕронд сылгоймаг. Йӕ лӕгимӕ авд азы йеддӕмӕ нӕ ацард,

³⁷афтӕмӕй идӕдзӕй баззад ӕмӕ йыл ныр цыппар ӕмӕ цыппарыссӕдз азы рацыд. Кувӕндонӕй ӕддӕмӕ нӕ цыди, ӕхсӕвӕй-бонӕй, ком даргӕйӕ ӕмӕ кувгӕйӕ, лӕггад кодта Хуыцауӕн.

³⁸Уый дӕр сӕм уыцы рӕстӕг бацыди, кадджын кодта Хуыцауы, Йерусалимы фервӕзтмӕ ӕнхъӕлмӕ чи касти, уыдонӕн дзырдта Йесойы тыххӕй.

³⁹Йосиф ӕмӕ Мариа Хуыцауы Ӕгъдаумӕ гӕсгӕ ӕппӕт дӕр куы бакодтой, уӕд раздӕхтысты Галилеймӕ, кӕм цардысты, уыцы сахар Назаретмӕ.

⁴⁰Сывӕллон рӕзыд ӕмӕ фидар кодта, бонӕй-бонмӕ ӕфтыди Йӕ зондыл, Хуыцауы фарнӕй хайджын уыди.

⁴¹Йесойы ныййарджытӕ Куадзӕны бӕрӕгбоны ӕрвылаз Йерусалиммӕ цыдысты.

⁴²Лӕппуйыл дыууадӕс азы куы сӕххӕст ис, уӕд дӕр та иннӕ хӕттытау ацыдысты.

⁴³Бӕрӕгбоны фӕстӕ сӕхимӕ куы раздӕхтысты, уӕд ӕнахъом Йесо баззади Йерусалимы, Йӕ ныййарджытӕ йӕ нӕ зыдтой, афтӕмӕй.

⁴⁴Уыдон ӕнхъӕлдтой, иннӕтимӕ ӕрбацӕуы, зӕгъгӕ, ӕмӕ, иу бонцау куы адард сты, уӕд Ӕй хӕстӕджытӕ ӕмӕ зонгӕты ӕхсӕн агурын райдыдтой.

⁴⁵Куы никуы уыди, уӕд Йӕ агурӕг фӕстӕмӕ Йерусалиммӕ аздӕхтысты.

⁴⁶Ӕртӕ боны фӕстӕ Йӕ Кувӕндоны ссардтой. Йесо бадтис ахуыргӕнджыты ӕхсӕн, хъуыста сӕм ӕмӕ сӕ алцӕмӕйты фарста.

⁴⁷Чи Йӕм хъуыста, уыдон Ын иууылдӕр Йӕ зонд ӕмӕ дзуаппытыл дис кодтой.

⁴⁸Ныййарджытӕ Йӕ уым куы федтой, уӕд сӕ дисӕн кӕрон нал уыд. Мад Ын загъта: «Хъӕбул, уый нын цы бакодтай? Тынг Дыл мӕт кодтам ӕмӕ Дӕ агуырдтам Дӕ фыдимӕ».

⁴⁹Йесо сын загъта: «Ӕмӕ Мӕ цӕмӕн агуырдтат? Нӕ йӕ зыдтат, Ӕз Мӕ Фыды хӕдзары кӕй хъуамӕ уон, уый?»

⁵⁰Фӕлӕ Йӕ уыдон нӕ бамбӕрстой.

⁵¹Йесо рацыди семӕ, Назаретмӕ ӕрбаздӕхтысты, ӕмӕ алцӕмӕй дӕр касти сӕ коммӕ. Мад та уыцы цау йӕ зӕрдыл бадардта.

⁵²Йесо куыд рӕзыд, афтӕ ӕнтыстджындӕр уыди уӕлзондӕй, ӕмӕ Йӕм фылдӕр кодта Хуыцау ӕмӕ адӕмы уарзондзинад.