Read Хуыцауы Дзырд иронау Иоанн 13 Bible Online

Иоанн 13 - Хуыцауы Дзырд иронау bible

Иоанн 13

¹Ӕрӕввахс ис Куадзӕн. Йесо зыдта, кӕй ралӕууыди ацы дунейӕ Йӕ Фыдмӕ ацӕуыны афон. Уый уарзта ацы дунейы Йӕхионты ӕмӕ Йӕ уарзт равдыста ӕххӕстӕй.

²Уыцы рӕстӕг хӕйрӕг Иудӕйы, Симон Искариоты фырты, Йесойы ауӕй кӕныныл сардыдта.

³Ӕхсӕвӕры рӕстӕг Йесо, Йӕ Фыд Ын ӕппӕт дӕр Йӕ къухмӕ кӕй радта, Хуыцауӕй кӕй ӕрцыд ӕмӕ ныр Хуыцаумӕ кӕй цӕуы, уый зонгӕйӕ,

⁴фынгӕй сыстади, раласта Йе ’ддаг дарӕс, райста хисӕрфӕн ӕмӕ йӕ ӕрбабаста Йӕ астӕуыл.

⁵Уый фӕстӕ дурыны дон ныккодта ӕмӕ райдыдта Йӕ ахуыргӕнинӕгтӕн сӕ къӕхтӕ ӕхсын ӕмӕ сӕ Йӕ астӕуыл баст хисӕрфӕнӕй сӕрфын.

⁶Симон Петрмӕ куы бацыди, уӕд Ын уый загъта: «Хицау! Ды мын мӕ къӕхтӕ куыд хъуамӕ цӕхсай?»

⁷Йесо йын дзуапп радта: «Ӕз цы кӕнын, уый ды ныртӕккӕ нӕма ӕмбарыс, фӕлӕ йӕ фӕстӕдӕр бамбардзынӕ».

⁸Петр Ын загъта: «Никуы мын цӕхсдзынӕ мӕ къӕхтӕ!» Йесо йын дзуапп радта: «Куынӕ дын сӕ цӕхсон, уӕд дын Мемӕ иумӕйагӕй ницы ис».

⁹Уӕд Ын Симон Петр загъта: «Хицау, канд мӕ къӕхтӕ нӕ, фӕлӕ мын мӕ къухтӕ ӕмӕ мӕ сӕр дӕр цӕхс».

¹⁰Йесо йын загъта: «Ӕхсадӕн ӕрмӕст йӕ къӕхтӕ цӕхсын хъӕуы, уымӕн ӕмӕ ӕгасӕй дӕр сыгъдӕг у. Сымах дӕр сыгъдӕг стут, ӕрмӕст уе ’ппӕт нӕ».

¹¹Йесо зыдта Йӕ уӕйгӕнӕджы ӕмӕ уымӕн загъта, уе ’ппӕт сыгъдӕг не стут, зӕгъгӕ.

¹²Сӕ къӕхтӕ сын куы цӕхсадта, уӕд Йӕ дарӕс скодта, ногӕй Йӕхи ӕруагъта ӕмӕ загъта: «Цы уын бакодтон, уый ӕмбарут?

¹³Сымах Мӕн Ахуыргӕнӕг ӕмӕ Хицау кӕй хонут, уымӕй раст зӕгъут, уымӕн ӕмӕ Ӕз Ахуыргӕнӕг ӕмӕ Хицау дӕн.

¹⁴Уӕдӕ уын кӕд Ӕз, Хицау ӕмӕ Ахуыргӕнӕг, уӕ къӕхтӕ цӕхсадтон, уӕд сымах дӕр хъуамӕ ӕхсат уӕ кӕрӕдзийы къӕхтӕ.

¹⁵Ӕз уын равдыстон, сымах дӕр куыд хъуамӕ кӕнат, уый.

¹⁶Ӕцӕг цы у, уый уын зӕгъын: цагъар йӕ хицауӕй уӕлдӕр нӕу, стӕй минӕвар дӕр йӕ рарвитӕгӕй уӕлдӕр нӕу.

¹⁷Кӕд уый зонут, уӕд тӕхудиаг уыдзыстут, сымах дӕр афтӕ куы кӕнат, уӕд.

¹⁸Уе ’ппӕты тыххӕй нӕ зӕгъын. Ӕз, кӕй равзӕрстон, уыдоны зонын. Фӕлӕ хъуамӕ сӕххӕст уа, Сыгъдӕг Фысты цы загъд ис, уый: „Мемӕ къӕбӕр чи хордта, уый рацыди Мӕ ныхмӕ“.

¹⁹Уый тыххӕй уын Ӕз зӕгъын рагацау, цалынмӕ нӕма ӕрцыд, уӕдмӕ, цӕмӕй сымах, куы ’рцӕуа, уӕд баууӕндат: УЫЙ ӔЗ ДӔН.

²⁰Ӕцӕг уын зӕгъын, ӕцӕг: Ӕз кӕй арвитын, уый чи суазӕг кӕны, уый Мӕн суазӕг кӕны, Мӕн чи суазӕг кӕны, уый та — Мӕ Рарвитӕджы».

²¹Уыцы ныхӕсты фӕстӕ Йесо Йӕхимидӕг тынг ӕрбатыхст ӕмӕ загъта: «Ӕцӕг уын зӕгъын, ӕцӕг, уӕ иу Мыл гадзрахатӕй рацӕудзӕни».

²²Уыцы ныхӕстӕм ахуыргӕнинӕгтӕ кӕрӕдзимӕ ракӕс-бакӕсыл фесты — Йесо кӕй тыххӕй зӕгъы, уый не ’мбӕрстой.

²³Йесойӕн Йӕ уарзон ахуыргӕнинаг бадти Йӕ фарсмӕ,

²⁴ӕмӕ йӕм Симон Петр ацамыдта, кӕй тыххӕй дзуры, уымӕй ма Йӕ бафӕрс, зӕгъгӕ.

²⁵Ахуыргӕнинаг йӕхи Йесомӕ бакъул кодта ӕмӕ Йӕ бафарста: «Хицау, кӕй кой кӕныс, уый чи у?»

²⁶Йесо йын дзуапп радта: «Мӕ къӕбӕр цӕхдоны куы атулон, уӕд ӕй кӕмӕ раттон, уый». Къӕбӕр цӕхдоны атылдта ӕмӕ йӕ радта Иудӕмӕ, Симон Искариоты фыртмӕ.

²⁷Уыцы тӕккӕ уысм сайтан бацыди Иудӕйы мидӕг, ӕмӕ йын уӕд Йесо загъта: «Цы кӕнинаг дӕ, уый тагъддӕр кӕн».

²⁸Афтӕ йын цӕй тыххӕй загъта, уый фынгыл бадджытӕй ничи бамбӕрста.

²⁹Ӕхцайы лагъз Иудӕмӕ кӕй уыди, уымӕ гӕсгӕ иуӕй-иутӕ ӕнхъӕлдтой, ӕмӕ йын Йесо, бӕрӕгбонмӕ сӕ цы хъӕуы, уый ӕлхӕнын кӕнӕ та мӕгуыртӕн исты раттын кӕны.

³⁰Иудӕ къӕбӕр куы райста, уӕд уайтагъд дуары ӕдде фӕци. Уыдис ӕхсӕв.

³¹Иудӕ куы ацыд, уӕд Йесо загъта: «Ныр раргом ис Адӕймаджы Фырты кад, ӕмӕ Хуыцауы кад дӕр раргом ис Йӕ фӕрцы.

³²Ӕмӕ кӕд Хуыцауы кад Йӕ фӕрцы раргом ис, уӕд Ӕй Хуыцау Йӕхӕдӕг дӕр скадджын кӕндзӕн, ӕмӕ Йӕ скадджын кӕндзӕн рӕхджы.

³³Мӕ хъӕбултӕ, Ӕз бирӕ нал уыдзынӕн уемӕ. Агурдзыстут Мӕ, фӕлӕ, иудейӕгтӕн куыд загътон, афтӕ ныр сымахӕн дӕр зӕгъын: „Ӕз кӕдӕм цӕуын, сымахӕн уырдӕм уӕ бон бацӕуын нӕу“.

³⁴Дӕттын уын ног фӕдзӕхст: уарзут кӕрӕдзийы. Ӕз уӕ куыд уарзын, афтӕ сымах дӕр кӕрӕдзийы уарзут.

³⁵Уӕ кӕрӕдзийы куы уарзат, уӕд алчидӕр базондзӕн, сымах Мӕ ахуыргӕнинӕгтӕ кӕй стут, уый».

³⁶Симон Петр Ын загъта: «Хицау, ӕмӕ Ды кӕдӕм цӕуыс?» Йесо йын дзуапп радта: «Ӕз кӕдӕм цӕуын, уырдӕм ныртӕккӕ дӕуӕн нӕй цӕуӕн, фӕлӕ фӕстӕдӕр рацӕудзынӕ Мӕ фӕдыл».

³⁷Петр Ын загъта: «Хицау, цӕуылнӕ мын ис ныр Дӕ фӕдыл ацӕуӕн? Ӕз мӕ цард дӕр ратдзынӕн Дӕу тыххӕй».

³⁸Йесо йын дзуапп радта: «Дӕ цард Мӕн тыххӕй ратдзынӕ? Зӕгъын дын: уасӕг нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи.