Read Хуыцауы Дзырд иронау Лука 24 Bible Online

Лука 24 - Хуыцауы Дзырд иронау bible

Лука 24

¹Къуырийӕн йӕ фыццаг бон сылгоймӕгтӕ, цы хӕрздӕфгӕнӕнтӕ ӕрцӕттӕ кодтой, уыдон семӕ райстой, афтӕмӕй сӕумӕйӕ зӕппадзмӕ атындзыдтой.

²Зӕппадзы дур иуварс фӕлдӕхтӕй баййӕфтой.

³Бацыдысты мидӕмӕ, фӕлӕ Хицау Йесойы мард уым нӕ разынди,

⁴ӕмӕ джихӕй аззадысты. Ӕваст сӕ разы дыууӕ лӕджы цӕхӕркалгӕ дарӕсы февзӕрдысты.

⁵Сылгоймӕгтӕ афтӕ фӕтарстысты, ӕмӕ сӕ сӕртӕ уӕлӕмӕ нал истой, фӕлӕ сын уыдон загътой: «Удӕгасы мӕрдтимӕ цы агурут?

⁶Ам нӕй, райгас ис. Галилейы ма куы уыди, уӕд уын цы дзырдта, уый-ма ӕрхъуыды кӕнут:

⁷„Адӕймаджы Фырт хъуамӕ лӕвӕрд ӕрцӕуа тӕригъӕдджын адӕмы къухмӕ. Уыдон Ӕй дзуарыл байтындздзысты, ӕмӕ ӕртыккаг бон райгас уыдзӕни“».

⁸Уӕд сылгоймӕгтӕн сӕ зӕрдыл ӕрлӕууыдысты Йесойы ныхӕстӕ.

⁹Раздӕхтысты зӕппадзӕй ӕмӕ ӕппӕт дӕр радзырдтой иуӕндӕс ахуыргӕнинагӕн, стӕй иннӕтӕн дӕр.

¹⁰Уыцы сылгоймӕгтӕ уыдысты магдалӕйаг Мариа, Иоаннӕ ӕмӕ Йаковы мад Мариа. Семӕ ма уыдис ӕндӕр сылгоймӕгтӕ, ӕмӕ уыдон дӕр апостолтӕн хабар афтӕ радзырдтой.

¹¹Фӕлӕ сыл нӕ баууындыдысты, афтӕ сӕм фӕкаст, цыма уыдон ӕрмӕст афтид ныхӕстӕ сты.

¹²Петр уӕддӕр фестад ӕмӕ зӕппадзмӕ азгъордта. Ӕргуыбыр кодта, йӕ хуылфмӕ йын бакаст ӕмӕ дзы мардӕмбӕрзӕн йеддӕмӕ куы ницы федта, уӕд фӕстӕмӕ раздӕхти, цы ӕрцыди, ууыл хинымӕр дисгӕнгӕйӕ.

¹³Раст уыцы бон ахуыргӕнинӕгтӕ дыууӕйӕ, Йерусалимӕй ӕртиссӕдз стадийы[1] дарддӕр цы Эммаусы хъӕу уыдис, уырдӕм фӕцӕйцыдысты

¹⁴ӕмӕ фӕндагыл, цы цаутӕ ӕрцыди, уыдоныл дзырдтой.

¹⁵Ныхас куы кодтой ӕмӕ кӕрӕдзийӕн сӕ хъуыдытӕ куы дзырдтой, уӕд сӕм Йесо Йӕхӕдӕг ӕрбаввахс ӕмӕ семӕ бамбал ис.

¹⁶Фӕлӕ Йӕ уыдон, цыма сӕ цӕстытӕй рӕстмӕ ницыуал уыдтой, уыйау нӕ базыдтой.

¹⁷Йесо сӕ бафарста: «Уый цӕуыл дзурут цӕугӕ-цӕуын?» Уыдон ӕнкъардӕй ӕрлӕууыдысты,

¹⁸ӕмӕ Йын сӕ иу, Клеопа, дзуапп радта: «Йерусалиммӕ ӕрцӕуджытӕй, ӕвӕццӕгӕн, иунӕг Ды нӕ зоныс, ацы бонты уым цы ӕрцыди, уыдӕтты тыххӕй?»

¹⁹Йесо сӕ бафарста: «Цы нӕ зонын?» Уыдон Ын загътой: «Назаретаг Йесойы хабар. Хъуыддагӕй дӕр ӕмӕ ныхасӕй дӕр Уый уыди тыхджын пехуымпар Хуыцауы ӕмӕ ӕппӕт адӕмы раз.

²⁰Нӕ хистӕр сауджынтӕ ӕмӕ Йын нӕ хицӕуттӕ марыны тӕрхон рахӕссын кодтой, ӕмӕ Йӕ дзуарыл байтыгътой.

²¹Мах та нӕ зӕрдӕ дардтам, Израилы Чи фервӕзын кӕндзӕн, Уый кӕй у, ууыл. Йӕ байтыгъдыл ныр ӕртыккаг бон цӕуы,

²²ӕмӕ нӕ сылгоймӕгтӕй чидӕртӕ мах дисы бафтыдтой — сӕумӕйӕ уыдысты зӕппадзы цур,

²³фӕлӕ Йын Йӕ мард не ссардтой. Ӕрбаздӕхтысты ӕмӕ радзырдтой, зӕдтӕ, дам, нӕм фӕзындысты ӕмӕ нын загътой, Йесо удӕгас у, зӕгъгӕ.

²⁴Уӕд махӕй чидӕртӕ ацыди зӕппадзмӕ, ӕмӕ алцы дӕр, сылгоймӕгтӕ куыд радзырдтой, афтӕ разынди, Йӕхи та Йын нӕ федтой».

²⁵Уӕд сын Йесо загъта: «О ӕнӕмбаргӕтӕ! Куыд зынтӕй ӕууӕндут, пехуымпартӕ рагуацы хуызы цы загътой, ӕппӕт уыдӕттыл!

²⁶Чырысти цӕмӕй Йӕ кады бӕрзӕндмӕ схиза, уый тыххӕй Йын ӕппӕт уыцы хъизӕмӕрттӕ бавзаринаг нӕ уыдысты, ӕви?»

²⁷Ӕмӕ сын, Моисей ӕмӕ ӕппӕт пехуымпартӕй райдайгӕйӕ, бамбарын кодта, ӕппӕт Фыстыты Йӕхи тыххӕй цы загъд ис, уыдӕттӕ.

²⁸Цы хъӕумӕ цыдысты, уымӕ куы баввахс сты, уӕд Йесойы фӕндыд дарддӕр цӕуын.

²⁹Фӕлӕ Йӕ уыдон урӕдтой ӕмӕ Йын лӕгъстӕ кодтой: «Баззай немӕ, тагъд баизӕр уыдзӕн, бон фӕивгъуыйы». Уӕд Уый дӕр бацыди хъӕумӕ ӕмӕ семӕ баззади.

³⁰Ӕмӕ Йесо фынгыл семӕ куы ӕрбадти, уӕд райста дзул, Хуыцауӕн арфӕ ракодта, ӕрсаста йӕ ӕмӕ сӕм ӕй алӕвӕрдта.

³¹Уӕд Ӕм бакастысты ӕмӕ Йӕ базыдтой, фӕлӕ Йӕ цӕстӕй нал уыдтой.

³²Ӕмӕ кӕрӕдзийӕн загътой: «Фӕндагыл немӕ куы ныхас кодта ӕмӕ нын Сыгъдӕг Фыст куы амыдта, уӕд нӕ риуы нӕ зӕрдӕтӕ нӕ сыгъдысты, ӕви?»

³³Уыйадыл фестадысты ӕмӕ фӕстӕмӕ Йерусалиммӕ аздӕхтысты. Иуӕндӕс ахуыргӕнинаджы иннӕтимӕ иумӕ уым ӕмбырдӕй баййӕфтой.

³⁴Уыдон дзырдтой, Хицау бӕлвырд райгас ис ӕмӕ Йӕхи Симонмӕ раргом кодта, зӕгъгӕ.

³⁵Ацы дыууӕ дӕр сын радзырдтой, фӕндагыл сыл цы ӕрцыди, уый, стӕй Йесойы куыд базыдтой, дзул куы ӕрсаста, уӕд.

³⁶Уыдӕттыл куы ныхас кодтой, уӕд Йесо Йӕхӕдӕг се ’хсӕн ӕрлӕууыд ӕмӕ загъта: «Фӕрнӕйдзаг ут!»

³⁷Уыдон фыр тӕссӕй сагъдау аззадысты — афтӕ фенхъӕлдтой, цыма ӕндӕрг уынынц.

³⁸Фӕлӕ сын Йесо загъта: «Афтӕ тынг цӕмӕй фӕтарстыстут, ӕмӕ уӕм ахӕм хъуыдытӕ цӕмӕн ӕвзӕры?

³⁹Фенут Мын Мӕ къухтӕ ӕмӕ Мӕ къӕхтӕ: уый Ӕз Мӕхӕдӕг дӕн. Басгарут Мӕ ӕмӕ сбӕлвырд кӕнут: ӕндӕргӕн буар ӕмӕ стджытӕ нӕй, Ӕз та, куыд уынут, афтӕмӕй буардзыд дӕн».

⁴⁰Уыцы ныхӕсты фӕстӕ сын фенын кодта Йӕ къухтӕ ӕмӕ Йӕ къӕхтӕ.

⁴¹Фыр цинӕй сӕ куы нӕ уырныдта ӕмӕ дисы куы бафтыдысты, уӕд сын загъта: «Хӕринаг уӕм ницы ис?»

⁴²Физонӕггонд кӕсаджы кӕрдих Ӕм радтой.

⁴³Уый йӕ райста ӕмӕ йӕ сӕ разы бахордта.

⁴⁴Уый фӕстӕ сын загъта: «Уемӕ ма куы уыдтӕн, уӕд уын Ӕз уымӕн дзырдтон, Моисейы Ӕгъдау, пехуымпарты чингуытӕ ӕмӕ псаломты Мӕн тыххӕй цы загъд ис, ӕппӕт уыдӕттӕ хъуамӕ сӕххӕст уой, зӕгъгӕ».

⁴⁵Раргом сын кодта, Сыгъдӕг Фыст куыд ӕмбарын хъӕуы, уый

⁴⁶ӕмӕ загъта: «Фыст ис, Чырысти хъуамӕ фӕхъизӕмар кодтаид ӕмӕ ӕртыккаг бон мӕрдтӕй райгас уыдаид, зӕгъгӕ.

⁴⁷Ӕмӕ, Йерусалимӕй райдайгӕйӕ, ӕппӕт адӕмтӕм фӕсидын хъӕуы Йӕ номӕй, цӕмӕй сӕ тӕригъӕдтыл ӕрфӕсмон кӕной ӕмӕ сын барст ӕрцӕуой.

⁴⁸Ӕппӕт уыдӕттӕн сымах ут ӕвдисӕн.

⁴⁹Ӕз уын рарвитдзынӕн, Мӕ Фыд уын зӕрдӕ цӕмӕй бавӕрдта, уый. Ӕмӕ уал ацы сахары баззайут, цалынмӕ уӕларвон тыхӕй не схайджын уат, уӕдмӕ».

⁵⁰Ӕмӕ сӕ сахарӕй Вифанийы онг ракодта. Йӕ къухтӕ хӕрдмӕ систа ӕмӕ сын арфӕ ракодта.

⁵¹Арфӕгӕнгӕйӕ сӕ адард ис ӕмӕ уӕларвмӕ ссыди.

⁵²Уыдон Ын зӕххы онг ныллӕг акуывтой ӕмӕ уый фӕстӕ стыр цинимӕ раздӕхтысты Йерусалиммӕ.

⁵³Уӕдӕй фӕстӕмӕ иудадзыг уыдысты Кувӕндоны ӕмӕ кад кодтой Хуыцауӕн.