Read Хуыцауы Дзырд иронау 1 Коринфӕгтӕм 16 Bible Online

1 Коринфӕгтӕм 16 - Хуыцауы Дзырд иронау bible

1 Коринфӕгтӕм 16

¹Ныр та сыгъдӕджытӕн ӕххуысы тыххӕй. Сымах хъуамӕ бакӕнат, ӕз Галатийы аргъуантӕн куыд бафӕдзӕхстон, афтӕ.

²Къуырийы фыццаг бон сымахӕй алчидӕр, йӕ къух куыд амоны, афтӕ йӕ мулкӕй рахицӕн кӕнӕд, цӕмӕй, куы уӕм ӕрцӕуон, уӕд уыцы ӕххуыс ӕмбырдгӕнинаг мауал уа.

³Куы ӕрцӕуон, уӕд, аккагыл кӕй банымайат, уыдоны фыстӕджытимӕ арвитдзынӕн Йерусалиммӕ, цӕмӕй уын уӕ лӕвар фӕхӕццӕ кӕной.

⁴Кӕд дзы уыцы сӕр бахъӕуа, ӕмӕ мӕхӕдӕг ацӕуон, уӕд уыдон дӕр мемӕ ацӕудзысты.

⁵Ӕз уӕм ӕрцӕудзынӕн, ӕгас Македонийыл куы ӕрзилон, уӕд. Уымӕн ӕмӕ мӕ зӕрды Македонийыл ӕрзилын ис.

⁶Афӕстиат уӕм уыдзынӕн, ӕвӕццӕгӕн. Чи зоны, мӕ зымӕг дӕр сымахмӕ арвитон, ӕмӕ мӕ уый фӕстӕ сымах срӕвдз кӕндзыстут фӕндагмӕ, дарддӕр кӕдӕм цӕуон, уырдӕм.

⁷Нӕ мӕ фӕнды сымахмӕ ӕхстуадӕй бауайын — Бардарӕджы фӕндӕй, иу цасдӕр уӕм кӕй фӕуыдзынӕн, ууыл мӕ зӕрдӕ дарын.

⁸Эфесы та фӕуыдзынӕн Къуыриты бӕрӕгбонмӕ —

⁹кӕд мӕ ныхмӕлӕуджытӕ бирӕ сты, уӕддӕр мын уым ис сӕрибар ӕмӕ ӕнтыстджынӕй кусыны фадат.

¹⁰Кӕд уӕм Тимофей ӕрцӕуа, уӕд бацархайут, сымахмӕ йын ӕдас цӕмӕй уа, ууыл. Уымӕн ӕмӕ уый дӕр мӕнау Бардарӕгӕн кусы.

¹¹Ӕнӕрвӕссонтӕ йыл мачи кӕнӕд. Ифтонгӕй йӕ фарнимӕ афӕндараст кӕнут, цӕмӕй ӕрцӕуа мӕнмӕ — иннӕ ӕфсымӕртимӕ йӕм ӕнхъӕлмӕ кӕсын.

¹²Ныр та не ’фсымӕр Аполлосы тыххӕй. Ӕз ӕм тынг ӕрхатыдтӕн, цӕмӕй ӕфсымӕртимӕ сымахмӕ ацӕуа, фӕлӕ йӕ ныртӕккӕ уый ницы хуызы бафӕндыд; фадат ын куы фӕуа, уӕд уӕм ацӕудзӕн.

¹³Къӕрцхъус ут, фидар уырнындзинад уӕм уӕд, ӕхсарджын ӕмӕ хъӕддых ут.

¹⁴Уӕ алы хъуыддаг дӕр уарзондзинадимӕ аразут.

¹⁵Ахайы фыццаг чи баууӕндыди, уыдон Стефан ӕмӕ йӕ хӕдзаронтӕ кӕй уыдысты ӕмӕ сыгъдӕджытӕн лӕггад кӕнынӕн сӕхи кӕй снывонд кодтой, уый уын зындгонд у. Курын уӕ, ӕфсымӕртӕ,

¹⁶ахӕмты, стӕй ма уыцы хъуыддаджы семӕ чидӕриддӕр фӕллой кӕны, уыдоны коммӕ кӕсут.

¹⁷Сымах мемӕ кӕй не стут, уый мын баххӕст кодтой Стефан, Фортунат ӕмӕ Ахаик. Райын се ’рцыдыл.

¹⁸Сымахау мӕнӕн дӕр удӕнцой ӕрхастой. Ахӕмтӕ уӕм нымады уӕнт!

¹⁹Салам уын ӕрвитынц Азийы аргъуантӕ; Бардарӕгимӕ иудзинады фӕрцы уын зӕрдиаг салам — Акилӕ ӕмӕ Прискиллӕйӕ, стӕй, сӕ хӕдзары цы аргъуан ӕмбырд кӕны, уымӕй дӕр.

²⁰Саламтӕ уын ӕрвитынц ӕфсымӕртӕ иууылдӕр. Ӕфсымӕрон байӕ салам дӕттут кӕрӕдзийӕн.

²¹Ныр та фыссын мӕхи къухӕй: салам уын Павелӕй.

²²Бардарӕджы [Йесо Чырыстийы] чи нӕ уарзы, уый ӕлгъыст у. Марана та![1]

²³Нӕ Бардарӕг Йесойы хорзӕх уӕ уӕд!

²⁴Йесо Чырыстиимӕ иудзинады фӕрцы мын уе ’ппӕт дӕр стут уарзон адӕм!