Read Хуыцауы Дзырд иронау Лука 3 Bible Online

Лука 3 - Хуыцауы Дзырд иронау bible

Лука 3

¹Уыцы цау ӕрцыди кесӕр Тиверийы паддзахиуӕджы фынддӕсӕймаг аз. Уӕд Понтий Пилат хицауиуӕг кодта Иудейы, Ирод — Галилейы, йе ’фсымӕр Филипп — Итурей ӕмӕ Трахониты, Лисани — Абилинийы,

²Анна ӕмӕ Каиафӕ та алчертӕ уыдысты. Захариайы фырт Иоаннӕн ӕдзӕрӕг быдыры раргом ис Хуыцауы Дзырд.

³Уыйадыл Иоанн Иорданы алфамбылай зилын райдыдта ӕмӕ адӕмӕн ӕмбарын кодта, сӕ тӕригъӕдтӕ сын хатыргонд кӕй ӕрцӕудзысты, куы сыл ӕрфӕсмон кӕной ӕмӕ уый нысанӕн донаргъуыд куы райсой, уӕд.

⁴Пехуымпар Исайайы чиныджы афтӕ фыст ис: «Ӕдзӕрӕг быдыры хъуысы фидиуӕджы хъӕлӕс: „Ӕрцӕттӕ кӕнут Бардарӕгӕн фӕндаг, сӕмраст Ын кӕнут Йӕ цӕуӕнтӕ.

⁵Алы дӕлвӕз дӕр уӕлӕмӕ схӕцӕд йӕхиуыл, алы хох ӕмӕ алы къуыбыр дӕр ӕрныллӕг уӕд, гакъӕттӕ сӕмраст уӕнт ӕмӕ гуыргъахъхъ фӕндӕгтӕ сӕмлӕгъз уӕнт.

⁶Уӕд алы адӕймаг дӕр фендзӕн Хуыцауӕй лӕвӕрд ирвӕзындзинад“».

⁷Аргъауынмӕ йӕм цы бирӕ адӕм цыди, уыдонӕн Иоанн дзырдта: «Калмы цот! Чи уын загъта, ӕмӕ сымах сомбоны азарӕй аирвӕздзыстут?

⁸Зӕрдиагӕй кӕй ӕрфӕсмон кодтат, уый равдисут хъуыддагӕй! Махӕн нӕ фыдӕл Авраам у, зӕгъгӕ, ахӕм хъуыды уӕм ма ӕрцӕуӕд. Зӕгъын уын: Хуыцауӕн ацы дуртӕй дӕр Йӕ бон у Авраамӕн цот скӕнын.

⁹Фӕрӕт ныридӕгӕн бӕласы рӕбын цӕттӕйӕ лӕууы: йӕ дыргъ цы бӕласӕн нӕ фӕбӕззы, уый акалынц ӕмӕ йӕ арты баппарынц».

¹⁰Адӕм фарстой Иоанны: «Цы гӕнгӕ нын у?»

¹¹Уый сын дзуапп лӕвӕрдта: «Дыууӕ хӕдоны кӕмӕн ис, уый дзы иу, ӕппындӕр кӕмӕн нӕй, уымӕн раттӕд; хойраг кӕмӕ ис, уый дӕр бакӕнӕд афтӕ».

¹²Хъалонисджытӕ дӕр ӕм аргъуыд райсынмӕ ӕрбацыдысты ӕмӕ йӕ бафарстой: «Ахуыргӕнӕг, цы гӕнгӕ нын у?»

¹³Уый сын дзуапп радта: «Цы уын ӕмбӕлы, уымӕй уӕлдай адӕмӕй мацы домут».

¹⁴Фарстой йӕ ӕфсӕддонтӕ дӕр: «Махӕн та цы гӕнгӕ у?» Иоанн сын загъта: «Макӕй стигъут ӕмӕ тыхӕй макӕмӕй мацы исут — разы ут уӕ мыздӕй».

¹⁵Адӕм Чырыстимӕ тынг ӕнхъӕлмӕ кастысты, ӕмӕ дзы алчи йӕхимидӕг хъуыды кодта, кӕд Иоанн, мыййаг, Чырысти у, зӕгъгӕ.

¹⁶Иоанн се ’ппӕтӕн дӕр дзуапп лӕвӕрдта: «Ӕз уыл аргъауын донӕй, фӕлӕ ӕрбацӕуы мӕнӕй Тыхджындӕр, ӕз Уымӕн Йӕ дзабыры бос райхалыны аккаг дӕр нӕ дӕн. Уый уыл аргъаудзӕни Сыгъдӕг Удӕй ӕмӕ артӕй.

¹⁷Йӕ фыййаг Йӕ къухы ис, ӕмӕ Йӕ мус ссыгъдӕг кӕндзӕн. Мӕнӕу бафснайдзӕни Йӕ хордоны, зыгуым та басудздзӕн ӕнӕхуысгӕ арты».

¹⁸Иоанн ма адӕмы разӕнгард кодта ноджы бирӕ ӕндӕр ныхӕстӕй, Фарны Уац сын ӕмбарын кодта.

¹⁹Фӕлӕ хицау Иродӕн йе ’фсымӕры ус Иродиадӕйы йӕ цӕстмӕ куы бадардта, стӕй ма йын йӕ иннӕ фыдракӕндты тыххӕй куы бауайдзӕф кодта,

²⁰уӕд ӕй Ирод ахӕстоны бакодта ӕмӕ ма уымӕй йӕ тӕригъӕдтӕ ноджы фӕфылдӕр сты.

²¹Иоанн, иннӕ адӕмыл куы аргъуыдта, уӕд Йесойыл дӕр саргъуыдта. Аргъуыд исгӕйӕ, Йесо куывта, афтӕмӕй арвы дуар фегом ис,

²²Сыгъдӕг Уд Ӕм бӕлоны хуызы ӕрцыд ӕмӕ уӕларвӕй ӕрыхъуысти хъӕлӕс: «Ды Мӕ уарзон Фырт дӕ, Ӕз Дӕуыл аудын».

²³Йесо Йӕ лӕггадмӕ куы бавнӕлдта, уӕд Ыл цыди дӕс ӕмӕ ссӕдз азы бӕрц. Адӕм куыд ӕнхъӕл уыдысты, афтӕмӕй Уый уыди Йосифы фырт, Йосиф та — Елиайы. Йӕ фыдӕлтӕ:

²⁴Матфат, Левий, Мелхи, Ианнай, Йосеф,

²⁵Маттафи, Амос, Наум, Еслиа, Наггей,

²⁶Мааф, Маттафи, Семеин, Иосих, Иода,

²⁷Иоанан, Риса, Зоровавел, Шеалтиел, Нери,

²⁸Мелхи, Адди, Косам, Элмадам, Ир,

²⁹Йесо, Елиезер, Иорим, Матфат, Левий,

³⁰Симеон, Иудӕ, Йосеф, Ионам, Елиаким,

³¹Мелеа, Менна, Маттафа, Нафан, Давид,

³²Йессей, Овед, Боаз, Шелах, Нахшон,

³³Аминадав, Админ, Арни, Есром, Парец, Иудӕ,

³⁴Йаков, Исаак, Авраам, Терах, Нахор,

³⁵Серух, Рагав, Пелег, Евер, Шелах,

³⁶Каинан, Арфахсад, Сим, Ной, Ламех,

³⁷Мефушал, Енох, Йаред, Махалаел, Кеинан,

³⁸Енош, Шет, Адам, Хуыцау.