Read Хуыцауы Дзырд иронау Фӕлхатгонд ӕгъдау 22 Bible Online

Фӕлхатгонд ӕгъдау 22 - Хуыцауы Дзырд иронау bible

Фӕлхатгонд ӕгъдау 22

¹Де ’фсымӕры дзӕгъӕл стур кӕнӕ лыстӕг фосыл куы бамбӕлай, уӕд ӕй уым ма ныууадз — йӕ хицауыл ӕй сӕмбӕлын кӕн.

²Кӕд ӕмӕ фосы хицау дард цӕры кӕнӕ, кӕй сты, уый нӕ зоныс, уӕд та уал сӕ, цалынмӕ сӕ хицау фӕзына, уӕдмӕ дӕ хӕдзармӕ бакӕн.

³Афтӕ-иу бакӕн искӕй хӕрӕг, искӕй дарӕс, стӕй искӕй дзаумайӕ цыдӕриддӕр ссарай, уыдонӕн дӕр. Сӕ рӕзты макуы ацу!

⁴Фӕндагыл искӕмӕн йӕ хӕрӕг кӕнӕ йӕ гал бастад ӕмӕ ӕрхауд, зӕгъгӕ, уӕд йӕ иувӕрсты ма ахиз — йӕ хицауӕн ын феххуыс кӕн, ӕмӕ йӕ иумӕ слӕууын кӕнут йӕ къӕхтыл.

⁵Сылгоймагӕн нӕлгоймаджы дарӕс дарын не ’мбӕлы, нӕлгоймаг та хъуамӕ сылгоймаджы дарӕс ма дара. Афтӕ чи кӕны, уый Дунедарӕгӕн, уӕ Хуыцауӕн, ӕлгъаг у.

⁶Зӕххыл уа ӕви бӕласыл, — маргъы ахстоныл бамбӕлдтӕ ӕмӕ дзы мадӕл маргъы ӕд лӕппынтӕ кӕнӕ къуыртты бадгӕ федтай, зӕгъгӕ, уӕд ӕй дӕхицӕн ӕд лӕппынтӕ ма рахӕсс.

⁷Мады уадз, йӕ лӕппынты та йын рахӕсс, цӕмӕй дын хорз уа ӕмӕ бирӕ фӕцӕрай.

⁸Хӕдзар аразыс, уӕд ын йӕ уӕлхӕдзары кӕрӕттыл кӕрӕй-кӕронмӕ быру скӕн, цӕмӕй дзы мачи рахауа ӕмӕ искӕй мӕлӕты азымджын ма фӕуай.

⁹Дӕ сӕндоны сӕнӕфсирӕй дарддӕр мацы ныссадз, цӕмӕй дӕ сӕнӕфсир дӕр ӕмӕ дӕ иннӕ мыггаджы тыллӕг дӕр ӕлгъыстаг ма фӕуой.

¹⁰Гал ӕмӕ хӕрӕгыл иумӕ ифтыгъдӕй хуым ма кӕн.

¹¹Ма дар алыхуызон ӕндӕхтӕй, къуымбил ӕмӕ гӕн ӕндахӕй уӕфт дарӕс.

¹²Дӕ уӕлӕфтауы цыппар тигъыл дӕр хаутӕ скӕн.

¹³Ус куы ӕрхӕссай, йемӕ ӕмуат куы ’рцӕуай, ӕмӕ дын стӕй ӕнӕуынон куы суа,

¹⁴афтӕмӕй йыл уый фӕстӕ цъыфкалӕн куы кӕнай ӕмӕ йӕ адӕмы цӕсты куы ӕфтауай, ракуырдтон ӕй, йемӕ ӕмуат ӕрцыдтӕн, фӕлӕ чызг нӕ разынди, зӕгъгӕ,

¹⁵уӕд чызджы фыд ӕмӕ мад, йе ’фсарм йӕхимӕ кӕй уыд, уый ӕвдисӕнӕн сахары хистӕртӕм сахары кулдуары размӕ чызджы пысултӕ рахӕссӕнт.

¹⁶Ӕмӕ йӕ фыд сахары хистӕртӕн зӕгъӕд: „Ацы лӕгӕн радтон ӕз мӕ чызджы, ӕмӕ йын адӕн нӕ фӕци.

¹⁷Цъыфкалӕн ыл кӕны, чызг нӕ уыди, зӕгъгӕ, фӕлӕ уын мӕнӕ мӕ чызджы ӕфсармы ӕвдисӕйнӕгтӕ“. Ӕмӕ сахары хистӕрты раз чызджы пысултӕ айтындзӕнт.

¹⁸Ӕмӕ сахары хистӕртӕ бафхӕрӕнт уыцы лӕджы.

¹⁹Сӕдӕ ӕвзист шекелы хъуамӕ бафида йӕ каисӕн, израилаг чызгӕн йе ’взӕры кой кӕй айхъуысын кодта, уый тыххӕй. Сылгоймагимӕ та цӕргӕйӕ баззайдзӕн, йемӕ ахицӕн уӕвыны бар ын нӕй.

²⁰Йӕ ныхӕстӕ ӕцӕг сты, ӕмӕ йӕ бинойнаг бӕлвырдӕй чызг нӕ разынди, зӕгъгӕ,

²¹уӕд та сахары цӕрджытӕ сылгоймаджы йӕ фыды хӕдзары дуармӕ дурты бын фӕкӕнӕнт: фӕхудинаг кодта Израилы, йӕ фыды хӕдзары хъахбай митӕ кодта. Фесафут уе ’хсӕнӕй фыддзинад!

²²Нӕлгоймаджы искӕй усимӕ баййӕфтой, зӕгъгӕ, уӕд сӕ дыууӕ дӕр маринаг сты: афтӕ чи бакодта, уыцы нӕлгоймаг дӕр ӕмӕ сылгоймаг дӕр. Искӕй усмӕ чи фӕрӕдыди, уыцы нӕлгоймаг дӕр хъуамӕ амӕла ӕмӕ сылгоймаг дӕр. Фесафут ӕвзӕрдзинад Израилӕй!

²³Куырдуаты бадӕг ӕнӕрцӕф чызгыл сахары ӕндӕр нӕлгоймаг амбӕлд ӕмӕ йын батых кодта, зӕгъгӕ,

²⁴уӕд сӕ дыууӕйы дӕр сахары кулдуары раз дурты бын фӕкӕнут: чызджы, сахары уӕвгӕйӕ, фӕдис, зӕгъгӕ, кӕй нӕ ныхъхъӕр кодта, уый тыххӕй, нӕлгоймаджы та, кӕйдӕр усаджы кӕй фӕхудинаг кодта, уый тыххӕй. Фесафут уе ’хсӕнӕй фыддзинад!

²⁵Фӕлӕ куырдуаты бадӕг чызгыл сахары ӕдде цы нӕлгоймаг амбӕла ӕмӕ йын тыхми чи бакӕна, уый та ӕрмӕстдӕр йӕхӕдӕг у маринаг,

²⁶чызг ницы аххосджын у: йӕ хабар у, исчи ӕваст искӕуыл йӕхи куы ныццӕва ӕмӕ йӕ куы ӕрбамара, уый хуызӕн.

²⁷Уымӕн ӕмӕ, кӕд быдыры цыфӕнды хъӕр кодта, уӕддӕр ын ӕххуысгӕнӕг нӕ уыди.

²⁸Нӕлгоймаг, искӕимӕ фидыд чи нӕма у, ахӕм чызгӕн тыхми куы бакӕна ӕмӕ йӕ уынӕг куы фӕуа,

²⁹уӕд ӕрыгон чызджы фыдӕн хъуамӕ бафида дӕс ӕмӕ дыууиссӕдз ӕвзист шекелы, чызджы та ракура, уымӕн ӕмӕ йӕ фӕхудинаг кодта, ӕмӕ йын цӕрӕнбонты йемӕ цӕргӕ у.

³⁰Йӕ фыды усимӕ бацӕрыны бар никӕмӕн ис. Йӕ фыды бӕгънӕгӕй феныны бар никӕмӕн ис.