Read Хуыцауы Дзырд иронау Лука 23 Bible Online

Лука 23 - Хуыцауы Дзырд иронау bible

Лука 23

¹Уӕд иууылдӕр сыстадысты ӕмӕ Йӕ Пилатмӕ акодтой.

²Уым Ӕй райдыдтой аххосджын кӕнын: «Мах сбӕлвырд кодтам, ацы адӕймаг нын адӕмы кӕй халы, уый. Кесӕрӕн хъалон фидын нӕ уадзы ӕмӕ Йӕхи хоны Чырысти, ома Паддзах».

³Уӕд Ӕй Пилат бафарста: «Ды дӕ иудейаг Паддзах?» Йесо йын дзуапп радта: «Дӕхӕдӕг ӕй куы зӕгъыс».

⁴Пилат хистӕр сауджынтӕ ӕмӕ адӕмӕн загъта: «Ӕз ацы адӕймагмӕ ницы азым арын».

⁵Фӕлӕ уыдон уӕддӕр нӕ састысты: «Уый ӕгас Иудейы Йӕ ахуырадӕй адӕмы змӕнты. Райдыдта Галилейӕ ӕмӕ ныр ардӕм ӕрбахӕццӕ».

⁶Пилат уый куы фехъуыста, уӕд бафарста: «Уыцы адӕймаг галилейаг у?»

⁷Ӕмӕ, Ироды дӕлбар цы бӕстӕ ис, уырдыгӕй у, уый куы базыдта, уӕд Йесойы уымӕ арвыста — уыцы рӕстӕг Ирод дӕр Йерусалимы уыди.

⁸Ирод Йесойы куы федта, уӕд тынг бацин кодта, уымӕн ӕмӕ йӕ рагӕй фӕндыд Йӕ фенын. Йесойы тыххӕй бирӕ хӕттыты фехъуыста ӕмӕ Йӕм ӕнхъӕлмӕ каст исты диссаг равдисынмӕ.

⁹Бирӕ цӕмӕйдӕрты Йӕ фарста, фӕлӕ йын Йесо ницы дзуапп лӕвӕрдта.

¹⁰Хистӕр сауджынтӕ ӕмӕ динамонджытӕ дӕр уыдысты уым ӕмӕ карзӕй дзырдтой Йӕ ныхмӕ, азымджын Ӕй кодтой.

¹¹Ирод ӕмӕ йе ’фсӕддонтӕ Йесойы ӕгады бынаты сӕвӕрдтой, сӕхицӕн дзы хъазӕнхъул сарӕзтой. Уый фӕстӕ Йыл Ирод зынаргъ дарӕс скӕнын кодта ӕмӕ Йӕ фӕстӕмӕ Пилатмӕ арвыста.

¹²Уыцы бонӕй фӕстӕмӕ Пилат ӕмӕ Ирод балымӕн сты, уымӕй размӕ та кӕрӕдзимӕ фыдӕх хастой.

¹³Пилат фӕсидти хистӕр сауджынтӕм, хицӕуттӕм ӕмӕ адӕммӕ.

¹⁴Загъта сын: «Сымах мӕм ӕрбакодтат ацы адӕймаджы, Уый адӕмы змӕнты, зӕгъгӕ. Ӕз уӕ разы равзӕрстон хъуыддаг ӕмӕ Йӕм, цы фыдракӕндты Йӕ азымджын кӕнут, ахӕмӕй ницы ссардтон.

¹⁵Ирод дӕр Ӕм ницы азым ссардта ӕмӕ нӕм Ӕй фӕстӕмӕ раздӕхта. Куыд уынут, афтӕмӕй, мӕлӕтмӕ Йӕ цӕй тыххӕй раттӕм, ахӕмӕй ницы сарӕзта.

¹⁶Ӕз Ӕй ехсӕй фӕнӕмын кӕндзынӕн ӕмӕ Йӕ ахӕстонӕй рауадздзынӕн».

¹⁷[Бӕрӕгбоны тыххӕй Пилатӕн ӕмбӕлди иу ахӕсты суӕгъд кӕнын.]

¹⁸Фӕлӕ адӕм ӕмхуызонӕй хъӕр систой: «Амар Ӕй! Вараввӕйы нын рауадз!»

¹⁹Вараввӕйы та ахӕстоны бакодтой, сахары змӕсты аххосджын кӕй уыди ӕмӕ кӕйдӕр кӕй амардта, уый тыххӕй.

²⁰Пилат адӕмимӕ ногӕй ныхас кӕнын райдыдта — Йесойы куы рауагътаид, уый йӕ фӕндыди.

²¹Фӕлӕ уыдон хъӕр кодтой: «Байтындз Ӕй, байтындз Ӕй!»

²²Пилат сын ӕртыккаг хатт загъта: «Уагӕры ӕвзӕрӕй цы ракодта? Мӕлӕты аккаг цы у, ахӕмӕй Йӕм ӕз ницы ссардтон. Ехсӕй Йӕ фӕнӕмын кӕндзынӕн ӕмӕ Йӕ рауадздзынӕн».

²³Фӕлӕ адӕм уӕддӕр хъӕлӕсыдзагӕй хъӕр кодтой ӕмӕ домдтой Йесойы байтындзын. Пилаты басастой сӕ хъӕрӕй,

²⁴ӕмӕ Пилат хъуыддаг аскъуыддзаг кодта, уыдон куыд домдтой, афтӕ:

²⁵змӕст ӕмӕ тугныккалды азымимӕ ахӕстоны кӕй сбадын кодтой ӕмӕ йӕм адӕм кӕй тыххӕй ныххатыдысты, уыцы Вараввӕйы рауагъта, Йесойы та сын сӕ бар бакодта.

²⁶Йесойы марынмӕ куы фӕцӕйкодтой, уӕд фӕссахарӕй иу киренӕйаг лӕг ӕрбацӕйцыди, йӕ ном — Симон. Баурӕдтой йӕ ӕмӕ йын Йесойы фӕдыл дзуар йе ’ккойыл фӕхӕссын кодтой.

²⁷Йесойы фӕстӕ цыди бирӕ адӕм. Се ’хсӕн уыди, сӕ риутӕ хойгӕйӕ Йыл чи хъарӕг кодта, ахӕм сылгоймӕгтӕ.

²⁸Йесо сӕм разылд ӕмӕ сын загъта: «Йерусалимы чызджытӕ! Ма кӕут Мӕныл, уӕхиуыл ӕмӕ уӕ сывӕллӕттыл кӕут.

²⁹Уымӕн ӕмӕ ӕрцӕуы ахӕм рӕстӕг, ӕмӕ дзурдзысты: „Тӕхудиаг сты, сывӕллон чи нӕ ныййардта ӕмӕ йӕ риуы ’хсырӕй хъӕбул чи не схаста, уыцы ӕнӕзӕнӕг сылгоймӕгтӕ!“

³⁰Уӕд хӕхтӕн лӕгъстӕ кӕндзысты: „Ӕркӕлут ныл!“ — къуыбыртӕн: „Ӕрӕмбӕрзут нӕ!“

³¹Уымӕн ӕмӕ, кӕд цъӕхвӕлыст бӕласӕн афтӕ кӕнынц, уӕд уагӕры хус бӕласӕн та цы бакӕндзысты?»

³²Йемӕ ма Йын марынмӕ акодтой дыууӕ фыдгӕнӕджы.

³³Ӕмӕ, Сӕргӕхц, зӕгъгӕ, уыцы бынатмӕ куы бахӕццӕ сты, уӕд уыцы ран дзуарыл байтыгътой Йесо ӕмӕ фыдгӕнджыты: иуы — Йӕ рахизфарс, иннӕйы — Йӕ галиуфарс.

³⁴Йесо дзырдта: «Мӕ Фыд, ныббар сын, уымӕн ӕмӕ, цы аразынц, уый нӕ зонынц». Йӕ дарӕстыл Ын хӕлттӕ сӕппӕрстой ӕмӕ сӕ се ’хсӕн байуӕрстой.

³⁵Адӕм лӕууыдысты ӕмӕ кастысты, сӕ хицӕуттӕ та Йыл худтысты: «Иннӕты ирвӕзын кодта, ныр Йӕхи фервӕзын кӕнӕд, кӕд Хуыцауы ӕвзӕрст Чырысти у, уӕд».

³⁶Ӕфсӕддонтӕ Дзы хынджылӕг кодтой — бацыдысты-иу Ӕм, Йӕ дзыхмӕ-иу Ын туаг сӕн схастой

³⁷ӕмӕ Йын дзырдтой: «Кӕд иудейаг Паддзах дӕ, уӕд Дӕхи фервӕзын кӕн».

³⁸Йӕ сӕрмӕ [бердзенаг, ромаг ӕмӕ дзуттаг ӕвзӕгтыл] уыди фыст: «Ацы адӕймаг у иудейаг Паддзах».

³⁹Кӕй байтыгътой, уыцы фыдгӕнджытӕй иу ӕлгъыста Йесойы ӕмӕ Йын дзырдта: «Чырысти нӕ дӕ, ӕви цы? Фервӕзын кӕн Дӕхи дӕр ӕмӕ мах дӕр».

⁴⁰Фӕлӕ йӕ иннӕ сабыр кодта: «Ау, Хуыцауӕй нӕ тӕрсыс, дӕуӕн дӕр ахӕм тӕрхон куы рахастой?

⁴¹Махӕн раст бакодтой — нӕ хъуыддӕгтӕм гӕсгӕ у нӕ тӕрхон, фӕлӕ уый ӕвзӕрӕй ницы сарӕзта».

⁴²Ӕмӕ загъта: «Йесо, Дӕ Паддзахадмӕ куы бацӕуай, уӕд-иу мӕ ӕрымыс!»

⁴³Йесо йын загъта: «Ӕцӕг цы у, уый дын зӕгъын: тӕккӕ абон Мемӕ уыдзынӕ дзӕнӕты».

⁴⁴Уыдис ӕхсӕз сахатмӕ[1] ӕввахс. Бӕстӕ ӕгасӕй дӕр саудалынг баци ӕмӕ суанг фарӕстӕм сахаты онг йӕ хуыз нӕ аивта,

⁴⁵уымӕн ӕмӕ хур рухс нал кодта. Кувӕндоны мидӕмбӕрзӕн уӕлейӕ бынмӕ дыууӕ дихы фӕцис.

⁴⁶Йесо хъӕрӕй ныууынӕргъыдта: «Мӕ Фыд, Дӕ къухмӕ Дын дӕттын Мӕ уд». Ӕмӕ, афтӕ куыддӕр загъта, афтӕ Йӕ уд систа.

⁴⁷Цы ӕрцыди, уый сӕдӕйыхицау куы федта, уӕд, Хуыцауӕн кад кӕнгӕйӕ, загъта: «Ацы Адӕймаг ӕнӕмӕнг рӕстгӕнӕг уыди».

⁴⁸Бакӕсынмӕ Йӕм цы адӕм ӕрбамбырд ис, уыдон уыцы цау куы федтой, уӕд, сӕ риутӕ хойгӕйӕ, сӕ хӕдзӕрттӕм аздӕхтысты.

⁴⁹Йесойы зонгӕтӕ, стӕй, Йӕ фӕдыл Галилейӕ чи рацыди, уыцы сылгоймӕгтӕ та дӕрддзӕф лӕууыдысты ӕмӕ, цытӕ цӕуы, уыдӕттӕм кастысты.

⁵⁰Иу лӕг, йӕ ном — Йосеф, синедрионы уӕнг, хӕларзӕрдӕ ӕмӕ раст адӕймаг,

⁵¹иудейаг сахар Аримафейы цӕрӕг, ӕнхъӕлмӕ касти Хуыцауы Паддзахадмӕ. Уый разы нӕ уыди, синедрион цы уынаффӕ рахаста ӕмӕ цы сарӕзта, уыимӕ.

⁵²Йосеф бацыди Пилатмӕ ӕмӕ Йесойы мард ракуырдта.

⁵³Ауындзӕнӕй йӕ ӕриста, мӕрдӕмбӕрзӕны йӕ батыхта ӕмӕ йӕ, къӕдзӕхы хуылфы цы афтид зӕппадз уыди, уым бавӕрдта.

⁵⁴Уый уыди майрӕмбоны, изӕрӕй, ныридӕгӕн сабатбон райдыдта.

⁵⁵Йесоимӕ Галилейӕ цы сылгоймӕгтӕ ӕрбацыд, уыдон федтой, Йесойы мард куыд ӕриста Йосеф ӕмӕ йӕ зӕппадзы куыд бавӕрдта, уый.

⁵⁶Куы раздӕхтысты, уӕд ӕрцӕттӕ кодтой хӕрздӕфгӕнӕнтӕ. Сабат сын, иудейаг Ӕгъдаумӕ гӕсгӕ, уыди ӕнцойбон.