Read Хуыцауы Дзырд иронау Фӕлхатгонд ӕгъдау 21 Bible Online

Фӕлхатгонд ӕгъдау 21 - Хуыцауы Дзырд иронау bible

Фӕлхатгонд ӕгъдау 21

¹Дунедарӕг, уӕ Хуыцау, сымахӕн кӕй дӕтты, уыцы бӕсты адӕймаджы мардыл куы бамбӕлат быдыры ӕмӕ йӕ чи амардта, уый бӕрӕг куынӕ уа,

²уӕд рацӕуӕнт уӕ хистӕртӕ ӕмӕ уӕ тӕрхонгӕнджытӕ ӕмӕ сбӕрӕг кӕнӕнт, мард кӕм ссардӕуыди, уыцы бынатӕй, йӕ алфамбылай цы сахартӕ ис, уыдонмӕ цас цыд у, уый.

³Мардмӕ дзы хӕстӕгдӕр кӕцы разына, уыцы сахары хистӕртӕ равзарӕнт, кусгӕ кӕуыл нӕма кодтой ӕмӕ ӕфсондз кӕуыл нӕма уыд, ахӕм дыгӕрдыг.

⁴Акӕнӕнт дыгӕрдыджы, хуымгонд дӕр чи никуыма уыд ӕмӕ кӕй никуы байтыдӕуыд, ахӕм дӕлвӕзмӕ ӕмӕ йын уыцы ран йӕ бӕрзӕй асӕттӕнт.

⁵Стӕй ӕрбацӕуӕнт сауджынтӕ, Левийы байзӕддӕгтӕ: уыдоны равзӕрста Дунедарӕг, уӕ Хуыцау, цӕмӕй Йын лӕггадгӕнӕг уой ӕмӕ Дунедарӕджы номӕй арфӕ кӕной, ӕмӕ уымӕ гӕсгӕ цыфӕнды быцӕу дӕр ӕмӕ уӕнгсаст фӕкӕныны фӕдыл цыфӕнды хъуыддаг равзарын дӕр уыдонмӕ хауы.

⁶Хӕстӕгдӕр сахары хистӕртӕ, доны раз цы дыгӕрдыджы бӕрзӕй асастой, уый сӕрмӕ сӕ къухтӕ цӕхсӕнт

⁷ӕмӕ зӕгъӕнт: „Нӕ къухӕй нӕ ныккалди ацы туг, ницы федтам.

⁸Дунедарӕг, ма сӕвӕр азым Дӕ адӕмыл, израилӕгтыл, уацарӕй кӕй фервӕзын кодтай, уыдоныл! Сраст кӕн Дӕ адӕмы, израилӕгты!“ Ӕмӕ уӕд уыцы тугныккалды уыдон азымджын нӕ уыдзысты.

⁹Афтӕмӕй уӕхи ӕнаххосы тугныккалды азымӕй бахиздзыстут, Дунедарӕгӕн фӕндон цы у, уый куы кӕнат, уӕд.

¹⁰Уе знӕгты ныхмӕ хӕстмӕ куы рацӕуат ӕмӕ уын сӕ Дунедарӕг, уӕ Хуыцау, уӕ къухтӕм куы ратта ӕмӕ сӕ уацары куы райсат,

¹¹уӕд се ’хсӕн рӕсугъд сылгоймаг куы фенай, дӕ зӕрдӕмӕ куы фӕцӕуа ӕмӕ йӕ ракурын куы сфӕнд кӕнай,

¹²уӕд ӕй дӕ хӕдзармӕ ӕрбахон. Йӕ сӕр алвынӕд, йӕ ныхтӕ ракӕнӕд,

¹³йӕ уацайраджы дарӕс раивӕд ӕмӕ мӕйы дӕргъы йӕ фыд ӕмӕ йӕ мадыл фӕкӕуӕд. Уый фӕстӕ йемӕ ӕмуат ӕрцу, ӕмӕ лӕг ӕмӕ ус уыдзыстут.

¹⁴Куынӕуал дӕ хъӕуа, уӕд ӕй, кӕдӕм ӕй фӕнды, уырдӕм ауадз. Уӕй йӕ ма акӕн ӕвзистыл, дӕхицӕн дзы, мӕ бар у, зӕгъгӕ, цагъар ма скӕн.

¹⁵Дыууӕ усы кӕмӕн уа, сӕ иу — уарзон, иннӕ та — нӕ, уымӕн сӕ дыууӕ дӕр лӕппутӕ ныййардтой, ӕмӕ, кӕй нӕ уарзы, уыцы усы лӕппу хистӕр зӕнӕг у, зӕгъгӕ,

¹⁶уӕд, йӕ фырттӕн йӕ бынтӕ уаргӕйӕ, кӕй нӕ уарзы, уыцы усы лӕппуйы ма фӕхъулон кӕнӕд ӕмӕ, кӕй уарзы, уыцы усы лӕппуйы ма фӕхистӕр кӕнӕд.

¹⁷Кӕй нӕ уарзы, уыцы усы лӕппу у цоты хистӕр, ӕмӕ бынтӕй дыууӕ хайы раттын уымӕн ӕмбӕлы. Хистӕры хай уымӕ хауы.

¹⁸Искӕмӕн йӕ фырт фыдуаг ӕмӕ ӕнӕсӕттон у, зӕгъгӕ, йӕ фыд ӕмӕ йӕ мадмӕ нӕ хъусы, цыфӕндыйӕ дӕр сын нӕ уисӕн кӕны,

¹⁹уӕд уыцы мад ӕмӕ фыд бавдӕлӕнт, сӕ сахары хистӕрты размӕ йӕ бакӕнӕнт

²⁰ӕмӕ сын зӕгъӕнт: „Мӕнӕ ай нӕ фырт у, фыдуаг ӕмӕ ӕнӕсӕттон, гуыбындзӕл ӕмӕ къупри“.

²¹Ӕмӕ йӕ сахары цӕрджытӕ дурты бын фӕкӕнӕнт. Фесафут фыддзинад уе ’хсӕнӕй! Ӕгас Израилы айхъуысдзӕн хабар, ӕмӕ адӕм се ’ппӕт дӕр адӕргӕй нырриздзысты.

²²Искӕмӕн йӕ фыдракӕнды тыххӕй марыны тӕрхон куы ӕмбӕла ӕмӕ йӕ куы ’рцауындзат,

²³уӕд мардӕн ӕхсӕвы хъӕдыл ауыгъдӕй ныууадзӕн нӕй, ӕмбойны йӕ баныгӕнын хъӕуы. Хъӕдыл ауыгъд Хуыцауӕй ӕлгъыст у! Уӕдӕ ма чъизи кӕнут, Дунедарӕг, уӕ Хуыцау, сымахӕн исбонӕн кӕй дӕтты, уыцы зӕхх!