Read Хуыцауы Дзырд иронау Лука 6 Bible Online

Лука 6 - Хуыцауы Дзырд иронау bible

Лука 6

¹Иу сабаты Йесо ӕфсирджын хоры хуымтыл фӕцӕйцыд. Йӕ ахуыргӕнинӕгтӕ-иу ӕфсиртӕ ратыдтой, сӕ къухты-иу сӕ аууӕрстой ӕмӕ-иу сын сӕ нӕмгуытӕ ахордтой.

²Фарисейтӕй сын чидӕртӕ загътой: «Сабаты цы не ’мбӕлы, уый цӕмӕн кӕнут?»

³Йесо сын дзуапп радта: «Давид йе ’мбӕлттимӕ куы сыстонг ис, уӕд цы бакодта, уый тыххӕй нӕ кастыстут, ӕви?

⁴Бацыди Хуыцауы хӕдзармӕ ӕмӕ райста, ӕрмӕст сауджынтӕн кӕмӕй ӕмбӕлд хӕрын, уыцы кувӕггаг дзултӕй, ӕмӕ дзы йӕхӕдӕг дӕр бахордта, стӕй ма дзы йе ’мбӕлттӕн дӕр радта».

⁵Ноджы ма сын загъта: «Адӕймаджы Фырт сабатӕн йӕ хицау у».

⁶Иннӕ сабаты Йесо бацыди синагогӕмӕ ӕмӕ ахуыр кодта адӕмы. Уыдис дзы, йӕ рахиз къух хуыскъ кӕмӕн уыди, ахӕм лӕг.

⁷Динамонджытӕ ӕмӕ фарисейтӕ сӕ цӕст дардтой Йесомӕ, ома кӕд сабаты искӕй сдзӕбӕх кӕна, уӕд Ӕй фӕазымджын кӕндзыстӕм, зӕгъгӕ.

⁸Фӕлӕ сын Йесо зыдта сӕ хъуыдытӕ ӕмӕ, йӕ къух хуыскъ кӕмӕн уыди, уыцы лӕгӕн загъта: «Сыст ӕмӕ адӕмы размӕ рацу». Уый сыстади ӕмӕ адӕмы размӕ рацыди.

⁹Уӕд сын Йесо загъта: «Ӕз уӕ фӕрсын, сабаты хорз кӕнын ӕмбӕлы ӕви ӕвзӕр? Уд фервӕзын кӕнын ӕви йӕ фесафын?»

¹⁰Йесо се ’ппӕтыл дӕр Йӕ цӕст ахаста, ӕмӕ цӕнкуылӕн загъта: «Ӕрбадар-ма Мӕм дӕ къух». Уый афтӕ бакодта, ӕмӕ йӕ къух адзӕбӕх ис.

¹¹Динамонджытӕ ӕмӕ фарисейтӕн сӕ маст фыхти Йесомӕ ӕмӕ уынаффӕтӕ кодтой, цы Йын бакӕной, ууыл.

¹²Иуахӕмы Йесо хохмӕ ссыди кувынмӕ, ӕмӕ ӕнӕхъӕн ӕхсӕв уым, Хуыцаумӕ кувгӕйӕ, арвыста.

¹³Куы ӕрбабон ис, уӕд фӕдзырдта Йӕ ахуыргӕнинӕгтӕм, равзӕрста дзы дыууадӕсы ӕмӕ сӕ схуыдта апостолтӕ:

¹⁴Петр, зӕгъгӕ, кӕй схуыдта, уыцы Симоны ӕмӕ уый ӕфсымӕр Андрейы, уыдонимӕ ма — Йаковы, Иоанны, Филиппы, Варфоломейы,

¹⁵Матфейы, Фомайы, Алфейы фырт Йаковы, фӕсномыгӕй Зилот кӕй хуыдтой, уыцы Симоны,

¹⁶Йаковы фырт Иудӕйы ӕмӕ, Йесойыл фӕстӕдӕр гадзрахатӕй чи рацыди, уыцы Иудӕ Искариоты.

¹⁷Йесо семӕ хохӕй ӕрцыди ӕмӕ фӕзы ӕрлӕууыд. Уырдӕм ӕрӕмбырд сты Йӕ бирӕ ахуыргӕнинӕгтӕ дӕр, ноджы ма ӕгас Иудей ӕмӕ Йерусалимӕй, стӕй денджызы былгӕронӕй — Тир ӕмӕ Сидонӕй ӕрцӕуӕг адӕм.

¹⁸Уыдон Ӕм ӕрцыдысты байхъусынмӕ ӕмӕ сӕ низтӕй фервӕзынмӕ. Ӕнӕзӕгъинӕгты ахӕсты чи уыди, уыдон дӕр-иу сдзӕбӕх сты.

¹⁹Ӕмӕ адӕм иууылдӕр архайдтой Йесойыл бандзӕвыныл, уымӕн ӕмӕ, Уымӕй цы тых цыд, уый се ’ппӕты дӕр дзӕбӕх кодта.

²⁰Йесо Йӕ ахуыргӕнинӕгтыл Йӕ цӕст ахаста ӕмӕ райдыдта дзурын: «Тӕхудиаг стут, Хуыцауы сӕраппонд мӕгуыр чи у, — Хуыцауы Паддзахад сымах у.

²¹Тӕхудиаг стут, абоны ӕххормӕгтӕ, — Хуыцау уӕ бафсаддзӕн. Тӕхудиаг стут, абон кӕугӕ чи кӕны, уыдон, — сымах худдзыстут.

²²Тӕхудиаг уыдзыстут, Адӕймаджы Фырты тыххӕй адӕмӕн ӕнӕуынон куы суат, хъоды уыл куы бакӕной, цъыф уыл куы калой ӕмӕ уын уӕ ном куы сӕгад кӕной, уӕд.

²³Цин кӕнут уыцы бон ӕмӕ райут — уӕларвы уӕм ӕнхъӕлмӕ кӕсы стыр хорзӕх: ацы адӕмӕн сӕ фыдӕлтӕ дӕр пехуымпартӕн афтӕ кодтой.

²⁴Фӕлӕ сар уӕ сӕр, хъӕздгуытӕ, — сымах ныридӕгӕн уӕ хорзӕхы хай райстат.

²⁵Сар уӕ сӕр, абоны фырӕфсӕстытӕ, — сымах сыстонг уыдзыстут. Сар уӕ сӕр, абоны цингӕнджытӕ, — сымах кӕудзыстут ӕмӕ дзыназдзыстут.

²⁶Сар уӕ сӕр, адӕм иууылдӕр уӕ хорзы кой куы кӕной, уӕд: ацы адӕмы фыдӕлтӕ дӕр мӕнгпехуымпартӕй афтӕ ӕппӕлыдысты.

²⁷Фӕлӕ Ӕз сымахӕн, Мӕнмӕ хъусджытӕ, зӕгъын: уарзут уе знӕгты, хорз кӕнут, сымахӕй йе сӕфт чи уыны, уыдонӕн,

²⁸уе ’лгъитджытӕн хорзӕх курут Хуыцауӕй, уе ’фхӕрджыты тыххӕй кувут.

²⁹Де ’хсӕрфарс дын чи ныццӕва, уымӕ бадар иннӕ дӕр. Ӕмӕ дын исчи дӕ пӕлӕз куы иса, уӕд ын ратт дӕ хӕдон дӕр.

³⁰Чи дӕ кура, уымӕн ратт ӕмӕ, цы дӕ айсой, уый фӕстӕмӕ мауал агур.

³¹Адӕмӕй цӕмӕ ӕнхъӕлмӕ кӕсут, уый-иу сын уӕхӕдӕг дӕр кӕнут.

³²Чи уӕ уарзы, уыдоны куы уарзат, уӕд уый тыххӕй цавӕр хорзӕхы аккаг стут? Тӕригъӕдджынтӕ дӕр уарзынц, чи сӕ уарзы, уыдоны.

³³Хорзы уын чи цӕуы, уыдонӕн хорздзинад куы кӕнат, уӕд уый тыххӕй цавӕр хорзӕхы аккаг стут? Тӕригъӕдджынтӕ дӕр афтӕ кӕнынц.

³⁴Йӕ бафидынӕй уӕ ныфс кӕмӕй ис, кӕд ӕфстау уыдонӕн дӕттут, уӕд уый тыххӕй цавӕр хорзӕхы аккаг стут? Тӕригъӕдджынтӕ дӕр ӕфстау фӕдӕттынц тӕригъӕдджынтӕн, цӕмӕй, цас радтой, уый бӕрц фӕстӕмӕ райсой.

³⁵Фӕлӕ уарзут уе знӕгты, хорз кӕнут ӕмӕ ӕфстау дӕттут, фӕстӕмӕ исты кӕй райсдзыстут, уымӕ ӕнхъӕлмӕ нӕ кӕсгӕйӕ. Уӕд уын уыдзӕни стыр хӕрзиуӕг, ӕмӕ уыдзыстут Иууылбӕрзонды хъӕбултӕ — Уый ӕбузныгтӕм дӕр ӕмӕ фыдзӕрдӕтӕм дӕр хорз цӕстӕй кӕсы.

³⁶Уӕдӕ хӕрзгӕнӕг ут, уӕ Фыд хӕрзгӕнӕг куыд у, афтӕ.

³⁷Тӕрхонгӕнӕг макӕмӕн ут, ӕмӕ уын Хуыцау дӕр не стӕрхон кӕндзӕн. Макӕй фаут, ӕмӕ уӕ Хуыцау дӕр нӕ рафаудзӕн. Хатыр кӕнут, ӕмӕ уын Уый дӕр ныххатыр кӕндзӕн.

³⁸Дӕттут ӕмӕ райсдзыстут — уӕ фӕччийы уын ӕркалдӕуыдзӕн раст, хӕрзнад ӕмӕ йедзаг барӕнӕй — цы барӕнӕй барут, уыцы барӕнӕй сбарстӕуыдзӕн сымахӕн дӕр».

³⁹Йесо сын фӕсномыг ныхас дӕр ракодта: «Куырм куырмӕн фӕндаг куыд амондзӕн? Сӕ дыууӕ дӕр дзыхъхъы нӕ ныххаудзысты, ӕви?

⁴⁰Ахуыргӕнинаг йӕ ахуыргӕнӕгӕй уӕлдӕр нӕу; фӕлӕ йӕ ахуыр кӕронмӕ чи фӕуа, уый суыдзӕнис йӕ ахуыргӕнӕджы хуызӕн.

⁴¹Де ’фсымӕры цӕсты ӕрду куы уыныс, уӕд дӕхи цӕсты къала бӕлас цӕуылнӕ фиппайыс?

⁴²Куыд дзурыс де ’фсымӕрӕн, ӕри-ма, дӕ цӕстӕй дын ӕрду райсон, зӕгъгӕ, кӕд ӕмӕ дӕхи цӕсты къала бӕлас нӕ уыныс, уӕд? Дыдзӕсгом! Дӕхи цӕстӕй уал къала бӕлас райс, цӕмӕй, де ’фсымӕры цӕстӕй ӕрду куыд райсын хъӕуы, уый фенай.

⁴³Хорз бӕлас ӕвзӕр дыргъ нӕ дӕтты, стӕй хорз дыргъ дӕр низджын бӕласыл нӕ зайы.

⁴⁴Алы бӕлас дӕр йӕ дыргъӕй бӕрӕг вӕййы: какон сындзӕй легъуи не ’ртондзынӕ, сындзкъутӕрӕй та — сӕнӕфсир.

⁴⁵Хорз адӕймаг йӕ зӕрдӕйы хӕзнадонӕй ӕддӕмӕ хорзӕй исты рахӕссы, фыдзӕрдӕ адӕймаг та фыдӕхы къӕбицӕй — фыдӕх. Уымӕн ӕмӕ, зӕрдӕйы цы ис, дзыхӕй дӕр уый цӕуы.

⁴⁶Цы уын зӕгъын, уый куы нӕ кӕнут, уӕд Мӕм „Хицау, Хицау!“ цӕмӕн дзурут?

⁴⁷Мӕнмӕ ӕрцӕуджытӕй Мӕ ныхӕстӕм чи хъусы ӕмӕ сӕ чи ӕххӕст кӕны, уыцы адӕймаг кӕй хуызӕн у, уый уын зӕгъдзынӕн.

⁴⁸Уый у, арф дзыхъхъ чи скъахта ӕмӕ йӕ хӕдзар дурын бындурыл чи сӕвӕрдта, ахӕм хӕдзаргӕнӕджы хуызӕн. Дон раивылди ӕмӕ уыцы хӕдзарыл ахӕцыд, фӕлӕ йӕ фенкъуысын кӕнын нӕ бафӕрӕзта, уымӕн ӕмӕ йӕ бындур фидар уыд.

⁴⁹Мӕ ныхӕстӕм чи хъусы ӕмӕ сӕ чи не ’ххӕст кӕны, уый та у, йӕ хӕдзар зӕххыл ӕнӕ бындурӕй чи сарӕзта, ахӕм адӕймаджы хуызӕн. Куыддӕр хӕдзарыл дон ахӕцыд, афтӕ ныккалди ӕмӕ дурты кӕри фестад».