Read Хуыцауы Дзырд иронау 2 Коринфӕгтӕм 3 Bible Online

2 Коринфӕгтӕм 3 - Хуыцауы Дзырд иронау bible

2 Коринфӕгтӕм 3

¹Афтӕ нӕ уайы, цыма та уын мах дӕр ногӕй, мӕнӕ куыд хорз стӕм, зӕгъгӕ, нӕхи бацамоныныл архайӕм? Кӕйдӕрты сӕхицӕй ӕппӕлыны сӕр куыд хъӕуы, афтӕ махмӕ дӕр хъуамӕ ахӕм фыстӕджытӕ уа сымахӕн равдисынӕн, кӕнӕ уын сӕ уӕхицӕй хъуамӕ райсӕм?

²Сымах уӕхӕдӕг стут нӕ фыстӕг! Уый нӕ зӕрдӕты фыстӕй лӕууы, алкӕмӕн дӕр зындгонд у, алчидӕр ӕй, йӕ бон у, ӕмӕ бакӕса.

³Нӕ фӕллойы руаджы Чырыстийы фыстӕг кӕй стут, уый уыны алчидӕр. Уыцы фыстӕг милдонӕй фыст нӕу — цардӕгас Хуыцауы Уды фыст ис; къӕйдуртыл фыст нӕу, фӕлӕ зӕрдӕйы къултыл.

⁴Уый ӕнӕмӕнг афтӕ кӕй у, ууыл Хуыцауы раз фидарӕй ӕууӕндӕм Чырыстийы руаджы.

⁵Уый тыххӕй нӕ, ӕмӕ нӕхӕдӕг истӕмӕн бӕззӕм. Мах афтӕ нӕ нымайӕм, ӕмӕ нӕм нӕхи цавӕрдӕр курдиат ис. Нӕ! Цы нӕм ис, уый Хуыцауӕй лӕвӕрд у.

⁶Хуыцау махӕн радта Йӕ Ног Фидыды кусджыты арӕхстдзинад. Уыцы ног фидыдмӕ гӕсгӕ Хуыцау ныр фыст ӕгъдау нал дӕтты, фӕлӕ хай кӕны Йӕ Удӕй. Уымӕн ӕмӕ фыст ӕгъдау маргӕ кӕны, Уд та цард дӕтты.

⁷Йӕ бындур къӕйдуртыл фыст дамгъӕтӕ кӕмӕн уыдысты, кӕд уыцы мӕлӕтхӕссӕг куыст афтӕ намысджын уыд, ӕмӕ рӕстӕгмӕ тӕмӕнтӕ чи калдта, Моисейы уыцы цӕсгоммӕ кӕсын Израилы адӕм нӕ фӕрӕзтой,

⁸уӕд Уды фӕрцы кусын та бирӕ намысджындӕр нӕу, ӕви?

⁹Ӕгъдауӕн лӕггадӕй тӕрхойнаг фӕуӕн уыдис, ӕмӕ кӕд уый скадджын ис, уӕд цас кадджындӕр хъуамӕ уа, адӕймаджы цы куыст раст кӕны, уый!

¹⁰Кӕддӕр кадджын цы уыди, уый ныр кадджын нал у, уымӕн ӕмӕ фӕци ноджы кадджындӕры аууон.

¹¹Кӕрон кӕмӕн хъуамӕ ӕрцыдаид, кӕд уый намысджын уыд, уӕд, кӕрон кӕмӕн не ’рцӕудзӕн, уый та цас ӕмӕ цас намысджындӕр у!

¹²Махмӕ ис ахӕм ныфс ӕмӕ архайӕм ӕргом, ӕдӕрсгӕ;

¹³нӕ фӕзмӕм Моисейы — уый ӕмбӕрзта йӕ цӕсгом, рӕстӕгмӕ цы у, уымӕн йӕ кӕрон Израилы адӕм куыд нӕ уыной, афтӕ.

¹⁴Нырма дӕр сӕ зонд куырм у. Рагон Фӕдзӕхст куы фӕкӕсынц, уӕд ыл уыцы ӕмбӕрзӕн тыгъд у, уымӕн ӕмӕ йӕ Чырысти хъуамӕ сиса.

¹⁵Абон дӕр ма, Моисейы Ӕгъдау кӕсгӕйӕ, ӕмбӕрзӕн тыгъд у сӕ зӕрдӕтыл.

¹⁶Фӕлӕ, Бардарӕгмӕ куы ӕрцӕуынц, уӕд уыцы ӕмбӕрзӕн айстӕуы.

¹⁷Бардарӕг у Уд, ӕмӕ, Бардарӕджы Уд кӕм ис, сӕрибар дӕр уым ис.

¹⁸Мах не ’ппӕт дӕр гом цӕсгомимӕ кӕсӕм Бардарӕджы кадмӕ, уыцы кад зыны махыл дӕр ӕмӕ нӕ кӕны Бардарӕджы хуызӕн — уый аразы Бардарӕг, Уый та у Уд.