Read Хуыцауы Дзырд иронау Ромӕгтӕм 7 Bible Online

Ромӕгтӕм 7 - Хуыцауы Дзырд иронау bible

Ромӕгтӕм 7

¹Ӕфсымӕртӕ, — Ӕгъдау чи зоны, уыдонмӕ дзурын, — Ӕгъдауы бар адӕймагыл ӕрмӕст йӕ удӕгасӕй кӕй цӕуы, уый нӕ зонут, ӕви?

²Зӕгъӕм, моймӕдзыд сылгоймаджы йӕ удӕгас мойыл ӕгъдау бӕтты. Йӕ мой куы амӕла, уӕд та ссӕрибар вӕййы, йӕ мойыл ӕй чи бӕтты, ӕгъдауы уыцы домӕнтӕй.

³Йӕ мой удӕгас куы уа, афтӕмӕй ӕндӕр мой куы скӕна, уӕд ыл хӕтаджы ном сбады. Йӕ мой куы амӕла, уӕд ӕгъдауӕй сӕрибар у ӕмӕ, ӕндӕр мой куы скӕна, уӕд хӕтагыл нымад нӕу.

⁴Сымах дӕр афтӕ, ме ’фсымӕртӕ: Чырыстийы мӕлӕты фӕрцы амардыстут Ӕгъдауӕн, цӕмӕй уат Ӕндӕры — мӕрдтӕй Чи райгас, Уый адӕм ӕмӕ кусат Хуыцауӕн.

⁵Удӕгасӕй мах нӕ тӕригъӕдджын ӕрдзыхъӕды уацары уыдыстӕм ӕмӕ, Ӕгъдау цы чъизи монцтӕ цырен кодта, уыдон хӕлбурцъ кодтой нӕ буары ӕмӕ куыстой мӕлӕтӕн.

⁶Ныр та, кӕй уацары уыдыстӕм, ӕппӕт уыдӕттӕн амардыстӕм ӕмӕ афтӕмӕй ссӕрибар стӕм Ӕгъдауӕй, цӕмӕй Хуыцауӕн кӕддӕрау, Ӕгъдауы фыстмӕ гӕсгӕ нӕ, фӕлӕ ног хуызы, Сыгъдӕг Уды ӕххуысӕй, лӕггад кӕнӕм.

⁷Уӕдӕ ныр цы зӕгъӕм? Ау, Ӕгъдауӕй цӕуы тӕригъӕд? Ницы хуызы! Фӕлӕ Ӕгъдау куынӕ уаид, уӕд, тӕригъӕд цы у, уый ӕз нӕ зыдтаин. Уымӕн ӕмӕ, Ӕгъдау куынӕ фӕдзӕхстаид «Ма бабӕлл», уӕд нӕ зыдтаин, бабӕллын цы нысан кӕны, уый.

⁸Фӕлӕ тӕригъӕдӕн фӕдзӕхсты фӕрцы фадат фӕци, ӕмӕ мӕм райгуырын кодта алы мондӕгтӕ. Тӕригъӕд та ӕнӕ Ӕгъдауӕй мард у.

⁹Ӕз кӕддӕр цардтӕн, Ӕгъдау нӕ зыдтон, афтӕмӕй; фӕлӕ, фӕдзӕхст куы фӕзынд, уӕд тӕригъӕд райгас ис,

¹⁰ӕз та амардтӕн: царддӕттӕг цы фӕдзӕхст хъуамӕ уыдаид, уый мын ӕрхаста мӕлӕт.

¹¹Уымӕн ӕмӕ тӕригъӕдӕн фӕзынди фадат фӕдзӕхстӕй спайда кӕнынӕн ӕмӕ мӕ амарынӕн.

¹²Фӕлӕ Ӕгъдау йӕхӕдӕг Хуыцауӕй цӕуы, ӕмӕ, цыдӕриддӕр домы, уый сыгъдӕг, раст ӕмӕ хорз у.

¹³Уӕдӕ мын, ау, уыцы хорз ӕрхаста мӕлӕт? Ницы хуызы! Уый тӕригъӕд сарӕзта ӕмӕ уымӕй йе ’цӕг цӕсгом равдыста: уыцы хорзӕй спайда кодта ӕмӕ мын мӕлӕт ӕрхаста. Уӕдӕ афтӕ: фӕдзӕхсты руаджы ноджы тынгдӕр рабӕрӕг ис, тӕригъӕд куыд тӕригъӕдджын у, уый.

¹⁴Мах зонӕм, Ӕгъдау Удӕй кӕй цӕуы, уый. Ӕз та буардзыд адӕймаг дӕн, тӕригъӕдджын ӕрдзыхъӕды цагъар.

¹⁵Цы ми кӕнын, уый мӕхӕдӕг дӕр не ’мбарын. Цы мӕ фӕнды, уый нӕ кӕнын, фӕлӕ мын ӕнӕуынон цы у, уый та кӕнын.

¹⁶Ӕмӕ кӕд, цы мӕ нӕ фӕнды, уый кӕнын, уӕд, бӕлвырд, разы дӕн: Ӕгъдау хорз у.

¹⁷Фӕлӕ, ӕцӕгдзинадӕй, уый ӕз нӕ, фӕлӕ, мӕ мидӕг цы тӕригъӕд цӕры, уый архайы.

¹⁸Ӕз зонын: мӕ мидӕг, ома мӕ тӕригъӕдджын ӕрдзыхъӕды, хорзӕй ницы ис. Хорздзинад кӕнын мӕ фӕнды, фӕлӕ мын нӕ уайы.

¹⁹Ӕмӕ мӕ кӕд фӕнды, уӕддӕр хорздзинад нӕ кӕнын, кӕд мӕ нӕ фӕнды, уӕддӕр аразын фыддзинад.

²⁰Ӕмӕ кӕд, цы мӕ нӕ фӕнды, уый кӕнын, уӕд ӕй ӕз нӕ кӕнын, фӕлӕ йӕ, мӕ мидӕг цы тӕригъӕд цӕры, уый кӕны.

²¹Уӕдӕ мӕхицӕн ахӕм ӕгъдау раргом кодтон: хорз кӕнын мӕ куы бафӕнды, уӕд мын фыддзинад рауайы.

²²Уымӕн ӕмӕ мӕ уд цин кӕны Хуыцауы ӕгъдауыл,

²³фӕлӕ мӕ туджы ис ӕндӕр ӕгъдау. Уыцы ӕгъдау тох кӕны, мӕ зонд цы ӕгъдауы фарс у, уый ныхмӕ, ӕмӕ ӕз свӕййын, мӕ туджы цы тӕригъӕдджын ӕгъдау ис, уымӕн йӕ уацайраг.

²⁴Цы мӕгуыр у адӕймаг! Чи мӕ фервӕзын кӕндзӕн, йӕ тӕригъӕдджын ӕрдзыхъӕды аххосӕй мӕлӕты фос цы буар у, уымӕй?

²⁵Бузныг Хуыцауӕн — нӕ Бардарӕг Йесо Чырыстийы руаджы мӕ фервӕзын кодта! Уӕдӕ ӕз уыцы иу адӕймаг дӕн, фӕлӕ мӕ зондӕй кусын Хуыцауы ӕгъдауӕн, мӕ тӕригъӕдджын ӕрдзыхъӕдӕй та — тӕригъӕды ӕгъдауӕн.