Read Хуыцауы Дзырд иронау 2 Коринфӕгтӕм 9 Bible Online

2 Коринфӕгтӕм 9 - Хуыцауы Дзырд иронау bible

2 Коринфӕгтӕм 9

¹Ӕниу, сыгъдӕджытӕн ӕххуысы тыххӕй сымахмӕ мӕн фыссын дӕр нӕ хъӕуы.

²Уымӕн ӕмӕ уӕ зӕрдиагӕй баххуыс кӕнын кӕй фӕнды, уый мӕнӕн зындгонд у, ӕмӕ мӕхицӕй ӕппӕлын македойнӕгтӕн, Ахайы уырнджытӕ суанг ивгъуыд азӕй нырмӕ ӕххуысмӕ цӕттӕ сты, зӕгъгӕ. Ӕмӕ, сымах ӕнувыд кӕй стут, уый бирӕты сразӕнгард кодта.

³Ӕфсымӕрты та ӕз уый тыххӕй ӕрвитын, цӕмӕй уӕ кӕй раппӕлыдтӕн, уый дзӕгъӕлы ма фӕуа — ӕз сымахӕй куыд дзырдтон, афтӕ цӕттӕ уат.

⁴Мемӕ македойнӕгтӕ куы ӕрцӕуой, уӕд уӕ ӕдзӕттӕйӕ ма ӕрӕййафой; тынг ныфсджын уӕ кӕй уыдыстӕм, — ам уӕ кой кӕнын уӕвгӕ дӕр нал хъӕуы, — уый махӕн худинаг куыд нӕ расайа.

⁵Уымӕ гӕсгӕ ӕз бакӕнинагыл банымадтон ӕфсымӕртӕм ӕрхатын, цӕмӕй уӕм ацӕуой нӕ разӕй ӕмӕ рагацау ӕрцӕттӕ кӕной, раздӕр ныфс кӕмӕй бавӕрдтат, уӕ уыцы зӕрдиаг ӕххуыс. Ӕмӕ уӕд уыдзӕн ӕнӕбары раттынау нӕ, фӕлӕ ӕцӕг зӕрдиаг ӕххуыс.

⁶Уӕ зӕрдыл дарут: чъынды тауӕгӕн йӕ хор дӕр мӕгуырау уыдзӕни, рӕдауӕй чи тауы, уымӕн та йӕ хор тугыл аскъуыйдзӕн.

⁷Йӕ цӕст цас уарзы, алчидӕр уый бӕрц хъуамӕ ратта ӕнӕхъынцъымӕй ӕмӕ барвӕндонӕй, уымӕн ӕмӕ, зӕрдӕрухсӕй чи дӕтты, Хуыцау уыцы адӕймаджы уарзы.

⁸Хуыцауӕн та Йӕ бон у сымах алы хорзӕхӕй дӕр схъӕздыг кӕнын; уӕд уӕм ӕдзух алцыдӕр уыдзӕни, цас уӕ хъӕуы, уый бӕрц, ӕмӕ ма уӕлдайджынтӕй фаг уыдзӕн алы хорз хъуыддагӕн дӕр.

⁹Сыгъдӕг Фыст дӕр афтӕ зӕгъы: «Рӕдауӕй радта, байуӕрста мӕгуыртӕн; йӕ рӕстад цӕрдзӕни мыггагмӕ».

¹⁰Тауӕгӕн мыггаг Чи дӕтты, хӕрынӕн та — хойраг, Уый уын ратдзӕн мыггаг, ӕрзайын кӕндзӕн ӕмӕ сбирӕ кӕндзӕн уӕ рӕстады тыллӕг.

¹¹Алцӕмӕй дӕр афтӕ схъӕздыг уыдзыстут, ӕмӕ уӕ бон уыдзӕни кӕддӕриддӕр рӕдауӕй баххуыс кӕнын. Уӕд бирӕтӕ арфӕ кӕндзысты Хуыцауӕн, нӕ къухӕй кӕй айсой, уӕ уыцы ӕххуысы тыххӕй.

¹²Уымӕн ӕмӕ сыгъдӕджытӕн сӕ хъуӕгты баххуыс кӕнынӕй уӕлдай уӕ уыцы лӕггад расайдзӕн бирӕ арфӕтӕ Хуыцауӕн.

¹³Уӕ лӕггадӕй уӕхи куы равдисат, уӕд сыгъдӕджытӕ стаудзысты Хуыцауы, уымӕн ӕмӕ сымах коммӕгӕс стут, уӕ зӕрдӕмӕ кӕй айстат, Чырыстийы уыцы Фарны Уацӕн, ӕмӕ рӕдауӕй ӕххуыс кӕнут уыдонӕн дӕр ӕмӕ алкӕмӕн дӕр.

¹⁴Куы-иу кувой, уӕд сӕ зӕрдӕтӕ тырндзысты сымахмӕ, уымӕн ӕмӕ уӕ Хуыцау схайджын кодта Йӕ ӕгӕрон хорзӕхӕй.

¹⁵Хуыцауӕй бузныг, ахӕм диссаджы хорзӕх нын балӕвар кодта, ӕмӕ йын зӕгъӕн дӕр нӕй!