Read Хуыцауы Дзырд иронау Нуны фырт Йешуа 21 Bible Online

Нуны фырт Йешуа 21 - Хуыцауы Дзырд иронау bible

Нуны фырт Йешуа 21

¹Левитты мыггӕгты хистӕртӕ бацыдысты сауджын Елеазармӕ, Нуны фырт Йешуамӕ ӕмӕ Израилы мыггӕгты хистӕртӕм —

²уый уыди Ханааны зӕххыл, Силомы сахары, — ӕмӕ сын загътой: «Дунедарӕг йӕ заманы Моисейӕн бафӕдзӕхста, цӕмӕй нын лӕвӕрд ӕрцӕуа цӕрӕн сахартӕ, сахарты алывӕрсты та — нӕ фосӕн сӕрвӕттӕ».

³Ӕмӕ Дунедарӕджы фӕдзӕхстмӕ гӕсгӕ израилӕгтӕ сӕ зӕххы хӕйттӕй левиттӕн рауӕлдай кодтой сахартӕ сӕ алыварс сӕрвӕттимӕ.

⁴Кехаты мыггагӕн хал сӕппӕрстой ӕмӕ халмӕ гӕсгӕ сауджын Аароны байзӕддӕгтӕм, левиттӕм, Иудӕ, Симеон ӕмӕ Бениамины хӕдзарвӕндӕгтӕй ӕрхауди ӕртындӕс сахары.

⁵Кехаты иннӕ байзӕддӕгтӕм, левиттӕм, Ефрем ӕмӕ Даны хӕдзарвӕндӕгты, стӕй Менассиайы хӕдзарвӕндаджы ӕмбисы мыггӕгтӕй халмӕ гӕсгӕ ӕрхауди дӕс сахары.

⁶Гершоны байзӕддӕгтӕм — левиттӕм, Иссахары, Асиры ӕмӕ Неффалимы хӕдзарвӕндӕгты, стӕй Менассиайы хӕдзарвӕндаджы ӕмбисы мыггӕгтӕй халмӕ гӕсгӕ Башаны ӕрхауди ӕртындӕс сахары.

⁷Мерарийы байзӕддӕгтӕм, левиттӕм, сӕ мыггӕгтӕм гӕсгӕ, Рувимы, Гады ӕмӕ Зевулоны хӕдзарвӕндӕгтӕй ӕрхауди дыууадӕс сахары.

⁸Ацы сахартӕ израилӕгтӕ сӕ алыварс сӕрвӕттимӕ левиттӕн радтой халмӕ гӕсгӕ, Дунедарӕг Моисейӕн куыд бафӕдзӕхста, афтӕ.

⁹Мӕнӕ, Иудӕ ӕмӕ Симеоны хӕдзарвӕндӕгтӕй левиттӕм цы сахартӕ ӕрхауд, уыдон.

¹⁰Лӕвӕрд ӕрцыдысты Аароны фӕстагӕттӕн — Кегъаты байзӕддӕгтӕн, левиттӕн, уымӕн ӕмӕ фыццаг уыдоны хал схаудта.

¹¹Радтой сын Анакы фыд Арбайы сахар — Кирйат-Арба (ома Хеврон), Иудӕйы хохыл, ӕмӕ сахарӕн йӕ алыварс сӕрвӕттӕ.

¹²Ӕцӕг, ацы сахары алыварс быдыртӕ ӕмӕ хъӕутӕ исбонӕн радтой Иефоннейы фырт Калевӕн.

¹³Сауджын Аароны байзӕддӕгтӕн радтой ӕмбӕхсӕн сахар Хеврон йӕ алыварс сӕрвӕттимӕ, стӕй Ливнӕйы сахар йӕ алыварс сӕрвӕттимӕ;

¹⁴Йатир йӕ алыварс сӕрвӕттимӕ, Ештемоа йӕ алыварс сӕрвӕттимӕ,

¹⁵Холон йӕ алыварс сӕрвӕттимӕ, Девир йӕ алыварс сӕрвӕттимӕ,

¹⁶Аин йӕ алыварс сӕрвӕттимӕ, Ютта йӕ алыварс сӕрвӕттимӕ, Бет-Шемеш йӕ алыварс сӕрвӕттимӕ: фараст сахары ацы дыууӕ хӕдзарвӕндагӕй.

¹⁷Бениамины хӕдзарвӕндагӕй: Гивон йӕ алыварс сӕрвӕттимӕ, Гевӕ йӕ алыварс сӕрвӕттимӕ,

¹⁸Анатот йӕ алыварс сӕрвӕттимӕ, Алмон йӕ алыварс сӕрвӕттимӕ: цыппар сахары.

¹⁹Аароны байзӕддӕгтӕм, сауджынтӕм, ӕдӕппӕтӕй ӕрхауди ӕртындӕс сахары сӕ алыварс сӕрвӕттимӕ.

²⁰Кехаты байзӕддӕгтӕм, левитты иннӕ хӕдзарвӕндӕгтӕм, халмӕ гӕсгӕ сахартӕ ӕрхауди Ефремы хӕдзарвӕндагӕй.

²¹Ефремы хохыл сын радтой ӕмбӕхсӕн сахар Шехем йӕ алыварс сӕрвӕттимӕ, стӕй Гезер йӕ алыварс сӕрвӕттимӕ;

²²Кивцаим йӕ алыварс сӕрвӕттимӕ, Бет-Хорон йӕ алыварс сӕрвӕттимӕ: цыппар сахары.

²³Даны хӕдзарвӕндагӕй сын радтой Елтехъе йӕ алыварс сӕрвӕттимӕ, Гиббетон йӕ алыварс сӕрвӕттимӕ,

²⁴Айалон йӕ алыварс сӕрвӕттимӕ, Гат-Риммон йӕ алыварс сӕрвӕттимӕ: цыппар сахары.

²⁵Менассиайы хӕдзарвӕндаджы ӕмбисӕй сын радтой Таанах йӕ алыварс сӕрвӕттимӕ, Гат-Риммон йӕ алыварс сӕрвӕттимӕ: дыууӕ сахары.

²⁶Кехаты байзӕддӕгтӕм — левитты иннӕ мыггӕгтӕм, ӕдӕппӕтӕй ӕрхауди дӕс сахары сӕ алыварс сӕрвӕттимӕ.

²⁷Гершоны байзӕддӕгтӕн, левитты мыггӕгтӕн, радтой: Менассиайы хӕдзарвӕндаджы ӕмбисӕй — ӕмбӕхсӕн сахар Голан йӕ алыварс сӕрвӕттимӕ Башаны, стӕй Беештерайы йӕ алыварс сӕрвӕттимӕ: дыууӕ сахары.

²⁸Иссахары хӕдзарвӕндагӕй — Кишион йӕ алыварс сӕрвӕттимӕ, Даверат йӕ алыварс сӕрвӕттимӕ,

²⁹Йармут йӕ алыварс сӕрвӕттимӕ, Ен-Ганним йӕ алыварс сӕрвӕттимӕ: цыппар сахары.

³⁰Асиры хӕдзарвӕндагӕй — Мишал йӕ алыварс сӕрвӕттимӕ, Авдон йӕ алыварс сӕрвӕттимӕ,

³¹Хелкат йӕ алыварс сӕрвӕттимӕ, Рехов йӕ алыварс сӕрвӕттимӕ: цыппар сахары.

³²Неффалимы хӕдзарвӕндагӕй — ӕмбӕхсӕн сахар Кедеш йӕ алыварс сӕрвӕттимӕ Галилейы, Хаммот-Дор йӕ алыварс сӕрвӕттимӕ, Картан йӕ алыварс сӕрвӕттимӕ: ӕртӕ сахары.

³³Афтӕмӕй Гершоны байзӕддӕгтӕм, левитты мыггӕгтӕм, ӕдӕппӕт ӕрхауди ӕртындӕс сахары сӕ алыварс сӕрвӕттимӕ.

³⁴Мерарийы байзӕддӕгтӕн, левитты иннӕ мыггӕгтӕн, радтой: Зевулоны хӕдзарвӕндагӕй — Йокнеам йӕ алыварс сӕрвӕттимӕ, Карта йӕ алыварс сӕрвӕттимӕ,

³⁵Димна йӕ алыварс сӕрвӕттимӕ, Нахалал йӕ алыварс сӕрвӕттимӕ: цыппар сахары.

³⁶Рувимы хӕдзарвӕндагӕй — ӕмбӕхсӕн сахар Бецер йӕ алыварс сӕрвӕттимӕ, Йахац йӕ алыварс сӕрвӕттимӕ,

³⁷Кедемот йӕ алыварс сӕрвӕттимӕ, Мефаат йӕ алыварс сӕрвӕттимӕ: цыппар сахары.

³⁸Гады хӕдзарвӕндагӕй — ӕмбӕхсӕн сахар Рамот йӕ алыварс сӕрвӕттимӕ Галаады, стӕй Маханаим йӕ алыварс сӕрвӕттимӕ;

³⁹Хешбон йӕ алыварс сӕрвӕттимӕ, Йазер йӕ алыварс сӕрвӕттимӕ: ӕдӕппӕтӕй цыппар сахары.

⁴⁰Мерарийы байзӕддӕгтӕм — левитты мыггӕгтӕм, халӕппӕрстӕй ӕдӕппӕт ӕрхауди дыууадӕс сахары.

⁴¹Израилӕгты зӕххыты ӕхсӕн левиттӕн ӕдӕппӕт уыди аст ӕмӕ дыууиссӕдз сахары сӕ алыварс сӕрвӕттимӕ.

⁴²Уыцы сахартимӕ сын лӕвӕрд цыдысты сӕ алыварс сӕрвӕттӕ дӕр.

⁴³Ӕмӕ афтӕмӕй Дунедарӕг Израилы адӕмӕн радта, сӕ фыдӕлтӕн сын ард кӕмӕй бахордта, уыцы зӕххытӕ иууылдӕр, ӕмӕ сӕ фыдӕй-фыртмӕйы исбонӕн райстой ӕмӕ дзы ӕрцардысты.

⁴⁴Дунедарӕг сын удӕнцой цард радта алырдыгӕй дӕр, сӕ фыдӕлтӕн ард куыд бахордта, афтӕ. Сӕ фыдгултӕй иунӕджы бон дӕр сӕ ныхмӕ фӕлӕууын нӕ бацис. Иууылдӕр сын сӕ Дунедарӕг радта сӕ къухтӕм.

⁴⁵Дунедарӕг Израилы хӕдзарӕн цӕмӕйдӕриддӕр зӕрдӕ бавӕрдта, уыдонӕй иу дӕр ӕнӕ сӕххӕстгӕнгӕ нӕ баззад — алцыдӕр дзы сӕххӕст.